ពលរដ្ឋនៅភូមិឡពាង ឃុំតាជេស ស្រុកកំពង់ត្រឡាច ខេត្តកំពង់ឆ្នាំង បាននាំគ្នាតវ៉ានៅខាងមុខសាលាដំបូងខេត្ត ទាមទារឲ្យតុលាការដោះលែងអ្នកភូមិ ២នាក់ ដែលកំពុងជាប់ពន្ធនាគារ និងសុំឲ្យលើកលែងការចោទប្រកាន់ពួកគាត់ ៨នាក់ផ្សេងទៀត។
អ្នកភូមិទាំងនោះ បាននាំគ្នាដើរក្បួនលើកបដាពីទីតាំងដីទំនាស់ជាមួយក្រុមហ៊ុន ខេ.ឌី.ស៊ី (KDC) ចម្ងាយប្រមាណ ៣០គីឡូម៉ែត្រមកតុលាការនេះ តាំងពីថ្ងៃទី៥ ខែសីហា និងបានសម្រេចបោះតង់ស្នាក់អាស្រ័យនៅមុខតុលាការរហូតដល់មានដំណោះស្រាយ។
អ្នកភូមិឡពាង បានបរាជ័យក្នុងការតវ៉ានៅខាងមុខសាលាដំបូងខេត្ត ទាមទារឲ្យដោះលែងគ្នាគាត់ ២នាក់ និងទម្លាក់ការចោទប្រកាន់លើពលរដ្ឋ ៨នាក់ ដោយសារតែគ្មានមន្ត្រីតុលាការរូបណាចេញមកដោះស្រាយនោះទេ ហើយទ្វារតុលាការបានបិទនៅថ្ងៃទី៦ ខែសីហា។
បុរសអ្នកភូមិឡពាង ដែលចៅក្រមស៊ើបសួរ កោះហៅឲ្យចូលខ្លួនបំភ្លឺនៅថ្ងៃទី៥ សីហា គឺលោក ហុង ដារ៉ូ ថ្លែងនៅថ្ងៃទី៦ សីហា ថា ពួកគាត់ប្ដេជ្ញាថានឹងបោះតង់ស្នាក់អាស្រ័យ ហូបចុកនៅមុខតុលាការរហូតដល់មានដំណោះស្រាយ។ លោកបញ្ជាក់ថា មូលហេតុដែលពួកគាត់ទាមទារនេះ គឺតុលាការបានឃុំខ្លួនអ្នកភូមិ ២នាក់ដោយអយុត្តិធម៌ ហើយពួកគាត់ទាំង ៨នាក់ ក៏មិនចូលខ្លួនតាមការកោះរបស់តុលាការដែរ៖ «ពួកខ្ញុំ គឺធ្វើការតវ៉ានៅដេកនៅទីនេះ គឺបោះតង់មានឆ្នាំងបាយសម្រាប់ដាំទុកហូប មានជាកន្ទេលអីដេកនៅមុខតុលាការហ្នឹងតែម្ដង ដើម្បីឲ្យតុលាការដោះលែងតំណាងពួកយើង ២រូបមកវិញ។ ពួកគាត់ក៏មិនបានចូលខ្លួនបំភ្លឺដែរ គឺដោយសារធ្វើការមិនឯករាជ្យ ចេះតែចោទប្រកាន់មិនបានចុះទៅដល់កន្លែងកើតហេតុ តុលាការកាន់ជើងតែខាងក្រុមហ៊ុន។ ខ្ញុំមិនមានជំនឿទៅលើប្រព័ន្ធតុលាការតទៅទៀតទេ។ បើសិនជាគ្មានការដោះលែង ពួកខ្ញុំនៅតែក្រាញននៀលតវ៉ានៅខាងមុខសាលាដំបូងខេត្តកំពង់ឆ្នាំង ជារៀងរាល់ថ្ងៃ លុះត្រាតែមានថ្ងៃដោះលែងតំណាងពួកយើងខ្ញុំ ឲ្យពួកយើងទៅផ្ទះយ៉ាងម៉េច បើសិនជាពួកយើងអត់មានដីធ្លីដដែល»។
វិទ្យុអាស៊ីសេរី មិនអាចទាក់ទងចៅក្រមស៊ើបសួរ លោក ញូង ចន្ធី ដើម្បីបកស្រាយចំពោះការទាមទាររបស់អ្នកភូមិបានទេ នៅថ្ងៃទី៦ ខែសីហា។
