ប្រជាពលរដ្ឋឃុំជាំក្រវៀន ស្រុកមេមត់ ខេត្តត្បូងឃ្មុំ ដែលមានបញ្ហាដីធ្លីជាមួយក្រុមហ៊ុន ម៉ែន សារុន ប្រមាណជា ១០០នាក់ នាំគ្នាឡើងមកសាលាស្រុកមេមត់ នៅព្រឹកថ្ងៃទី១ ខែសីហា ដើម្បីស្នើឱ្យអាជ្ញាធរពាក់ព័ន្ធ ធ្វើការដោះស្រាយបញ្ហារបស់ពួកគាត់។ អាជ្ញាធរស្រុក បានទទួលពាក្យបណ្ដឹងរបស់ពួកគាត់ ដោយសន្យាថានឹងមានការប្រជុំពិភាក្សាគ្នាលើបញ្ហានេះនៅសប្ដាហ៍ក្រោយ។
ប្រជាពលរដ្ឋនៅឃុំជាំក្រវៀន ដាក់ពាក្យប្ដឹងទៅអាជ្ញាធរស្រុក ឱ្យដោះស្រាយបញ្ហាដីធ្លីរបស់ពួកគាត់ជាមួយក្រុមហ៊ុន ម៉ែន សារុន ដែលបានឈូសឆាយលើដីដំណាំរបស់ពួកគាត់។
ប្រជាពលរដ្ឋម្នាក់រស់នៅឃុំជាំក្រវៀន ស្រុកមេមត់ លោក ផុន សុផល ឱ្យដឹងថា ពួកគាត់បាននាំគ្នាទៅហាមឃាត់ត្រាក់ទ័រឈូសឆាយ និងជីកជាប្រឡាយលើដី ដែលលោកអះអាងថា ប្រជាពលរដ្ឋបានកាន់កាប់ជាច្រើនឆ្នាំហើយនោះ ជាច្រើនលើកច្រើនសាមកហើយ។ ប៉ុន្តែស្ងាត់ៗ គឺខាងភាគីក្រុមហ៊ុន យកអាត្រាក់ទៅជីកប្រឡាយព័ទ្ធជារបងព្រំដីតែម្តង ដោយអះអាងថា ដីតំបន់នោះជាដីក្រុមហ៊ុន ហើយប្រជាពលរដ្ឋទៅវិញទេ ដែលបានកាន់កាប់ដីខុសច្បាប់ ប៉ុន្តែពួកគាត់ឆ្ងល់ថា ពីដំបូងឡើយមិនដឹងជាក្រុមហ៊ុននៅទីណាទេ តែពេលពួកគាត់ដាំដំណាំបានហើយ បែរជាក្រុមហ៊ុនអះអាងថា ជាដីរបស់ខ្លួនទៅវិញ។
លោក ផុន សុផល៖ «ខ្ញុំគិតថា ដីហ្នឹងមិនមែនជាដីរបស់ក្រុមហ៊ុនទេ ពីព្រោះថា មិនឃើញអ្វីជាភស្តុតាងរបស់ក្រុមហ៊ុន ដូចថាឃើញថាជាក្រវាត់ ជាប្រឡាយ ឬដំណាំអីជារបស់ក្រុមហ៊ុន។ ប្រជាពលរដ្ឋទៅហ្នឹងឃើញតែជាព្រៃស្រោងព្រៃធំ នាំគ្នាកាប់ឆ្ការ ដើម្បីកាន់កាប់ទៅរហូតដល់ប្រជាពលរដ្ឋធ្វើច្រើនឆ្នាំកន្លង មានអ្នកខ្លះ ១០ឆ្នាំ ៨ឆ្នាំ ៦ឆ្នាំ ៣ ឬ៤ឆ្នាំអ៊ីចឹងទៅ ស្រាប់តែក្រុមហ៊ុនឃើញស្រឡះមកវាត់ និងពុះឡូយកហ្មង»។
ប្រភពដដែលបន្តថា ប្រជាពលរដ្ឋជាង ១០០គ្រួសារ សុំឱ្យអាជ្ញាធរបញ្ឈប់ការឈូសឆាយរបស់ក្រុមហ៊ុនជាមុន ទម្រាំមានការដោះស្រាយណាមួយដល់ពួកគាត់។ ហើយប្រសិនបើនៅតែមិនមានដំណោះស្រាយសម្រាប់ពួកគាត់ទេ ប្រជាពលរដ្ឋទាំងនោះនឹងឡើងទៅតវ៉ានៅរាជធានីភ្នំពេញតែម្តង។
វិទ្យុអាស៊ីសេរី ព្យាយាមទាក់ទងតំណាងក្រុមហ៊ុន ម៉ែន សារុន លោក សុខ វាសនា ប៉ុន្តែលោកមិនលើកទូរស័ព្ទ នៅថ្ងៃទី១ សីហា។ ប៉ុន្តែ លោកធ្លាប់មានប្រសាសន៍កាលពីពេលកន្លងទៅថា ដីតំបន់នោះជាដីរបស់ក្រុមហ៊ុន ទទួលសិទ្ធិវិនិយោគពីរដ្ឋាភិបាល ហើយប្រជាពលរដ្ឋទៅវិញទេ ដែលបាននាំគ្នាចូលទៅកាប់រុករានដីក្រុមហ៊ុនដាំដំណាំដោយលួចលាក់ និងខុសច្បាប់។
ចំណែកអភិបាលស្រុកមេមត់ លោក ចេង ប៊ុណ្ណារ៉ា មានប្រសាសន៍ថា ខាងលោកបានទទួលពាក្យបណ្ដឹងពីប្រជាពលរដ្ឋទាំងនោះហើយ ហើយពួកគាត់យល់ព្រមត្រឡប់ទៅផ្ទះវិញ បន្ទាប់ពីខាងអាជ្ញាធរស្រុក សន្យាថានឹងកោះហៅតំណាងប្រជាពលរដ្ឋ និងតំណាងក្រុមហ៊ុន មកធ្វើការដោះស្រាយនៅថ្ងៃច័ន្ទ សប្ដាហ៍ក្រោយ៖ «ចង់ដឹងច្បាស់ ចាំមកជួបផ្ទាល់។ ខ្ញុំអឺ! កំពុងរង់ចាំការដោះស្រាយសប្ដាហ៍ក្រោយជាមួយតំណាងក្រុមហ៊ុន និងតំណាងពួកគាត់ ហើយបើចង់ដឹងច្បាស់មកជួបផ្ទាល់»។
ទំនាស់ដីធ្លីរវាងប្រជាពលរដ្ឋជាមួយក្រុមហ៊ុន ម៉ែន សារុន ដែលអះអាងថា ទទួលបានដីសម្បទានពីរដ្ឋ នៅឃុំជាំក្រវៀន គឺកើតឡើងតាំងពីខែកុម្ភៈ ឆ្នាំ២០១៤ បន្ទាប់ពីក្រុមហ៊ុនដាក់គ្រឿងចក្រឈូសឆាយដីព័ទ្ធជារបងនៅលើផ្ទៃដីប្រមាណជាង ៣០០ហិកតារ ដែលមានពលរដ្ឋប្រមាណ ១៥០គ្រួសារ បានអាស្រ័យផល។ ប្រជាពលរដ្ឋ បាននាំគ្នាដាក់ពាក្យប្ដឹង និងសុំកិច្ចអន្តរាគមន៍ទៅអាជ្ញាធរឃុំស្រុកខេត្តជាច្រើនខែមកហើយ ប៉ុន្តែគ្មានដំណោះស្រាយដដែល៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។