នៅក្នុងឱកាសនោះដែរ អ្នកភូមិទាំងនោះ ក៏បានធ្វើពិធីដុតដីកាចាប់ខ្លួន អ្នកស្រី យ៉ោម បុប្ផា ដែលចេញដោយតុលាការក្រុងភ្នំពេញ នៅខាងមុខតុលាការកំពូលនោះដែរ ដោយចាត់ទុកដីកានោះផ្តល់ភាពអយុត្តិធម៌។ ការទាមទារនេះ ធ្វើឡើងប៉ុន្មានថ្ងៃមុនពេលតុលាការកំពូលគ្រោងបើកសវនាការលើករណី អ្នកស្រី យ៉ោម បុប្ផា នៅថ្ងៃទី២២ វិច្ឆិកា ខាងមុននេះ។
តំណាងអ្នកភូមិជាង១០នាក់បានស្លៀកពាក់ស ចងក្បិន ដើរជើងទទេ និងមានទូលបាយសី។ អ្នកខ្លះ ទូលកញ្ជើរណ្តាប់សែនព្រែនជាច្រើន រួមមានស្រូវ ពោត សណ្តែក ល្ង ល្ពៅ ត្រប់ ត្រាវ ត្រឡាច និងដូង។ ក្រៅពីនេះអ្នកចូលរួមភាគច្រើន ដៃម្ខាងកាន់ផ្កាឈូក និងដៃម្ខាងទៀតកាន់ដីកាចាប់ខ្លួន អ្នកស្រី យ៉ោម បុប្ឆា កាលពីចុងឆ្នាំ២០១២កន្លងមក។ ដីកានោះត្រូវបានដុតចោលម្តងមួយៗ នៅពេលដែលក្បួនដង្ហែបានមួយជុំមកចំពីមុខខ្លោងទ្វារតុលាការកំពូល។
តំណាងអ្នកភូមិបឹងកក់ លោកស្រី ទេព វន្នី មានជំនឿថាពិធីបួងសួងនេះ នឹងអាចបន្ទន់ចិត្តដល់ អាជ្ញាធររដ្ឋាភិបាលពិសេសតុលាការកំពូល ឲ្យជួយដោះលែងអ្នកស្រី យ៉ោម បុប្ឆា មានសេរីភាពវិញ។
ក្បួនដង្ហែនោះមិនមានព្រះសង្ឃនិមន្តចូលរួម តាមការគ្រោងទុកទេ។ ប៉ុន្តែមានព្រះសង្ឃជាង១០អង្គ និមន្តមកក្បែរៗ តុលាការ និងបានទតពីចំងាយ។ យ៉ាងណាតាអាចារ្យបានចូលរួម ក្នុងពិធីបួងសួងនេះ និងបានសូត្រធម៌ ដោយមានការទូងស្គរបួងសួងដល់បុព្វការីជន ដែលចែកឋាន និងស្រលាញ់យុត្តិធម៌ទាំងអស់ ឲ្យជួយបន្ទន់ចិត្តដល់តុលាការកំពូល ឲ្យដោះលែងអ្នកស្រី យ៉ោម បុប្ឆា។ គ្រាដែលតុលាការនេះ គ្រោងបើកសវនាការជំរះក្តីនៅថ្ងៃទី២២ ខែវិច្ឆិកា ខាងមុខ។
លោកស្រី យ៉ោម បុប្ឆា សកម្មជនដីធ្លីនៅតំបន់បឹងកក់ ជាប់ពន្ធនាគារបាន១ឆ្នាំហើយ បន្ទាប់ពីត្រូវសាលាដំបូងរាជធានីភ្នំពេញ កាត់ឲ្យមានទោស៣ឆ្នាំ ហើយក្រោយមកត្រូវសាលាឧទ្ធរណ៍សម្រេចបន្ធូរបន្ថយ ឲ្យមកជាប់ទោស២ឆ្នាំវិញ ក្នុងសំណុំរឿងអំពើហិង្សាមួយនៅក្នុងភូមិ។
កាលពីថ្ងៃទី១៥ ខែវិច្ឆិកា អាជ្ញាធរខណ្ឌ និងមន្រ្តីសាលារាជធានីភ្នំពេញ បានហៅប្តីលោកស្រី យ៉ោម បុប្ឆា គឺលោក លួស សាខន ទៅជួប ដើម្បីឲ្យលោកផ្តិតមេដៃលើលិខិតស្នើសុំឲ្យថ្នាក់ដឹកនាំសាលា រាជធានីភ្នំពេញ ជួយអន្តរាគមន៍ទៅតុលាការកំពូលឲ្យដោះលែង លោកស្រី យ៉ោម បុប្ឆា។
