ប្រជាពលរដ្ឋជាជនជាតិដើមភាគតិចពរ នៅស្រុកសំឡូត ខេត្តបាត់ដំបង សម្ដែងក្ដីបារម្ភខ្លាចបាត់បង់ដីក្នុងសហគមន៍ទៅជាកម្មសិទ្ធិរបស់ក្រុមហ៊ុន រ័ត្ន សម្បត្តិ។
ក្ដីបារម្ភនេះ បន្ទាប់ពីពួកគាត់ស្វែងរកអន្តរាគមន៍ពីសាលាខេត្ត ប៉ុន្តែខេត្តបានត្រឹមតែចេញលិខិតការពារដីជម្លោះបណ្ដោះអាសន្ន ហើយទុកឲ្យអាជ្ញាធរមូលដ្ឋានដោះស្រាយបន្ត តែអាជ្ញាធរថ្នាក់ក្រោមនេះ ដោះស្រាយពុំចេញឡើយ។
ប្រជាពលរដ្ឋជនជាតិដើមភាគតិចពរ នៅស្រុកសំឡូត អំពាវនាវឲ្យអាជ្ញាធរពាក់ព័ន្ធ ពន្លឿនការដោះស្រាយជម្លោះដីក្នុងសហគមន៍របស់ពួកគាត់ឲ្យបានឆាប់ ពីព្រោះរឿងទំនាស់នេះបានអូសបន្លាយជាយូរឆ្នាំមកហើយ។
ផ្ទៃដីដែលអ្នកភូមិអះអាងថា ជាកម្មសិទ្ធិរបស់ពួកគាត់នោះ មានទំហំប្រមាណ ២ពាន់ហិកតារ ស្ថិតនៅភូមិភ្នំរៃ ឃុំតាតោក ស្រុកសំឡូត ខេត្តបាត់ដំបង។ អ្នកភូមិប្រមាណ ៧៥គ្រួសារ កំពុងមានទំនាស់ជាមួយក្រុមហ៊ុន រ័ត្ន សម្បត្តិ ចាប់តាំងពីឆ្នាំ២០០៨ រហូតមក។
តំណាងសហគមន៍ជនជាតិដើមភាគតិចពរ នៅស្រុកសំឡូត លោក ឆឺត ឈន ថ្លែងនៅថ្ងៃទី២៣ តុលា ថា ផ្ទៃដីសហគមន៍ដែលមានទំនាស់នោះ ប្រជាពលរដ្ឋបានកាន់កាប់តាំងពីឆ្នាំ១៩៩១។ មកដល់ឆ្នាំ២០០៨ ក៏កើតមានទំនាស់ ដោយសារក្រុមហ៊ុន រ័ត្ន សម្បត្តិ បោះបង្គោលរំលោភលើដីរបស់ពួកគាត់។ លោកបន្តថា ចាប់តាំងពីពេលមានទំនាស់មក អ្នកភូមិបានស្វែងរកអន្តរាគមន៍ពីអាជ្ញាធរ ចាប់តាំងពីថ្នាក់មូលដ្ឋានដល់ថ្នាក់ខេត្តជាបន្តបន្ទាប់ តែគ្មានដំណោះស្រាយទាល់តែសោះ។
លោក ឆឺត ឈន៖ «អឺ! ខ្ញុំបានតវ៉ារយៈពេលបីបួនដងហើយ គាត់បានចុះដែរសិក្សាស្រាវជ្រាវ មានខាងសមត្ថកិច្ចចុះសិក្សាស្រាវជ្រាវ។ ប៉ុន្តែបើលទ្ធផលដែលដោះ វានៅបង្គោលបោះដដែល ហើយផ្លាកក្រុមហ៊ុននៅដដែល ហើយខាងក្រុមហ៊ុន ខ្ញុំបានជជែកជាមួយតំណាងរបស់គេថា នៅតែដីគេដដែល។ អ៊ីចឹង លទ្ធផលវាអត់មាន លោក! ដោយសារតែអឺ! ស្រុកឃុំហ្នឹងគាត់អត់មានលទ្ធភាពដោះ»។
លោកបន្ថែមថា បន្ទាប់ពីមានការតវ៉ារបស់ប្រជាពលរដ្ឋមក ថ្មីៗនេះ អាជ្ញាធរខេត្តបាត់ដំបង បានចេញលិខិតការពារលើដីទំនាស់ឲ្យផ្អាកធ្វើសកម្មភាពបណ្ដោះអាសន្ន ហើយបញ្ជូនទៅឲ្យសមត្ថកិច្ចស្រុកដោះស្រាយបន្ត តែរហូតមកទល់ពេលនេះ ពុំទាន់មានច្រកចេញនៅឡើយទេ។
