នៅឯភូមិដាច់ស្រយាលមួយក្នុងស្រុកភ្នំក្រវាញ ខេត្តពោធិ៍សាត់ មានក្រុមហ៊ុនសម្បទានដីសេដ្ឋកិច្ចមួយឈ្មោះក្រុមហ៊ុន តូច ហ៊ាវ បាននាំកម្លាំងសមត្ថកិច្ចចម្រុះរបស់ខេត្តទៅឃាត់ឃាំងមិនឲ្យអ្នកភូមិបង្កបង្កើនផលលើដីដែលធ្លាប់មានទំនាស់ជាមួយក្រុមហ៊ុននោះទេ បើទោះបីជាអ្នកភូមិទទួលបានប័ណ្ណសម្គាល់ម្ចាស់អចលនវត្ថុ ឬហៅថាប្លង់កម្មសិទ្ធិរួចហើយក្ដី។
អង្គការសង្គមស៊ីវិលនានាក្នុងខេត្ត បានកត់សម្គាល់ថា ក្រុមហ៊ុនសម្បទានដីសេដ្ឋកិច្ច និងអាជ្ញាធរខ្លះក្នុងខេត្តនេះ ហាក់មិនគាំទ្រគោលនយោបាយចាស់សកម្មភាពថ្មីរបស់ប្រមុខរដ្ឋាភិបាលឡើយ។
បុរសអ្នកភូមិឈ្មោះ លុយ ម៉េង អាយុ ៣៦ឆ្នាំ មានលំនៅភូមិជ្រៃក្រឹម បានឲ្យដឹងនៅព្រឹកថ្ងៃទី១២ ខែមេសា ថា កម្លាំងចម្រុះមកពីស្រុកភ្នំក្រវាញ ជាង ១០នាក់ ដែលក្នុងនោះមានប៉េអិម និងប៉ូលិសស្រុក រួមទាំងសង្កាត់រដ្ឋបាលព្រៃឈើសំរោង និងកូនប្រុសរបស់លោកប្រធានក្រុមហ៊ុន តូច ហ៊ាវ បានមកហាមឃាត់ប្រជាពលរដ្ឋដែលមានប័ណ្ណកម្មសិទ្ធិរួចហើយនោះ មិនឲ្យភ្ជួររាស់បង្កបង្កើនផលឡើយ ដោយអះអាងថា ជាដីរបស់ក្រុមហ៊ុន។ កម្លាំងសមត្ថកិច្ចចម្រុះបានព្រមានថា ប្រសិនបើប្រជាពលរដ្ឋហ៊ានបន្តការឈូសឆាយដីនោះ គេនឹងចាប់យកត្រាក់ទ័រ។
បុរសអ្នកភូមិរូបនេះបន្តថា ប័ណ្ណកម្មសិទ្ធិនេះលោក ស៊ុយ សែម ទើបតែចែកឲ្យក្នុងពេលថ្មីៗនេះ តែគេបែរជាមិនទទួលស្គាល់៖ «បាទ! ចេះតែខ្លាចណា៎បង យើងប្រជាពលរដ្ឋមានប្លង់ត្រឹមត្រូវ អ៊ីចឹងហើយគេនៅតែមិនឲ្យធ្វើទៀត។ ម្សិលមិញ ខ្ញុំបានយកប្លង់នេះទៅសួរអាជ្ញាធរ ភូមិ ឃុំ ថាបើខ្ញុំមានប្លង់អីត្រឹមត្រូវហើយ មិនឲ្យខ្ញុំធ្វើ តើឲ្យខ្ញុំធ្វើម៉េចទៀត? ម្សិលមិញហ្នឹង គេបានដកយកម៉ាស៊ីនអារឈើដែលខ្ញុំទុកអារគល់ឈើដែលនៅសល់ ព្រមទាំងដកកាំបិតកកុករបស់ខ្ញុំទៀត...»។
