ចៅក្រមជំនុំជម្រះរឿងក្ដីឆបោករបស់សកម្មជនដីធ្លី និងព្រៃឈើ លោក គុជ វេង បានប្រកាសផ្ដន្ទាទោសឲ្យជាប់ពន្ធនាគាររយៈពេល ១ឆ្នាំ ក៏ប៉ុន្តែអនុវត្តទោសនៅក្នុងពន្ធនាគារតែរយៈពេល ៣ខែ ១៥ថ្ងៃប៉ុណ្ណោះ។
សង្គមស៊ីវិលបញ្ជាក់ថា ការសម្រេចទោសនេះ គឺធ្វើឡើងដោយពុំមានភាពយុត្តិធម៌ ពីព្រោះចៅក្រមបានផ្អែកតែទៅលើសាក្សីដាក់បន្ទុកម្នាក់ និងមិនបានយកចម្លើយសាក្សីដោះបន្ទុកទៅអនុវត្ត។
មន្ត្រីសម្របសម្រួលសមាគមអាដហុក (Adhoc) ប្រចាំខេត្តពោធិ៍សាត់ លោក ភួង សុធា មានប្រសាសន៍ថា សាក្សីដាក់បន្ទុកមានរហូតដល់ ៤នាក់ ក៏ប៉ុន្តែបានមកចូលរួមក្នុងសវនាការតែម្នាក់ ហើយចម្លើយសាក្សីដាក់បន្ទុកពុំមានភាពច្បាស់លាស់នោះទេ៖ «មានសាក្សីជាច្រើនបានបញ្ជាក់ថា លោក គុជ វេង មិនបានប្រព្រឹត្ត ហើយសាក្សីសម្រាប់សាក្សីដាក់បន្ទុកនោះ គឺអត់បានបង្ហាញជាក់លាក់ថា គុជ វេង ប្រាកដជាប្រព្រឹត្តអីចឹងមែន»។
ចំណែកមេធាវីការពារក្ដីឲ្យចុងចោទ លោក ចាន់ សុជាតិ បានបញ្ជាក់ថា កូនក្ដីរបស់លោកមិនទាន់ទទួលបានយុត្តិធម៌នៅឡើយទេ ហើយលោកនឹងសួរយោបល់កូនក្ដីលោកបន្តទៀតថា តើត្រូវប្ដឹងទៅសាលាឧទ្ធរណ៍បន្តទៀត ឬយ៉ាងណា៖ «វាអត់មានអីស៊ីសង្វាក់ទេ ដោយសារវាដាច់ដោយឡែកពីគ្នា ត្រង់ថាពេលវេលានៃការចោទប្រកាន់ ហើយពេលវេលាដែលគាត់មានវត្តមានខុសគ្នា ព្រោះថាអាថ្ងៃដែលគេចោទថាគាត់ទៅយកលុយ គឺថ្ងៃហ្នឹងគាត់មកប្រជុំនៅអង្គការលីកាដូ (Licadho) ខេត្តពោធិ៍សាត់។ អីចឹង មនុស្សអត់ស្ថិតនៅក្នុងពេលវេលា និងទីកន្លែងគ្នា អីចឹងវាអត់អាចមានបទល្មើសកើតឡើងទេ»។
ចៅក្រមជំនុំជម្រះក្ដី លោក ម៉ៅ ស៊ីណា បានបដិសេធមិនអត្ថាធិប្បាយជុំវិញដីកាសម្រេចទោស លោក គុជ វេង នោះទេ នៅរសៀលថ្ងៃទី២០ សីហា ដោយលោកបានជំរុញឲ្យវិទ្យុអាស៊ីសេរី ទៅសួរតំណាងអយ្យការនៃសាលាដំបូងខេត្តពោធិ៍សាត់ លោក ប៉ង់ ចាន់សុយុទ្ធារ៉ា ដើម្បីបកស្រាយបន្ថែមលើសាលក្រមនេះ។
ចំណែក លោក ប៉ង់ ចាន់សុយុទ្ធារ៉ា មានប្រសាសន៍យ៉ាងខ្លីថា សំណុំរឿងនៅក្នុងដៃរបស់ចៅក្រម ហើយចៅក្រមជាអ្នកសម្រេច ដោយផ្អែកលើការដាក់បន្ទុក ឬដោះបន្ទុកយ៉ាងណានោះ គឺជារឿងរបស់ចៅក្រម៖ «បើថាការហ្នឹងពិនិត្យឃើញថា វាមិនអាចទទួលយកបាន យើងអាចឲ្យពិរុទ្ធជនហ្នឹងប្ដឹងឧទ្ធរណ៍ទៅដើម្បីឲ្យខាងលើគេពិនិត្យទៀត»។
តំណាងសហគមន៍ដែលបានធ្វើដំណើរមកពីបណ្ដាខេត្តផ្សេងៗជាង ២០នាក់ ក្នុងគោលបំណងមកចូលរួមស្ដាប់សវនាការនៅសាលាដំបូងខេត្តពោធិ៍សាត់ នាព្រឹកថ្ងៃទី២០ សីហា បានសម្ដែងក្ដីបារម្ភចំពោះដីកាសម្រេចរបស់ចៅក្រមថា បានដាក់សម្ពាធកាន់តែធ្ងន់ធ្ងរសម្រាប់គ្រួសារ និង លោក គុជ វេង។
តំណាងសហគមន៍ម្នាក់មកពីខេត្តបន្ទាយមានជ័យ អ្នកស្រី ភឿង គឹមហួយ បញ្ជាក់ថា ក្រុមប្រជាពលរដ្ឋ និងតំណាងសហគមន៍ ទន្ទឹងចាំមើលការដោះលែង លោក គុជ វេង ចេញពីពន្ធនាគារនៅក្នុងរយៈពេល ១៥ថ្ងៃ ក្រោយការប្រកាសសាលក្រមនេះ៖ «ខ្ញុំត្រេកអរណាស់ដែលគេបានដោះលែង លោក គុជ វេង ប៉ុន្តែដែលខ្ញុំបារម្ភមួយទៀត គឺទាក់ទងទៅនឹង ១៥ថ្ងៃ ហើយខ្លាចអត់បានដោះលែង ហើយមួយទៀតបែរជាឲ្យគាត់សងលុយទៅដើមបណ្ដឹង ៤.៥០០ដុល្លារ អីចឹងសម្រាប់ លោក គុជ វេង គាត់អត់បានយក គាត់មិនដឹងបានលុយពីណាសងគេទេ»។
ការចាប់ខ្លួនរបស់សកម្មជនដីធ្លី និងព្រៃឈើ ប្រចាំស្រុកក្រគរ លោក គុជ វេង នៅថ្ងៃទី១៩ ខែឧសភា ឆ្នាំ២០១៣ ត្រូវបានសង្គមស៊ីវិលជាតិ និងអន្តរជាតិជាច្រើន ចេញសេចក្ដីថ្លែងការណ៍ជំរុញឲ្យមានការដោះលែង ដោយសង្គមស៊ីវិលទាំងនោះបានចាត់ទុកករណីចោទប្រកាន់នេះ គឺកើតចេញពីភាពសកម្មនិយមរបស់លោកក្នុងការការពារដីធ្លី និងព្រៃឈើ ពីសំណាក់អ្នកមានលុយ និងមានអំណាច៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។