អ្នកតវ៉ារឿងដីធ្លីជិត ១០០នាក់ មានអ្នកបឹងកក់ អតីតអ្នកបឹងកក់ អ្នកបុរីកីឡា និងអ្នកភូមិឡពាង ប្រមូលផ្តុំគ្នាតវ៉ាមុខទីស្នាក់ការការិយាល័យធនាគារពិភពលោក នៅថ្ងៃទី១៨ កញ្ញា ដើម្បីស្នើឲ្យធនាគារអន្តរជាតិមួយនេះបញ្ឈប់ការផ្ដល់ប្រាក់កម្ចីនានាដល់រដ្ឋាភិបាលកម្ពុជា។
ការតវ៉ានេះ កើតឡើងបន្ទាប់ពីក្រុមអ្នកបឹងកក់ ដឹងថា ធនាគារពិភពលោកគ្រោងនឹងផ្ដល់ថវិកាជាង ២០លានដុល្លារសហរដ្ឋអាមេរិកដល់រដ្ឋាភិបាលកម្ពុជា នៅដំណាច់ឆ្នាំ២០១៤ ទាក់ទងនឹងការផ្ដល់មូលនិធិសម្បទានដីសង្គមកិច្ចដល់ប្រទេសកម្ពុជា។
តំណាងអ្នកបឹងកក់ អ្នកស្រី ទេព វន្នី ថ្លែងថា ធនាគារពិភពលោកមិនគួរបំភ្លេចការសន្យារបស់ខ្លួន ជាមួយនឹងអ្នករងគ្រោះដីធ្លីនៅតំបន់បឹងកក់ ថានឹងជំរុញរដ្ឋាភិបាលឲ្យពន្លឿនការដោះស្រាយដើម្បីបញ្ចប់ជម្លោះដីធ្លីដែលអូសបន្លាយអស់ជាច្រើនឆ្នាំមកហើយ៖ «យើងទៅហ្នឹង គឺគោលបំណងចង់បង្ហាញពីការមិនគាំទ្រ និងមិនពេញចិត្តនៃកិច្ចប្រជុំរបស់ធនាគារពិភពលោកពីថ្ងៃទី៩ ខែ៩ នៅវ៉ាស៊ីនតោន ដែលគាត់មានគម្រោងនឹងផ្ដល់ថវិកាទៅឲ្យរដ្ឋាភិបាលកម្ពុជា ឡើងវិញ នៅអំឡុងពេលដែលប្រជាពលរដ្ឋបឹងកក់ កំពុងរស់នៅ និងចាកចេញរាប់ពាន់គ្រួសារមិនទាន់មានដំណោះស្រាយហ្នឹង គាត់ចង់ឲ្យលុយទៅរដ្ឋាភិបាលវិញ»។
ទាក់ទងនឹងការទាមទារនេះ មន្ត្រីទំនាក់ទំនងនៃធនាគារពិភពលោក លោក ប៊ូ សារឿន ឆ្លើយតបតាមសារអេឡិចត្រូនិកថា ធនាគារពិភពលោកមិនបានយល់ព្រមផ្ដល់ហិរញ្ញវត្ថុថ្មីណាមួយដល់កម្ពុជាទេ ចាប់តាំងពីខែធ្នូ ឆ្នាំ២០១០ មក។ លោកបន្តថា ធនាគារពិភពលោកនៅបន្តផ្ដល់ថវិកាដែលចំណាយដល់គម្រោងទាំងឡាយណាកំពុងអនុវត្តន៍ និងគ្រប់គ្រងដោយដៃគូអភិវឌ្ឍន៍ផ្សេងៗ ក្រោមជំនួយថវិកាទុកចិត្ត។
កាលពីថ្ងៃទី១៦ មិថុនា អ្នកភូមិបឹងកក់ ប្រមាណ ១០០នាក់ បានលើកគ្នាមកតវ៉ានៅមុខទីស្នាក់ការការិយាល័យធនាគារពិភពលោកម្ដងរួចហើយ ដោយថ្កោលទោសស្ថាប័ននេះថា មានបាតដៃប្រឡាក់ឈាមជាមួយរដ្ឋាភិបាលកម្ពុជា ដែលធ្វើឱ្យពួកគាត់រងទុក្ខវេទនា។
ទាក់ទងនឹងរឿងដីធ្លីនៅព្រឹកថ្ងៃដដែលនេះ អ្នកភូមិឡពាង ដែលមានការចូលរួមពីអ្នកបឹងកក់ អតីតអ្នកបឹងកក់ និងបុរីកីឡា សម្រេចនាំគ្នាមកដាក់ញត្តិជូនលោក ហ្សង់ ហ្វ្រង់ស្វ័រ កូតាំង (Jean-François Cautain) អគ្គរដ្ឋទូតសភាពអឺរ៉ុបប្រចាំកម្ពុជា និងលោក អេង ឆៃអ៊ាង ប្រធានគណៈកម្មការទី១ នៃរដ្ឋសភា។ ពួកគាត់ស្នើស្ថាប័នទាំងពីរជួយអន្តរាគមន៍ និងផ្ដល់ដំណោះស្រាយរឿងដីធ្លីដ៏រ៉ាំរ៉ៃរបស់ប្រជាពលរដ្ឋទាំង ៨៣គ្រួសារដែលមានកំពុងមានទំនាស់ជាមួយក្រុមហ៊ុន ខេ.ឌី.ស៊ី (KDC) របស់លោកស្រី ជា ខេង ភរិយាលោក ស៊ុយ សែម ជារដ្ឋមន្ត្រីក្រសួងរ៉ែនិងថាមពល៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។