វិទ្យុអាស៊ីសេរី មិនអាចទាក់ទងក្រុមហ៊ុន រ័ត្ន សម្បត្តិ ដើម្បីអត្ថាធិប្បាយជុំវិញបញ្ហានេះបានទេ នៅថ្ងៃទី២៣ តុលា។
ទាក់ទងនឹងបញ្ហានេះ អភិបាលស្រុកសំឡូត លោក ឥន សៅរិទ្ធ មានប្រសាសន៍បញ្ជាក់ថា ហេតុដែលយឺតយ៉ាវមិនបានដោះស្រាយភ្លាមៗនោះ ដោយសារអង្គការសង្គមស៊ីវិលមួយចំនួន បានមករារាំងមិនឲ្យតំណាងប្រជាពលរដ្ឋចូលរួមពិភាក្សាតាមការកោះអញ្ជើញរបស់អាជ្ញាធរ៖ «អាហ្នឹងរកដីទំនាស់វាអត់ឃើញ ហើយគាត់ដាក់ពាក្យបណ្ដឹងមក សាលាខេត្តបានរៀបចំឲ្យស្រុកដោះស្រាយ។ ស្រុកអញ្ជើញពួកគាត់មក តែពួកគាត់ថាគាត់គ្មានលទ្ធភាពមកទេ។ មុននឹងការដោះស្រាយអី យើងត្រូវពិគ្រោះពិភាក្សារាល់ជំនាញទាំងអស់អ៊ីចឹង ដល់គាត់មកអ៊ីចឹង ខ្ញុំមិនដឹងថាដោះយ៉ាងម៉េច»។
ទាក់ទងនឹងបញ្ហានេះដែរ មន្ត្រីស៊ើបអង្កេតអង្គការលីកាដូ (Licadho) ប្រចាំខេត្តបាត់ដំបង លោក ហេង សាយហុង មានប្រសាសន៍ថា ការអូសបន្លាយដោយគ្មានច្រកចេញជាច្រើនឆ្នាំមកនេះ ពុំមែនដោយសារអង្គការសង្គមស៊ីវិល ឬប្រជាពលរដ្ឋមិនចូលរួមរកដំណោះស្រាយជាមួយអាជ្ញាធរនោះឡើយ។ លោក ហេង សាយហុង ចាត់ទុកការឆ្លើយបដិសេធរបស់អាជ្ញាធរស្រុកនោះ ថាគ្រាន់តែជាលេសមួយ ដើម្បីដោះបន្ទុកពីការទទួលខុសត្រូវរបស់ខ្លួនប៉ុណ្ណោះ៖ «អ៊ីចឹងវាអាចប៉ះពាល់នឹងទីកន្លែងខ្លះ ឬក៏អារម្មណ៍ខ្លះមួយចំនួនទេ មិនមែនជារឿងអីធំដុំទេ។ តាមខ្ញុំគិតមើលទៅ បើសិនជាអាជ្ញាធរយើងមានឆន្ទៈដោះស្រាយតំបន់សហគមន៍ពរហ្នឹង យើងអាចជួបប្រជាសហគមន៍ជាទូទៅទៅ ដើម្បីធ្វើការសម្របសម្រួលសំណេះសំណាលជាបឋម ស៊ើបជាបឋម យើងអាចរូបមន្តដោះស្រាយច្រើនណាស់។ យើងអត់មានយកលេសថាសង្គមស៊ីវិលនេះទៅរារាំង មិនមែនទេ សង្គមស៊ីវិល គឺថាមានគោលបំណងសហការជាមួយអាជ្ញាធរជាដៃគូ ដើម្បីធ្វើយ៉ាងម៉េចឲ្យប្រជាពលរដ្ឋដែលគាត់បាត់បង់ដីធ្លីហ្នឹង គាត់ទទួលបានយុត្តិធម៌»។
យ៉ាងណា តំណាងអ្នកភូមិឲ្យដឹងថា ហេតុដែលពួកគាត់មិនចូលរួមតាមការអញ្ជើញរបស់អាជ្ញាធរស្រុក ដោយសារសមត្ថកិច្ចតម្រូវឲ្យតំណាងតែម្នាក់ចូលពិភាក្សា ពីព្រោះការធ្វើដូចនេះ កន្លងមកពុំទទួលបានលទ្ធផលទេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។