ប្រជាពលរដ្ឋនៅឃុំសំបួរ ស្រុកក្រឡាញ់ បានដាក់ពាក្យបណ្ដឹងមួយច្បាប់ រិះគន់ថា អ្នកមានឥទ្ធិពលម្នាក់ដែលជាបណ្ដាញពង្រឹងសមាជិកឱ្យគណបក្សប្រជាជនកម្ពុជា នៅមូលដ្ឋាននោះ កំពុងប្រើអំណាចផ្ទាល់ខ្លួនយកដីទៅចាក់លុបអូរ ដែលជាផ្លូវសាធារណៈមិនឱ្យប្រជាពលរដ្ឋចេញចូលបានទេ។
បញ្ហានេះ ក្រុមអ្នកភូមិបានប្ដឹងទៅអាជ្ញាធរឃុំ ឱ្យជួយដោះស្រាយរយៈពេល ៥ខែមកហើយ ក៏ប៉ុន្តែ មេឃុំបានផ្អាប់សំណុំរឿងនោះចោលមិនហ៊ានដោះស្រាយ។
ប្រជាពលរដ្ឋចំនួន ១២៣គ្រួសារ នៅភូមិដំណាក់ខ្ចាស់ ឃុំសំបួរ ស្រុកក្រឡាញ់ កំពុងទាមទារឱ្យអាជ្ញាធរស្រុកនេះ ដោះស្រាយឱ្យបានឆាប់រហ័សទៅលើបញ្ហាអ្នកមានឥទ្ធិពលចំនួន ២គ្រួសារ ដែលចាក់ដីលុបអូរជាផ្លូវចាស់ ហើយយកធ្វើជាកម្មសិទ្ធិឯកជន បណ្ដាលឲ្យគ្មានផ្លូវចេញចូលបាននោះ។
ក្រុមអ្នកភូមិបាននាំគ្នាផ្ដិតមេដៃប្ដឹងបុរសឈ្មោះ ពេញ ង៉ិក និងប្រពន្ធឈ្មោះ ចាន់ សារេត ថាជាអ្នកបានចាក់ដីលុបអូរជាផ្លូវរបស់ពួកគេធ្លាប់ចេញចូលរាប់ជំនាន់មកហើយ។
តំណាងអ្នកភូមិដំណាក់ខ្ចាស់ គឺលោក ឈួន តេត។ លោកមានប្រសាសន៍ថា ប្ដីប្រពន្ធទាំងពីរនាក់នោះ បានយកដីទៅចាក់លុបអូរដែលជាផ្លូវគោក្របីធ្លាប់ដើរនៅរដូវប្រាំង ចំណែកនៅរដូវវស្សា គឺជាផ្លូវទូកជាច្រើនខែមកហើយ មិនឱ្យអ្នកភូមិអាចចេញចូលបានទេ។ លោក ឈួន តេត បញ្ជាក់ថា លោក និងអ្នកភូមិជាង ១២០គ្រួសារ ព្យាយាមតវ៉ាបញ្ហានេះរយៈពេលជាង ៥ខែមកហើយ ក៏ប៉ុន្តែនៅតែមិនទាន់បានលទ្ធផល។
លោក ឈួន តេត៖ «ផ្លូវហ្នឹងអូរបុរាណច្រើនជំនាន់មកហើយ កាលពីសម័យមានគោក្របី ពេលខែប្រាំងយើងដេញគោក្របីបររទេះ។ ដល់ខែរដូវវស្សា គឺផ្លូវទូក។ គេបិទថាជាដីរបស់គេ ហើយឃុំថាគេមិនអាចដោះស្រាយបាន។ ដូច្នេះ គេអត់ហ៊ានដោះទេ គឺបញ្ជូនទៅស្រុកប៉ុន្មានខែមកហើយ»។
ចំណែកអ្នកភូមិដំណាក់ខ្ចាស់ ម្នាក់ទៀត លោក ខៀន ឃាង មានប្រសាសន៍ថា ចាប់ពីឈ្មោះ ពេញ ង៉ិក និងចាន់ សារេត ចាក់ដីលុបអូរបិទផ្លូវសាធារណៈមិនឱ្យចេញចូលមក គឺរូបលោកក៏ដូចជាអ្នកភូមិដំណាក់ខ្ចាស់ ជាច្រើនទៀត មានការពិបាកធ្វើដំណើរទាំងផ្លូវទឹក និងផ្លូវគោក ពីព្រោះតែមិនមានផ្លូវ។ បុរសដដែលទាមទារឱ្យអាជ្ញាធរឃុំសំបួរ និងស្រុកក្រឡាញ់ ត្រូវតែដោះស្រាយរឿងនេះឱ្យបានឆាប់រហ័ស។
