ប្រជាពលរដ្ឋដែលមានទំនាស់ដីធ្លីជាមួយមន្ត្រីយោធាជាន់ខ្ពស់នៃក្រសួងការពារជាតិ ចំនួន ៩គ្រួសារ នៅក្រុងបាវិត ខេត្តស្វាយរៀង កំពង់ព្រួយបារម្ភខ្លាចបាត់បង់ដីដោយចាញ់ក្ដីក្នុងរឿងទំនាស់។ ក្ដីបារម្ភរបស់អ្នកស្រុកនេះ ដោយសាររឿងក្ដីក្នុងទំនាស់ដីនោះដោះស្រាយមិនចេញជាង ១០ឆ្នាំមកហើយ។ ប៉ុន្តែ មន្ត្រីយោធាដែលបានចុះអង្កេតពីបញ្ហាទំនាស់នេះ បញ្ជាក់ថា រឿងក្ដីនេះត្រូវដោះស្រាយបញ្ចប់នៅស្ថាប័នតុលាការ។
ក្រុមអ្នកភូមិដែលមានទំនាស់ដីនៅខេត្តស្វាយរៀង ចំនួនជាង ១២ហិកតារ បានអំពាវនាវសុំឲ្យលោកនាយករដ្ឋមន្ត្រី ហ៊ុន សែន និងស្ថាប័នពាក់ព័ន្ធនឹងបញ្ហានេះ ជួយអន្តរាគមន៍ និងពន្លឿនការដោះស្រាយក្នុងទំនាស់ដីឲ្យមានតម្លាភាព។ ប្រជាពលរដ្ឋថ្លែងដូចនេះ បន្ទាប់ពីស្វែងរកការអន្តរាគមន៍ដោះស្រាយវិវាទជាច្រើនស្ថាប័ន តែគ្មានដំណោះស្រាយ។
ប្រជាពលរដ្ឋដែលមានទំនាស់ដីម្នាក់រស់នៅភូមិត្រពាំងផ្លុង សង្កាត់បាទី ក្រុងបាវិត លោក ឯក សារឿន ថ្លែងនៅថ្ងៃទី២៤ មីនា ថា លោកមានក្ដីបារម្ភខ្លាចបាត់ដី ដោយសារអស់ជំនឿក្នុងការរកដំណោះស្រាយនាពេលកន្លងមក។ ម្យ៉ាង ចុងបណ្ដឹងនៃទំនាស់ជាមន្ត្រីយោធាជាន់ខ្ពស់នៃក្រសួងការពារជាតិ ធ្វើឲ្យអាជ្ញាធរដែលមានអំណាចដោះស្រាយក្នុងវិវាទនេះ មានការក្រែងរអា និងរុញរាក្នុងការរកដំណោះស្រាយ បានអូសបន្លាយពេលជាង ១០ឆ្នាំមកហើយ។
លោក ឯក សារឿន៖ «ប្ដឹងទៅសាលាដំបូងៗគេហៅទៅដែរ ប៉ុន្តែគេអត់កាត់ មិនដឹងគាត់យល់យ៉ាងម៉េចទេ។ ក្រោយមកបន្តបន្ទាប់ទៀតហ្នឹង ខ្ញុំប្ដឹងទៅកន្លែងទីស្ដីការគណៈរដ្ឋមន្ត្រី ទីប្រឹក្សាសម្ដេចនាយក។ ហើយចុងក្រោយមក ក៏មានសម្ដេច ហេង សំរិន ហ្នឹង គាត់មានលិខិតអន្តរាគមន៍មួយដែរ។ ដល់ចំពោះខ្ញុំយកមកក្រោមៗទៅហាក់ដូចគេមិនសូវអើពើ ដូចមិនមានប្រសិទ្ធភាពអ៊ីចឹង។ ហើយដល់ពួកខ្ញុំឥឡូវហ្នឹង មិនដឹងទៅរកវិធីណាទៀតទេ អ៊ីចឹងបានខ្ញុំអំពាវនាវហើយអំពាវនាវទៀត សូមឲ្យសម្ដេចជួយពួកខ្ញុំផង»។
ស្រដៀងគ្នានេះដែរ ពលរដ្ឋទំនាស់ម្នាក់ទៀត លោក ភឿង សុគន្ធី ឲ្យដឹងថា ដីរបស់លោកដែលមានទំនាស់ដោះស្រាយមិនចេញនោះមានចំនួន ៤ហិកតារ បានកាន់កាប់តាំងពីឆ្នាំ១៩៧៩ មកម្ល៉េះ។ ក្រោយមកមានទំនាស់ប្ដឹងគ្នាជាមួយ លោក ចៅ ភិរុណ ជាមន្ត្រីយោធាជាន់ខ្ពស់នៃក្រសួងការពារជាតិ។
