ពលរដ្ឋមានជម្លោះដីធ្លីមកពី ៣ខេត្ត គឺខេត្តព្រះសីហនុ ស្វាយរៀង និងខេត្តតាកែវ ជាង ២០០នាក់ ប្រមូលផ្តុំគ្នាមុខមន្ទីររដ្ឋសភា សុំអន្តរាគមន៍ពីតំណាងរាស្ត្រទាំងពីរគណបក្ស។ ជាការឆ្លើយតប អ្នកតំណាងរាស្ត្រទាំងពីរគណបក្ស នឹងអន្តរាគមន៍ទៅមន្ត្រីរដ្ឋាភិបាល ហើយសន្យានឹងដោះស្រាយតាមនីតិវិធីក្រោយពីចេញមកទទួលយកញត្តិរបស់ពួកគាត់។
ក្រុមពលរដ្ឋកាន់បដាពាក្យស្លោកបង្ហាញទុក្ខកង្វល់ គឺសរសេរថា បាត់បង់ដីធ្លី គឺបាត់បង់អ្វីទាំងអស់ និងកាន់ញត្តិដាក់ជូនតំណាងរាស្ត្រ ឲ្យជួយអន្តរាគមន៍ដោះស្រាយ ខណៈដែលពួកគាត់កំពុងមានវិវាទជាមួយក្រុមហ៊ុន ដែលទទួលបានដីសម្បទានសេដ្ឋកិច្ចពីរដ្ឋាភិបាល និងអាជ្ញាធរមូលដ្ឋានដែលអូសបន្លាយពេលជាយូរមកហើយនោះ។
តំណាងពលរដ្ឋមកពីតាមខេត្តនីមួយៗ ថ្លែងរៀបរាប់ពីទុក្ខវេទនានៃការបាត់បង់ដី ស្រែកហៅឲ្យតំណាងរាស្ត្រទាំងពីរបក្ស ចេញមកទទួលញត្តិ និងព្រមានមិនបោះឆ្នោតឲ្យ បើមិនចេញមកទទួលញត្តិ។
ពលរដ្ឋមានជម្លោះដីធ្លីជាមួយក្រុមហ៊ុនចិន មកពីខេត្តព្រះសីហនុ លោកស្រី ជុំ សាត ប្រាប់ថា ដីស្រែរបស់លោកស្រីចាប់តាំងពីមានវិវាទ ពួកគាត់គ្មានដីបង្កបង្កើនផលលើដីនោះទេ។ ស្ត្រីមានអាយុ ៨០ឆ្នាំរូបនេះ រំពឹងថា ស្ថាប័នរដ្ឋសភាអាចដោះស្រាយបញ្ហាលោកស្រី និងពលរដ្ឋផ្សេងបាន៖ «ឲ្យរដ្ឋសភាលោកជួយបានប្លង់រឹងមក ពិបាកណាស់ក្នុងជីវិត ចេះតែភ័យក្នុងមិនដឹងទៅរស់នៅទីណាទេ»។
ដំណាលគ្នាដែលក្រុមពលរដ្ឋបានមកដល់រដ្ឋសភា ពលរដ្ឋនៅខេត្តស្វាយរៀង ជាង ២០០នាក់ ត្រូវអាជ្ញាធរស្រុករមាសហែក ឃាត់ឡានមិនឲ្យធ្វើដំណើរមកជួបជុំគ្នានៅមុខរដ្ឋសភា ដើម្បីដាក់ញត្តិនៅរដ្ឋសភាទេ នៅរសៀលថ្ងៃទី២០ កក្កដា ដូចដែលពលរដ្ឋមកពីបីខេត្តទាំងនេះ បានមកដល់មុខរដ្ឋសភាដូចការគ្រោងទុកនោះ។
មិនយូរប៉ុន្មានក្រោយពីក្រុមប្រជាពលរដ្ឋទាំងនោះ បានបំពងសំឡេងស្រែកសុំឲ្យតំណាងរាស្ត្រមកទទួលយកញត្តិរបស់ពួកគាត់នោះ គឺតំណាងរាស្ត្រទាំងពីរគណបក្ស បានចេញពីមន្ទីររដ្ឋសភាមកទទួលញត្តិពីក្រុមពលរដ្ឋ។
