អ្នកភូមិចោទថា ក្រុមហ៊ុនឈូសឆាយរំលោភយកដីសហគមន៍ទើបអ្នកភូមិលើក គ្នាទៅការពារដីដែលក្រុមហ៊ុនប៉ុនប៉ងយកដាំកៅស៊ូ។
ជម្លោះស្រែកតវ៉ាតទល់គ្នារវាងពលរដ្ឋជនជាតិដើមភាគតិចនៅភូមិឆ្នែង ឃុំស្រែខ្ទុំ ស្រុកកែវសីមា កើតមាននៅព្រឹកថ្ងៃអាទិត្យ ទី៩ ខែកុម្ភៈ បន្ទាប់ពីក្រុមហ៊ុន សុវណ្ណ រាជសី បានរារាំងមិនឲ្យប្រជាពលរដ្ឋចូលទៅគ្រប់គ្រងដីប្រមាណជាង ១០០ហិកតារ ដែលអ្នកភូមិអះអាងថា ជាដីសហគមន៍អភិរក្ស។
មិនមានអំពើហិង្សាកើតឡើងទេ ក៏ប៉ុន្តែអ្នកភូមិចោទប្រកាន់ភាគីក្រុមហ៊ុន បុគ្គលិកជាជនជាតិវៀតណាម ថាប្រើប្រាស់កងកម្លាំងរាជរដ្ឋាភិបាល មានប៉ូលិស និងកងរាជអាវុធហត្ថប្រដាប់ដោយកាំភ្លើង គំរាមប្រជាពលរដ្ឋក្នុងការតវ៉ានេះ។
អ្នកតវ៉ាម្នាក់ឈ្មោះ មឿន ឃឿន មានប្រសាសន៍បញ្ជាក់ថា មិនមានមន្ត្រីអាជ្ញាធរមានសមត្ថកិច្ចមូលដ្ឋានមានវត្តមានដោះស្រាយការប្រឈមមុខដាក់គ្នានោះទេ ក៏ប៉ុន្តែបុគ្គលិកក្រុមហ៊ុនអមដោយកងប្រដាប់អាវុធមានគ្នា ១០នាក់ បានដកថយ ហើយព្រមានថា នឹងនាំកងកម្លាំងថ្នាក់ខេត្តមកបង្ក្រាបប្រជាពលរដ្ឋនៅវេលារសៀលទៀត។
លោកបន្តថា ក្រុមហ៊ុនបានរំលោភឈូសឆាយដីសហគមន៍ ហេតុនេះអ្នកភូមិបាននាំគ្នាមកការពារដីកុំឲ្យក្រុមហ៊ុនឈូសឆាយយកជាលើកទី២ទៀត៖ «ក្រុមហ៊ុនសុវណ្ណ រាជសី គេឈូសឆាយ ប៉ុន្មានឆ្នាំមុន ឥឡូវនៅសល់តិចតួចហ្នឹង ពួកខ្ញុំចង់ដណ្ដើមយកពីក្រុមហ៊ុន។ ក្រុមហ៊ុនធ្វើបាន ពួកខ្ញុំប្រជាពលរដ្ឋធ្វើមិនបាន ពួកខ្ញុំមានដីសហគមន៍ ចុងក្រោយពីខ្ញុំគ្មានដីសហគមន៍តិចតួចណាផង»។
សេចក្ដីរាយការណ៍របស់អាជ្ញាធរភូមិឆ្នែង ឲ្យដឹងថា ដីដែលកើតមានជម្លោះមានទំហំជាង ១២៥ហិកតារ ឋិតនៅចំណុចក្បាលដំរី ក្នុងឃុំស្រែខ្ទុំ ជាអតីតព្រៃសហគមន៍ភូមិឆ្នែង ១២៤គ្រួសារ ត្រូវបានក្រុមហ៊ុនសុវណ្ណ រាជសី ឈូសឆាយកាលពីឆ្នាំ២០១៣ ប៉ុន្តែមិនទាន់បានដាំដុះ។
