សកម្មជន និងអ្នកគាំទ្រគណបក្សសម្ព័ន្ធដើម្បីប្រជាធិបតេយ្យ (LDP) ជាច្រើនរយនាក់ បានប្រមូលផ្តុំគ្នានៅមុខស្នងការដ្ឋាននគរបាលខេត្តកំពត នៅថ្ងៃទី៥ ខែកុម្ភៈ ដើម្បីទាមទារឲ្យអាជ្ញាធរដោះលែងសកម្មជនរបស់ខ្លួនចំនួន ១៣នាក់ ដែលត្រូវបានចាប់ខ្លួនទាក់ទងនឹងបញ្ហាទំនាស់ដីធ្លីកាលពីរសៀលថ្ងៃទី៤ កុម្ភៈ។ អាជ្ញាធរខេត្តកំពត បញ្ជាក់ថា ការឃាត់ខ្លួនអ្នកទាំង ១៣នាក់ គឺដោយសារពួកគេបានឈូសរានដីសម្បទានសង្គមកិច្ចរបស់រដ្ឋ និងដោយសារមានពាក្យបណ្ដឹងពីពលរដ្ឋ។
ក្រុមបាតុករគណបក្សសម្ព័ន្ធដើម្បីប្រជាធិបតេយ្យ បានរំសាយគ្នានៅម៉ោងជាង ៣រសៀល ក្រោយពីអាជ្ញាធរខេត្តកំពត បានព្រមានចាត់វិធានការតាមផ្លូវច្បាប់ចំពោះការប្រមូលផ្តុំគ្នា ដែលអាជ្ញាធរចាត់ទុកថាជាទង្វើខុសច្បាប់។ អាជ្ញាធរខេត្តបានប្រកាសកុំឲ្យអ្នកគាំទ្រគណបក្សសម្ព័ន្ធដើម្បីប្រជាធិបតេយ្យ ទាញភ្ជាប់បញ្ហានៃការអនុវត្តច្បាប់ទៅលើបុគ្គលល្មើសច្បាប់ ទៅជារឿងនយោបាយ ហើយស្នើឲ្យតំណាងគណបក្សនេះតវ៉ាតាមផ្លូវតុលាការ ក្នុងករណីមិនពេញចិត្តការអនុវត្តរបស់សមត្ថកិច្ច៖ «ករណីចាប់ខ្លួនបុគ្គល ១៣នាក់ ធ្វើឡើងដោយសារជនល្មើសជាបុគ្គល និងប្រជាពលរដ្ឋ គឺមិនមែនពាក់ព័ន្ធជាមួយនឹងគណបក្ស LDP នោះទេ។ ដូច្នេះបើសិនជាលោក ខឹម វាសនា និងសមាជិក LDP ទាំងអស់ ផ្សារភ្ជាប់ទៅនឹងបញ្ហាបុគ្គល និងផ្លូវច្បាប់ គឺលោក ខឹម វាសនា និងសមាជិកដែលចូលរួមបាតុកម្មនៅទីនេះទាំងអស់ ត្រូវទទួលខុសត្រូវចំពោះមុខច្បាប់»។
តំណាងគណបក្សសម្ព័ន្ធដើម្បីប្រជាធិបតេយ្យ ដែលបានចូលរួមក្នុងបាតុកម្ម លោក ឆឺយ ប៊ុនធឿន បញ្ជាក់ថា វាជារឿងអយុត្តិធម៌ដែលអាជ្ញាធរខេត្តកំពត ចាប់ខ្លួនសកម្មជនរបស់លោកទាំង ១៣នាក់ ដែលពួកគេមិនបានប្រព្រឹត្តកំហុស។ លោកបញ្ជាក់ថា គណបក្សរបស់លោកនឹងធ្វើសន្និសីទសារព័ត៌មាននៅថ្ងៃទី៦ កុម្ភៈ ដើម្បីបញ្ជាក់ពីជំហរ និងបង្ហាញពីផែនការបន្ទាប់របស់គណបក្ស៖ «យើងវាអត់មានខុសអីផង។ បញ្ហាទំនាស់រវាងប្រជាពលរដ្ឋ និងប្រជាពលរដ្ឋហ្នឹង ហើយប្រជាពលរដ្ឋជាអ្នកប្តឹង ហើយអាជ្ញាធរចាប់មនុស្សទាំងហ្វូងទៅ វាអយុត្តិធម៌នៅលើគោកពេក។ បើពួកយើងខុសច្បាប់ អាហ្នឹងអនុវត្តទៅតាមច្បាប់ទៅតែពួកយើងអត់មានខុសអីផង។ អ៊ីចឹងបានថា គេអនុវត្តមកលើពួកយើងទាំងបំពាន ទាំងកម្រោលតែម្តង។ ច្បាប់ស្រេចតែនៅលើមាត់ ស្រេចតែគេថា គេនិយាយហ្នឹង»។
