ប្រជាពលរដ្ឋម្នាក់ឈ្មោះ ឡូញ រ័ត្នមុនី បានអោយដឹងនៅថ្ងៃទី២៣ វិច្ឆិកា ថា អ្នកស្រីបានរស់នៅក្នុងភូមិពោងពាយ តាំងពីឆ្នាំ១៩៩១ ហើយសព្វថ្ងៃអ្នកស្រីមានផ្ទះល្វែងមួយខ្នងបណ្តោយ ១០ម៉ែត្រ។ អ្នកស្រីថា គម្រោងរបស់សាលារាជធានីភ្នំពេញ សាងសង់ផ្លូវចាក់បេតុងនោះ នឹងប៉ះពាល់លើផ្ទះរបស់អ្នកស្រីទាំងមូល តែសាលាក្រុងមិនបាននិយាយដល់ការសងសំណងឡើយ។
អ្នកស្រី ឡូញ រ័ត្នមុនី៖ «គ្រាន់តែថាចង់អ៊ីចេះ យើងមិនមែនឃាត់ឃាំងគេអោយអភិវឌ្ឍទេ អោយអភិវឌ្ឍ ក៏ប៉ុន្តែធ្វើម៉េចដោះស្រាយអោយប្រជាពលរដ្ឋដែលគ្នារស់នៅតាំងពីឆ្នាំ១៩៩១ ហើយជាប្រជាពលរដ្ឋមួយដែរ ហើយបើយើងមិនដោះស្រាយអោយគេទៅរស់នៅណាទៅ និយាយរួមទៅអត់មាននិយាយថា តើផ្ទះរបស់យើងអោយប៉ុន្មានម៉ឺនៗ គឺអត់និយាយហ្មង និយាយតែរឿងធ្វើផ្លូវហ្មង បើសិនជានិយាយថា ដោះស្រាយអោយយើង អោយផ្ទះយើងតម្លៃប៉ុន្មាន បើសិនយើងមិនយល់ព្រមទេ សឹមគិតគ្នាទៀត ប៉ុន្តែអត់និយាយជាមួយយើងហ្មង»។
បើតាមលិខិតដែល អ្នកស្រី ឡូញ រ័ត្នមុនី ទទួលបានពីសាលាខណ្ឌសែនសុខ កាលពីថ្ងៃទី១២ វិច្ឆិកា ឆ្នាំ២០១៣ អោយដឹងថា សាលារាជធានីភ្នំពេញ នឹងចាប់ផ្ដើមដំណើរការជួសជុលសាងសង់ផ្លូវបេតុងលេខ១០០៣ ទំហំ ២០ម៉ែត្រ ស្ថិតក្នុងភូមិពោងពាយ ខណ្ឌសែនសុខ។ សាលាខណ្ឌបានស្នើអោយពលរដ្ឋដែលរស់នៅតាមបណ្តោយផ្លូវលេខ១០០៣ រុះរើសំណង់គ្រប់ប្រភេទចេញពីផ្លូវសាធារណៈ ហើយព្រមានថា ក្នុងករណីម្ចាស់ដីឡូត៍ណាមិនចូលរួមសហការ សាលាខណ្ឌសែនសុខ នឹងមិនទទួលខុសត្រូវរាល់ការខូចខាត ឬបាត់បង់ទ្រព្យសម្បត្តិនោះឡើយ។
វិទ្យុអាស៊ីសេរី មិនអាចសុំការបំភ្លឺពីអភិបាលខណ្ឌសែនសុខ លោក លី សាវ៉េត បានទេ នៅថ្ងៃទី២៣ វិច្ឆិកា ដោយលោកបានដាក់ទូរស័ព្ទចុះ បន្ទាប់ពីដឹងថា វិទ្យុអាស៊ីសេរី ទូរស័ព្ទទៅ។
អ្នកស្រី ឡូញ រ័ត្នមុនី និយាយថា អ្នកស្រីនឹងមិនរុះរើផ្ទះរបស់អ្នកស្រីឡើយ ប្រសិនបើគ្មានសំណងអោយបានត្រឹមត្រូវជាមុន។ អ្នកស្រីនឹងធ្វើលិខិតតវ៉ាទៅសាលាខណ្ឌសែនសុខ នៅសប្ដាហ៍ក្រោយ ដើម្បីអោយរកដំណោះស្រាយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។