ទាក់ទិនចំពោះបញ្ហានេះ អាជ្ញាធរដែនដីភូមិ ឃុំ និងស្រុក បានអះអាងដូចៗគ្នាថា កម្លាំងចម្រុះដែលចុះទៅធ្វើសកម្មភាពហាមឃាត់ពលរដ្ឋនេះ គឺជាកម្លាំងរបស់សាលាខេត្ត ហើយមិនពាក់ព័ន្ធជាមួយ ភូមិ ឃុំ និងស្រុក នោះទេ។
អភិបាលស្រុកភ្នំក្រវាញ លោក ទូច សំបូរ បានជំរុញឲ្យវិទ្យុអាស៊ីសេរី សួរបញ្ហានេះទៅថ្នាក់ខេត្ត ព្រោះពុំមានអ្វីពាក់ព័ន្ធនឹងអាជ្ញាធរស្រុកទេ៖ «ការងារនេះ គឺក្រុមចម្រុះរបស់ខេត្ត អ៊ីចឹងគឺរឿងនេះទាក់ទងជាមួយខេត្ត អត់ទាក់ទងនឹងខាងស្រុកទេ។ ខ្ញុំគ្រាន់តែផ្ដល់កម្លាំងតាមសំណូមពររបស់ខេត្តប៉ុណ្ណោះ...»។
ប្រធានក្រុមហ៊ុន គឺលោក តូច ហ៊ាវ ក៏បានបដិសេធថា បញ្ហានេះពុំមានពាក់ព័ន្ធជាមួយក្រុមហ៊ុនលោកទេ។ លោកថា នេះជារឿងរបស់អាជ្ញាធរខេត្ត៖ «ខ្ញុំមិនបានទៅឃាត់ប្រជាពលរដ្ឋណាទេ។ អ្នកណាមានប្លង់ ឬអត់ប្លង់អី ខ្ញុំអត់ដឹងទេ ព្រោះតាំងពីខាងរដ្ឋាភិបាល ចុះមកវាស់វែងដីឲ្យប្រជាពលរដ្ឋមកនោះ ប្រជាពលរដ្ឋទាំងនោះលែងមកទាក់ទងតវ៉ាអីជាមួយក្រុមហ៊ុនខ្ញុំហើយ...»។
វិទ្យុអាស៊ីសេរី ពុំទាន់អាចទាក់ទងអភិបាលរងខេត្ត ទទួលបន្ទុកដីធ្លីនៅតំបន់ស្រុកភ្នំក្រវាញ គឺលោក កែម សុធឿន ដើម្បីសុំការបំភ្លឺចំពោះបញ្ហានេះបាននៅឡើយទេ នៅថ្ងៃសុក្រ ទី១២ មេសា។
មន្ត្រីអង្គការសង្គមស៊ីវិលនានាក្នុងខេត្ត បានកត់សម្គាល់ថា ក្រុមហ៊ុនសម្បទានដីសេដ្ឋកិច្ច និងអាជ្ញាធរខ្លះក្នុងខេត្តនេះ ហាក់មិនគាំទ្រគោលនយោបាយចាស់សកម្មភាពថ្មីរបស់ប្រមុខរដ្ឋាភិបាលឡើយ។
នៅក្នុងខេត្តពោធិ៍សាត់ កន្លងទៅ មានការដកនិស្សិតដែលវាស់វែងដីឲ្យប្រជាពលរដ្ឋតាមគោលការណ៍របស់លោកនាយករដ្ឋមន្ត្រីចេញ។ ម្យ៉ាង នៅពេលដែលប្រជាពលរដ្ឋទទួលបានប្លង់កម្មសិទ្ធិស្របច្បាប់ហើយក៏ដោយ ក៏ក្រុមហ៊ុននៅតែរារាំងមិនឲ្យប្រជាពលរដ្ឋបង្កបង្កើនផលលើដីនោះដដែល។ ចំណែកអាជ្ញាធរក៏មិនឃើញជួយដោះស្រាយបញ្ហានេះឡើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។