លោក ហ៊ុន សែន ព្រមាននាយកក្រុមហ៊ុនស្រាបៀលីអូរឿងដីនៅកែវផុស

ដោយ ទេព សុរ៉ាវី
2013-03-20

ស្ដាប់ ឬ ទាញយកសំឡេង

លោកនាយករដ្ឋមន្ត្រី ហ៊ុន សែន បានព្រមានចាត់វិធានការតាមនីតិវិធីច្បាប់ចំពោះមេខ្លោងនៃការឈូសឆាយផ្ទះអ្នកភូមិនៅចំណុចចំរាំង ក្នុងស្រុកស្ទឹងហាវ ខេត្តព្រះសីហនុ។ ការព្រមាននេះធ្វើឡើង ២ថ្ងៃ បន្ទាប់ពីលោក ហ៊ុន សែន បានចេញលិខិតអន្តរាគមន៍ ២ កាលពីថ្ងៃទី១៧ ខែមីនា ក្នុងរឿងទំនាស់ដីធ្លីរវាងលោក ជៀម ផែន នាយកស្រាបៀលីអូ (Leo Beer) ជាមួយពលរដ្ឋចំនួន ៤៩គ្រួសារ និងបានសម្រេចប្រគល់ដី ៣៥២ហិកតារ ព្រមទាំងសង់ផ្ទះថ្មជូនអ្នកភូមិឡើងវិញ បន្ទាប់ពីមានការឈូសបំផ្លាញចោលកាលពីដើមខែមីនា។

ប្រមុខរាជរដ្ឋាភិបាលបានព្រមានចំឈ្មោះ លោក ជៀម ផែន នាយកក្រុមហ៊ុនស្រាបៀលីអូ ដែលបានចុះអនុវត្តឈូសបំផ្លិចបំផ្លាញផ្ទះអ្នកភូមិចំនួន ៤៩គ្រួសារ នៅចំណុចចំរាំង ក្នុងឃុំកែវផុស បន្ទាប់ពីអនុវត្តតាមសាលក្រមរបស់សាលាដំបូងខេត្តព្រះសីហនុ រួចមក។

សមត្ថកិច្ចចម្រុះជិត ១០០នាក់ មានខែល ដំបងឆក់ និងកាំភ្លើងគ្រប់ដៃ ចុះអនុវត្តសាលក្រមបណ្ដោះអាសន្ន ឈូសបំផ្លាញផ្ទះសម្បែងអ្នកភូមិនៅចំណុចចំរាំង កាលពីថ្ងៃទី៥ ខែមីនា ដើម្បីយកដីទំនាស់ទំហំ ៣៥២ហិកតារ ប្រគល់ឲ្យលោក ជៀម ផែន។

ថ្លែងនៅក្នុងពិធីសម្ពោធក្រុមប្រឹក្សាជាតិអភិវឌ្ឍន៍បៃតង និងផ្សព្វផ្សាយគោលនយោបាយជាតិស្ដីពីការអភិវឌ្ឍបៃតង និងផែនការយុទ្ធសាស្ត្រជាតិ ស្ដីពីការអភិវឌ្ឍបៃតងឆ្នាំ២០១៣ ដល់ឆ្នាំ២០៣០ នៅឯវិមានសន្តិភាព នៅថ្ងៃទី១៩ ខែមីនា។ លោក ហ៊ុន សែន បានព្រមានថា ការឈូសឆាយផ្ទះអ្នកភូមិនៅក្នុងឃុំកែវផុស មិនអាចអត់ឱនឲ្យបាននោះទេ ហើយលោក ជៀម ផែន ត្រូវទទួលខុសត្រូវចំពោះទង្វើរបស់ខ្លួន។

លោក ហ៊ុន សែន បញ្ជាក់ថា លោកនឹងលូកដៃចូលក្នុងរឿងនេះ ដោយសារតែមិនអាចទទួលយកបាននូវទង្វើរបស់លោក ជៀម ផែន ហើយក៏មិនអាចអត់ឱនបានចំពោះអ្នកប្រព្រឹត្តដែរ៖ «ករណីនេះលោក ជៀម ផែន អត់ទាន់រួចខ្លួនទេ ឮថា សំណុំរឿងឋិតក្នុងសាលាឧទ្ធរណ៍ ហេតុអីបានគាត់មានសិទ្ធិទៅឈូសបំផ្លាញផ្ទះប្រជាជន? ខ្ញុំតាមរឿងហ្នឹងមួយអត់ឲ្យរបូតទេ ខ្ញុំចូលពាក់ព័ន្ធប៉ុណ្ណេះហើយមិនឲ្យរបូតទេ»។

