ថ្នាក់ដឹកនាំខេត្តព្រះសីហនុ បានអះអាងថា កំពុងដោះស្រាយទំនាស់ដីធ្លីរ៉ាំរ៉ៃ ដែលប្រជាពលរដ្ឋ ១១សហគមន៍។ ក្នុងចំណោមនេះ អាជ្ញាធរបានដោះស្រាយទំនាស់នេះជូនពលរដ្ឋបាន ៣សហគមន៍ទៅតាមញត្តិស្នើជួយអន្តរាគមន៍។
ទោះយ៉ាងនេះក្តី មន្ត្រីសង្គមស៊ីវិលរិះគន់ថា ចំណាត់ការដោះស្រាយវិវាទដីធ្លីហាក់មានការយឺតយ៉ាវ និងមិនទាន់ផ្ដល់យុត្តិធម៌ពិតប្រាកដជូនពលរដ្ឋបានច្រើននៅឡើយទេ។
អភិបាលរងខេត្តព្រះសីហនុ លោក ស្រ៊ុន ស្រ៊ន់ មានប្រសាសន៍ថា នឹងពន្លឿនដោះស្រាយទំនាស់ដីធ្លីជូនពលរដ្ឋទាំង ១១សហគមន៍ឲ្យបានឆាប់តាមដែលអាជ្ញាធរជំនាញពាក់ព័ន្ធខេត្តអាចធ្វើទៅបាន។
លោកបន្តថា បច្ចុប្បន្ននេះក្នុងចំណោមពលរដ្ឋមានទំនាស់ដីធ្លីចំនួន ១១សហគមន៍នាខេត្តព្រះសីហនុ គឺអាជ្ញាធរបានដោះស្រាយ និងរកដីសម្បទានសង្គមកិច្ចសម្រាប់ផ្ដល់ជូន ឬក៏បែងចែកជូនពលរដ្ឋបានចំនួន ៣សហគមន៍រួចហើយ។
ទោះយ៉ាងនេះក្តី លោក ស្រ៊ុន ស្រ៊ន់ ថ្លែងថា ទំនាស់នានាដែលនៅក្នុងដៃតុលាការ គឺអាជ្ញាធរខេត្តមិនអាចលូកដៃចូលបានទេ ដោយស្នើឲ្យពលរដ្ឋមានទំនាស់ដីធ្លីទាំងនោះដាក់ពាក្យបណ្ដឹងបន្តទៅកាន់តុលាការ ដើម្បីរកដំណោះដោះស្រាយ៖ «ដំបូងឡើយគោលការណ៍របស់សាលាខេត្តផ្ដល់ជូនបងប្អូន ២០ម៉ែត្រ គុណ ៣០ម៉ែត្រ ហើយបងប្អូនមិនព្រមយក ២០ម៉ែត្រ គុណ ៣០ម៉ែត្រ សុំទារយក ៣០ គុណ ៤០ម៉ែត្រ។ ឥឡូវនេះដល់ពេលសាលាខេត្តឯកភាពផ្ដល់ជូនដី ៣០ម៉ែត្រ គុណ ៤០ម៉ែត្រ ប៉ុន្តែបងប្អូនទាមទារយកដីកន្លះហិកតារ។ ដល់ទាមទារយកកន្លះហិកតារ មិនទាន់ថា ផ្ដល់ជូនស្រួលបួលផង ទាមទារយក ១ហិកតារទៀត។ ខ្លះសុំកន្លះហិកតារ ខ្លះសុំ ១ហិកតារ។ អ៊ីចឹងបានថា ពិបាកអ៊ីចឹង។ ខ្ញុំមិនដឹងថា តើត្រូវដោះស្រាយ រត់រកគោលការណ៍ដោះស្រាយណាទេ។ ចង់បញ្ជាក់ថា ការដោះស្រាយទៅតាមធនធានដែលយើងមាន»។
កាលពីថ្ងៃទី១១ ខែវិច្ឆិកា តំណាងប្រជាពលរដ្ឋមានទំនាស់ដីធ្លីចំនួន ១១សហគមន៍ មានគ្នាជិត ២០នាក់ ជួបជុំគ្នានៅសាលាខេត្តព្រះសីហនុ ដើម្បីសួរនាំអំពីការដាក់ញត្តិស្នើកិច្ចអន្តរាគមន៍លើទំនាស់ដីធ្លីរ៉ាំរ៉ៃរបស់ពួកគាត់។
