ប្រជាពលរដ្ឋប្រមាណជា ១០០នាក់ នៅឃុំជាំក្រវៀន ស្រុកមេមត់ នាំគ្នាមកសាលាខេត្តត្បូងឃ្មុំ នៅថ្ងៃទី៥ សីហា ដើម្បីស្វែងរកកិច្ចអន្តរាគមន៍បញ្ហាជម្លោះដីធ្លីរបស់ពួកគាត់ជាមួយក្រុមហ៊ុន ម៉ែន សារុន។
ប្រជាពលរដ្ឋស្នើសុំឱ្យអាជ្ញាធរ ធ្វើការដោះស្រាយបញ្ហាដីធ្លីនោះឱ្យបានឆាប់រហ័ស ពីព្រោះជារដូវដាំដំណាំ ហើយក្រុមហ៊ុននៅតែឈូសឆាយ ប្រសិនអាជ្ញាធរមិនមានការដោះស្រាយឱ្យបានសមស្របនោះទេ វានឹងធ្វើឱ្យពួកគាត់ពិបាកមិនខានឡើយ។
ប្រជាពលរដ្ឋនាំគ្នាឡើងមកដាក់ពាក្យប្ដឹងនៅសាលាខេត្តត្បូងឃ្មុំ នៅថ្ងៃទី៥ សីហា បន្ទាប់ពីកិច្ចប្រជុំពិភាក្សានៅសាលាស្រុកមេមត់ ជាមួយតំណាងប្រជាពលរដ្ឋ តំណាងក្រុមហ៊ុន និងអាជ្ញាធរ កាលពីថ្ងៃទី៤ សីហា មិនមានលទ្ធផលអ្វីសោះឡើយសម្រាប់ពួកគាត់។
ប្រជាពលរដ្ឋម្នាក់រស់នៅឃុំជាំក្រវៀន ស្រុកមេមត់ លោក ផុន សុផល ឱ្យដឹងថា ការប្រជុំពិភាក្សាគ្នានៅសាលាស្រុកកន្លងមក មិនមានអ្វីក្រៅពីប្រាប់ប្រជាពលរដ្ឋទាំងនោះឱ្យជួលដីពីក្រុមហ៊ុន ប៉ុន្តែពួកគាត់មិនព្រមឡើយ ដោយអះអាងថា ពួកគាត់បានកាប់រុករានស្អាត និងដាំដំណាំនៅលើដីនោះជាច្រើនឆ្នាំមកហើយ។
លោកបន្តថា គោលបំណងដែលប្រជាពលរដ្ឋឡើងមកសាលាខេត្ត គឺសង្ឃឹមថា អាជ្ញាធរខេត្តនឹងមានដំណោះស្រាយជូនពួកគាត់ប្រសើរជាងនៅថ្នាក់ស្រុក ហើយបើគ្មានការឆ្លើយតបទៀត ពួកគាត់មានតែឡើងទៅភ្នំពេញតែប៉ុណ្ណោះ៖ «ខាងក្រុមហ៊ុនគេបដិសេធថាមិនអាចធ្វើបានទេ ប៉ុន្តែបើអាចធ្វើបាននោះ គឺគ្រាន់តែបង្អាក់ការចុះឈូសឆាយលើដំណាំប្រជាពលរដ្ឋ ប៉ុន្តែគេនៅតែឈូសឆាយនៅកន្លែងណាដែលអត់មានដំណាំប្រជាពលរដ្ឋ គេកាយក្រវាត់កន្លែងណាអត់មានដំណាំប្រជាពលរដ្ឋ។ ហើយគេកន្លែងណាដំណាំប្រជាពលរដ្ឋគេទុកសិន។ ហើយបើសិនប្រជាពលរដ្ឋណាចង់ធ្វើកិច្ចសន្យាជាជួលដីក្រុមហ៊ុន គេទៅជាមួយគេទៅ។ ប៉ុន្តែប្រជាពលរដ្ឋនៅតែមិនព្រមទទួលកិច្ចសន្យាហើយនៅតែតស៊ូតទៅទៀត»។
ប្រភពដដែលបន្តថា ពួកគាត់ចង់ឱ្យអាជ្ញាធរពាក់ព័ន្ធ ចុះត្រួតពិនិត្យលើបញ្ហានេះឱ្យបានច្បាស់លាស់ ហើយបញ្ជាក់ឱ្យច្បាស់រវាងដីប្រជាពលរដ្ឋ និងដីក្រុមហ៊ុន និងបញ្ឈប់នូវការឈូសឆាយ រួមនឹងការរំលោភបំពានណាមួយពីខាងក្រុមហ៊ុនតទៅទៀត។ លោកបញ្ជាក់ថា ទំនាស់ដីធ្លីរវាងប្រជាពលរដ្ឋជាមួយក្រុមហ៊ុន ម៉ែន សារុន នៅឃុំជាំក្រវៀន គឺកើតឡើងតាំងពីខែកុម្ភៈ ឆ្នាំ២០១៤ បន្ទាប់ពីក្រុមហ៊ុនដាក់គ្រឿងចក្រឈូសឆាយដីព័ទ្ធជារបងនៅលើផ្ទៃដីប្រមាណជាង ៣០០ហិកតារ ដែលមានពលរដ្ឋប្រមាណ ១៥០គ្រួសារ បានអាស្រ័យផល។
