ពលរដ្ឋនៅភូមិចំនួន ៦ផ្សេងគ្នា ក្នុងសង្កាត់ពញាពន់ ខណ្ឌសែនសុខ បានប្រតិកម្មចំពោះអាជ្ញាធរមានសមត្ថកិច្ចនៅក្នុងខណ្ឌនេះ ថាបានបង្ខំឲ្យពលរដ្ឋផ្ដិតស្នាមមេដៃ ប្រគល់ដីដែលពួកគាត់កាន់កាប់ជាយូរមកហើយទៅឲ្យក្រុមហ៊ុន ដោយមិនបានបញ្ជាក់ថា ក្រុមហ៊ុនណាដែលត្រូវទៅវិនិយោគឲ្យប្រាកដ។
ពលរដ្ឋ ២៦០គ្រួសារ រស់នៅក្នុងសង្កាត់ពញាពន់ បានរិះគន់ប៉ូលិសខណ្ឌសែនសុខ ថាបានបង្ខំនិងគំរាមកំហែងពួកគាត់ឲ្យផ្ដិតមេដៃប្រគល់ដីដែលកាន់កាប់ជាង ២០០ហិកតារទៅឲ្យក្រុមហ៊ុនឯកជនមួយ ដោយមិនបានបង្ហាញពីអត្តសញ្ញាក្រុមហ៊ុននោះ។
តំណាងអ្នកភូមិ លោក ជា ច័ន្ទ ឲ្យដឹងនៅថ្ងៃទី២២ មីនា ថា អ្នកភូមិ ២៦០គ្រួសារ រស់នៅភូមិធំត្បូង ភូមិធំជើង ភូមិត្រពាំងស្នោរ ភូមិបឹង ភូមិព្រៃពង្ររ និងភូមិវែង ក្នុងសង្កាត់ពញាពន់ បានកាន់កាប់ និងធ្វើស្រែចម្ការលើដីជាង ២០០ហិកតារ តាំងពីឆ្នាំ១៩៧៩។
លោកបានរំលឹកថា កាលពីឆ្នាំ១៩៩៣ អាជ្ញាធរភូមិបានឲ្យអ្នកភូមិលក់ដីទាំងនោះទៅឲ្យក្រុមហ៊ុនចិនតៃវ៉ាន់មួយ ដើម្បីឲ្យក្រុមហ៊ុនសាងសង់ជារោងចក្រនៅតំបន់នោះ ក្រោមកិច្ចសន្យាថា បើរយៈពេល ៥ឆ្នាំ ក្រុមហ៊ុននោះមិនសាងសង់រោងចក្រ ឬវិនិយោគតំបន់នោះទេ ពលរដ្ឋនឹងយកដីទាំងនោះមកបង្កបង្កើនផលវិញ។
តំណាងអ្នកភូមិប្រាប់ថា ក្រោយពីក្រុមហ៊ុនទិញដីពីអ្នកភូមិហើយនោះ ក្រុមហ៊ុនមិនបានសាងសង់រោងចក្រអ្វីទេ ហើយអ្នកភូមិក៏នៅតែបង្កបង្កើនផលលើដីនោះដូចសព្វមួយដង។ រហូតដល់ខែកុម្ភៈ ឆ្នាំ២០១៤ ពោលគឺ ២១ឆ្នាំក្រោយ ស្រាប់តែលោកអធិការខណ្ឌសែនសុខ លោក ម៉ក់ ហុង បានប្រកាសឲ្យអ្នកភូមិ រុះរើរោងចាំចម្ការ និងចោទអ្នកភូមិថា បានបង្កបង្កើនផលលើដីក្រុមហ៊ុន និងតម្រូវឲ្យផ្ដិតមេដៃប្រគល់ដីទាំងនោះទៅក្រុមហ៊ុនវិញ ដោយមិនប្រាប់ថា ក្រុមហ៊ុននោះឈ្មោះអ្វីទេ។
