ពលរដ្ឋមកពីខេត្តកោះកុងស្នើក្រសួងយុត្តិធម៌ដោះស្រាយបញ្ចប់ជម្លោះដី
2014.09.18
តំណាងប្រជាពលរដ្ឋដែលមានទំនាស់ដីធ្លីនៅខេត្តកោះកុង ចំនួន ១៥គ្រួសារ នៅរសៀលថ្ងៃទី១៨ ខែកញ្ញា ប្រមូលផ្តុំគ្នាដាក់ញត្តិទៅកាន់ក្រសួងយុត្តិធម៌ និងឧត្តមក្រុមប្រឹក្សានៃអង្គចៅក្រម។ ពួកគេស្នើឲ្យស្ថាប័នការពារយុត្តិធម៌ពីរនេះ ស្វែងរកយុត្តិធម៌ឲ្យពួកគេក្នុងជម្លោះដីធ្លីជាមួយក្រុមហ៊ុនសម្បទានដីសេដ្ឋកិច្ច ដែលបានអូសបន្លាយប្រមាណ ៦ឆ្នាំមកហើយនោះ។
តំណាងពលរដ្ឋមានទំនាស់ដីធ្លីនៅភូមិព្រែកជីក ឃុំជីខក្រោម ស្រុកស្រែអំបិល ខេត្តកោះកុង ដែលភាគច្រើនមានវ័យចំណាស់ និងរួមដំណើរដោយប្រជាពលរដ្ឋមានជម្លោះដីធ្លីនៅខេត្តព្រះវិហារ ដែលសព្វថ្ងៃកំពុងស្នាក់នៅវត្តស្ទឹងមានជ័យ ព្រមទាំងព្រះសង្ឃ ដែលមានគ្នីគ្នាសរុបប្រមាណ ៥០អង្គ និងនាក់ បានទៅប្រមូលផ្តុំគ្នានៅមុខក្រសួងយុត្តិធម៌ ស្រែកទាមទារឲ្យក្រសួង ស្វែងរកយុត្តិធម៌ឲ្យពួកគេ ជុំវិញបញ្ហាដីធ្លីប្រមាណ ៦០ហិកតារ។
ក្រោយពីឈរស្រែកតវ៉ាប្រហែល ១៥នាទី តំណាងអ្នកភូមិចំនួន ៤នាក់ ត្រូវបានមន្ត្រីក្រសួងយុត្តិធម៌ អនុញ្ញាតឲ្យចូលជួប ដើម្បីសាកសួរ និងដាក់ញត្តិ។ នៅក្នុងញត្តិនោះ ប្រជាពលរដ្ឋស្នើឲ្យក្រសួងយុត្តិធម៌ ជំរុញឲ្យតុលាការខេត្តកោះកុង លើកចោលការចោទប្រកាន់របស់ក្រុមហ៊ុន លើតំណាងរបស់ពួកគេ គឺអ្នកស្រី ផាវ ញ៉ើង ដែលត្រូវតុលាការខេត្តកោះកុង ចោទប្រកាន់ពីបទធ្វើឲ្យខូចខាតទ្រព្យសម្បត្តិអ្នកដទៃដោយចេតនា ស្នើឲ្យក្រសួងយុត្តិធម៌ ជំរុញទៅស្ថាប័នតុលាការ លុបចោលសាលដីកាកាលពីឆ្នាំ២០០៩ ដែលពលរដ្ឋថាសាលដីកានោះ បានកាត់ដីប្រជាពលរដ្ឋទៅឲ្យក្រុមហ៊ុនរបស់ លោក ហេង ហ៊ុយ ដែលជាម្ចាស់ក្រុមហ៊ុន ហេង ហ៊ុយ អាហ្គ្រីខលឈ័រ គ្រូប (Heng Huy Agriculture Group) និងសុំឲ្យតុលាការមានភាពឯករាជ្យ យុត្តិធម៌ និងកាត់ក្តីប្រកបដោយឆន្ទៈ ស្មោះត្រង់មិនលម្អៀង។ បន្ទាប់ពីដាក់ញត្តិរួច ពលរដ្ឋឲ្យដឹងថា ក្រសួងយុត្តិធម៌ សន្យាថានឹងជំរុញឲ្យតុលាការខេត្តកោះកុង ដោះស្រាយបញ្ហាក្នុងពេលឆាប់ៗនេះ។
ក្នុងពេលប្រមូលផ្តុំនៅមុខក្រសួងយុត្តិធម៌ នោះ កងសន្តិសុខខណ្ឌដូនពេញ ប្រមាណ ១០នាក់ ក៏ត្រូវបានដាក់ពង្រាយនៅមុខក្រសួង ប៉ុន្តែពួកគេមិនបានរារាំងការប្រមូលផ្តុំរបស់ពលរដ្ឋឡើយ។ ក្នុងពេលស្រែកទាមទារនោះដែរ ស្ត្រីវ័យចំណាស់ម្នាក់បានខ្យល់គ និងសន្លប់ ដែលតាមមើលទៅប្រហែលជាអស់កម្លាំងពេក ហើយក៏ត្រូវបានបញ្ជូនទៅកាន់ព្យាបាលនៅអង្គការលីកាដូ (Licadho)។
