អ្នក​ភូមិ​នៅ​កំពង់ឆ្នាំង​ចោទ​អាជ្ញាធរ​នាំ​និស្សិត​វាស់​ដី​គាត់​ឲ្យ​អ្នក​ផ្សេង

ដោយ មណ្ឌល កែវ
2013-04-09
អ៊ីម៉ែល
មតិ
ចែករំលែក
បោះពុម្ព
  • បោះពុម្ព
  • ចែករំលែក
  • មតិ
  • អ៊ីម៉ែល

បញ្ហា​ទំនាស់​ដីធ្លី​នៅ​ប្រទេស​កម្ពុជា មាន​ច្រើន​រូបភាព។ នៅ​ឯ​ភូមិ​មួយ​ក្នុង​ខេត្ត​កំពង់ឆ្នាំង ប្រជាពលរដ្ឋ​បាន​ចោទ​ប្រកាន់​អាជ្ញាធរ​ដែនដី​ថា​បាន​នាំ​និស្សិត​ទៅ​វាស់វែង​លើ​ដីធ្លី​ដែល​ពួក​គាត់​បាន​កាន់​កាប់ និង​បង្កបង្កើន​ផល​ជាច្រើន​ឆ្នាំ​មក​ហើយ ហើយ​អាជ្ញាធរ​ភូមិ ឃុំ ក៏​បាន​ដឹង​ឮ​រួច​ហើយ​ដែរ ឲ្យ​ទៅ​អ្នក​មក​ពី​ភូមិ​ផ្សេង។

តើ​ហេតុ​អ្វី​បាន​ជា​អាជ្ញាធរ​ដែនដី​ភូមិ ឃុំ ធ្វើ​ដូច្នោះ?

ប្រជាពលរដ្ឋ ៧៦​គ្រួសារ នៅ​ភូមិ​ក្រាំងលាវ ឃុំ​ក្រាំងលាវ ស្រុក​រលាប្អៀរ បាន​មក​ដាក់​ពាក្យ​បណ្ដឹង​នៅ​សមាគម​អាដហុក (Adhoc) ការពារ​សិទ្ធិ​មនុស្ស ខេត្ត​កំពង់ឆ្នាំង សុំ​ការ​ជួយ​អន្តរាគមន៍​ផ្នែក​ច្បាប់។ ពួក​គាត់​ចោទ​ប្រកាន់​ថា អាជ្ញាធរ​ភូមិ ឃុំ បាន​នាំ​និស្សិត​ទៅ​វាស់​ដី​ពួក​គាត់​ឲ្យ​ប្រជាពលរដ្ឋ​នៅ​ឃុំ​ផ្សេង។

ស្ត្រី​អ្នក​ភូមិ​ឈ្មោះ សោម យ៉ូត អាយុ ៦៥​ឆ្នាំ ជា​ប្រជាពលរដ្ឋ​នៅ​ភូមិ​ក្រាំងលាវ ឃុំ​ក្រាំងលាវ។ គាត់​បាន​ឲ្យ​ដឹង​នៅ​ព្រឹក​ថ្ងៃ​ទី៨ ខែ​មេសា ថា ដី​របស់​គាត់​ដែល​មាន​ទទឹង ២៥​ម៉ែត្រ និង​បណ្ដោយ​ប្រមាណ ៧៥​ម៉ែត្រ​នេះ គាត់​បាន​កាន់​កាប់ និង​បង្កបង្កើន​ផល​តាំង​ពី​ឆ្នាំ​១៩៨៥ មក​ម្ល៉េះ។ ឥឡូវ ស្រាប់​តែ​លោក​មេ​ឃុំ​បែរ​ជា​ឲ្យ​ក្រុម​និស្សិត​វាស់វែង​ឲ្យ​ប្រជាពលរដ្ឋ​មក​ពី​ឃុំ​ស្វាយជ្រំ ទៅ​វិញ៖ «ខ្ញុំ​តំណាង​ឲ្យ​ប្រជាជន​ទាំង ៧៦​គ្រួសារ​នេះ សំណូមពរ​ឲ្យ​សម្ដេច​នាយក​ជួយ​ប្រជាជន​ភូមិ​ក្រាំងលាវ នេះ​ផង។ ដី​វា​កាន់​តែ​តូច​ទៅ ឯ​កូន​ចៅ​ក៏​កាន់​តែ​ច្រើន បើ​សិន​ជា​ដី​ហ្នឹង​បាន​ទៅ​ឈ្មួញ ប្រជាជន​ក្រាំងលាវ អត់​មាន​ដី​ឲ្យ​កូន​ចៅ​ធ្វើ​ស្រែ​ទេ»

បុរស​អ្នក​ភូមិ​ម្នាក់​ទៀត​បន្ថែម​ថា រីឯ​ដី​របស់​គាត់​វិញ គាត់​បាន​កាន់​កាប់​តាំង​ពី​ឆ្នាំ​១៩៨០ មក​ម្ល៉េះ តែ​ឥឡូវ លោក​មេ​ឃុំ​ក៏​ឲ្យ​ក្រុម​និស្សិត​វាស់​ឲ្យ​អ្នក​ផ្សេង​ទៅ​វិញ។ គាត់​ថា ដោយ​អាជ្ញាធរ​ជា​អ្នក​បំពាន​លើ​ប្រជាពលរដ្ឋ ដូច្នេះ​ហើយ​ទើប​គាត់​មក​ពឹង​អង្គការ​ក្រៅ​រដ្ឋាភិបាល និង​ពឹង​ប្រព័ន្ធ​ផ្សព្វផ្សាយ​ឲ្យ​ជួយ​គាត់៖ «បើ​តាម​ការ​យល់ គឺ​គាត់​សម្អាង​ទៅ​លើ​ខ្សែ​រយៈ​ភូមិ ឃុំ ព្រោះ​គឺ​ជា​គ្រួសារ​បងប្អូន​គេ ម្ល៉ោះ​ហើយ​គេ​មាន​បំណង​ចង់​រំលែក​ដី​ហ្នឹង​ឲ្យ​បងប្អូន​គេ»