អ្នកភូមិម្នាក់ទៀតរស់នៅភូមិបឹង គឺលោកស្រី ព្រុំ សុគង់ ដែលត្រូវលោក ម៉ក់ ហុង ហៅឲ្យទៅជួប និងបង្ខំផ្ដិតមេដៃប្រគល់ដីចម្ការជាង ១ហិកតារទៅឲ្យក្រុមហ៊ុន កាលពីថ្ងៃទី២២ ខែកុម្ភៈ កន្លងទៅ ប្រាប់ថា អធិការខណ្ឌរូបនេះបានគំរាមថា ប្រសិនបើលោកស្រីមិនផ្ដិតស្នាមមេដៃប្រគល់ដីទេនោះ លោកស្រីនឹងត្រូវប្ដឹងពីបទព្រហ្មទណ្ឌ ដែលបានកាន់កាប់លើដីក្រុមហ៊ុន។ ប៉ុន្តែអ្នកស្រីមិនព្រមផ្ដិត និងទទូចឲ្យប្រាប់ឈ្មោះក្រុមហ៊ុន ហើយឲ្យក្រុមហ៊ុននោះមកជួបអ្នកភូមិ។
តំណាងអ្នកភូមិ លោក ជា ច័ន្ទ បញ្ជាក់ថា អ្នកភូមិមិនដែលរំលោភកាន់កាប់ដីក្រុមហ៊ុនទេ។ដីជាង ២០០ហិកតារនោះ ជាដីដែលក្រុមហ៊ុនកាន់កាប់ឡើងវិញ ក្រោយពេលក្រុមហ៊ុនចិនតៃវ៉ាន់ ក្បត់សន្យាមិនសាងសង់រោងចក្រ។ លោកបញ្ជាក់ថា ប្រសិនបើក្រុមហ៊ុនចិនតៃវ៉ាន់នោះ ត្រឡប់មកយកដីវិនិយោគជារោងចក្រ អ្នកភូមិនឹងប្រគល់ដីឲ្យ។ ប៉ុន្តែប៉ូលិសខណ្ឌដែលចេះតែអះអាងថា យកដីទៅឲ្យក្រុមហ៊ុននោះ មិនហ៊ានប្រាប់ឈ្មោះក្រុមហ៊ុនឲ្យប្រាកដ ដែលអ្នកភូមិសង្ស័យថា អាជ្ញាធរមានបំណងយកដីទាំងនោះទុកខ្លួនឯង ខណៈតំបន់នោះទើបតែកាត់ចូលមកក្រុងភ្នំពេញ បានជាងមួយឆ្នាំ ហើយហាងឆេងដីនៅតំបន់នោះចាប់ផ្ដើមស្ទុះឡើង។
ជុំវិញបញ្ហានេះ លោក ម៉ក់ ហុង អធិការខណ្ឌសែនសុខ បានចុចបិទទូរស័ព្ទភ្លាមៗ នៅពេលដែលវិទ្យុអាស៊ីសេរី សាកសួរពីរឿងដែលអ្នកភូមិក្នុងសង្កាត់ពញាពន់ ចោទប្រកាន់ថា លោកបានបង្ខំនិងគំរាមឲ្យអ្នកភូមិផ្តិតមេដៃប្រគល់ដីឲ្យក្រុមហ៊ុនឯកជន។
នាយកលេខាធិការដ្ឋានក្រុមការងារពិសេសសិទ្ធិលំនៅឋាន លោក សៀ ភារម្យ បានពន្យល់ថា ប្រសិនបើក្រុមហ៊ុនចិនតៃវ៉ាន់ ទិញដីពីអ្នកភូមិតាំងពីឆ្នាំ១៩៩៣ លេចមុខមកទាមទារដីវិញនោះ តំណាងក្រុមហ៊ុនគួរជួបចរចាជាមួយអ្នកភូមិ។
មាត្រា៣០ នៃច្បាប់ភូមិបាល ចេញកាលពីឆ្នាំ២០០១ បានចែងថា បុគ្គលទាំងឡាយដែលអាស្រ័យផលនៃភោគៈដោយសន្តិវិធី និងមិនមានការជំទាស់ចាប់ពី ៥ឆ្នាំយ៉ាងតិច គិតមកដល់កាលបរិច្ឆេទនៃការប្រកាសឲ្យប្រើច្បាប់នេះ លើអចលនវត្ថុដែលមានលក្ខណៈត្រឹមត្រូវតាមច្បាប់ក្នុងការកាន់កាប់ជាឯកជន មានសិទ្ធិស្នើសុំប័ណ្ណកម្មសិទ្ធិស្ថាពរ។ ក្នុងករណីមានការជំទាស់ដល់ការផ្តល់ប័ណ្ណកម្មសិទ្ធិនេះ អ្នកតវ៉ាត្រូវយកភស្តុតាងមកបញ្ជាក់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។