លោក ហ៊ុន សែន សម្ដែងការងឿងឆ្ងល់ថា ទំនាស់ដីធ្លីនៅឃុំកែវផុស កំពុងឋិតក្នុងសមត្ថកិច្ចតុលាការឧទ្ធរណ៍នៅឡើយ ហេតុអីបានលោក ជៀម ផែន មានសិទ្ធិទៅឈូសផ្ទះអ្នកភូមិទៅកើត?

លោក ហ៊ុន សែន បញ្ជាក់ថា ក្រោយពីដោះស្រាយដីធ្លី និងផ្ទះសម្បែងជូនអ្នកភូមិហើយនោះ លោកនឹងងាកមើលតាមផ្លូវតុលាការវិញ ដើម្បីវែកមុខអ្នកបញ្ជាឲ្យអនុវត្តសាលក្រមតុលាការ។

ការព្រមាននេះធ្វើឡើងបន្ទាប់ពីលោក ហ៊ុន សែន បានមើលឃើញរូបភាពវីដេអូឃ្លីប ពីសកម្មភាពឈូសបំផ្លាញផ្ទះអ្នកភូមិនៅចំណុចចំរាំង និងបានចុះហត្ថលេខាលើលិខិត ២ ដាច់ដោយឡែកពីគ្នា កាលពីថ្ងៃទី១៧ ខែមីនា ដោយលិខិតទី១ ដាក់ឲ្យនិរាករណ៍ទាំងយប់ចំពោះសេចក្ដីជូនដំណឹងរបស់ទីស្ដីការគណៈរដ្ឋមន្រ្តី ដែលប្រគល់ដី ៣៥២ហិកតារឲ្យលោក ជៀម ផែន និងទី២ សម្រេចប្រគល់ដីជាង ៣០០ហិកតារនោះទៅឲ្យអ្នកភូមិ និងសាងសង់ផ្ទះថ្មជូនអ្នកភូមិវិញ។

ជុំវិញបញ្ហានេះវិទ្យុអាស៊ីសេរី មិនអាចសុំការបំភ្លឺពីលោក ជៀម ផែន នាយកស្រាបៀលីអូ បានទេ នៅថ្ងៃទី១៩ ខែមីនា។

ប្រធានតុលាការខេត្តព្រះសីហនុ លោក ម៉ុង មុនីចរិយា បដិសេធមិនពន្យល់ជុំវិញការចុះអនុវត្តសាលក្រមបណ្ដោះអាសន្នរបស់តុលាការនៅពេលកន្លងមកនោះទេ។

រីឯនាយកខុទ្ទកាល័យក្រសួងយុត្តិធម៌ លោក សំ ប្រជាមានិត បញ្ជាក់ថា ក្រសួងយុត្តិធម៌នៅមិនទាន់ឃើញរបាយការណ៍ណាមួយនៃកំហុសឆ្គងរបស់តុលាការខេត្តព្រះសីហនុ នៅឡើយ។ លោកបន្តថា ក្នុងលក្ខខណ្ឌមានបណ្ដឹងណាមួយមកក្រសួងយុត្តិធម៌នោះ ក្រសួងនឹងចុះអធិការកិច្ចករណីនោះភ្លាម។ តែបើករណីពិសេសនឹងមានការចង្អុលបង្ហាញពីរដ្ឋមន្ត្រីក្រសួងនោះ ក្រុមអធិការកិច្ចក៏នឹងចុះទៅស៊ើបអង្កេតដែរ៖ «មិនថាខុស ឬមិនថាត្រូវដែរ ទាល់តែតុលាការអនុវត្តផ្ទាល់ សួរគាត់បានដឹង»។

