ប្រជាការពារព្រៃឈើប្រមាណជិត ៧០នាក់ នៅឃុំស្រយង់ នៃស្រុកគូលែន ខេត្តព្រះវិហារ បានលើកគ្នាទៅរារាំងគ្រឿងចក្ររបស់ក្រុមហ៊ុនម៉ាឡេស៊ី មួយឈ្មោះ ហ្វីភី (Fephy) កាលពីថ្ងៃអាទិត្យ ទី២៧ ខែមេសា កន្លងទៅ។ ការរារាំងនោះ បន្ទាប់ពីក្រុមសហគមន៍អះអាងថា ក្រុមហ៊ុនបរទេសនេះ បានឈូសឆាយពង្រីកព្រំប្រទល់ដីសម្បទានសេដ្ឋកិច្ច ហើយរំលោភចូលទៅក្នុងដែនដីព្រៃសហគមន៍។
សហគមន៍ការពារព្រៃឈើ ឈ្មោះ ព្រៃម្ល៉ូង នៅភូមិស្រយង់ខាងត្បូង ឃុំស្រយង់ កំពុងរាយបណ្ដាក់សមាជិកឱ្យឃ្លាំមើលជាប្រចាំទៅលើសកម្មភាពគ្រឿងចក្ររបស់ក្រុមហ៊ុនម៉ាឡេស៊ី ដោយមិនឱ្យឈូសឆាយចូលទៅក្នុងដីព្រៃការពារបានទេ។
តំណាងសហគមន៍ព្រៃម្ល៉ូង គឺលោក សែម ឡំ។ លោកបានមានប្រសាសន៍កាលពីរសៀលថ្ងៃច័ន្ទ ទី២៨ ខែមេសា ថា លោកនិងប្រជាពលរដ្ឋជាច្រើន កំពុងព្រួយបារម្ភខ្លាចបាត់បង់ព្រៃឈើទំហំជាង ២ពាន់ហិកតារ ដែលខិតខំការពារជាច្រើនឆ្នាំមកហើយ។
លោក សែម ឡំ បានមានប្រសាសន៍ថា កាលពីថ្ងៃអាទិត្យ ទី២៧ ខែមេសា កន្លងទៅ ក្រុមហ៊ុន ហ្វីភី ម៉ាឡេស៊ី បានយកគ្រឿងចក្រ ១គ្រឿង ទៅឈូសឆាយកំណត់ព្រំដីសម្បទានសេដ្ឋកិច្ច ហើយបានរំលោភចូលយ៉ាងជ្រៅទៅក្នុងតំបន់ព្រៃសហគមន៍៖ «ពីម្សិលឈូសនោះ ប្រហែលចូល ៥០០ហិកតារហើយ បើគិតពីដីព្រៃនៅចំណុចត្រពាំងតាគង់ ព្រៃម្ល៉ូង ស្រយង់ខាងត្បូង។ ពួកខ្ញុំដាក់បណ្ដាញសមាជិកសហគមន៍ចែកជាក្រុម ១០នាក់ ឃ្លាំមើលក្រុមហ៊ុន តើអាចវាយចូលព្រៃសហគមន៍ទៀតឬក៏អត់?»។
តំណាងសហគមន៍ដដែលបញ្ជាក់ថា ចាប់តាំងពីឆ្នាំ២០០៨ មក គេបានទទួលការពារព្រៃឈើទំហំជាង ២.៤០០ហិកតារ ហើយកាលពីថ្ងៃទី២៧ ខែមេសា កន្លងទៅ គឺគេបានជួបជជែកជាមួយមនុស្សរបស់ក្រុមហ៊ុន ហ្វីភី ដោយបានស្នើសុំ កុំឱ្យឈូសឆាយរំលោភចូលទៅក្នុងដីព្រៃការពារតទៅទៀត។
ទោះយ៉ាងណា វិទ្យុអាស៊ីសេរីមិនអាចស្វែងរកការទាក់ទងជាមួយតំណាងក្រុមហ៊ុន ហ្វីភី ម៉ាឡេស៊ី ដើម្បីសុំការបំភ្លឺរឿងនោះបានយ៉ាងណានៅឡើយ។
