ក្រុមពលរដ្ឋរស់នៅអគារបូឌីញស អះអាងថា មិនព្រមចាកចេញពីអគារទេ ខណៈដែលអាជ្ញាធរក្រុងជូនដំណឹងឲ្យពលរដ្ឋចាកចេញមួយរយៈសិន ព្រោះអគារទ្រុឌទ្រោម។ ចំណែកអាជ្ញាធរលើកឡើងថា ស្ថានភាពអគារនេះពលរដ្ឋដល់ពេលត្រូវចាកចេញហើយ ចំណែករឿងលំនៅឋានថ្មី ពលរដ្ឋអាចជជែកគ្នាដើម្បីរកដំណោះស្រាយ។
ទោះអាជ្ញាធរ និងមន្ត្រីជំនាញ ព្រួយបារម្ភពីសភាពទ្រុឌទ្រោមនៃអគារបូឌីញស និងប្រាប់ឲ្យពលរដ្ឋចាកចេញមួយរយៈពេលក្តី ប៉ុន្តែពលរដ្ឋនៅតែអះអាងថា ស៊ូស្លាប់ដោយអគារបាក់រលំលើ ក៏មិនចាកចេញដែរ ព្រោះគេមិនដឹងទៅរស់នៅទីណា។
លោក ម៉ម ចាន់រិទ្ធិ ជាពលរដ្ឋរស់នៅលើអគារបូឌីញ លោកអះអាងថាមិនព្រមចាកចេញពីទីនេះ ទេ ព្រោះជាជម្រកសុខសាន្តរបស់លោក។ ពលរដ្ឋរូបនេះចង់ឃើញអាជ្ញាធរគ្រប់លំដាប់ថ្នាក់ ផ្តល់ដំណោះស្រាយ ដែលពលរដ្ឋអាចទទួលយកបាន៖ «សម្រាប់ខ្ញុំអត់ចេញទេ យើងចុះទៅណា? ខ្ញុំចង់ឲ្យគេ (អាជ្ញាធរ) ដោះស្រាយតាមតម្លៃទីផ្សារ»។
កាលពីដើមខែមិថុនា ការិយាល័យរៀបចំដែនដី នគរូបនីយកម្ម និងសំណង់ ខណ្ឌចំការមន បានបង្ហាញការស្រាវជ្រាវរបស់ខ្លួនដែលផ្ញើទៅសាលាខណ្ឌចំការមន ថា អគារបូឌីញជាសំណង់ចាស់ស្នាក់នៅច្រើនគ្រួសារ ដោយគ្រួសារនីមួយៗជួសជុល និងសាងសង់បន្ថែមទម្ងន់លើបន្ទុកអគារស្នាក់នៅរបស់ខ្លួន ដោយគ្មានលិខិតអញ្ញាត និងគ្មានការថែទាំបានល្អផងនោះ បច្ចុប្បន្នអគារនេះមានសភាពទ្រុឌទ្រោមគួរឲ្យព្រួយបារម្ភ។
ស្រដៀងគ្នានេះដែរ សាលាខណ្ឌចំការមន ដែលផ្ញើលិខិតរបស់ខ្លួនជូនទៅពលរដ្ឋកាលពីថ្ងៃទី១៧ ខែកក្កដា សង្ឃឹមជឿជាក់ថា ពលរដ្ឋនឹងចូលរួមអនុវត្តតាមខ្លឹមសារនៃសេចក្តីជូនដំណឹងរបស់ការិយាល័យរៀបចំដែនដី នគរូបនីយកម្ម និងសំណង់។
លោកស្រី អ៊ុច យ៉ានី ដែលរស់នៅលើអគារបូឌីញអស់រយៈពេលជាង ៣០ឆ្នាំមកហើយ ឲ្យដឹងថា លោកស្រីមិនចាកចេញពីអគារនេះទេ ព្រោះលោកស្រីមិនដឹងត្រូវទៅរស់នៅទីណា។ ពលរដ្ឋរូបនេះនិយាយទៀតថា លិខិតរបស់អាជ្ញាធរត្រឹមតែប្រាប់ឲ្យចាកចេញ ប៉ុន្តែមិនផ្តល់ដំណោះស្រាយដល់ពលរដ្ឋ ថាត្រូវទៅស្នាក់នៅទីណា និងរហូតដល់ពេលណា ទើបក្រុមពលរដ្ឋមករស់នៅវិញបាន៖ «ឲ្យខ្ញុំចាកចេញមួយរយៈ ឲ្យខ្ញុំទៅនៅណា? មានលុយណាជួលផ្ទះ? ពួកខ្ញុំអ្នករស់នៅបូឌីញ សុទ្ធតែអ្នកក្រ»។
