សហគមន៍ជនជាតិដើមភាគតិច ២០ក្រុម មកពីស្រុកចំនួន៥ ក្នុងខេត្តមណ្ឌលគិរី នាំយកញត្តិតវ៉ានិងពាក្យប្ដឹងច្រើនករណីដាក់ជូនអាជ្ញាធរខេត្តទាមទារឲ្យដោះស្រាយ។ បញ្ហាទាំងនោះ រួមមានការរំលោភដីធ្លី បញ្ហាកាប់បំផ្លាញព្រៃឈើធ្វើឲ្យមានផលប៉ះពាល់ច្រើនដល់ប្រជាពលរដ្ឋជនជាតិដើមភាគតិច និងធនធានធម្មជាតិ។ នេះជាលើកទីពីរក្នុងឆ្នាំ២០១៤ ដែលសហគមន៍នាំគ្នាយកញត្តិទាមទារឲ្យអាជ្ញាធរខេត្តដោះស្រាយបញ្ហាជូនពលរដ្ឋ។
អាជ្ញាធរខេត្តមណ្ឌលគិរី នៅព្រឹកថ្ងៃទី២៨ ខែមេសា បានអនុញ្ញាតឲ្យតំណាងប្រជាពលរដ្ឋប្រមាណ ២០នាក់មកពីសហគមន៍នានាក្នុងខេត្តជួបពិភាក្សាតវ៉ាពីបញ្ហារំលោភដីធ្លីនិងសកម្មភាពកាប់បំផ្លាញព្រៃឈើនៅមូលដ្ឋានប្រជាពលរដ្ឋរស់នៅ។
ការជួបពិភាក្សានេះធ្វើឡើងបន្ទាប់ពីប្រជាសហគមន៍ប្រមាណ ២០០នាក់ បាននាំគ្នាយកញត្តិតវ៉ា និងពាក្យបណ្ដឹងច្រើនករណីដាក់ជូនអាជ្ញាធរខេត្តធ្វើការដោះស្រាយឲ្យមានប្រសិទ្ធភាព។
តំណាងសហគមន៍ជនជាតិព្នងមកពីស្រុកពេជ្រាដា លោក ឃុត ចាន់រ៉ា រៀបរាប់ថា ក្នុងកិច្ចប្រជុំពិភាក្សានេះក្រុមមន្ត្រីអាជ្ញាធរពាក់ព័ន្ធក្នុងខេត្តបានសន្យាថា នឹងធ្វើការស៊ើបអង្កេតសិក្សាបញ្ហាតវ៉ារបស់សហគមន៍ ប៉ុន្តែសហគមន៍មានជំនឿតិចតួចថា ការសន្យានេះអាចមានការដោះស្រាយបានលទ្ធផលល្អ។
លោកបន្តថា យ៉ាងណាសហគមន៍ផ្ដល់លទ្ធភាពជូនមន្ត្រីអាជ្ញាធរដើម្បីធ្វើឲ្យមានជំនឿឡើងវិញពីពលរដ្ឋទាក់ទិនការបំពេញតួនាទីរបស់ខ្លួនជាមន្ត្រីបម្រើរាស្ត្រពិតប្រាកដ៖ «ប្រហែលជាសន្យាខ្យល់ ឬសន្យាយ៉ាងម៉េចខ្ញុំអត់ដឹងទេ ប៉ុន្តែគាត់សន្យាថា នឹងអនុវត្តបង្ក្រាបបទល្មើសព្រៃឈើ រួមគ្នាបង្ក្រាបទាំងប្រជាពលរដ្ឋ ទាំងអាជ្ញាធរ ហើយបញ្ហាដីធ្លីគាត់ថា នឹងព្យាយាមដោះស្រាយបណ្តើរៗ។ ឥឡូវទុកឱកាសឲ្យអាជ្ញាធរគេមានដំណោះស្រាយ ឬធ្វើការយ៉ាងម៉េចៗសិន»។
ញត្តិតវ៉ាសំខាន់គឺតំណាងឲ្យប្រជាពលរដ្ឋ ៨ភូមិ មកពីស្រុកពេជ្រាដា ៥ភូមិ និងស្រុកអូររាំង ៣ភូមិ ទាមទារឲ្យអាជ្ញាធរខេត្តស្នើសុំទៅរាជរដ្ឋាភិបាលឲ្យលប់ចោលសម្បទានដីសេដ្ឋកិច្ចជាង ៩ពាន់ហិកតារ នៅតំបន់ដែនជម្រកសត្វព្រៃណាំលា ពីក្រុមហ៊ុនឈ្មោះ មេហ្គា ហ្វឺស ខបផូរ៉េសិន ប៊ឺហេដ (Mega First Corporation Berhad) និងពាក្យប្ដឹងពីបញ្ហារំលោភដីធ្លីពីសំណាក់ក្រុមហ៊ុន សុវណ្ណ រាជសី និងក្រុមហ៊ុន ឫទ្ធីគីរីសីមា។