ឯកសារបានបង្ហាញថា កាលពីខែមករា ឆ្នាំ២០១២ កន្លងទៅ រដ្ឋាភិបាលបានផ្ដល់ដីសម្បទានសេដ្ឋកិច្ចទំហំ ៨.២០០ហិកតារទៅឱ្យក្រុមហ៊ុន ហ្វីភី ម៉ាឡេស៊ី នៅឃុំស្រយង់ ភូមិត្បែង១ និងភូមិត្បែង២ ស្រុកគូលែន។
អភិបាលរងស្រុកគូលែន លោក ប៉ែន ជឹង បានមានប្រសាសន៍ថា ក្រុមសហគមន៍បានសុំឱ្យរូបលោកទៅពិនិត្យមើលជាក់ស្ដែងអំពីបញ្ហាដែលក្រុមហ៊ុនបានប្រើគ្រឿងចក្រឈូសឆាយចូលតំបន់ព្រៃសហគមន៍នេះ ក៏ប៉ុន្តែលោកពិបាកដោះស្រាយ ដោយសារតែលោកមិនដឹងច្បាស់លាស់អំពីព្រំប្រទល់របស់ព្រៃសហគមន៍ ពីព្រោះសហគមន៍នោះ មិនទាន់បានទទួលសិទ្ធិស្របច្បាប់ក្នុងការគ្រប់គ្រងព្រៃឈើនៅឡើយ។
លោក ប៉ែន ជឹង៖ «ខ្ញុំក៏បានប្រាប់ពួកគាត់ថា ឱ្យគាត់រត់ ច្បាប់សហគមន៍នោះឱ្យត្រឹមត្រូវ សព្វគ្រប់មក ស្រណុកដោះស្រាយ កុំឱ្យវាមានបញ្ហា ព្រោះសហគមន៍នោះមិនទាន់មានអាជ្ញាប័ណ្ណទទួលស្គាល់ពីក្រសួងអីផ្សេងៗទេ។ អ៊ីចឹងបានយើងពិបាកដោះស្រាយ ហើយខាងក្រុមហ៊ុនគេមានផែនទី មិនដឹងត្រឹមណា អីត្រឹមណាផង អត់ទានសិក្សាច្បាស់ទេ»។
ទោះយ៉ាងណា មេឃុំស្រយង់ លោក ប៉ែន ឡាម បានអះអាងថា តំបន់ព្រៃជាង ២.៤០០ហិកតារនោះ គឺអាជ្ញាធរឃុំស្រុកបានយល់ព្រម និងទទួលស្គាល់ឱ្យប្រជាពលរដ្ឋការពារជាច្រើនឆ្នាំមកហើយ។
អង្គការក្រៅរដ្ឋាភិបាលដែលពាក់ព័ន្ធនឹងកិច្ចការពារព្រៃឈើក្នុងខេត្តព្រះវិហារ បានឱ្យដឹងថា តំបន់ការពារព្រៃឈើព្រៃម្ល៉ូង នោះ មិនមែនទើបតែមានការប្រឈមមុខជាលើកដំបូងជាមួយក្រុមហ៊ុនទេ គឺចាប់តាំងតែពីអំឡុងខែកក្កដា ឆ្នាំ២០១៣ រហូតមកដល់ពេលនេះ ប្រជាសហគមន៍បានប្រឈមមុខជាមួយក្រុមហ៊ុនដីសម្បទានសេដ្ឋកិច្ច ឈ្មោះ សេលា ដាមិច និងក្រុមហ៊ុនហ្វីភី ម៉ាឡេស៊ី ចំនួន ២-៣លើកមកហើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។