អ្នកភូមិនៅស្រុករមាសហែក ខេត្តស្វាយរៀង ចោទប្រកាន់អាជ្ញាធរមូលដ្ឋានថា ឃុបឃិតជាមួយក្រុមហ៊ុន សួស សម្បត្តិ រំលោភដីស្រែប្រជាពលរដ្ឋធ្វើជាកម្មសិទ្ធិ ដោយរារាំងមិនឲ្យអ្នកភូមិទៅបង្កបង្កើនផលលើដីមានទំនាស់។ ប៉ុន្តែមេឃុំបញ្ជាក់ថា ក្រុមហ៊ុនពុំបានទៅរំលោភយកដីរបស់ប្រជាពលរដ្ឋដូចការលើកឡើងឡើយ។
អ្នកភូមិដែលមានទំនាស់ដីបង្ហាញថា ដីស្រែរួមទាំងដីព្រៃផងប្រមាណជាង ៧ហិកតាររបស់ប្រជាពលរដ្ឋចំនួន ៥គ្រួសារ ស្ថិតនៅភូមិព្រៃផ្ដៀក ឃុំក្រសាំង ស្រុករមាសហែក ខេត្តស្វាយរៀង មានទំនាស់ជាមួយក្រុមហ៊ុន សួស សម្បត្តិ។ អ្នកភូមិបញ្ជាក់ថា ក្នុងចំណោមប្រជាពលរដ្ឋទាំង ៥គ្រួសារនោះ ពុំមានគ្រួសារណាទៅធ្វើស្រែនៅលើដីដែលមានទំនាស់នោះបានទេ។
អ្នកភូមិម្នាក់ លោក ជិន សាវឿន រស់នៅភូមិព្រៃផ្ដៀក ឃុំក្រសាំង ថ្លែងនៅថ្ងៃទី២៣ មិថុនា ថា ដីស្រែរបស់លោកប្រមាណជិតមួយហិកតារ កាន់កាប់ និងដាំដុះអាស្រ័យនៅលើដីនោះជាង ១០ឆ្នាំមកហើយ ប៉ុន្តែប្រមាណ ២ឆ្នាំចុងក្រោយនេះ លោកពុំអាចទៅបង្កបង្កើនផលនៅលើដីនោះបានដូចពេលមុនទៀតឡើយ។ លោក ជិន សាវឿន មានមតិថា ប្រជាពលរដ្ឋមិនអាចទៅធ្វើស្រែលើដីនោះបាន ដោយសារអាជ្ញាធរបាននាំកម្លាំងទៅរារាំង ហើយបង្ខំឲ្យប្រជាពលរដ្ឋលក់ដីទៅឲ្យក្រុមហ៊ុនក្នុងតម្លៃទាប ក្នុងរូបភាពយកដីនោះទៅអភិវឌ្ឍផ្នែកកសិកម្ម។ លោកបន្តថា ប្រជាពលរដ្ឋទាំងអស់ពុំមាននរណាម្នាក់ចង់លក់ដីទៅឲ្យក្រុមហ៊ុនទេ ប៉ុន្តែត្រូវអាជ្ញាធរគំរាមកំហែង ធ្វើឲ្យអ្នកភូមិមួយចំនួនភ័យខ្លាច ក៏លក់ដីដោយបង្ខំចិត្ត។
លោក ជិន សាវឿន៖ «ក្រុមហ៊ុន សួស សម្បត្តិ ហ្នឹងគាត់ឃុបឃិតជាមួយមេភូមិ និងអនុភូមិក្នុងភូមិព្រៃផ្ដៀក ហ្នឹង ហើយក្នុងឃុំក្រសាំង ទាំងអស់ ក៏មេភូមិ និងអនុភូមិហ្នឹងរំលោភដីហ្នឹងយកទៅលក់ឲ្យក្រុមហ៊ុនដែរ។ ដល់ពេលអ៊ីចឹងទៅ ប្រជាពលរដ្ឋទៅរកអាជ្ញាធរមូលដ្ឋានភូមិឃុំហ្នឹង ដើម្បីឲ្យមកជួបគាត់បែរជាមិនមក មិនឲ្យប្រជាពលរដ្ឋតវ៉ា គាត់ថារឿងនេះមិនបាច់តវ៉ាទេ ព្រោះដីហ្នឹងគ្មាននរណាធ្វើទេ ប៉ុន្តែក្រុមគឺអាចឈូសឆាយពីកន្លងមកច្រើនណាស់ទៅហើយ»។
