ស្របពេលដែលគណបក្សនយោបាយនានាកំពុងតែមមាញឹកឃោសនារកសំឡេងគាំទ្រពីប្រជាពលរដ្ឋ បញ្ហាវិវាទដីធ្លីក៏ចាត់ទុកជាបញ្ហាក្ដៅមិនចាញ់ការឃោសនារកសំឡេងឆ្នោតរបស់គណបក្សនយោបាយដែរ។ ដោយឡែកនៅថ្ងៃទី៤ កក្កដា ឆ្នាំ២០១៣ ពលរដ្ឋនៅក្នុងសហគមន៍ថ្មគោល បានចូលរួមប្រជុំរកដំណោះស្រាយវិវាទដីធ្លីជាមួយអាជ្ញាធរនៅអាកាសយានដ្ឋានអន្តរជាតិភ្នំពេញ។
តើនៅក្នុងកិច្ចប្រជុំនោះនឹងទទួលបានលទ្ធផលយ៉ាងណាដែរ?
នៅក្នុងកិច្ចប្រជុំនោះបានពិភាក្សាផ្ដោតទៅលើចំណុចសំខាន់ៗរួមមាន ទី១ ពលរដ្ឋស្នើសុំឲ្យមានការដោះស្រាយដោយតម្លាភាព និងផ្ដល់សំណងទៅតាមទីផ្សារសេរី។ ទី២ តំណាងប្រជាពលរដ្ឋទាមទារឲ្យពន្លឿនការដោះស្រាយបញ្ហារបស់ពួកគាត់ឲ្យបានឆាប់។ ពោល គឺឲ្យទទួលបានជាផ្លែផ្កាឲ្យបានមុនការបោះឆ្នោតសភាតំណាងរាស្ត្រនីតិកាលទី៥។
តំណាងអ្នកភូមិសហគមន៍ថ្មគោល គឺអ្នកស្រី ច្រាយ នីម បានថ្លែងក្នុងអង្គប្រជុំនៅថ្ងៃទី៤ កក្កដា ដោយអ្នកស្រីបានលើកសំណើទៅអាជ្ញាធរនូវលក្ខខណ្ឌចំនួន២ រួមមាន ទី១ សុំបន្តរស់នៅកន្លែងដើម និងមានផ្ដល់ប័ណ្ណកម្មសិទ្ធិស្របច្បាប់ផង។ និងទី២ បើមានការដោះដូរ ក៏សុំឲ្យនៅក្បែរកន្លែងចាស់ និងផ្ដល់ប័ណ្ណកម្មសិទ្ធិស្របច្បាប់ដូចគ្នា។
ឆ្លើយតបទៅនឹងបញ្ហានេះ ប្រធាននាយកដ្ឋានអាកាសយានដ្ឋានអន្តរជាតិភ្នំពេញ លោក ប៊ុន រដ្ឋា ថ្លែងនៅក្នុងអង្គប្រជុំថា ការសម្រេចចិត្តឲ្យពលរដ្ឋដែលរស់នៅជុំវិញព្រលានយន្តហោះអន្តរជាតិភ្នំពេញ ចាកចេញពីលំនៅឋានរបស់ពួកគាត់ ដើម្បីរក្សាស្ថិរភាព សន្តិសុខសណ្ដាប់ធ្នាប់អាកាសយានដ្ឋានឲ្យស្របតាមស្តង់ដារអន្តរជាតិ។ លោកថា អាជ្ញាធរតែងគិតពីផលប៉ះពាល់របស់ប្រជាពលរដ្ឋជាចម្បង និងសន្យាដោះស្រាយបញ្ហានេះជូនប្រជាពលរដ្ឋឲ្យបានសមស្របបំផុត។
ទាក់ទងនឹងបញ្ហានេះ មន្ត្រីស៊ើបអង្កេតជម្លោះដីធ្លីសមាគមអាដហុក (Adhoc) លោក យី សុខសាន្ត ថ្លែងថា ការដោះស្រាយរបស់អាជ្ញាធរហាក់មានភាពយឺតយ៉ាវ ហើយប្រសិនបើអាជ្ញាធរមិនបានបង្កើតឲ្យមានអ្នកទទួលខុសត្រូវច្បាស់នោះ លោកថា បញ្ហានេះអាចនឹងអូសបន្លាយយូរអង្វែងទៅមុខទៀតជាក់ជាមិនខាន។
កិច្ចប្រជុំដោះស្រាយវិវាទដីធ្លីនេះ ប្រព្រឹត្តទៅនៅព្រលានយន្តហោះអន្តរជាតិភ្នំពេញ ដោយមានការចូលរួមពីប្រធានអាកាសចរអន្តរជាតិភ្នំពេញ និងមន្ត្រីអាកាសចរអន្តរជាតិភ្នំពេញមួយចំនួន ព្រមទាំងអង្គការសង្គមស៊ីវិល និងតំណាងសហគមន៍អ្នកភូមិថ្មគោល។ ក្រោយកិច្ចប្រជុំចំណាយរយៈពេលជាង ២ម៉ោងមកនោះ ភាគីអាជ្ញាធរសន្យាដោះស្រាយបញ្ហានេះ ដើម្បីឲ្យសមស្របតាមសំណើរបស់ប្រជាពលរដ្ឋ និងនាំបញ្ហាដាក់ជូនគណៈកម្មការដោះស្រាយដីធ្លីនៃនាយកដ្ឋានអាកាសចរណ៍ស៊ីវិលអន្តរជាតិកម្ពុជា ដើម្បីដោះស្រាយឲ្យបានឆាប់។
ទោះយ៉ាងនេះក្ដី អ្នកភូមិសហគមន៍ថ្មគោលភ្នំពេញ នៅតែមានក្ដីកង្វល់លើការរកដំណោះស្រាយរបស់អាជ្ញាធរនៅឡើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។