តំណាងពលរដ្ឋ ៥នាក់នៅឃុំត្រមូង ស្រុកមេមត់ ខេត្តត្បូងឃ្មុំ ជួបចរចាជាមួយអាជ្ញាធរខេត្ត ដើម្បីសុំឲ្យមានការដោះស្រាយបញ្ហាដីធ្លីរបស់ពួកគាត់ជាមួយក្រុមហ៊ុនចម្ការកៅស៊ូមេមត់ នៅព្រឹកថ្ងៃទី១៤ វិច្ឆិកា។
ពលរដ្ឋជាង ១០០នាក់ នាំគ្នាទៅខាងមុខសាលាស្រុកមេមត់ ដោយបារម្ភពីការចាប់ខ្លួនតំណាងរបស់ពួកគាត់ទាំង ៥នាក់ ដែលចូលចរចា។ ពលរដ្ឋទាមទារអោយអាជ្ញាធរ សម្រេចផ្តល់កម្មសិទ្ធិដីធ្លីអោយពួកគាត់។ យ៉ាងណា អាជ្ញាធរថាកំពុងពិនិត្យលើបញ្ហានេះ ហើយនឹងពិភាក្សាបន្តទៀតនៅសប្ដាហ៍ក្រោយ។
ពលរដ្ឋហាក់មានជំនឿថា បញ្ហាដីធ្លីរបស់ពួកគាត់ នឹងអាចដោះស្រាយបាននៅពេលខាងមុខ បើទោះបីជាលទ្ធផលនៃការពិភាក្សា ដើម្បីរកដំណោះស្រាយនៅមិនទាន់បានលទ្ធផលជាដុំកំភួននៅឡើយ។
តំណាងពលរដ្ឋម្នាក់ដែលចូលចរចា គឺអ្នកស្រី អ៊ុន ស៊ូចេង មានប្រសាសន៍ថា ការពិភាក្សាគ្នានោះ បានត្រឹមតែស្តាប់ការស្នើសុំរបស់អាជ្ញាធរខេត្តទៅខាងតំណាងក្រុមហ៊ុន ឲ្យផ្តល់លទ្ធភាពជូនពលរដ្ឋអាចជួសជុលផ្ទះសម្បែងរបស់ខ្លួនបាន។ ប៉ុន្តែសំណើនេះ មិនទាន់មានការយល់ព្រមពីខាងក្រុមហ៊ុននៅឡើយ។ អ្នកស្រីយល់ថា ការពន្យារពេលទៅសប្ដាហ៍ក្រោយនោះ ដើម្បីឈានទៅរកចំណុចរួមមួយ៖ «ពួកខ្ញុំនៅតែមានសង្ឃឹម ព្រោះយើងឃើញថា ប្រមុខរដ្ឋាភិបាលលោកមិនធ្វើឲ្យប្រជាពលរដ្ឋអស់សង្ឃឹមក្នុងបញ្ហាកម្មសិទ្ធិដីធ្លីទេ។ ពួកខ្ញុំនៅតែមានសង្ឃឹមជានិច្ច គ្រាន់តែដំណោះស្រាយនេះមិនទាន់ចេញជាផ្លែផ្កានៅឡើយ»។
តំណាង ៥នាក់ ចូលពិភាក្សានៅក្នុងសាលាស្រុកមេមត់ ជាមួយអាជ្ញាធរ។ ចំណែកខាងក្រៅបន្ទប់ និងក្រៅរបងសាលាស្រុកវិញ មានប្រជាពលរដ្ឋជាង ១០០នាក់ ខ្លះអង្គុយខ្លះឈរនៅរង់ចាំលទ្ធភាពនៃកិច្ចចរចា។
ពលរដ្ឋម្នាក់នៅឃុំត្រមូង អ្នកស្រី សំ សុខា និយាយថា អ្នកស្រីមកស្តាប់លទ្ធផលទៅតាមការសន្យារបស់អាជ្ញាធរកាលពីកន្លងទៅ ថានឹងជូនដំណឹងដល់ពួកគាត់។ អ្នកស្រីថា ប្រសិនបើនៅតែគ្មានដំណោះស្រាយ ពលរដ្ឋទាំងអស់នឹងឡើងទៅរកស្ថាប័នជាតិធំៗ ដើម្បីឲ្យជួយដោះស្រាយរឿងចេញប្លង់កម្មសិទ្ធិជូនពួកគាត់បន្តទៀត៖ «ទៅវិញ ហើយការដោះស្រាយមិនចេញទេ អាហ្នឹងយើងចាំនិយាយគ្នាគិតធ្វើអ្វីម្តងទៀតណាស់! ទៅលើទៅអីទៀតទៅ ក្រែងសុំឲ្យសម្ដេចនាយកហ្នឹងគាត់ជួយដោះស្រាយឲ្យប្រជាពលរដ្ឋទាំងអស់ កុំឲ្យនៅពិបាកវេទនាមិនបានរកស៊ីអីម៉ាថ្ងៃៗចា៎!»។