ឆ្លើយតបនឹងបញ្ហានេះ មេឃុំក្រសាំង លោក សាន់ ទឹម មានប្រសាសន៍បញ្ជាក់ថា ពុំមានដីរបស់ប្រជាពលរដ្ឋ ៥គ្រួសារ ទំនាស់ជាមួយក្រុមហ៊ុន សួស សម្បត្តិ ដូចការលើកឡើងនោះទេ។ ម្យ៉ាងទៀត ក្រុមហ៊ុនក៏ពុំបានឲ្យប្រជាពលរដ្ឋទាំងនោះលក់ដីដោយបង្ខំនោះទេ គឺពួកគាត់ធ្វើឡើងដោយស្ម័គ្រចិត្ត និងមានលិខិតផ្ដិតស្នាមមេដៃត្រឹមត្រូវពីអាជ្ញាធរ។ លោក សាន់ ទឹម គូសបញ្ជាក់ថា ប្រជាពលរដ្ឋដែលតវ៉ារឿងដីនោះ មានទំនាស់ដីធ្លីជាមួយអ្នកភូមិក្បែរខាង បានប្ដឹងផ្ដល់ដណ្ដើមដីគ្នាឡើងតុលាការ ហើយទម្លាក់កំហុសសំអុយមកលើអាជ្ញាធរមូលដ្ឋាន ថាឃុបឃិតចូលដៃជាមួយក្រុមរំលោភអ្នកភូមិ។
លោក សាន់ ទឹម៖ «អូ! គ្មានអាជ្ញាធរណាហ៊ានទៅការពារឲ្យក្រុមហ៊ុនបានទេ ឥឡូវនេះបាទ។ ក្រោយពីលេខ ស.ណ០១ មកហ្នឹង ជាគោលការណ៍ហ្នឹង គ្មានហ៊ានប៉ះពាល់ថាដីហ្នឹងមិនហ៊ានឲ្យប្រជាជនលក់ដូរផង បើដីណាមានបញ្ហានោះ មិនពិតទេលើកហ្នឹង។ អ៊ីចឹងបើរំលោភហ្នឹងប្រជាជនដល់រដ្ឋអំណាច ហើយដល់ភូមិឃុំ ហើយដល់ស្ងាត់ឈឹងអ៊ីចឹង ថារំលោភដូចគ្មានទេ»។
មន្ត្រីសម្របសម្រួលអង្គការលីកាដូ (Licadho) ប្រចាំខេត្តស្វាយរៀង លោក នុត ប៊ូពិណារ័ត្ន កត់សម្គាល់ថា ទំនាស់ដីធ្លីរវាងប្រជាពលរដ្ឋ និងក្រុមហ៊ុននានានៅស្រុករមាសហែក តែងតែកើតមានជាហូរហែ ជាពិសេសទំនាស់ដីធ្លីនៅឃុំក្រសាំង តែម្ដង។ លោកថា ទំនាស់ដីធ្លីនោះភាគច្រើនអាជ្ញាធរតែងតែឆ្លើយអូសបន្លាយពេល ថាយ៉ាងនេះយ៉ាងនោះ ដោយខ្វះការទទួលខុសត្រូវរកដំណោះស្រាយឲ្យប្រជាពលរដ្ឋ៖ «អ៊ីចឹងមើលឃើញសកម្មភាពរបស់អាជ្ញាធរកន្លងមក គឺពាក់ព័ន្ធរឿងដីឲ្យតែរឿងដីព្រៃក៏ដោយ ដីរបស់ពលរដ្ឋក៏ដោយ ឲ្យតែមានទំនាស់ គាត់ហាក់បីដូចជាឆ្លើយយកតែម៉ារួចខ្លួនម៉ាខ្លួន។ គាត់ថាផុតពីដៃគាត់ គាត់អត់មានលទ្ធភាពក្នុងការស្រាយ គឺយើងធ្វើអន្តរាគមន៍គាត់ គឺអត់បានទេ រហូតដល់ពេលខ្លះ រឿងខ្លះមកដល់ខេត្តៗគេថាផុតដៃគេទៀត គឺជាសមត្ថកិច្ចរបស់គណៈកម្មការថ្នាក់លើទៀត»។
អ្នកភូមិទំនាស់ដីធ្លីឲ្យដឹងថា កន្លងមកអាជ្ញាធរពុំបានរកដំណោះស្រាយរឿងទំនាស់ដីសមស្របឲ្យប្រជាពលរដ្ឋ ដោយសារខ្លួនមាននិន្នាការនយោបាយគាំទ្រគណបក្សប្រឆាំង៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។