លោក ខៀន ឃាង៖ «អូ! រាល់ថ្ងៃនេះ វាមានការលំបាកត្រង់ថា យើងចេញទូកចេញអីទៅច្រូតស្មៅ រាយសន្ទូច ដាក់មងដាក់អី ក៏វាអត់បាន។ ចង់បានឱ្យតែបើកវិញនេះឯង សព្វថ្ងៃកំពុងតែទាមទារលោកអភិបាល គាត់សន្យាកាលពីជួបគ្នាថ្ងៃទី២០ ខែកញ្ញា នោះ ថាដល់ថ្ងៃទី២៦ ខែកញ្ញា គាត់នឹងបើកឱ្យ។ យើងមិនទុកចិត្តដែរ ព្រោះកាលពីលើកមុនសន្យា ៣ថ្ងៃ ដល់ពេលគ្រប់ ៣ថ្ងៃហើយ ភាគីខាងបិទនោះ គេថារវល់ប្អូន ឡើងផ្ទះ ទៅគេអត់បានជួបដោះស្រាយ»។
ក្រុមអ្នកភូមិដំណាក់ខ្ចាស់ ចោទប្រកាន់មេឃុំសំបួរ ថាមានចេតនាមិនដោះស្រាយបណ្ដឹងរបស់ប្រជាពលរដ្ឋជុំវិញរឿងនោះ ពីព្រោះតែគេបានដាក់ពាក្យប្ដឹងតាំងតែពីអំឡុងដើមខែមេសា មក ប៉ុន្តែមេឃុំមិនបានដោះស្រាយទេ ហើយក៏មិនបញ្ជូនបណ្ដឹងនោះបន្តទៅអាជ្ញាធរស្រុកក្រឡាញ់ ឱ្យជួយដោះស្រាយដែរ។
ទោះយ៉ាងណា វិទ្យុអាស៊ីសេរី មិនអាចទាក់ទងមេឃុំសំបួរ លោក ប៊ុន អឿម ដើម្បីសុំការបំភ្លឺជុំវិញការចោទប្រកាន់នោះបានថាយ៉ាងណានៅឡើយ ដោយសារតែលោកមិនទទួលទូរស័ព្ទ។
ក៏ប៉ុន្តែ នៅលើបណ្ដឹងរបស់ប្រជាពលរដ្ឋជុំវិញរឿងនោះ លោកមេឃុំសំបួរ បានចារជាលាយលក្ខណ៍អក្សរ ដោយទទួលស្គាល់ថា ឈ្មោះ ពេញ ង៉ិក និងប្រពន្ធឈ្មោះ ចាន់ សារេត ពិតជាបានរំលោភយកផ្លូវធ្វើដំណើរ និងផ្លូវទូកកាណូតរបស់ប្រជាពលរដ្ឋនៅរដូវវស្សាមែន។ ក្នុងករណីនេះ មេឃុំសំបួរ ហាក់មិនបង្ហាញពីការដោះស្រាយយ៉ាងណានៅឡើយ គឺបញ្ជូនទៅឱ្យសាលាស្រុកក្រឡាញ់ ជួយដោះស្រាយតែម្ដង។
ទាំងក្រុមប្រជាពលរដ្ឋភូមិដំណាក់ខ្ចាស់ និងសមាជិកនៃក្រុមប្រឹក្សាស្រុកក្រឡាញ់ ខ្លះ បានរិះគន់ថា ឈ្មោះ ពេញ ង៉ិក និងឈ្មោះ ចាន់ សារេត ដែលហ៊ានចាក់ដីលុបអូរយកផ្លូវរបស់ប្រជាពលរដ្ឋនោះ គឺជាកូនរបស់អ្នកមានឥទ្ធិពលម្នាក់នៅតំបន់នោះឈ្មោះ លោក សៃ សឿម។