បញ្ហានេះ តំណាងក្រុមហ៊ុន ម៉ែន សារុន លោក សុខ វាសនា បញ្ជាក់ថា ការដោះស្រាយនៅសាលាស្រុកនោះ គឺខាងអាជ្ញាធរបានពន្យល់ណែនាំដល់ប្រជាពលរដ្ឋទាំងនោះតាមលក្ខណៈច្បាប់ ពីព្រោះការកាន់កាប់ដីរបស់ប្រជាពលរដ្ឋពេលនេះ គឺជារឿងខុសទៅនឹងផ្លូវច្បាប់។ លើសពីនេះទៀត ខាងក្រុមហ៊ុនមិនបានរំលោភបំពានលើដីប្រជាពលរដ្ឋនោះឡើយ ពីព្រោះខាងក្រុមហ៊ុនមានឯកសារគ្រប់គ្រាន់ជុំវិញបញ្ហានេះ៖ «ខ្ញុំបាននិយាយៗហើយថា ស្រុកគាត់បានដឹងរឿងទាំងអស់តាំងពីឯកសារផលប៉ះពាល់ រឿងដំណោះស្រាយអី គាត់មានរហូត។ រឿងក្រុមហ៊ុនមិនដែលធ្វើអ្វីរំលោភទៅលើអីគាត់ផងហ្នឹង ធ្វើតាមនីតិវិធីដូចថា មានបញ្ហាអីស្រុកអញ្ជើញមក អ៊ីចឹងខាងក្រុមហ៊ុនមកអ៊ីចឹងមករហូត»។
លោកបន្ថែមថា ខាងក្រុមហ៊ុននៅតែព្យាយាមសម្របសម្រួលជាមួយប្រជាពលរដ្ឋទាំងនោះទៅតាមផ្លូវច្បាប់ និងព្យាយាមឱ្យអាជ្ញាធរពន្យល់ពួកគាត់ឱ្យយល់តាមនីតិវិធីលើបញ្ហានេះដែរ។
នាយករដ្ឋបាលខេត្តត្បូងឃ្មុំ លោក ពាង ណារិទ្ធ មានប្រសាសន៍នៅរសៀលថ្ងៃទី៥ សីហា ថា ខាងលោកបានទទួលពាក្យបណ្ដឹងរបស់ប្រជាពលរដ្ឋទាំងនោះហើយ ប៉ុន្តែការដោះស្រាយយ៉ាងណានោះ ខាងខេត្តមិនទាន់កំណត់នៅឡើយទេ៖ «អើខ្ញុំមិនទាន់ថាម៉េចទេ ព្រោះអានេះខ្ញុំគ្រាន់តែទទួលពាក្យហ្នឹង ហើយខ្ញុំនឹងរាយការណ៍ជូនថ្នាក់ដឹកនាំខេត្ត អំពីរឿងប្រជាពលរដ្ឋបានយកពាក្យបណ្ដឹងមកដាក់ ហើយភារកិច្ចខ្ញុំមានតែប៉ុណ្ណឹងទេបាទ»។
មន្ត្រីសម្របសម្រួលនៃសមាគមការពារសិទ្ធិមនុស្សអាដហុក (ADHOC) ប្រចាំខេត្តកំពង់ចាម លោក នាង សុវ៉ាត យល់ថា បញ្ហានេះគប្បីអាជ្ញាធរចុះស្រាវជ្រាវលើកិច្ចសន្យារបស់រដ្ឋាភិបាលជាមួយក្រុមហ៊ុន ពីព្រោះការកាន់កាប់ដីរបស់ប្រជាពលរដ្ឋនៅលើដីដែលភាគីក្រុមហ៊ុនអះអាងថា ជាដីរបស់ខ្លួននោះ វាមិនមែនជាកំហុសរបស់ប្រជាពលរដ្ឋឡើយ ប៉ុន្តែវាជាកំហុសរបស់ក្រុមហ៊ុនទៅវិញទេ ដែលមិនបានធ្វើតាមកិច្ចសន្យាវិនិយោគពីរដ្ឋ។ លោកបញ្ជាក់ថា កិច្ចសន្យារបស់រដ្ឋាភិបាលក្នុងការផ្តល់ដីសម្បទានទៅក្រុមហ៊ុន គឺក្នុងអំឡុងពេលមួយឆ្នាំក្រោយ ប្រសិនក្រុមហ៊ុនមិនបានធ្វើអ្វីនោះទេ រដ្ឋមានសិទ្ធិដកយកដីនោះមករក្សាទុកវិញ ឬក៏ធ្វើសម្បទានសង្គមកិច្ចឱ្យទៅពលរដ្ឋតែម្តង៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។