អតីតអ្នកភូមិបឹងកក់ ប្រមាណ ៥០នាក់ បាននាំគ្នាមកតវ៉ានៅមុខសាលារាជធានីភ្នំពេញ ដើម្បីទាមទារសំណងមួយចំនួនបន្ថែមលើគោលនយោបាយដែលសាលារាជធានីភ្នំពេញ ផ្ដល់ឲ្យនៅពេលពួកគាត់ត្រូវបានអាជ្ញាធរបង្ខំឲ្យចេញពីលំនៅឋានកាលពីឆ្នាំ២០០៨ ដល់ឆ្នាំ២០១១។
អតីតអ្នកបឹងកក់ អ្នកស្រី ស៊ា ណារ៉េត ថ្លែងថា ពួកគាត់មកទាមទារឲ្យអភិបាលរាជធានីភ្នំពេញ បំភ្លឺចំពោះករណីដែលពួកគាត់ទាមទារសំណងបន្ថែមលើគោលនយោបាយដែលសាលារាជធានីភ្នំពេញ ផ្ដល់ឲ្យកាលពីឆ្នាំ២០០៨ គឺលុយ ៨.៥០០ដុល្លារ ជាថ្នូរចាកចេញពីលំនៅឋាននោះ។ អ្នកស្រីបន្តថា នៅពេលនោះក្រុមហ៊ុនស៊ូកាគូ បូមខ្សាច់ពន្លិចផ្ទះរបស់ពួកគាត់ទើបពួកគាត់ចាកចេញដោយបង្ខំ។
ទាក់ទងបញ្ហានេះ អ្នកភូមិបាននាំគ្នាយកលិខិតសុំអន្តរាគមន៍ដាក់ជូនមន្ត្រីសាលារាជធានី ដើម្បីដោះស្រាយ។ ជាលទ្ធផលអ្នកស្រីបញ្ជាក់ថា មន្ត្រីសាលារាជធានីសន្យាថា សាលារាជធានីនឹងព្យាយាមដោះស្រាយជូនពួកគាត់នៅចុងខែមិថុនានេះ តាមរយៈការប្រជុំជាមួយម្ចាស់ជំនួយ ដូចជាធនាគារពិភពលោក សភាពាណិជ្ជកម្ម និងម្ចាស់ជំនួយធំៗ ដើម្បីស្វែងរកថវិកាជួយអតីតអ្នកបឹងកក់។ ប៉ុន្តែសាលារាជធានីសុំដោះស្រាយបញ្ហាជូនអ្នកបុរីកីឡា ជាមុនសិនដើម្បីជាគំរូ។
ពលរដ្ឋដដែលឲ្យដឹងថា សាលារាជធានីភ្នំពេញ បានធ្វើសលាកបត្រព័ត៌មានអំពីសំណូមពររបស់អតីតអ្នកបឹងកក់សុំសំណងបន្ថែមគឺមានជាង១ពាន់គ្រួសារ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។