សមាជិកក្រុមប្រឹក្សាស្រុកក្រឡាញ់ មួយរូប លោក ស៊ឹម សោភ័ណ ឱ្យដឹងថា ដោយសារ លោក សៃ សឿម គឺជាអ្នកមានឥទ្ធិពលម្នាក់នៅតំបន់នោះ គឺអាជ្ញាធរឃុំសំបួរ និងអាជ្ញាធរស្រុកក្រឡាញ់ មិនហ៊ានដោះស្រាយរឿងចាក់ដីលុបអូរយកផ្លូវសាធារណៈនោះទេ បានជាពន្យារពេលជាច្រើនខែមកហើយ៖ «គាត់ត្រូវបានគណបក្សប្រជាជន រើសធ្វើជាបណ្ដាញពង្រឹងគណបក្សប្រជាជន រួមទាំងខាងប៉ូលិស ឱ្យគាត់ធ្វើបណ្ដាញគ្រាន់រាយការណ៍មកថ្នាក់លើផង អ៊ីចឹងបើសិនជាអភិបាល ឬក្រុមប្រឹក្សាឃុំមកពីគណបក្សប្រជាជន កាត់ឱ្យឈ្មោះ សៃ សឿម ឬកូន សៃ សឿម ចាញ់ ហាក់បីដូចជាគាត់អត់មានអំណាចអីជួយការពារផលប្រយោជន៍ សៃ សឿម នោះវិញសោះ»។
ក៏ប៉ុន្តែ អាជ្ញាធរស្រុកក្រឡាញ់ បានច្រានចោលបញ្ហាដែលភ្ជាប់ទៅនឹងគណបក្សនយោបាយនោះ ថា ក្រុមអ្នកនិយាយដូចនេះគ្រាន់តែធ្វើឱ្យពីរោះស្ដាប់។
អភិបាលស្រុកក្រឡាញ់ លោក ជឿន ជាន អះអាងថា បញ្ហាដែលកើតឡើងយូរហើយមិនទាន់ដោះស្រាយនោះ គឺតាំងតែពីមុនរូបលោកទៅកាន់តំណែងម្ល៉េះ ហើយលោកទើបតែបានទទួលបណ្ដឹង។ លោកអភិបាលស្រុកក្រឡាញ់ បានបដិសេធថា ឈ្មោះ ពេញ ង៉ិក និងចាន់ សារេត មិនមែនចាក់ដីលុបផ្លូវសាធារណៈដូចអ្នកភូមិប្ដឹងនោះឡើយ។ តាមពិត គឺលុបកំណាត់អូរដែលធ្លាប់ជាផ្លូវអ្នកភូមិឆ្លងកាត់។ ទោះយ៉ាងណា លោកអភិបាលស្រុកក្រឡាញ់ ទទួលស្គាល់ថា ការបិទអូរនោះ គឺផលប្រយោជន៍បានទៅមនុស្សតិចតួច ប៉ុន្តែប្រសិនបើបើកអូរដូចធម្មតាវិញ គឺប្រជាពលរដ្ឋជាច្រើនបានទទួលផលប្រយោជន៍។ ដូច្នេះ លោកកំពុងព្យាយាមដោះស្រាយឱ្យឆាប់រហ័ស៖ «សម្រាប់ខ្ញុំជាអាជ្ញាធរដែនដីនេះ ខ្ញុំខិតខំស្វះស្វែងរកគ្រប់មធ្យោបាយ ដើម្បីដោះស្រាយបញ្ហាទំនាស់ក្រៅប្រព័ន្ធតុលាការ។ មិនមែនទើបតែលើកទី១ ចុងក្រោយនេះទេ ចង់៤-៥លើកទៅហើយ គឺវិធីសាស្ត្រធ្វើការសាកសួររកមធ្យោបាយសព្វបែបយ៉ាង ដើម្បីជួយគាត់ទាំងសងខាង»។
លោកអភិបាលស្រុកក្រឡាញ់ បានសន្យាយ៉ាងមុតមាំថា លោកនឹងប្រឹងប្រែងដោះស្រាយរឿងនោះឱ្យចប់សព្វគ្រប់នៅក្រោយពិធីបុណ្យភ្ជុំបិណ្ឌចប់រួចរាល់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។