អ្នកសម្របសម្រួលអង្គការលីកាដូ (Licadho) ប្រចាំខេត្តបន្ទាយមានជ័យ លោក ភុន ឈិន ថ្លែងថា ប្រជាពលរដ្ឋទាំងបីក្រុមនោះមកទីពីឃុំផ្សេងគ្នា។
ក្នុងនោះ មួយក្រុមមកពីឃុំបន្ទាយនាង ស្រុកមង្គលបុរី បាននាំគ្នាឡើងទៅតវ៉ារឿងអគ្គិសនី ដែលធ្លាប់កើតមានភាពមិនប្រក្រតីកុងទ័រភ្លើងដើរលឿន។ ករណីពីរទៀត គឺរឿងប្រជាពលរដ្ឋនៅក្រុងប៉ោយប៉ែត ដែលត្រូវទទួលបានដីសម្បទានសង្គមកិច្ចនៅឃុំបឹងស្នោ ស្រុកស្វាយចេក និងមួយក្រុមទៀត មកពីឃុំទួលពង្រ ស្រុកម៉ាឡៃ ខេត្តបន្ទាយមានជ័យ ដូចគ្នា៖ «យើងឃើញមានភាពផ្លែផ្កាច្រើនសម្រាប់អ្នកឡើងមកតវ៉ារឿងភ្លើងអគ្គិសនី ដោយអាជ្ញាធរខេត្តបានឆ្លើយតបចំពោះការទាមទាររបស់ពួកគាត់ឲ្យមានការដោះស្រាយ ខាងខេត្តគេបានតម្រូវឲ្យខាងអាជ្ញាធរអគ្គិសនីហ្នឹង ទទួលយកវិក្កយបត្រខែបី មានន័យថា ពួកគាត់ទទួលបានផលប្រយោជន៍មកវិញ។ ហើយរឿងទាក់ទងបញ្ហាដីធ្លី វាហាក់ដូចបានត្រឹមតែការសន្យានៅឡើយទេ។ ប៉ុន្តែ ទោះបីយ៉ាងណា ក៏យើងសង្កេតឃើញអាជ្ញាធរខេត្តនៅក្នុងការដោះស្រាយដល់ប្រជាពលរដ្ឋ»។
អង្គការលីកាដូ ទន្ទឹមគ្នាបានស្នើឲ្យអាជ្ញាធរខេត្តដោះស្រាយបញ្ហាទំនាស់ដីធ្លីឲ្យបានឆាប់ ដើម្បីចៀសវាងការអូសបន្លាយដែលនាំឲ្យមានអំពើហិង្សារវាងប្រជាពលរដ្ឋ និងប្រជាពលរដ្ឋកើតឡើងតទៅទៀត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។