កាលពីរាត្រីថ្ងៃទី១ ខែកុម្ភៈ នៅពេលក្រុមហ៊ុនម៉ៅការសាងសង់សណ្ឋាគារកំពុងដំណើរការបុកគ្រឹះ និងកាយដី ពលរដ្ឋរស់នៅអគារបូឌីញឲ្យដឹងថា ស្រាប់តែផ្នែកខ្លះនៃអគារនេះចេញស្នាមប្រេះ ធ្វើឲ្យពលរដ្ឋរត់ចាកចេញពីអគារអស់មួយរយៈ។
នាយកលេខាធិការដ្ឋានក្រុមការងារពិសេសសិទ្ធិលំនៅឋាន លោក សៀ ភារម្យ ស្វាគមន៍ការជូនលិខិតរបស់អាជ្ញាធរ និងស្នើឲ្យមន្ត្រីមានសមត្ថកិច្ច ធ្វើវេទិកាជជែកជាមួយពលរដ្ឋជាមុនសិន មុននឹងសម្រេចឲ្យពួកគេចាកចេញ៖ «ខ្ញុំគិតថា អាជ្ញាធរមិនត្រឹមតែផ្តល់ជាសេចក្តីដំណឹងទេ គួរតែធ្វើវេទិកាជជែកជាមួយពលរដ្ឋ សួរគាត់មើល ថាគាត់ចង់ទៅណា? ហើយរដ្ឋមានលទ្ធភាពជួយបានប៉ុណ្ណា?»។
អគារវ័យចំណាស់សល់ពីសម័យរាស្ត្រនិយម មានទីតាំងនៅក្នុងសង្កាត់ទន្លេបាសាក់ ខណ្ឌចំការមន រាជធានីភ្នំពេញ សព្វថ្ងៃមានពលរដ្ឋជាង ៦០០គ្រួសារកំពុងរស់នៅ។
អ្នកនាំពាក្យនៃសាលារាជធានីភ្នំពេញ លោក ឡុង ឌីម៉ង់ ឲ្យដឹងនៅថ្ងៃទី១៨ ខែកក្កដា ថា ស្ថានភាពអគារនៅពេលនេះដល់ពេលដែលពលរដ្ឋគួរចាកចេញហើយ។ អ្នកនាំពាក្យរូបនេះប្រាប់ថា កន្លងមកសាលារាជធានីភ្នំពេញ ធ្លាប់លើកជាដំណោះស្រាយដល់ពលរដ្ឋផ្តល់ទីតាំងថ្មី ប៉ុន្តែពលរដ្ឋនៅមិនស្វាគមន៍ដំណោះស្រាយនោះ។ ទោះបែបនេះ លោកថា អាជ្ញាធរនៅតែស្វះស្វែងរកដំណោះស្រាយដល់ពលរដ្ឋ៖ «ជម្រើស ឬអ្វីផ្សេងទៀត យើងអាចជជែកគ្នាបាន ប្រសិនជាគាត់ (ប្រជាជន) មានឆន្ទៈក្នុងការជជែកគ្នា រួមគ្នាដោះស្រាយបញ្ហា»។
នេះមិនមែនជាលើកទីមួយទេ ដែលសាលារាជធានីភ្នំពេញ ជូនដំណឹងពីភាពទ្រុឌទ្រោមនៃអគារបូឌីញសនេះ។ ដូចគ្នានេះដែរ ពលរដ្ឋនៅតែប្រកាន់ជំហរមិនចាកចេញពីអគារ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។