លោក លួស សាខន ជឿថានេះជាសញ្ញាមួយ ដែលអាចឲ្យតុលាការដោះលែងប្រពន្ធរបស់គាត់ នៅចំពេលដែលតុលាការកំពូលបើកសវនាការនៅថ្ងៃទី២២ ខែវិច្ឆិកាខាងមុខ។
ប្រធានផ្នែកបច្ចេកទេសនៃអង្គការលីកាដូ លោក អំ សំអាត សង្ឃឹមថាតុលាការកំពូលនឹងផ្តល់យុត្តិធម៌ដល់លោកស្រី យ៉ោម បុប្ឆា ហើយថាប្រសិនបើលោកស្រី យ៉ោម បុប្ឆា មិនមែនជាសកម្មជនដីធ្លី សកម្មនៅតំបន់បឹងកក់ទេនោះ វាសនារបស់គាត់មិនត្រូវជាប់ពន្ធនាគារឡើយ ព្រោះគ្មានភស្តុតាង ណាមួយ បញ្ជាក់ថាគាត់ និងប្តីលោក លួស សាខន បានប្រព្រឹត្តហិង្សានោះទេ។
អង្គការលើកលែងទោសអន្តរជាតិ (Amnesty International) បានទាមទារឲ្យដោះលែងសកម្មជនដីធ្លីតំបន់បឹងកក់ អ្នកស្រី យ៉ោម បុប្ផា ជាបន្ទាន់ ដោយពុំមានដាក់លក្ខខណ្ឌ។ អង្គការនេះចាត់ទុកករណីរបស់ លោកស្រី យ៉ោម បុប្ឆា និងពលរដ្ឋនៅតំបន់បឹងកក់ បង្ហាញឲ្យឃើញយ៉ាងច្បាស់នូវបញ្ហាមួយចំនួន ដែលបណ្ដាលមកពីការអភិវឌ្ឍមិនស្មើភាព ជម្លោះដីធ្លី ការបណ្ដេញចេញដោយបង្ខំ និងបរាជ័យនៃប្រព័ន្ធយុត្តិធម៌ក្នុងកិច្ចការពារសិទ្ធិពលរដ្ឋ និងសេរីភាពនៃការបញ្ចេញមតិ៕
១-ក្រុមអ្នកមានជម្លោះដីធ្លីត្រៀមរៀបចំចេញដំណើរពីបឹងកក់។
២-ក្រុមអ្នកមានជម្លោះដីធ្លីត្រៀមហែក្បួននៅជិតតុលាការកំពូល។
៣-ក្រុមអ្នកមានជម្លោះដីធ្លីហែក្បួនជុំវិញតុលាការកំពូល។
៤-ក្រុមអ្នកមានជម្លោះដីធ្លីហែក្បួនជុំវិញតុលាការកំពូល។
៥-ក្រុមអ្នកមានជម្លោះដីធ្លីហែក្បួនជុំវិញតុលាការកំពូល។
៦-ក្រុមអ្នកមានជម្លោះដីធ្លីហែក្បួនជុំវិញតុលាការកំពូល។
៧-ក្រុមអ្នកមានជម្លោះដីធ្លីដុតដីកាចាប់ខ្លួនអ្នកស្រី យ៉ោម បុប្ផា។
៨-ក្រុមអ្នកមានជម្លោះដីធ្លីកាន់បដាសរសេរថា ដោះលែង បុប្ផា។
៩-ក្រុមអ្នកមានជម្លោះដីធ្លីកាន់បដាដែលសរសេរប្រៀបធៀបរវាង លោក ឈូក បណ្ឌិត និងអ្នកស្រី យ៉ោម បុប្ផា។
១០-ក្រុមអ្នកមានជម្លោះដីធ្លីបួងសួងនៅមុខតុលាការកំពូល។
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។