បន្ទាប់ពីក្រសួងយុត្តិធម៌ ពលរដ្ឋបានធ្វើដំណើរតាមរថយន្តទៅកាន់ឧត្តមក្រុមប្រឹក្សានៃអង្គចៅក្រមក្នុងខណ្ឌចំការមន។ នៅទីនោះ ពួកគេត្រូវបានអនុប្រធាននាយកដ្ឋានជំនួយការកិច្ចការតុលាការ នៃឧត្តមក្រុមប្រឹក្សានៃអង្គចៅក្រម លោក សុង សុខភារម្យ ចេញមកជួប និងបានអញ្ជើញតំណាងពលរដ្ឋចំនួន ២រូប រួមនិងព្រះសង្ឃចំនួន ២អង្គផងដែរ ចូលទៅខាងក្នុង។
ក្រោយជំនួបនោះ ពលរដ្ឋឲ្យដឹងថា ឧត្តមក្រុមប្រឹក្សានៃអង្គចៅក្រម សន្យាថា ពួកគេនឹងចែកចាយឯកសាររបស់ពលរដ្ឋទៅកាន់ស្ថាប័នពាក់ព័ន្ធ និងជួយដោះស្រាយឲ្យពលរដ្ឋក្នុងពេលឆាប់ៗនេះ។
តំណាងពលរដ្ឋ អ្នកស្រី ផាវ ញ៉ើង បានថ្លែងនៅមុខឧត្តមក្រុមប្រឹក្សានៃអង្គចៅក្រម នៅពេលដៃម្ខាងកំពុងបីកូនអាយុទើបតែ ២៤ថ្ងៃនោះថា អ្នកស្រី និងប្រជាពលរដ្ឋក្នុងសហគមន៍របស់អ្នកស្រី រងការរំលោភបំពានពីសំណាក់ក្រុមហ៊ុនអស់ជាច្រើនឆ្នាំមកហើយ ប៉ុន្តែគ្មានអ្នកណាជួយដោះស្រាយឡើយ បើទោះជាកន្លងមក ពលរដ្ឋបានដាក់ពាក្យបណ្ដឹងទៅកាន់ស្ថាប័នពាក់ព័ន្ធផ្សេងៗជាច្រើនកន្លែង ប៉ុន្តែអ្នកស្រីថា ពេលនេះពួកគាត់ស៊ូទ្រាំលែងបានទៀតហើយ៖ «គេប្ដឹងបងពីរលើកហើយ កាលពីឆ្នាំ២០១០ លោក ហេង ហ៊ុយ ប្ដឹងបងពីបទប្រើអំពើហិង្សាលើម្ចាស់ដី ការពិតគាត់មករុះផ្ទះបង បងរារាំងអត់ឲ្យគេរុះ អត់ឲ្យគេបំផ្លាញផ្ទះបង អ៊ីចឹងគេប្ដឹងបងថា បងនៅលើដីគេ»។
អ្នកស្រី ផាវ ញ៉ើង ឲ្យដឹងបន្តថា ទាក់ទងបញ្ហាដីធ្លីនេះ ពលរដ្ឋបានប្ដឹងទៅតុលាការខេត្តកោះកុង នៅឆ្នាំ២០១០ ដើម្បីឲ្យតុលាការដោះស្រាយបញ្ហាដីធ្លីជូនពួកគាត់ ប៉ុន្តែតុលាការខេត្តកោះកុង មិនចាត់ការឡើយ។ ដោយរង់ចាំយូរពេក អ្នកស្រីក៏ប្ដឹងទៅកាន់សាលាឧទ្ធរណ៍បន្តទៀត ហើយសាលាឧទ្ធរណ៍ បានកោះហៅអ្នកស្រីឲ្យចូលខ្លួននៅថ្ងៃទី១៦ ខែកញ្ញា ឆ្នាំ២០១៤។ ប៉ុន្តែស្រាប់តែឡើងមកដល់ភ្នំពេញ តុលាការប្រាប់ថា ពួកគេលើកពេលសវនាការទៀត៖ «វាអយុត្តិធម៌ណាស់ចំពោះអ្នកក្រីក្រដូចពួកខ្ញុំ បើចង់លើកពេលម៉េចក៏លោកតាំងពីមុនមក ប្រាប់ពីរថ្ងៃអីមក ពួកខ្ញុំចងការលុយគេមក ទម្រាំបានមក ព្រោះអីហៅចំខ្ញុំហ្នឹង»។
ក្នុងមួយរយៈពេលចុងក្រោយនេះ ពិសេស គឺក្រោយពីលោកនាយករដ្ឋមន្ត្រី ហ៊ុន សែន ថ្លែងថា លោកមិនបានទទួលញត្តិបញ្ហាដីធ្លីពីពលរដ្ឋក្នុងពេលថ្មីៗនេះ ប្រជាពលរដ្ឋដែលមានទំនាស់ដីធ្លីក្នុងខេត្តមួយចំនួនក្នុងប្រទេសកម្ពុជា ដែលមិនមានជំនឿទៅលើអាជ្ញាធរមូលដ្ឋានរបស់ពួកគេ បានធ្វើដំណើរឡើងមករាជធានីភ្នំពេញជាហូរហែ ដើម្បីស្វែងរកអន្តរាគមន៍ពី លោក ហ៊ុន សែន និងស្ថាប័នពាក់ព័ន្ធ។ ទោះយ៉ាងណា បញ្ហារបស់ពួកគេហាក់នៅមិនទាន់ត្រូវបានដោះស្រាយជាដុំកំភួននៅឡើយ៕