អង្គការសង្គមស៊ីវិលនានាក្នុងខេត្តពោធិ៍សាត់ បានចាត់ទុកទំនាស់នេះថា បានកើតឡើងដោយសារតែក្រុមហ៊ុនសម្បទានដីសេដ្ឋកិច្ចភាពីម៉ិច មិនគោរពបទបញ្ជារបស់លោកនាយករដ្ឋមន្ត្រី។
ប្រជាពលរដ្ឋ ១០គ្រួសារ នៅចំណុចដំណាក់ព្រីង ស្ថិតក្នុងភូមិក្រឡាញ់ ឃុំក្បាលត្រាច បានប្រតិកម្មតវ៉ាចំពោះមេការជនជាតិចិន នៅការដ្ឋានលេខ៧.១ ថាបានប្រើអំណាចរំលោភយកដីធ្លីពួកគាត់។
បុរសអ្នកភូមិឈ្មោះ មឿង ផូ អាយុ ៤៤ឆ្នាំ ជាប្រជាពលរដ្ឋនៅភូមិក្រឡាញ់ ឃុំក្បាលត្រាច ស្រុកក្រគរ ខេត្តពោធិ៍សាត់។ គាត់បានឲ្យដឹងនៅព្រឹកថ្ងៃទី២២ មីនា ថា មេការជនជាតិចិន នៅការដ្ឋានលេខ៧.១ បានប្រើអំពើហិង្សាដឹកនាំកម្លាំងមករុះរើរបង និងខ្ទមចាំចម្ការរបស់គាត់ ព្រមទាំងបានគំរាមមិនឲ្យគាត់តវ៉ាអ្វីទាំងអស់។
បុរសអ្នកភូមិរូបនេះក៏បានឲ្យដឹងដែរថា ដីចម្ការរបស់គាត់ប្រមាណ ៣ហិកតារនេះ ត្រូវបានក្រុមនិស្សិតវាស់វែងឲ្យហើយ បន្ទាប់ពីទទួលបានប័ណ្ណកម្មសិទ្ធិ គាត់ក៏ធ្វើរបង និងត្រៀមធ្វើការដាំដុះ៖ «សំណូមពរឲ្យអាជ្ញាធរដោះស្រាយដីរបស់ខ្ញុំណា៎! អ៊ំ គេមកដករបងដករោងរបស់ខ្ញុំដឹកយកទៅការដ្ឋានគេអស់ហើយ។ ខ្ញុំមានប្លង់កាន់កាប់ត្រឹមត្រូវហើយ ទើបខ្ញុំទៅធ្វើរោងនោះ»។
អ្នកភូមិម្នាក់ទៀតឈ្មោះ សេង នេត បន្ថែមថា គាត់ក៏ត្រូវបានមេការចិន របស់ក្រុមហ៊ុនភាពីម៉ិច នាំកម្មករមកដករបង និងរុះខ្ទមរបស់គាត់ ដឹកយកទៅការដ្ឋានដែរ។ គាត់ថា រដូវដាំដុះបានចូលមកដល់ តែប្រជាពលរដ្ឋកំពុងរងការរំលោភបំពានពីក្រុមហ៊ុនមិនចេះចប់។ ចំណែកអាជ្ញាធរហាក់មិនអើពើការពារប្រជាពលរដ្ឋទេ៖ «ខ្ញុំចង់សំណូមពរឲ្យអាជ្ញាធរដែនដីដោះស្រាយឲ្យខ្ញុំឆាប់ៗណា៎! អ៊ំ។ គេមកបំផ្លាញរោងខ្ញុំអស់អ៊ីចឹងម៉េចកើត។ ឥឡូវដល់ខែដាំដុះហើយ ខ្ញុំចង់ឲ្យអាជ្ញាធរដោះស្រាយឲ្យខ្ញុំឲ្យលឿន ព្រោះខ្លាចហួសរដូវដាំដុះ។ ខ្ញុំមិនដឹងថា ហេតុអីបានជាគេធ្វើអ៊ីចឹង ព្រោះដីខ្ញុំរដ្ឋចេញប្លង់ឲ្យខ្ញុំហើយតើ»។
ប្រភពពីអាជ្ញាធរភូមិម្នាក់ដែលសុំមិនបញ្ចេញឈ្មោះ បានឲ្យដឹងថា ប្រជាពលរដ្ឋទាំង ១០គ្រួសារនេះ មានទំហំប្រមាណ ៣០ហិកតារ និងទើបតែទទួលបានប័ណ្ណកម្មសិទ្ធិនាពេលថ្មីៗនេះ។ បន្ទាប់ពីបានប័ណ្ណកម្មសិទ្ធិ ពួកគាត់ក៏ចាប់ផ្ដើមធ្វើរបងព្រំដី និងធ្វើការដាំដុះ តែមេការចិន របស់ក្រុមហ៊ុនភាពីម៉ិច បានរារាំង។ មន្ត្រីអាជ្ញាធរភូមិរូបនេះបន្តថា ក្នុងខេត្តពោធិ៍សាត់ ក្រុមហ៊ុនភាពីម៉ិច មានអំណាចខ្លាំងណាស់ អាជ្ញាធរដែនដីភូមិ ឃុំ គ្មាននរណាហ៊ានបៀតទេ ទាល់តែថ្នាក់ខេត្តទើបអាចនិយាយជាមួយគេបាន ព្រោះមានអភិបាលរងខេត្តម្នាក់ជាអ្នកចេញមុខការពារឲ្យក្រុមហ៊ុននេះ។
មេឃុំក្បាលត្រាច មិនព្រមឆ្លើយសំណួររបស់អ្នកយកព័ត៌មានវិទ្យុអាស៊ីសេរី ទេ នៅរសៀលថ្ងៃទី២២ មីនា ចំណែកអភិបាលស្រុកក្រគរ គឺលោក ទឹម សារិន បានឆ្លើយយ៉ាងខ្លីថា អាជ្ញាធរស្រុកកំពុងដោះស្រាយបញ្ហានេះហើយ៖ «អាជ្ញាធរកំពុងដោះស្រាយឲ្យហើយ»។
ទាក់ទិនចំពោះបញ្ហានេះ មន្ត្រីសម្របសម្រួល អង្គការសិទ្ធិមនុស្សលីកាដូ (Licadho) ប្រចាំខេត្តពោធិ៍សាត់ លោក អេង ឈុនហាន ជំរុញឲ្យប្រជាពលរដ្ឋដាក់បណ្ដឹងទៅតុលាការ៖ «ដីនេះគាត់មានកម្មសិទ្ធិស្របច្បាប់។ ចិន ធ្វើនេះគឺរំលោភច្បាប់ហើយ។ យើងនឹងជួយធ្វើអន្តរាគមន៍ដោយធ្វើពាក្យបណ្ដឹងជូនគាត់ ប្រសិនបើគាត់ចង់ប្ដឹងពីបទបំផ្លិចបំផ្លាញទ្រព្យសម្បត្តិរបស់ប្រជាពលរដ្ឋដោយចេតនា»។
លោក អេង ឈុនហាន បន្តថា ក្រុមហ៊ុនភាពីម៉ិច ដែលមានជនជាតិចិន ជាតំណាងនៅក្នុងខេត្តនេះ ត្រូវតែគោរពច្បាប់នៃព្រះរាជាណាចក្រកម្ពុជា ជាពិសេសគឺបទបញ្ជាលេខ០១ របស់ប្រមុខរាជរដ្ឋាភិបាល៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។