ប្រជាពលរដ្ឋនៅឃុំក្រូចឆ្មារ ស្រុកក្រូចឆ្មារ ខេត្តកំពង់ចាម បារម្ភទៅនឹងគម្រោងធ្វើស្ពានរបស់ក្រុមហ៊ុនចិន ដែលបានខួងដីនៅក្នុងភូមិរបស់ពួកគាត់ ដើម្បីពិនិត្យស្ថានភាពដី។ ប្រជាពលរដ្ឋឱ្យដឹងថា ការខួងដីនោះអាចធ្វើឱ្យដីធ្លីរបស់ពួកគាត់នៅទីនោះរងការបាក់ស្រុត ពីព្រោះកន្លែងខួងនោះ គឺនៅជាប់នឹងទន្លេ។
កន្លងមក ដីធ្លីប្រជាពលរដ្ឋនៅទីនោះ តែងតែត្រូវបាក់ស្រុតជានិច្ច។ ចំណែកអាជ្ញាធរស្រុកបញ្ជាក់ថា ការខួងដីនោះ ដំបូងឡើយគឺមានការយល់ព្រមពីប្រជាពលរដ្ឋ ហើយការខួងដីនោះគ្រាន់តែជាការសិក្សាពីស្ថានភាពដីតែប៉ុណ្ណោះ។
ក្រុមប្រជាពលរដ្ឋជាច្រើនគ្រួសារនៅក្នុងភូមិខ្សាច់ប្រឆេះលើ ឃុំក្រូចឆ្មារ ស្រុកក្រូចឆ្មារ ខេត្តកំពង់ចាម បាននាំគ្នាហាមឃាត់សកម្មភាពខួងដីពីសំណាក់ក្រុមហ៊ុនចិន មួយឈ្មោះថា ស៊ាងហៃ ខន់ស្ត្រាក់សិន (Seanghai Contruction) ដែលបានចុះពិនិត្យលើស្ថានភាពដី ដើម្បីសិក្សាលើគម្រោងធ្វើស្ពានឆ្លងកាត់ពីស្រុកស្ទឹងត្រង់ មកកាន់ស្រុកក្រូចឆ្មារ។ ការខួងដីនោះ គឺមានជម្រៅជិត ១០០ម៉ែត្រ ទើបធ្វើឱ្យប្រជាពលរដ្ឋយល់ថា នឹងអាចធ្វើឱ្យដីធ្លី និងផ្ទះសម្បែងរបស់ពួកគាត់នៅក្នុងភូមិ ដែលមានទីតាំងជាប់ដងទន្លេផងនោះ នឹងអាចបាក់ស្រុតមិនខាន។
ប្រជាពលរដ្ឋម្នាក់ អ្នកស្រី ហោ កើយ ដែលក្រុមហ៊ុនចិន បានខួងដីចំមុខផ្ទះរបស់គាត់ មានប្រសាសន៍ថា ដំបូងឡើយពួកគាត់មិនយល់ព្រមឱ្យក្រុមហ៊ុនធ្វើការខួងដីនៅមុខផ្ទះរបស់គាត់នោះទេ ប៉ុន្តែក្រោយមកទើបមានការយល់ព្រម ដោយមានលក្ខខណ្ឌឱ្យខួងដីនោះត្រឹមជម្រៅ ៦០ម៉ែត្រប៉ុណ្ណោះ ហើយបន្ទាប់មកក៏បន្ថែមរហូតដល់ ៨០ម៉ែត្រ។ អ្នកស្រីបន្តថា ជម្រៅ ៨០ម៉ែត្រទៅហើយ ក្រុមហ៊ុនចិន នោះនៅតែមិនទាន់បញ្ឈប់ការខួងដីរបស់ខ្លួនទៀត ទើបធ្វើឱ្យគ្រួសារគាត់ និងអ្នកភូមិឯទៀតនាំគ្នាឃាត់ដំណើរការពិនិត្យដីរបស់ក្រុមហ៊ុននោះតែម្តង ព្រោះខ្លាចបាក់ស្រុតដី និងផ្ទះរបស់ពួកគាត់៖ «ខ្ញុំមិនឱ្យខួងដាច់ខាតប្រសិនបើអង្គការណាអាជ្ញាធរប៉ូលិសទាហានណាក៏ដោយ មកថាសុំដីហ្នឹងខួងទៅខួងមុខផ្ទះលោកឯងចុះ។ ខ្ញុំប្ដេជ្ញាអ៊ីចឹងខ្លាចស្រុតដីស្រុតផ្ទះសម្បែងបងប្អូនកូនចៅខ្ញុំដែរ»។
អ្នកស្រីបញ្ជាក់ថា គាត់មិនចង់ឱ្យក្រុមហ៊ុនចិន នោះបន្តដំណើរការខួងដីតទៅទៀតឡើយ បើទោះបីជាមានលិខិតស្នាមជាផ្លូវការពីរដ្ឋាភិបាលក៏ដោយ ពីព្រោះកាលណាបាក់ស្រុតដីធ្លី និងផ្ទះសម្បែងទៅពួកគាត់មិនដឹងទៅរស់នៅទីណានោះទេ។