មន្ត្រីស៊ើបអង្កេតជាន់ខ្ពស់នៃសមាគមសិទ្ធិមនុស្សលីកាដូ (Licadho)លោក អំ សំអាត យល់ឃើញថា ការអនុវត្តសាលក្រមបណ្ដោះអាសន្នរបស់តុលាការខេត្តព្រះសីហនុ ជាទង្វើផ្ទុយពីច្បាប់។ លោកបន្តថា ជាលើកទី១ដែលនាយករដ្ឋមន្រ្តី លោក ហ៊ុន សែន បារម្ភចំពោះការអនុវត្តក្នុងប្រព័ន្ធតុលាការ ហើយលោកចាំមើលថា តើរាជរដ្ឋាភិបាលនឹងមានវិធានការបែបណាខ្លះចំពោះអ្នកស្នើសុំឲ្យអនុវត្តសាលក្រម និងឈូសបំផ្លិចបំផ្លាញទ្រព្យសម្បត្តិរបស់ប្រជាពលរដ្ឋ និងទោសទណ្ឌចំពោះចៅក្រមតុលាការខេត្តព្រះសីហនុ ដែលមិនអនុវត្តតាមច្បាប់។

លោក អំ សំអាត៖ «កាលណាបំផ្លិចបំផ្លាញទ្រព្យសម្បត្តិត្រូវតែមានទោសព្រហ្មទណ្ឌ ហើយទី២ ការមិនអនុវត្តការណែនាំរបស់ក្រសួងយុត្តិធម៌របស់តុលាការកំពូលហ្នឹង តើចៅក្រមត្រូវប្រឈមមុខនឹងការដាក់ពិន័យយ៉ាងម៉េច?»។

កាលពីឆ្នាំ២០០៨ ប្រធានតុលាការកំពូល លោក ឌិត មន្ទីរ ចេញសេចក្ដីជូនដំណឹងដោយបង្គាប់ឲ្យសាលាដំបូងខេត្ត ក្រុង ទាំងអស់ មិនត្រូវអនុវត្តសាលក្រមបណ្ដោះអាសន្នមុននឹងមានការជំនុំជម្រះ ឬសាលក្រមថ្មីចេញដោយសាលាឧទ្ធរណ៍ ឬតុលាការកំពូលនោះទេ៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។

អត្ថបទដែលទាក់ទង

មតិ (5)

ចុចត្រង់នេះដើម្បីបន្ថែមយោបល់របស់អ្នក

អ្នកអានអនាមិក

ពី United States

Hun Sen warned like this before,but he was just faking . He does not and he will never have real intention to stop corruption in Cambodia. He can run out of money for his gang members who help keep him in power,if he stop the corruption .

Mar 21, 2013 10:07 AM

អ្នកអានអនាមិក

តើសំដីរបស់លោកនាយករដ្ឋមន្ត្រីធ្វើឲ្យមន្ត្រីក្រោមឳវាទខ្លាចរអារដែរ ឬ ទេ? តើការព្រមាននេះមានប្រសិទ្ធិភាពភាពដែរ ឬ ទេ?

Mar 20, 2013 06:10 AM

សារ៉ាត់

ពី តាកែវ

សូមអ្នកដឹកនាំទាំងអស់ស្រឡាញ់ប្រទេស ស្រឡាញ់ប្រជាជនក្រីក្រ ស្រឡាញ់យុត្តិធម៌ បំបាត់អំពើពុករលួយសូមអ្នកដឹកនាំត្រូវដឹងថាប្រជាជនក្រីក្រមិនជាអ្នកបំផ្លាញជាតិទេ ហើយត្រូវចាំថា ភូតនៅនឹងហោចោរនៅនឹងជាង យល់ញ្ញាត្តិបង្កភាពអយុត្តិធម៌ និង អំពើពុករលួយ។

Mar 20, 2013 05:13 AM

សេរី

សូមស្វាគមន៍។ហ៊ុនសែនមិនមែនអាក្រក់ទាំងអស់ទេ។តែពពួកមន្រ្តី១ចំនួនធំជាអ្នកខឹលខូច។សូមលោកហ៊ុនសែនស្រែក១វ៉ាស់ដល់បព្ហាាបឺងកក់និងបុរីកីទ្បាផងព្រោះមានតែលោកទេដែលអាចធ្វើកើត។

Mar 20, 2013 03:51 AM