កាលពីរសៀលថ្ងៃទី៤ កុម្ភៈ សមត្ថកិច្ចខេត្តកំពត ដឹកនាំដោយអភិបាលរងខេត្ត លោក ស៊ឹម វុទ្ធា និងលោក ខាន់ សុផល ព្រះរាជអាជ្ញារងអមតុលាការខេត្តកំពត បានចុះឃាត់ខ្លួនពលរដ្ឋចំនួន ១៣នាក់ ដែលអាជ្ញាធរចោទថា ពួកគេបានឈូសឆាយយកដីសម្បទានសង្គមកិច្ចរបស់រដ្ឋ បំផ្លាញផលដំណាំរបស់ប្រជាពលរដ្ឋ និងដុតទន្ទ្រានព្រៃយកដីឧទ្យានជាតិធ្វើជាកម្មសិទ្ធិ ក្នុងភូមិសាស្ត្រភូមិតេជោក្បាលដំរី ឃុំតេជោអភិវឌ្ឍន៍ ស្រុកឈូក ខេត្តកំពត។
ព្រះរាជអាជ្ញារងអមសាលាដំបូងខេត្តកំពត លោក ខាន់ សុផល ឲ្យដឹងថា ការឃាត់ខ្លួននេះ គឺផ្អែកតាមបណ្ដឹងពលរដ្ឋ ហើយម្យ៉ាងដោយសារជនទាំងនោះមិនបានស្តាប់ការណែនាំរបស់អាជ្ញាធរ ដោយធ្វើការឈូសឆាយរំលោភបំពានដីរដ្ឋជាច្រើនដង។ លោកថា សមត្ថកិច្ចកំពុងពិនិត្យលើករណីនេះ មុននឹងសម្រេចបញ្ជូន ឬមិនបញ្ជូនពួកគេទៅតុលាការ៖ «យើងចាំមើលផុតរយៈពេលនៃការឃាត់ខ្លួនហ្នឹងសិន តើយើងសម្រេចបញ្ជូនគាត់ទៅតុលាការ ឬមួយក៏ត្រូវដោះលែងគាត់វិញ។ អ៊ីចឹងយើងចាំមើលផុតរយៈពេលនៃការឃាត់ខ្លួនគាត់សិន»។
មន្ត្រីសម្របសម្រួលនៃអង្គការសិទ្ធិមនុស្សលីកាដូ (LICADHO) ប្រចាំខេត្តកំពត លោក សេត វណ្ណៈ ដែលបានតាមដានរឿងនេះយល់ឃើញថា អាជ្ញាធរគួរតែដោះស្រាយបញ្ចប់ទំនាស់នេះ ដោយវាស់វែងដីដែលពលរដ្ឋធ្លាប់កាន់កាប់ទៅតាមសភាពជាក់ស្តែង។ លោកថា ការចាប់ខ្លួនពលរដ្ឋច្រើនបែបនេះ គឺជាការរំលោភសិទ្ធិមនុស្ស ដ្បិតពួកគេគ្រាន់តែឈូសឆាយដីដែលខ្លួនធ្លាប់កាន់កាប់តែប៉ុណ្ណោះ មិនបានបង្កហិង្សា ឬការរំលោភបំពានធ្ងន់ធ្ងរណាមួយនោះទេ៖ «វាមិនមានអ្វីឱ្យច្បាស់លាស់ ដូចជាការបំផ្លិចបំផ្លាញ ឬការបង្ករបួសស្នាមដល់ជនណាម្នាក់ក្នុងវិវាទដីធ្លីហ្នឹង គ្រាន់តែគាត់យកគ្រឿងចក្រទៅឈូសឆាយដីរបស់ពួកគាត់ដែលធ្លាប់កាន់កាប់កន្លងមក បែរជាចំណាត់ការនេះលឿនដូចព្យុះ ចាប់ប្រជាពលរដ្ឋរហូតដល់ជាង ១០នាក់មកភ្លាមៗបែបនេះ»។
ស្របពេលដែលមានការប្រមូលផ្តុំសកម្មជនគណបក្សសម្ព័ន្ធដើម្បីប្រជាធិបតេយ្យ នៅមុខស្នងការដ្ឋាននគរបាលខេត្តកំពត ដើម្បីប្រឆាំងនឹងចំណាត់ការរបស់អាជ្ញាធរ មានពលរដ្ឋមួយក្រុមដែលអះអាងថា ជាក្រុមសោធននិវត្តន៍ បានប្រមូលផ្តុំគ្នានៅមុខសាលាឃុំតេជោអភិវឌ្ឍន៍ គាំទ្រនឹងចំណាត់ការរបស់អាជ្ញាធរ។ តាមរយៈខ្សែវីដេអូខ្លី និងរូបថតមួយចំនួនដែលត្រូវបានបង្ហោះនៅលើបណ្ដាញសង្គមហ្វេសប៊ុករបស់លោក ម៉ៅ ច័ន្ទមធុរិទ្ធិ ស្នងការខេត្តកំពត ឲ្យដឹងថា មានពលរដ្ឋមួយចំនួននៅភូមិតេជោអភិវឌ្ឍន៍ ឃុំតេជោអភិវឌ្ឍន៍ បានប្រមូលផ្តុំគ្នានៅសាលាឃុំ អបអរសាទរចំពោះសកម្មភាពអនុវត្តច្បាប់របស់ក្រុមការងារថ្នាក់ខេត្ត ជុំវិញការបង្ក្រាបនេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។