តុលាការខេត្តកំពង់ឆ្នាំង បានចេញដីកាចាប់ខ្លួនអ្នកភូមិ ២នាក់ដាក់ពន្ធនាគារ គឺឈ្មោះ ម៉ាង យាវ និងលោក សៀង ហេង ហើយចេញដីកាបង្គាប់ឲ្យពលរដ្ឋចំនួន ៨នាក់ទៀត ចូលខ្លួនទៅបំភ្លឺក្នុងសំណុំរឿងព្រហ្មទណ្ឌនេះ គឺបន្ទាប់ពីមានការប៉ះទង្គិចគ្នាដោយចម្ពាមកៅស៊ូប្រើគ្រាប់ដែក និងដុំថ្ម រវាងអ្នកភូមិ និងកម្មករស៊ីឈ្នួលធ្វើរបងឲ្យក្រុមហ៊ុន ខេ.ឌី.ស៊ី របស់លោកស្រី ជា ខេង ភរិយា លោក ស៊ុយ សែម ជារដ្ឋមន្ត្រីក្រសួងរ៉ែ និងថាមពល កាលពីថ្ងៃទី១៧ ខែកក្កដា ឆ្នាំ២០១៤។ ការប៉ះទង្គិចនោះ បណ្ដាលឲ្យរងរបួសជាង ២០នាក់ទាំងសងខាង ខណៈដែលអ្នកភូមិព្យាយាមរារាំងសកម្មភាពធ្វើរបង និងវាយទម្លុះរបងថ្មក្រុមហ៊ុន ដែលពួកគាត់អះអាងថា បានសង់រំលោភលើដីរបស់អ្នកភូមិមិនទាន់មានការដោះស្រាយបញ្ចប់នៅឡើយ។
ទាក់ទងបញ្ហានេះ អនុប្រធានផ្នែកអង្កេតរបស់សមាគមអាដហុក (Adhoc) លោក ចាន់ សុវ៉េត ដែលបានឃ្លាំមើលការតវ៉ានេះ មានមតិថា កងកម្លាំងប្រដាប់អាវុធប្រមាណ ៥០នាក់ បានដាក់កម្លាំងការពារសន្តិសុខនៅខាងមុខតុលាការ ដោយសារតែនៅខាងក្រោយតុលាការ គឺមានពន្ធនាគារ និងខាងមុខតុលាការ គឺសាលាខេត្ត។ យ៉ាងណាក៏ដោយ ពាក់ព័ន្ធការតវ៉ារបស់អ្នកភូមិ អង្គការសង្គមស៊ីវិល បានព្យាយាមជួយអន្តរាគមន៍ តែពិបាកក្នុងការទំនាក់ទំនងជាមួយមន្ត្រីតុលាការ៖ «តុលាការធ្វើកិច្ចការងារនេះ ហាក់បីដូចជាគ្រាន់តែធ្វើតាមរបៀបការសម្ដែងឲ្យធ្វើ វាមិនមែនជាចេញពីឆន្ទៈរបស់តុលាការ ហើយតុលាការមិនទាន់បានអង្កេតរឿងហ្នឹងច្បាស់លាស់ផង ថាតើរឿងហ្នឹងវាយ៉ាងម៉េច ព្រោះរឿងអំពើហិង្សា ត្រូវចោទប្រកាន់នៅក្នុងមាត្រា២១៧ ២១៨ ៤១០ ៤១១ អីក្ដី ចាំបាច់ត្រូវធ្វើការស៊ើបអង្កេត ហើយដល់ចឹងទៅ អត់មានការស៊ើបអង្កេតអីបន្តិចសោះ ហើយចេញដីកាបង្គាប់ឲ្យចូលខ្លួន។ អ្នកភូមិឡពាង គឺជាអ្នកភូមិក្រីក្រជាងគេបំផុតនៅក្នុងសហគមន៍ ដែលមានទំនាស់ដីធ្លីដទៃៗទៀតណាស់ ហើយអ្នកភូមិហ្នឹងទទួលរងអយុត្តិធម៌ម្ដងហើយម្ដងទៀត។ វាជារឿងមួយដែលតុលាការត្រូវប្រើប្រាស់ឆន្ទានុសិទ្ធិផ្ទាល់ខ្លួន ឲ្យសមស្របទៅតាមលក្ខខណ្ឌការពារសិទ្ធិពលរដ្ឋការពារសិទ្ធិមនុស្ស»។
យ៉ាងណាក៏ដោយ មេធាវីការពារក្ដីអ្នកភូមិឡពាង មកពីមជ្ឈមណ្ឌលអប់រំច្បាប់សម្រាប់សហគមន៍ លោកស្រី សាម សុគន្ធា ថ្លែងថា កាលពីថ្ងៃទី៥ សីហា ក្រុមមេធាវីនៃអង្គការលីកាដូ (Licadho) មជ្ឈមណ្ឌលអប់រំច្បាប់ និងក្រុមគ្រួសារ រួមទាំងជនជាប់ចោទទាំងពីរនាក់ បានដាក់លិខិតទៅតុលាការសុំធានានៅក្រៅឃុំ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។