ឆ្លើយតបបញ្ហានេះ អភិបាលរងខេត្តមណ្ឌលគិរី លោក យឹម លុច មានប្រសាសន៍បញ្ជាក់ថា អាជ្ញាធរខេត្តនឹងធ្វើការដោះស្រាយបញ្ហាជាមួយបណ្ដាក្រុមហ៊ុនដែលមានការពាក់ព័ន្ធជាមួយប្រជាពលរដ្ឋផ្ទាល់។ លោកបន្តថា ករណីក្រុមហ៊ុនសម្បទាននៅតំបន់ដែនជម្រកសត្វព្រៃភ្នំណាំលា អាជ្ញាធរខេត្តបានស្នើសុំតាមរយៈក្រសួងមហាផ្ទៃ រក្សាតំបន់នោះជាតំបន់អភិរក្សតាមសំណើប្រជាពលរដ្ឋរួចហើយ។ ដោយឡែកក្រុមហ៊ុនចំនួនពីរទៀត គឺក្រុមហ៊ុនសុវណ្ណ រាជសី និងក្រុមហ៊ុន ឬទ្ធីគីរីសីមា អាជ្ញាធរខេត្តក៏បានធ្វើការដោះស្រាយបញ្ហាជូនប្រជាពលរដ្ឋជាបន្តបន្ទាប់ដូចគ្នា។
លោក យឹម លុច៖ «ភាគច្រើនគាត់សំណូមពរតាមផ្នែកនីមួយៗ អ្នកខ្លះមានទុក្ខកង្វល់រឿងនេះមួយ អ្នកខ្លះមានទុក្ខកង្វល់រឿងនេះពីរ។ ផ្ដោតជាសំខាន់ទៅលើរឿងព្រៃឈើហ្នឹង។ ខ្ញុំបានដោះស្រាយជាមួយគាត់ហើយ យើងនឹងធ្វើការជាមួយក្រុមហ៊ុនណាដែលមានការពាក់ព័ន្ធជាមួយគាត់»។
ទាក់ទិនករណីនេះដែរ មន្ត្រីឃ្លាំមើលសិទ្ធិមនុស្សសមាគមអាដហុក ខេត្តមណ្ឌលគិរី លោក សុក រដ្ឋា កត់សំគាល់ថា ការជួបពិភាក្សារវាងមន្ត្រីអាជ្ញាធរខេត្ត និងសហគមន៍បង្ហាញឲ្យឃើញពីឆន្ទៈរួមគ្នាដោះស្រាយបញ្ហារបស់ប្រជាពលរដ្ឋ។ លោកបន្តថា ប្រសិនអាជ្ញាធរធ្វើឲ្យប្រាកដថា បញ្ហារបស់ប្រជាពលរដ្ឋពិតជាបានដោះស្រាយនោះ វានឹងឆ្លុះបញ្ចាំងពីជំនឿប្រជាពលរដ្ឋលើមន្ត្រីមូលដ្ឋាន៖ «អ្វីដែលសហគមន៍លើកឡើងនិងអ្វីដែលអាជ្ញាធរខេត្តបានសន្យាហ្នឹង ប្រសិនបើអាជ្ញាធរខេត្តមានឆន្ទៈធ្វើទៅតាមការស្នើផ្ទាល់របស់ពលរដ្ឋឲ្យមានប្រសិទ្ធភាព ប្រជាពលរដ្ឋនឹងមានជំនឿលើ»។
កាលពីខែមីនា កន្លងទៅ តំណាងសហគមន៍ជនជាតិដើមភាគតិចព្នង មកពីឃុំចំនួន៦ ក្នុងស្រុកអូររាំង ពេជ្រាដា ស្រុកកែវសីមា និងក្រុងសែនមនោរម្យ បានដាក់ញត្តិទាមទារឲ្យអាជ្ញាធរខេត្តថ្កោលទោសឧក្រិដ្ឋជនព្រៃឈើតាំងពីឆ្នាំ២០០២ រហូតបច្ចុប្បន្ន និងទាមទារឲ្យមានការផ្ដន្ទាទោសពួកគេតាមច្បាប់កំណត់ ក៏ប៉ុន្តែមិនទាន់ឃើញមានការឆ្លើយតបតាមសំណើប្រជាពលរដ្ឋនៅឡើយ។ តំណាងសហគមន៍ដដែលឲ្យដឹងថា ពួកគេនឹងបន្តការតវ៉ាជាថ្មីទៀត ប្រសិនការសន្យារបស់អាជ្ញាធរខេត្តមិនបង្ហាញពីឆន្ទៈពិតប្រាកដនោះទេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។