ជំទប់ទី១ ឃុំក្រូចឆ្មារ លោក ប៉ាវ សេងលី មានប្រសាសន៍ថា ដំណើរការខួងដីពីសំណាក់ក្រុមហ៊ុនចិន នោះ ដំបូងឡើយ គឺមិនបានជម្រាបមកអាជ្ញាធរឃុំ និងស្រុកឱ្យបានដឹងនោះទេ ហើយអាជ្ញាធរឃុំក៏មិនបានដឹងថា ការខួងដីនោះមានគោលបំណងអ្វីពិតប្រាកដនោះដែរ ទើបធ្វើឱ្យលោកមានការបារម្ភចំពោះបញ្ហានឹងអាចកើតឡើងនៅពេលខាងមុខ ទៅលើប្រជាពលរដ្ឋនៅក្នុងភូមិជាច្រើនរយគ្រួសារនោះ៖ «បាទ! ព្រួយបារម្ភដែលខ្លាចស្រុតដីទៅប៉ះពាល់ដល់អាយុជីវិតរបស់ប្រជាពលរដ្ឋនៅក្នុងឃុំក្រូចឆ្មារ»។
អ្នកបកប្រែភាសាចិន លោក លីម សុខា ឱ្យដឹងថា គម្រោងធ្វើស្ពាននោះជាដំបូងខាងអ្នកជំនាញរបស់ចិន ត្រូវពិនិត្យលើស្ថានភាពដីសិន ហើយការខួងដីនោះ គឺគេកំណត់ត្រឹមតែស្រទាប់មានថ្មតែប៉ុណ្ណោះ គេនឹងផ្អាកទៅវិញ ដោយយកដីនោះទៅពិនិត្យក្នុងកន្លែងពិសោធន៍។ លោកបន្តថា គម្រោងនឹងត្រូវបញ្ចប់ក្នុងមួយសប្ដាហ៍ ហើយដំណើរការនេះ គឺមានការអនុញ្ញាតពីខាងរាជរដ្ឋាភិបាល ចំណែកខាងក្រុមហ៊ុនក៏បានបញ្ជូនលិខិតអនុញ្ញាតមកខាងអាជ្ញាធររួចហើយដែរ៖ «ថាអ៊ីចេះ គាត់ខួងដល់ថ្មបានអាចឈប់បាន។ អត់ទេ! ទោះដល់ថ្ម ឬមិនដល់ថ្ម ក៏ខ្ញុំលែងឱ្យខួងហើយ ព្រោះដល់កំណត់ ៨០ហើយ។ ឈប់ឱ្យខួងហើយ ប្រជាជនគេថាឈប់ឱ្យខួងហើយ ឱ្យលើកម៉ាស៊ីនចេញ។ ផ្ទះនៅមាត់ច្រាំងអ៊ីចឹងបាក់ច្រាំងទៅ មានដីណានៅ? គាត់ថាអ៊ីចេះ បើបាក់ផ្ទះទៅ គាត់ចេញលុយសង។ អត់ជឿៗៗ អត់ឱ្យសងទេ ខ្ញុំមានប៉ុណ្ណាខ្ញុំនៅប៉ុណ្ណឹង»។
លោកបន្តថា នេះជាលើកទីពីរក្នុងការខួងពិនិត្យស្ថានភាពដីនៅស្រុកក្រូចឆ្មារ ដោយលើកទីមួយ អ្នកជំនាញមិនបានរកឃើញស្រទាប់មានថ្មទេ ហើយប្រសិនបើការខួងនោះនៅតែមិនប៉ះចំស្រទាប់មានថ្មទៀត គម្រោងធ្វើស្ពាននោះនឹងអាចត្រូវផ្អាកទៅវិញ។
អភិបាលស្រុកក្រូចឆ្មារ លោក ស្រេង លី មានប្រសាសន៍ថា ដំបូងឡើយ គឺមានការយល់ព្រមពីសំណាក់ម្ចាស់ផ្ទះ ដើម្បីឱ្យខួងដីនោះ ហើយការខួងនោះ គឺគ្រាន់តែជាការសិក្សាពីស្ថានភាពដីតែប៉ុណ្ណោះ។ លោកបញ្ជាក់ថា ខាងលោកមានឯកសារ និងពន្យល់អំពីការអនុវត្តគម្រោងនោះដល់ប្រជាពលរដ្ឋ អំពីផលប្រយោជន៍រួម។ ហើយប្រសិនបើពួកគាត់យល់ព្រមនោះ អាជ្ញាធរនឹងឯកភាពតាម តែបើពួកគាត់មិនយល់ព្រមទេ អាជ្ញាធរក៏មិនអាចបង្ខំនោះដែរ។ យ៉ាងណាក៏ដោយ សកម្មភាពខួងដីនោះ ត្រូវបានផ្អាកវិញទៅហើយ ហើយប្រជាពលរដ្ឋនៅតែទាមទារឱ្យខាងក្រុមហ៊ុនដកគ្រឿងចក្រ និងបញ្ឈប់សកម្មភាពខួងដីនៅតំបន់នោះតទៅទៀត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។