អាជ្ញាធរខេត្តពោធិ៍សាត់ និងអង្គការក្រៅរដ្ឋាភិបាល កំណត់ថ្ងៃចុះស៊ើបអង្កេត និងដោះស្រាយរឿងដីធ្លីរបស់ប្រជាពលរដ្ឋរស់នៅភូមិសង្គមថ្មី ឃុំថ្មដា ចំនួន ២៣គ្រួសារ។ ប៉ុន្តែពលរដ្ឋមានជម្លោះដីធ្លីជាមួយមន្ត្រីបរិស្ថាន និងក្រុមហ៊ុន អឹម.ឌី.អេស (MDS) របស់លោកឧកញ៉ា ទ្រី ភាព ហាក់មិនសូវមានជំនឿច្រើនចំពោះវិធានការដោះស្រាយនាពេលនេះឡើយ។
សាលាខេត្តពោធិ៍សាត់ ចេញសេចក្ដីប្រកាសព័ត៌មានមួយនៅថ្ងៃទី៣ ខែធ្នូ ឆ្នាំ២០១៤ បង្ហាញពីលទ្ធផលនៃកិច្ចពិភាក្សារវាងអាជ្ញាធរ និងមន្ត្រីសង្គមស៊ីវិល ជុំវិញជម្លោះដីធ្លីរបស់អ្នកភូមិសង្គមថ្មី។ កិច្ចពិភាក្សា បានសម្រេចរកកន្លែងជូនពលរដ្ឋស្នាក់នៅបណ្ដោះអាសន្ននៅវត្តថ្មដា ឃុំថ្មដា បង្កើតក្រុមការងារចម្រុះរវាងអាជ្ញាធរ និងអង្គការសង្គមស៊ីវិល ចុះស្រង់ស្ថិតិ និងធ្វើបច្ចុប្បន្នភាពដល់ទីតាំងដីមានជម្លោះនៅថ្ងៃទី៨ ខែធ្នូ ឆ្នាំ២០១៤។ ក្រោយពីចុះស្រង់ស្ថិតិ និងធ្វើបច្ចុប្បន្នភាពបានហើយ ក្រុមការងារនឹងជួបពិភាក្សាគ្នាជាថ្មីទៀត ដើម្បីកំណត់លក្ខណៈវិនិច្ឆ័យ និងសិក្សារកទីតាំងដីជូនប្រជាពលរដ្ឋ។
អភិបាលរងខេត្តពោធិ៍សាត់ និងជាអ្នកនាំពាក្យ លោក កើត ឆែ មានប្រសាសន៍ថា ក្រុមការងារនឹងចុះប្រមូលព័ត៌មាន និងចង់ដឹងបំណងជាក់លាក់របស់ពលរដ្ឋ ហើយក្រុមការងារនេះពុំមានសមាសភាពចេញពីតំណាងក្រុមហ៊ុន អឹម.ឌី.អេស ឡើយ ពីព្រោះពលរដ្ឋទាំងនោះរស់នៅប៉ះពាល់តែលើដីរបស់ក្រសួងបរិស្ថាន ដែលការពារដោយព្រះរាជ្យក្រឹត្យ។ លោកបន្តថា អាជ្ញាធរនឹងប្រើគោលការណ៍សន្ដោស និងមនុស្សធម៌ចំពោះពលរដ្ឋ ប៉ុន្តែបើតាមច្បាប់ ពួកគាត់ត្រូវទទួលទោសរឿងកាប់រុករានដីព្រៃរបស់រដ្ឋ ហើយគាត់មិនអាចទៅចង្អុលបង្ហាញយកទីតាំងដីដែលកាប់រានខុសច្បាប់នោះវិញបានទេ៖ «ខ្ញុំទៅស្រង់ទិន្នន័យដែលទាក់ទងនឹងព័ត៌មាន ដើម្បីធ្វើសម្បទានសង្គមកិច្ចជូនគាត់។ យើងចង់ជួយប្រជាពលរដ្ឋ មិនចង់ជំរុញឲ្យប្រជាពលរដ្ឋខុសច្បាប់ទេ បើនាំគាត់ទៅចង្អុលបង្ហាញឡើងវិញ គឺគាត់ខុសច្បាប់ហើយ»។