ប្រធានភូមិឆ្នែង លោក ខៀវ សំបូរ មានប្រសាសន៍បញ្ជាក់ថា កន្លងទៅនេះក្រុមមន្ត្រីពាក់ព័ន្ធបានចុះសម្របសម្រួលបោះបង្គោលកំណត់ព្រំដីក្រុមហ៊ុន និងដីសហគមន៍រួចហើយ ប៉ុន្តែក្រុមហ៊ុននៅតែឈូសឆាយចូលដីសហគមន៍ ទើបអ្នកភូមិនាំគ្នាទៅវាស់យកដីដែលក្រុមហ៊ុនឈូសឆាយនោះមកវិញ។
លោកទទួលស្គាល់ថា ក្រុមហ៊ុនពិតជាបានប្រើប្រាស់កងកម្លាំងប្រដាប់អាវុធ បណ្ដេញអ្នកភូមិចេញពីដីទំនាស់៖ «វាមិនតាមដែលវាថាហ្នឹងណា វាចេះតែវាងៗ ធ្លាក់លើស្រែដដែល អ៊ីចឹងហើយបានជាប្រជាពលរដ្ឋមិនសុខចិត្តគេហ្នឹង កងកម្លាំងប្រដាប់អាវុធហ្នឹង កាំភ្លើងហ្នឹង ៥ដើម កាំភ្លើងខ្លី ២ដើម អាកាហ្នឹង ៣ដើម»។
វិទ្យុអាស៊ីសេរី នៅថ្ងៃទី៩ ខែកុម្ភៈ បានទូរស័ព្ទទាក់ទងតំណាងក្រុមហ៊ុនសុវណ្ណ រាជសី សុំបញ្ជាក់ពីករណីនេះ ប៉ុន្តែអ្នកទទួលទូរស័ព្ទបញ្ជាក់ថា លោកមិនមានវត្តមានក្នុងប្រទេសទេ។
ទាក់ទិនករណីនេះដែរ មេឃុំស្រែខ្ទុំ លោក ប៊ុត សំអែល មានប្រសាសន៍បញ្ជាក់ថា លោកបានទទួលព័ត៌មានស្ដីពីការប្រឈមមុខដាក់គ្នានេះពីមេភូមិហើយ។ លោកគ្រោងរៀបចំកម្មវិធីដោះស្រាយបញ្ហានេះ ប៉ុន្តែលោកមិនទាន់កំណត់ពេលនៅឡើយ ដោយសាររង់ចាំឆ្លងយោបល់ពីអភិបាលស្រុក៖ «វាមានការទាមទារ អ៊ីចឹងក្រោយពីស្រុកសម្រុះសម្រួលឈានដល់ការចែកព្រំប្រទល់គ្នា។ មូលដ្ឋានខ្ញុំមានតែហៅគាត់មកសម្របសម្រួល គាត់មិនពេញចិត្តកន្លងមក ខ្ញុំរាយការណ៍ជូនអភិបាលស្រុក»។
មន្ត្រីឃ្លាំមើលសិទ្ធិមនុស្សសមាគមអាដហុក ខេត្តមណ្ឌលគិរី លោក សុខ រដ្ឋា បានចុះទៅឃ្លាំមើលបញ្ហានេះ បានកត់សម្គាល់ថា រហូតមកទល់នឹងរសៀលម៉ោង ៤ មិនឃើញមានសមត្ថកិច្ចណាចុះមកដូចការព្រមានរបស់បុគ្គលិកក្រុមហ៊ុនទេ។ ចំណែកអ្នកតវ៉ាបានសម្រេចចិត្តធ្វើការតវ៉ាបន្តទៀត ពីព្រោះពួកគាត់អះអាងថា ដីសហគមន៍ រួមទាំងព្រៃឈើតំណមរបស់អ្នកភូមិ ត្រូវក្រុមហ៊ុនឈូសឆាយអស់ហើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។