លីកាដូថានឹងផ្តល់ទិន្នន័យជាក់លាក់ទាក់ទងជម្លោះដីធ្លីទៅក្រសួងរៀបចំដែនដី
2015.08.02
អង្គការសិទ្ធិមនុស្សលីកាដូ (Licadho) អះអាងថានឹងផ្តល់ទិន្នន័យជាក់លាក់ចំនួន ៧ចំណុច ទៅក្រសួងរៀបចំដែនដី នៅពាក់កណ្ដាលខែសីហា នេះ។ ការលើកឡើងបែបនេះ ឆ្លើយតបទៅនឹងសេចក្តីជូនដំណឹងរបស់ក្រសួងរៀបចំដែនដី នគរូបនីយកម្ម និងសំណង់ កាលពីថ្ងៃទី៣១ កក្កដា ដែលលើកឡើងថា អង្គការលីកាដូ ត្រឹមផ្តល់របាយការណ៍ឆៅទាក់ទងជម្លោះដីធ្លីធ្វើឲ្យក្រសួងពិបាកនឹងទទួលយកបាន។
មន្ត្រីជាន់ខ្ពស់នៃអង្គការសិទ្ធិមនុស្សលីកាដូ អះអាងនៅថ្ងៃទី១ ខែសីហា នេះថា ខ្លួនមិនខ្លាចនឹងផ្តល់ទិន្នន័យជាក់លាក់ទាក់ទងនឹងជម្លោះដីធ្លី ទៅក្រសួងរៀបចំដែនដី នគរូបនីយកម្ម និងសំណង់ នោះទេ។
មន្ត្រីជាន់ខ្ពស់នៃអង្គការសិទ្ធិមនុស្សលីកាដូ លោក អំ សំអាត ឲ្យដឹងថា អង្គការលីកាដូ នៅតែរីករាយផ្តល់ទិន្នន័យជាក់លាក់ពីករណីជម្លោះដីធ្លី ទៅក្រសួងតាមការចង់បាន។ លោកបន្តទៀតថា របាយការណ៍របស់លីកាដូ នាពេលកន្លងទៅនោះ គឺគ្រាន់តែជាទិន្នន័យមូលដ្ឋាន ដើម្បីឲ្យក្រសួងរៀបចំដែនដី យករបាយការណ៍ទាំងនោះធ្វើជាពន្លឺយកទៅដោះស្រាយ និងស្វែងរកបន្ថែម៖ «អង្គការលីកាដូ យើងកំពុងធ្វើរបាយការណ៍ទៅក្រសួងបន្ថែមទៀត ផ្ញើទៅក្រសួងមិនឲ្យលើសពីសប្ដាហ៍ទី២ នៃសីហា នេះ»។
កាលពីថ្ងៃទី៣១ ខែកក្កដា ក្រសួងរៀបចំដែនដី នគរូបនីយកម្ម និងសំណង់ បានចេញផ្សាយសេចក្តីជូនដំណឹង បដិសេធរបាយការណ៍ដែលក្រសួងចាត់ទុកថាគ្មានមូលដ្ឋានពិត និងស្នើសុំអង្គការលីកាដូ ផ្តល់ទិន្នន័យច្បាស់លាស់រួមមាន អត្តសញ្ញាណភាគីទាំងសងខាង កម្មវត្ថុនៃបណ្ដឹងទាមទារ ទំហំដីទំនាស់ ចំនួនគ្រួសារ ទីតាំងដីវិវាទ អំពីអង្គភាពដែលបណ្ដឹងទាំងនោះបានដាក់ ដើម្បីសុំជួយដោះស្រាយ និងស្ថានភាពនៃការដោះស្រាយ។
ថ្លែងបញ្ជាក់បន្ថែមពីសេចក្តីជូនដំណឹងនេះ អ្នកនាំពាក្យក្រសួងរៀបចំដែនដី នគរូបនីយកម្ម និងសំណង់ លោ សេង ឡូត ថាកន្លងមក ក្រសួងតែងស្នើសុំទិន្នន័យបន្ថែមពីអង្គការលីកាដូ ប៉ុន្តែមិនដែលទទួលបានការឆ្លើយតបនៅឡើយទេ។ អ្នកនាំពាក្យរូបនេះលើកឡើងថា ទោះរបាយការណ៍របស់ក្រសួងរៀបចំដែនដី ខុសពីរបាយការណ៍របស់អង្គការលីកាដូ តែក្រសួងនៅតែចង់បានរបាយការណ៍ពីអង្គការលីកាដូ ឬអង្គការផ្សេងៗទៀត ដើម្បីយកមកពិភាក្សារកដំណោះស្រាយ៖ «ខ្ញុំយល់ថា បើសិនជាក្នុងស្មារតីរួមគ្នាទាំងអស់គ្នា ក្នុងការជួយលើកិច្ចការជម្លោះដីធ្លី គួរណាស់តែមានការពិគ្រោះជជែកជាមួយគ្នាឲ្យច្បាស់លាស់»។
របាយការណ៍របស់ក្រសួងរៀបចំដែនដី នគរូបនីយកម្ម និងសំណង់ ឲ្យដឹងថា ចាប់តាំងពីឆ្នាំ២០០៣ មកដល់បច្ចុប្បន្ននេះ ជម្លោះដីធ្លីទូទាំងប្រទេស កើតឡើងប្រមាណ ៨.០០០ករណី ក្នុងនោះដោះស្រាយបានជាង ៣.០០០ករណី និងជាង ២.០០០ករណីត្រូវក្រសួងច្រានចោល ហើយនៅឆ្នាំ២០១៥ នេះ នៅសល់ជាង ៨០០ករណី ក្រសួងកំពុងដោះស្រាយ។
ការឆ្លើយឆ្លងរវាងអង្គការលីកាដូ និងក្រសួងរៀបចំដែនដី នគរូបនីយកម្ម និងសំណង់ នេះ ក្រោយពេលដែលអ្នកនាំពាក្យទីស្ដីការគណៈរដ្ឋមន្ត្រី លោក ផៃ ស៊ីផាន ថ្លែងអះអាងនៅក្នុងវេទិកាអ្នកស្តាប់វិទ្យុអាស៊ីសេរី កាលពីរាត្រីថ្ងៃទី២៨ ខែកក្កដា ថា អង្គការលីកាដូ ទទួលស្គាល់ថា របាយការណ៍ខ្លួនចេញរបាយការណ៍ជម្លោះដីធ្លីឆ្នាំ២០១៤ នោះខុស និងបានសុំទោសក្រសួងរៀបចំដែនដី នគរូបនីយកម្ម និងសំណង់។ ប៉ុន្តែអង្គការលីកាដូ ចេញលិខិតជូនដំណឹងការពាររបាយការណ៍របស់ខ្លួន និងថាមិនបានសុំទោសក្រសួងរៀបចំដែនដី ទេ។ កាលពីថ្ងៃទី១៩ ខែកុម្ភៈ ឆ្នាំ២០១៥ អង្គការលីកាដូ ចេញផ្សាយរបាយការណ៍របស់ខ្លួនថា នៅឆ្នាំ២០១៤ ករណីជម្លោះដីធ្លីមានចំនួន ១១២ករណីទូទាំង ១៣ខេត្តរាជធានី ប៉ុន្តែក្រសួងរៀបចំដែនដី រកឃើញតែ ៥៩ករណី៕