នៅក្នុងជំនួបនោះ តំណាងសហគមន៍នីមួយៗ ក៏បានសំណូមពរដល់ថ្នាក់ដឹកនាំខេត្តព្រះសីហនុ ជួយពន្លឿនការដោះស្រាយទំនាស់ដីធ្លីជូនពួកគាត់ឲ្យបានឆាប់ ព្រោះសហគមន៍ខ្លះមានទំនាស់ដីធ្លីនេះអូសបន្លាយចន្លោះពី ៥ឆ្នាំ រហូតដល់ជិត ១០ឆ្នាំមកហើយ។ ទំនាស់នេះ ទុកឲ្យឈ្មួញ ឬមន្ត្រីមានអំណាចប្រើប្រព័ន្ធតុលាការ ដើម្បីរំលោភយកដីលំនៅឋាន ឬដីបង្កបង្កើនផល និងចាប់ពលរដ្ឋដែលហ៊ានចេញមុខតវ៉ាដាក់គុកជាបន្តបន្ទាប់។
តំណាងពលរដ្ឋម្នាក់ក្នុងចំណោមពលរដ្ឋមានទំនាស់ដីធ្លីចំនួន ១១សហគមន៍ នាខេត្តព្រះសីហនុ បានកត់សម្គាល់ និងកោតសរសើរចំពោះសកម្មភាពដោះស្រាយទំនាស់របស់ថ្នាក់ដឹកនាំខេត្តព្រះសីហនុ ពេលនេះ៖ «គាត់សន្យាថា នឹងដោះស្រាយតាមដំណាក់កាល ហើយឲ្យមន្ត្រីចុះទៅពិនិត្យទៅអង្កេតហើយ ចុះវាស់វែងដីឲ្យពលរដ្ឋតែម្ដង។ ដោយសារតែសហគមន៍ទាំងប៉ុន្មានហ្នឹងគាត់រស់នៅលើដីហ្នឹងស្រាប់ហើយ អ៊ីចឹងបានជាគាត់រកដំណោះស្រាយជូន។ សហគមន៍ទាំងប៉ុន្មានរស់នៅលើដីហ្នឹងស្រាប់ គឺគេចុះផ្តល់ប័ណ្ណកម្មសិទ្ធិជូនពលរដ្ឋ»។
ទាក់ទិនបញ្ហានេះ លោក ឃុន សាវឿន មន្ត្រីអង្កេតអង្គការលីកាដូ (Licadho) ខេត្តព្រះសីហនុ បានស្នើដល់អាជ្ញាធរពាក់ព័ន្ធខេត្តព្រះសីហនុ ត្រូវពន្លឿនសកម្មភាពដោះស្រាយទំនាស់ដីធ្លីឲ្យបានឆាប់។ ជាងនេះ លោកថា ដីធ្លីដែលអាជ្ញាធរត្រូវផ្ដល់ជូនពលរដ្ឋនោះ ត្រូវអភិវឌ្ឍន៍ទីតាំងទាំងនោះឲ្យមានផ្លូវថ្នល់ ប្រព័ន្ធទឹកភ្លើង សាលារៀន និងមន្ទីរពេទ្យឲ្យបានត្រឹមត្រូវ។
លោកបន្តថា ការដោះស្រាយទំនាស់ដីធ្លីមានប្រសិទ្ធភាពទៅបានដរាបណាអាជ្ញាធរពាក់ព័ន្ធចាប់ពីថ្នាក់ក្រោមរហូតដល់ថ្នាក់ជាតិ មានឆន្ទៈពិតប្រាកដ ហើយយកយុត្តិធម៌ជាធំ ទើបបញ្ចប់ជម្លោះដីធ្លីនៅខេត្តព្រះសីហនុ ទៅបាន៖ «បើសិនជាអាជ្ញាធរហ្នឹងយកពលរដ្ឋទៅបោះចោលឲ្យផុតតែពីមុខពីមាត់ហ្នឹង វាជាចំណុចមួយចុងក្រោយ នាំឲ្យប្រជាពលរដ្ឋមានទំនាស់ដីធ្លីទាំងអស់ហ្នឹងពិបាកដដែល។ ខ្ញុំព្រួយបារម្ភអ៊ីចឹង»។
យ៉ាងណាក៏ដោយ ប្រជាពលរដ្ឋមានទំនាស់ដីធ្លីទាំង ១១សហគមន៍ បានអះអាងថា បើសិនជាថ្នាក់ដឹកនាំខេត្តព្រះសីហនុ មិនអាចដោះស្រាយទំនាស់ដីធ្លីជូនពួកគាត់ឲ្យបានសមរម្យទេ ក្រុមប្រជាពលរដ្ឋទាំង ១១សហគមន៍ មានគម្រោងលើកគ្នាទៅតវ៉ាដល់មុខស្ថាប័នកំពូលៗ នៃរាជរដ្ឋាភិបាលជាបន្តទៀតនៅថ្ងៃអនាគត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។