ឯកសារ​ដែល​វិទ្យុ​អាស៊ីសេរី ទទួល​បាន​បង្ហាញ​ថា ដី​នេះ​ធ្លាប់​មាន​ទំនាស់​ប្ដឹង​ផ្ដល់​គ្នា​ដល់​តុលាការ​កំពូល រវាង​ប្រជាពលរដ្ឋ​ក្នុង​ភូមិ និង​អ្នក​ទិញ​ដី​ពី​លោក​អតីត​មេ​ឃុំ​ក្រាំងលាវ គឺ​លោក ថោង ស៊ីម។ សាល​ដីកា​តុលាការ​កំពូល បាន​សម្រេច​ឲ្យ​ភាគី​អ្នក​ភូមិ​ជា​អ្នក​ឈ្នះ​ក្ដី។ អាជ្ញាធរ​ភូមិ ឃុំ ក៏​បាន​ដឹង​ឮ​រួច​ហើយ​ដែរ តែ​លុះ​ដល់​ក្រុម​និស្សិត​មក​វាស់វែង អាជ្ញាធរ​ភូមិ ឃុំ បែរ​ជា​ឲ្យ​ក្រុម​និស្សិត​វាស់វែង​ឲ្យ​ភាគី​ចាញ់​ក្ដី​ដែរ ទើប​ប្រជាពលរដ្ឋ​ធ្វើ​ការ​តវ៉ា​ដូច្នេះ។

ពន្យល់​ចំពោះ​បញ្ហា​នេះ មេ​ឃុំ​ក្រាំងលាវ គឺ​លោក កែ រិន មាន​ប្រសាសន៍​ថា ដោយ​ភាគី​អ្នក​ចាញ់​ក្ដី​ក៏​មាន​លិខិត​កាន់​កាប់​ដីធ្លី​ដែរ ទើប​អាជ្ញាធរ​សម្រេច​ឲ្យ​និស្សិត​វាស់វែង​ឲ្យ​យ៉ាង​ដូច្នេះ៖ «អា​នេះ​គឺ​គេ​មាន​សិទ្ធិ​ដូច​គ្នា ម្ចាស់​ដី​ក៏​មាន​សិទ្ធិ ប្រជារាស្ត្រ​ក៏​មាន​សិទ្ធិ ទាំង​២​ហ្នឹង​មាន​សិទ្ធិ​ដូច​គ្នា។ ម្ចាស់​ដី​គេ​មាន​ប័ណ្ណ ឯ​ប្រជារាស្ត្រ​ក៏​មាន​សិទ្ធិ ដល់​អ៊ីចឹង ខ្ញុំ​ឲ្យ​វាស់​ទាំងអស់​គ្នា​ទៅ ដល់​មាន​ទំនាស់ គេ​នាំគ្នា​មក​ដោះស្រាយ​ទៅ អាជ្ញាធរ​នឹង​ដោះស្រាយ​ជូន»

មន្ត្រី​សម្រប​សម្រួល​សមាគម​អាដហុក ការពារ​សិទ្ធិ​មនុស្ស ខេត្ត​កំពង់ឆ្នាំង លោក សំ ច័ន្ទគា មាន​ប្រសាសន៍​ថា អាជ្ញាធរ​ភូមិ ឃុំ ត្រូវ​ទទួល​ខុស​ត្រូវ​ទាំង​ស្រុង​ចំពោះ​មុខ​ច្បាប់ ព្រោះ​បាន​ដឹង​ពី​ការ​សម្រេច​របស់​សាល​ដីកា​តុលាការ​កំពូល សម្រេច​ថា​អ្នក​ភូមិ​ជា​ម្ចាស់​ដី​ហើយ តែ​អាជ្ញាធរ​នៅ​តែ​បំពាន៖ «មន្ត្រី ឬ​អាជ្ញាធរ​ដែល​បាន​ប្រើ​អំណាច​ដោយ​រំលោភ គេ​បាន​ដឹង​ដី​នោះ​គេ​មាន​ម្ចាស់​ហើយ នៅ​តែ​ទៅ​ចង្អុល​បង្ហាញ​ឲ្យ​ជំនាញ ឬ​ក្រុម​និស្សិត​ធ្វើ​ការ​វាស់វែង​លើ​ដី​របស់​ប្រជាពលរដ្ឋ​ឲ្យ​អ្នក​ដទៃ​ទៀត នោះ​គួរ​តែ​ត្រូវ​ផ្ដន្ទាទោស គួរ​តែ​នាំ​ទៅ​ផ្ដន្ទាទោស​តាម​ផ្លូវ​ច្បាប់»

លោក សំ ច័ន្ទគា បន្ត​ថា ករណី​ប្រហាក់​ប្រហែល​គ្នា​នេះ បាន​កើត​មាន​នៅ​ច្រើន​កន្លែង​ទៀត​ក្នុង​ខេត្ត​កំពង់ឆ្នាំង ដែល​រាជ​រដ្ឋាភិបាល និង​អង្គភាព​ប្រឆាំង​អំពើ​ពុក​រលួយ​គួរ​តែ​ធ្វើ​ការ​ស្រាវជ្រាវ ដើម្បី​ជួយ​ដោះស្រាយ​ជូន​ប្រជាពលរដ្ឋ៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

មតិ (0)
  • បោះពុម្ព
  • ចែករំលែក
  • អ៊ីម៉ែល