មន្ត្រីសម្របសម្រួលអង្គការសិទ្ធិមនុស្សលីកាដូ (Licadho) ប្រចាំខេត្តពោធិ៍សាត់ លោក អេង ឈុនហាន ថ្លែងថា នេះគឺជាចំណុចវិជ្ជមានមួយដែលអាជ្ញាធរសហការជាមួយសង្គមស៊ីវិល ដើម្បីចុះស្រង់ព័ត៌មានលម្អិតក្នុងករណីដីធ្លីនេះ ប៉ុន្តែក្រុមការងារគួរបើកទូលាយក្នុងការពិភាក្សា ឬឲ្យពលរដ្ឋមានឱកាសបង្ហាញរាល់ឯកសារ និងទៅចង្អុលបង្ហាញដល់ទីតាំងដីដែលពួកគាត់ធ្លាប់រស់នៅ ទើបប្រសើរ៖ «យើងគិតថាវាជាចំណុចវិជ្ជមានមួយ បើយើងនៅខេត្តពោធិ៍សាត់ នេះ យើងមិនធ្លាប់ជួបព្រឹត្តិការណ៍ដែលខាងអាជ្ញាធរទៅជួបពិភាក្សាដូច្នេះទេ ហើយយើងរង់ចាំមើលការអនុវត្ដការងារបន្តបន្ទាប់ទៀត»។
តំណាងពលរដ្ឋម្នាក់ អ្នកស្រី វ៉ាន់ ស្រីមុំ ឲ្យដឹងថា អ្នកស្រី និងពលរដ្ឋចំនួន ៩គ្រួសារក្នុងចំណោម ២៣គ្រួសារដែលមានរឿងដីធ្លី កំពុងស្នាក់នៅក្នុងវត្តប្រមោយ ស្រុកវាលវែង បណ្ដោះអាសន្ន ដើម្បីរង់ចាំដំណោះស្រាយពីអាជ្ញាធរ។ អ្នកស្រីថា អាជ្ញាធរតែងតែនិយាយមួលបង្កាច់បំផ្លើសការពិតលើរឿងដីធ្លីរបស់ពួកគាត់។ តាមការពិត ប្រជាពលរដ្ឋមានបង្កាន់ដៃកាន់កាប់ដីធ្លីទទួលស្គាល់ដោយអាជ្ញាធរភូមិឃុំ និងភូមិបាលស្រុកតាំងពីឆ្នាំ១៩៩៩ តែបែរជាអាជ្ញាធរចោទពួកគាត់ថារស់នៅលើដីរដ្ឋ នៅក្រោយពេលដែលក្រុមហ៊ុន អឹម.ឌី.អេស ចូលមកអភិវឌ្ឍនៅតំបន់ថ្មដា៖ «រស់នៅលើដីរបស់ខ្លួនឯងមិនបានផង ទៅទទួលដីសង្គមកិច្ចសុទ្ធតែដីគេហ្នឹងលោកពូ។ ខ្ញុំចង់បានតែដីរបស់ពួកខ្ញុំទេ»។
កាលពីថ្ងៃទី២២ ខែវិច្ឆិកា ឆ្នាំ២០១៤ អាជ្ញាធរបានដាក់កម្លាំងចម្រុះរាប់រយនាក់ចុះរុះរើផ្ទះសម្បែង និងខ្ទមពលរដ្ឋនៅចំណុចអូរដើមគ នៃភូមិសង្គមថ្មី ឃុំថ្មដា ចំនួន ១២ខ្នង ដោយចោទថា ពលរដ្ឋទាំងនោះរស់នៅលើដីរបស់រដ្ឋ។ ក្រោយមកនៅថ្ងៃទី១ ខែធ្នូ ឆ្នាំ២០១៤ ក្រុមពលរដ្ឋនាំគ្នាតវ៉ាដោយដើរថ្មើរជើងពីទីរួមខេត្តពោធិ៍សាត់ ឆ្ពោះទៅរាជធានីភ្នំពេញ ក្នុងគោលបំណងសុំអន្តរាគមន៍ពីលោកនាយករដ្ឋមន្ត្រី ហ៊ុន សែន និងតំណាងរាស្ត្រ ប៉ុន្តែដើរបានជិត ១០គីឡូម៉ែត្រ ត្រូវអាជ្ញាធរចេញមកសម្របសម្រួល និងប្រាប់ពលរដ្ឋរង់ចាំការដោះស្រាយពីសំណាក់អាជ្ញាធរមានសមត្ថកិច្ចក្នុងខេត្តសិន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។