ថ្លែងក្រោយពីទទួលញត្តិ អ្នកតំណាងរាស្ត្រ អ្នកស្រី ឡោក ខេង ឲ្យដឹងថា ក្រោយរដ្ឋសភាទទួលញត្តិ និងពិនិត្យមើលញត្តិរួចហើយ នឹងប្រជុំពិភាក្សាគ្នា បន្ទាប់មកនឹងត្រូវបញ្ជូនសំណើនេះទៅប្រធានរដ្ឋសភា ដើម្បីអន្តរាគមន៍។ អ្នកស្រីបញ្ជាក់ថា រដ្ឋសភាមានសិទ្ធិត្រឹមសម្របសម្រួលរវាងគូទំនាស់នៅក្រៅប្រព័ន្ធតុលាការប៉ុណ្ណោះ៖ «រដ្ឋសភាមិនមែនជាតុលាការកាត់ក្តីថា ភាគីណាឈ្នះភាគីណាចាញ់ទេ ចឹងមានតែការខិតខំសម្របសម្រួលក្នុងនាមជាតំណាងរាស្ត្រជាមួយអាជ្ញាធរ»។
អ្នកតំណាងរាស្ត្ររូបនេះប្រាប់ថា អ្នកស្រីនឹងប្រាប់ទៅអាជ្ញាធរខេត្តឲ្យបញ្ឈប់ការរារាំងពលរដ្ឋ ដែលស្វែងរកអន្តរាគមន៍ពីតំណាងរាស្ត្រ។
អគ្គលេខាធិការនៃសម្ព័ន្ធសហគមន៍កសិករកម្ពុជា លោក ថេង សារឿន ប្រាប់ថា ក្រុមពលរដ្ឋទាំងអស់ដែលស្វែងរកអន្តរាគមន៍នៅពេលនេះ មានគោលបំណងធំៗពីរ គឺដាក់ញត្តិ និងពាក្យបណ្ដឹងនៅរដ្ឋសភា។ លោកបន្តថា ប្រសិនបើរដ្ឋសភាមិនអាចដោះស្រាយបានទេនោះ ក្រុមពលរដ្ឋនឹងនាំគ្នាដង្ហែធ្វើបាតុកម្មនៅភ្នំពេញជាទ្រង់ទ្រាយធំជាងនេះ៖ «យើងគិតថា ប្រសិនបើតំណាងរាស្ត្រធ្វើអន្តរាគមន៍ ច្បាស់ណាស់អាជ្ញាធរនឹងដោះស្រាយ»។
ក្រុមតំណាងរាស្ត្រដែលចេញមកទទួលញត្តិរបស់ក្រុមពលរដ្ឋមានជម្លោះដីធ្លី បង្ហាញពីដំណោះស្រាយរបស់ខ្លួនទៅមន្ត្រីរដ្ឋាភិបាលភ្លាមៗ ដោយការចាត់តាំងក្រុមការងារឲ្យទូរស័ព្ទទៅរដ្ឋមន្ត្រីក្រសួងបរិស្ថាន ដែលដោះស្រាយនាពេលកន្លងមក និងទូរស័ព្ទទៅអាជ្ញាធរខេត្តដែលពលរដ្ឋមានបញ្ហាទាំងនោះ។
មកទល់ពេលនេះ គណៈកម្មការសិទ្ធិមនុស្ស ទទួលពាក្យបណ្ដឹង អង្កេត និងទំនាក់ទំនងជាមួយរដ្ឋសភា ព្រឹទ្ធសភា បានទទួលញត្តិ និងពាក្យបណ្ដឹងចំនួនជាង ២០០បណ្ដឹង មកពីបណ្ដាខេត្តរាជធានី។ សមាជិកនៃគណៈកម្មការនេះ មកពីគណបក្សសង្គ្រោះជាតិ លោក ងឹម ញេង ឲ្យដឹងថា ចំនួនញត្តិ និងបណ្ដឹងទទួលបានច្រើន ប៉ុន្តែដោះស្រាយតិច ព្រោះខ្វះកិច្ចសហការពីអាជ្ញាធរ និងមន្ត្រីរដ្ឋាភិបាល៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។