លោក ភឿង សុគន្ធី បញ្ជាក់ថា ដោយឃើញចុងបណ្ដឹងជាមន្ត្រីយោធាដែលមានតំណែងខ្ពស់ ទើបរួមគ្នាជាមួយប្រជាពលរដ្ឋដែលមានទំនាស់ដីផ្សេងទៀត ប្ដឹងទៅស្ថាប័នមួយចំនួន រួមមាន តុលាការ ព្រឹទ្ធសភា និងទីស្ដីការគណៈរដ្ឋមន្ត្រី ជាដើម។ ហើយស្ថាប័នទាំងនោះក៏បានចេញដីកាបង្គាប់ជាបន្តបន្ទាប់ដែរ ប៉ុន្តែរហូតមកទល់ពេលនេះ ដីដែលមានទំនាស់នោះក៏ពុំទាន់មានពន្លឺណាមួយដោះស្រាយបញ្ចប់បញ្ហានៅឡើយ៖ «ក្ដីព្រួយបារម្ភខ្លាចរដ្ឋាភិបាលហ្នឹង ច្បាប់ចេញហើយថាអ្នករំលោភយកដីគេៗមានអំណាចអ៊ីចឹង គេត្រូវគ្នាអ៊ីចឹង ខ្លាចគាត់មិនដោះស្រាយឲ្យយើងតែប៉ុណ្ណឹងទេ។ ជឿជាក់លើសម្ដេច ហើយសម្ដេចគាត់ថាមិនឲ្យអ្នកណាមួយបាត់បង់ដី មិនត្រូវគេរំលោភយកដី ពីព្រោះដីខ្ញុំនេះបើសិននិយាយពិតរុករានពី ៧៩ មក»។
វិទ្យុអាស៊ីសេរី ពុំអាចទាក់ទងចុងបណ្ដឹង លោក ចៅ ភិរុណ ដើម្បីមានឱកាសឆ្លើយតបនឹងបញ្ហានេះបានទេ នៅថ្ងៃទី២៤ មីនា។
ប៉ុន្តែ នាយរងអធិការកិច្ចនៃក្រសួងការពារជាតិ ដែលបានចុះអង្កេតពាក់ព័ន្ធនឹងបញ្ហានេះ លោក អ៊ិត ជី មានប្រសាសន៍ថា ក្នុងទំនាស់នេះ ចុងបណ្ដឹងមានប័ណ្ណកម្មសិទ្ធិកាន់កាប់ដីធ្លីស្របច្បាប់ ឬហៅថា ប្លង់រឹង ដែលចេញដោយសុរិយោដីខេត្ត ចំណែកឯអ្នកភូមិទាំង ៩គ្រួសារនោះ ពុំមានប័ណ្ណកាន់កាប់នោះទេ។ ហើយទំនាស់នេះមានការរាំងស្ទះ ដែលមិនអាចសម្រួលដោះស្រាយបញ្ចប់បញ្ហានេះបាន ទើបបញ្ជូនទៅតុលាការ ដើម្បីដោះស្រាយតាមផ្លូវច្បាប់៖ «ខ្ញុំស្រាវជ្រាវទីក៏ខ្ញុំមិនអាចជួយដោះស្រាយគាត់បាន ព្រោះថានេះវាជាសិទ្ធិសមត្ថកិច្ចរបស់តុលាការ ដែលគេមានសិទ្ធិសម្រេច ខាងខ្ញុំនេះមានសិទ្ធិសម្រួល។ ហើយដល់សម្រួល វាមិនបានភាគីទាំង២ហ្នឹង មានភាគីណាព្រមចូលសម្រួលក៏មិនអាចសម្រួលគ្នាបាន។ អ៊ីចឹងក៏ស្នើសុំជូនយោបល់ទៅរដ្ឋមន្ត្រីហ្នឹង តើគួរទុកឲ្យភាគីទាំង២ហ្នឹងប្ដឹងផ្ដល់គ្នានៅតុលាការទៅ»។
អ្នកភូមិឲ្យដឹងថា ពួកគាត់មានប័ណ្ណកាន់កាប់ដីធ្លីដែលមានអាជ្ញាធរមូលដ្ឋានបញ្ជាក់ត្រឹមត្រូវ។ ដីដែលមានទំនាស់នោះទំហំជាង ១២ហិកតារ ស្ថិតតាមបណ្ដោយផ្លូវជាតិលេខ១ នៅភូមិតាពៅ និងភូមិតាបឹប សង្កាត់បាវិត ក្រុងបាវិត ខេត្តស្វាយរៀង។ ដីនេះមានទំនាស់ប្ដឹងផ្ដល់រវាងប្រជាពលរដ្ឋចំនួន ៩គ្រួសារ និងមន្ត្រីយោធាជាន់ខ្ពស់នៃក្រសួងការពារជាតិ ប្ដឹងគ្នាតាំងពីឆ្នាំ២០០០ រហូតមក៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។