ពលរដ្ឋចោទអាជ្ញាធរថាមិនដោះស្រាយរឿងជនជាតិវៀតណាមធ្វើរបងលើដីផ្លូវ
2017.02.26
របងស័ង្កសីរបស់ជនជាតិវៀតណាម ឈ្មោះ ខាំ ប៊ុនម៉េង ហៅម៉ឺន ជាប់នឹងផ្លូវឋិតនៅភូមិព្រែក សង្កាត់ស្ទឹងត្រែង ក្រុងស្ទឹងត្រែង ខែត្រស្ទឹងត្រែង នៅថ្ងៃទី២៦ ខែកុម្ភៈ ឆ្នាំ២០១៧។ RFA/Men Sothyr
RFA/Men Sothyr
អាជ្ញាធរខែត្រស្ទឹងត្រែង រងការចោទពីពលរដ្ឋថាមិនអើពើដោះស្រាយបញ្ហាប្រឈមរបស់ពួកគាត់ និងរុញច្រានការដោះស្រាយករណីជម្លោះដីធ្លីដាក់គ្នាទៅវិញទៅមក។ កាលពីឆ្នាំ២០១៥ អាជ្ញាធរសង្កាត់ស្ទឹងត្រែង សម្រេចអភិវឌ្ឍផ្លូវប៉ះចំដីអ្នកភូមិមួយគ្រួសារ ដោយពង្វាងរោងកែច្នៃសិប្បកម្មឈើប្រណិតរបស់ជនជាតិវៀតណាម នៅក្រុងស្ទឹងត្រែង។ ចំណែកថៅកែសិប្បកម្មឈើប្រណិតជាជនជាតិវៀតណាម បានយកចំណីផ្លូវធ្វើអាជីវកម្មជាប់ផ្លូវច្រើនឆ្នាំមកហើយ ពុំឃើញមានអាជ្ញាធរដោះស្រាយ។
ពលរដ្ឋមួយគ្រួសាររស់នៅក្រុងស្ទឹងត្រែង រិះគន់រដ្ឋបាលខែត្រស្ទឹងត្រែង ថាគ្មានឆន្ទៈដោះស្រាយជម្លោះដីធ្លីរបស់ពលរដ្ឋ ដែលប្ដឹងសុំឲ្យអាជ្ញាធរអន្តរាគមន៍លើចៅសង្កាត់ស្ទឹងត្រែង កសាងផ្លូវលេខ៧៧ ភ្ជាប់ផ្លូវលេខ១៤ ឋិតនៅភូមិព្រែក សង្កាត់ស្ទឹងត្រែង ក្រុងស្ទឹងត្រែង លម្អៀងទៅខាងឈ្មួញបើកសិប្បកម្មកែច្នៃឈើប្រណិតរបស់ជនជាតិវៀតណាម ឈ្មោះ ខាំ ប៊ុនម៉េង ហៅម៉ឺន។
ពលរដ្ឋរស់នៅសង្កាត់ស្រះឫស្សី លោក ភូ ថងសុំ ឲ្យដឹងនៅថ្ងៃទី២៦ កុម្ភៈ ថា ពាក្យបណ្ដឹងរបស់លោកជាង ២ឆ្នាំហើយ ពុំឃើញមានអាជ្ញាធរណាប្រកាន់ជំហរច្បាស់លាស់ដោះស្រាយឲ្យពួកគាត់ឡើយ។ លោកមានដីទំហំ ២៩ x ៤៣ម៉ែត្រ គ្រប់គ្រងតាំងពីឆ្នាំ១៩៩១ ហើយលោកបានសម្បទានជូនរដ្ឋសម្រាប់អភិវឌ្ឍផ្លូវទំហំដីចំនួន ៥ម៉ែត្រ បណ្ដោយ ៤៣ម៉ែត្រ ជាប់ដីវិហារសាសនាគ្រឹះ។ ប៉ុន្តែចៅសង្កាត់ស្ទឹងត្រែង លោក ជា វណ្ណ បានឈូសឆាយដីរហូតដល់ ១០ម៉ែត្រ បណ្ដោយ ៤៣ម៉ែត្រ ដើម្បីពង្វាងរោងសិប្បកម្មកែច្នៃឈើប្រណិតជនជាតិវៀតណាម។ ចំណែកដីវិហារសាសនាគ្រឹះ បានបើកផ្លូវឲ្យអាជ្ញាធរអភិវឌ្ឍចំនួនទទឹង ៥ម៉ែត្រដែរ តែអាជ្ញាធរបែរជាមិនធ្វើទេ ព្រោះខ្លាចបុកចំដីជនជាតិវៀតណាម៖ «អត់មានតម្លាភាព ឧទាហរណ៍ថាផ្លូវយក ១០ម៉ែត្រ ត្រូវម្នាក់ ៥ម៉ែត្រ បើថា ៨ម៉ែត្រ គឺម្នាក់ ៤ម៉ែត្រ ហើយការអភិវឌ្ឍនេះអត់ចូលដីជនជាតិវៀតណាម ទេ គឺយកតែខាងខ្ញុំម្នាក់ ហើយស័ង្កសីនៅជាប់មិនព្រមរើសោះ ហើយយកតែខាងខ្ញុំម្នាក់»។
លោក ភូ ថងសុំ អះអាងថា អាជ្ញាធរខែត្រស្ទឹងត្រែង ហាក់ធ្វើមិនដឹងមិនឮរឿងជនជាតិវៀតណាម ប្រើប្រាស់ដីចំណីផ្លូវសាធារណៈរបស់រដ្ឋធ្វើអាជីវកម្មក្នុងក្រុងស្ទឹងត្រែង ច្រើនឆ្នាំមកហើយ។ បញ្ហានេះ លោកសង្ស័យថាជាចេតនាមិនយកចិត្តទុកដាក់របស់អាជ្ញាធរពាក់ព័ន្ធ ព្រោះខ្លាចក្រែងប៉ះពាល់ប្រយោជន៍ឈ្មួញកែច្នៃឈើប្រណិត ហើយអាចមានភាពមិនប្រក្រតី ឬការសូកប៉ាន់ណាមួយ។
កាលពីឆ្នាំ២០១៥ អាជ្ញាធរសង្កាត់ស្ទឹងត្រែង បានសម្រេចអភិវឌ្ឍផ្លូវមួយខ្សែជាកញ្ចប់ថវិកាសង្កាត់ស្ទឹងត្រែង មានទទឹង ៥ម៉ែត្រ និងបណ្តោយប្រហែលជាង ៥០០ម៉ែត្រ។
អាស៊ីសេរី មិនអាចទាក់ទងអ្នកនាំពាក្យសាលាខែត្រស្ទឹងត្រែង លោក ម៉ែន គុង ដើម្បីសុំការបំភ្លឺបញ្ហានេះបានទេនៅថ្ងៃទី២៦ កុម្ភៈ ព្រោះទូរស័ព្ទហៅចូល តែគ្មានអ្នកទទួល។
ចំណែកអភិបាលក្រុងស្ទឹងត្រែង លោក ប៊ុន ណារី បញ្ជាក់នៅថ្ងៃទី២៦ កុម្ភៈ ថា លោកពុំទាន់ទទួលពាក្យបណ្ដឹងករណីនេះទេ។ លោកថា ប្រសិនបើពាក្យបណ្ដឹងដល់អាជ្ញាធរខែត្រ ហួសពីសមត្ថភាពអាជ្ញាធរក្រុងដោះស្រាយ។ លោកបញ្ជាក់ថា ជនជាតិវៀតណាម យកដីចំណីផ្លូវធ្វើអាជីវកម្ម អាជ្ញាធរនឹងកែលំអទៅមុខទៀត ក៏ប៉ុន្តែលោកពុំបានបញ្ជាក់លម្អិតពីកាលបរិច្ឆេទដោះស្រាយនោះទេ៖ «ការកែសម្រួលយើងនៅតែកែសម្រួល យើងមិនបណ្តោយឲ្យសភាពការណ៍វាទៅចឹងទេ គឺយើងធ្វើតាមដំណាក់កាល បើយើងធ្វើម្តងឲ្យអស់សាច់រឿង គឺមិនអស់ទេ ពីណាក៏ធ្វើមិនចេញដែរ»។
កាលពីឆ្នាំ២០១៦ មន្ត្រីការិយាល័យអន្តរវិស័យនៃសាលាខែត្រស្ទឹងត្រែង បានចុះវាយតម្លៃការអភិវឌ្ឍនៅតំបន់នោះរកឃើញថា អាជ្ញាធរសង្កាត់ស្ទឹងត្រែង អភិវឌ្ឍផ្លូវ និងដោះស្រាយបញ្ហាប្រឈមធ្វើឡើងពុំមានតម្លាភាព។