បន្ថែមពីលើប្រសាសន៍របស់ អ្នកស្រី សំ សុខា ពលរដ្ឋម្នាក់ទៀត លោក រត្ន ពិសី ឲ្យដឹងដែរថា លោកមកសាលាស្រុក ពីព្រោះតែខ្លាចក្រែងមានការចាប់តំណាងរបស់ពួកគាត់ពីសំណាក់អាជ្ញាធរដូចនៅភ្នំពេញ ឬនៅតំបន់ផ្សេងទៀត។ លោកបារម្ភថា ប្រសិនបើរាជរដ្ឋាភិបាលមិនដោះស្រាយបញ្ហានេះជូនពួកគាត់ទេ ហើយដីដែលពលរដ្ឋទាមទារបានទៅលើក្រុមហ៊ុន នោះពួកគាត់នឹងមិនមានអ្វីជាទីពឹងឡើយ។
ទាក់ទងបញ្ហានេះ អភិបាលរងខេត្តត្បូងឃ្មុំ ទទួលបន្ទុកដីធ្លី លោក ហាក់ សុខមករា មានប្រសាសន៍ថា តំណាងក្រុមហ៊ុនដែលចូលរួមគ្រាន់តែជាអ្នកពាំនាំនូវសំណើក្នុងកិច្ចប្រជុំ ទៅប្រាប់ថ្នាក់ដឹកនាំរបស់ខ្លួន ហើយយល់ព្រមយ៉ាងណានោះ នឹងសម្រេចនៅសប្ដាហ៍ក្រោយ។ យ៉ាងណា លោកថា អាជ្ញាធរថ្នាក់ខេត្ត គឺជាអ្នកសម្របសម្រួលគ្មានសិទ្ធិសម្រេចទេ គ្រាន់តែពិនិត្យមើលបញ្ហា ហើយរាយការណ៍ទៅថ្នាក់លើតែប៉ុណ្ណោះ៖ «ឥឡូវយើងកំពុងពិភាក្សាគ្នា ដើម្បីចាប់ផ្តើមរកចំណុចនិយាយគ្នា។ យើងអត់ទាន់ថាតើជ្រើសរើសយកចំណុចណាមួយទេ។ ការទាមទាររបស់បងប្អូន ប្រជាពលរដ្ឋនៅតែជាការទាមទារដដែល។ ប៉ុន្តែយើងនឹងពិភាក្សាជាមួយគាត់បន្តទៀត បន្តិចម្តងៗរកដំណោះស្រាយអ្វីដែលជាគន្លឹះដ៏ល្អសម្រាប់ទាំងប្រជាពលរដ្ឋ និងទាំងក្រុមហ៊ុន»។
កន្លងមក ប្រជាពលរដ្ឋនៅភូមិខ្នងក្រពើលិច និងខ្នងក្រពើកើត ក្នុងឃុំត្រមូង បានផ្ញើលិខិតអន្តរាគមន៍ទៅស្ថាប័នរដ្ឋសភា និងព្រឹទ្ធសភា ដោយស្នើសុំឲ្យរាជរដ្ឋាភិបាលដោះស្រាយរឿងចេញប័ណ្ណកម្មសិទ្ធិកាន់កាប់ដីស្របច្បាប់របស់ពលរដ្ឋ ៥២៤គ្រួសារ លើទំហំដីជាង ២០ហិកតារ។ ក្រោយមកនៅថ្ងៃទី៥ និងទី៨ សីហា លិខិតពីរដាច់ដោយឡែកពីគ្នា គឺលិខិតរបស់រដ្ឋសភា និងលិខិតរបស់ព្រឹទ្ធសភា ផ្ញើជូនអភិបាលខេត្តត្បូងឃ្មុំ ដើម្បីឲ្យពិនិត្យ និងជួយដោះស្រាយ។
យ៉ាងណាក៏ដោយ លោក ហាក់ សុខមករា ថា អាជ្ញាធរខេត្តកំពុងតែខិតខំធ្វើការងារនេះ ហើយបានលទ្ធផលយ៉ាងណានោះ នឹងរាយការណ៍ត្រឡប់ទៅតាមអ្វីដែលកំណត់ក្នុងលិខិតទាំងពីរនោះ។
មន្ត្រីសម្របសម្រួលសមាគមការពារសិទ្ធិមនុស្សអាដហុក (ADHOC) លោក នាង សុវ៉ាត ធ្លាប់មានប្រសាសន៍ថា បញ្ហាដីធ្លីនេះ គឺអាជ្ញាធរខេត្ត និងស្រុក ពិបាកដោះស្រាយណាស់ ពីព្រោះអ្នកមកយកដីពលរដ្ឋ គឺមានអំណាចធំជាងអាជ្ញាធរទាំងនោះ។ ដូចនេះ លោកថាមានតែលោកនាយករដ្ឋមន្ត្រីទេ ដែលអាចសម្រេចលើរឿងនេះបាន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។