មន្ត្រីសម្របសម្រួលសមាគមអាដហុក (ADHOC) ខែត្រស្ទឹងត្រែង លោក ហូ សំអុល ដែលបានចុះអង្កេតរឿងនេះរកឃើញថា សមាគមអាដហុក បានឃើញរបងសិប្បកម្មជាប់ផ្លូវពុំមានចំណីផ្លូវ និងប្រព័ន្ធលូបង្ហូរទឹក អាចបង្កផលគ្រោះថ្នាក់ដល់ពលរដ្ឋជាយថាហេតុ។ លោកថា អាជ្ញាធរគួរពន្លឿនដោះស្រាយជាបន្ទាន់ ដើម្បីបង្កលក្ខណៈងាយស្រួលឲ្យពលរដ្ឋធ្វើចរាចរ និងដើម្បីលំអសោភ័ណភាពក្រុងផង៖ «ពលរដ្ឋដាក់ពាក្យប្ដឹងទៅអាជ្ញាធរក្រុងក៏ដោយ ខែត្រក៏ដោយ សង្កាត់ក៏ដោយ យើងតែងតែឃើញមានការយឺតយ៉ាវក្នុងការដោះស្រាយ។ ចឹងវាធ្វើឲ្យប៉ះពាល់ទៅនឹងសេវាសាធារណៈពលរដ្ឋ ហើយវាជាការរាំងស្ទះមួយ»។
មុនឆ្នាំ២០១៥ ផ្លូវនេះត្រូវបានកាត់ផ្តាច់ពាក់កណ្ដាល ដោយឆ្ពោះចូលក្នុងរោងសិប្បកម្មកែច្នៃឈើប្រណិតរបស់ថៅកែជនជាតិវៀតណាម ឈ្មោះ ខាំ ប៊ុនម៉េង ហៅម៉ឺន ដើម្បីដឹកជញ្ជូនឈើប្រណិតចូលរោងនោះ។ ជនជាតិវៀតណាម រូបនោះ ត្រូវបានអ្នកភូមិចោទថា បច្ចុប្បន្នបម្រើការងារជាមន្ត្រីកងរាជអាវុធហត្ថ។
អ្នកនាំពាក្យសមាគមការពារសិទ្ធិមនុស្សអាដហុក (ADHOC) លោក សំ ច័ន្ទគា ពន្យល់ថា ជនបរទេសគ្មានសិទ្ធិកាន់កាប់ដីធ្លីនៅប្រទេសកម្ពុជា ដាច់ខាត ដរាបណាពួកគេពុំទាន់បំពេញបែបបទស្នើសុំសញ្ជាតិតាមច្បាប់ ដែលមានព្រះហស្តលេខាពីព្រះមហាក្សត្រនោះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- វៀតណាមព្រមានថា ព្រែកជីកហ្វូណនតេជោអាចជួយសម្រួលវត្តមានយោធាចិនក្នុងទឹកដីកម្ពុជាកាន់តែជ្រៅ
- ពលរដ្ឋនៅតំបន់បឹងតាមោក ចោទប្រកាន់អាជ្ញាធរខណ្ឌព្រែកព្នៅថា ប្រើអំពើហិង្សា
- អាជ្ញាធរក្រុងភ្នំពេញមិនអនុញ្ញាតឱ្យបក្សកម្លាំងជាតិធ្វើបាតុកម្ម នៅទីលានប្រជាធិបតេយ្យ
- ក្រសួងដែនដីបានហៅអតិថិជនបុរីពិភពថ្មីទៅពិភាក្សា ដើម្បីរកដំណោះស្រាយ
- ពលរដ្ឋខ្មែរ-អូស្ត្រាលីម្នាក់ ដែលរិះគន់រដ្ឋាភិបាលកម្ពុជា រងការវាយដំពីជនមិនស្គាល់មុខមួយក្រុម ពេលទៅលេងស្រុកខ្មែរ
