ជនជាតិ​ភាគ​តិច​កួយ​នៅ​ស្រុក​រវៀង​ចោទ​ក្រុមហ៊ុន​ចិន​​រុករក​រ៉ែ​រំលោភ​យក​ដី​ពួកគាត់

ដោយ ហង្ស សាវយុត
2017-05-31
អ៊ីម៉ែល
មតិ
ចែករំលែក
បោះពុម្ព
  • បោះពុម្ព
  • ចែករំលែក
  • មតិ
  • អ៊ីម៉ែល
ផែនទី​ខេត្ត​ព្រះវិហារ
ផែនទី​ខេត្ត​ព្រះវិហារ
Photo: RFA

ក្នុង​ពេល​ដែល​អាជ្ញាធរ​នៅ​តាម​មូលដ្ឋាន​ជា​ច្រើន​កំពុង​គិត​ទៅ​លើ​តែ​យុទ្ធនា​ការឃោសនា​រក​សំឡេង​ឆ្នោត​សម្រាប់​ជ្រើសរើស​ក្រុមប្រឹក្សា​ឃុំ-​សង្កាត់ អាណត្តិ​ទី​៤ ដែល​ការ​បោះឆ្នោត​កាន់​តែ​ខិត​ជិត​មក​ដល់​នេះ ហាក់​ដូចជា​ទុក​ឱ្យ​កាស​ឱ្យ​ក្រុមហ៊ុន​ខ្លះ កាន់​តែ​រំលោភ​យក​ដីធ្លី​របស់​ប្រជាពលរដ្ឋ​ដែរ។

អ្នក​ភូមិ​ឱ្យ​ដឹង​ថា នៅ​ឯ​តំបន់​ភ្នំ​ដែក នៃ​ស្រុក​រវៀង ខេត្ត​ព្រះវិហារ មាន​ក្រុមហ៊ុន​មួយ​ឈ្មោះ ឌែលខម កម្ពុជា ១ (Delcom Cambodia1) បាន​រំលោភ​លើ​ដី​ស្រែ​ចម្ការ​របស់​ប្រជាពលរដ្ឋ​ជា​បន្តបន្ទាប់​ដើម្បី​ពង្រីក​ផ្ទៃដី​រុករក​រ៉ែ​មាស។

ជនជាតិ​ដើម​ភាគតិច​កួយ​ខ្លះ រស់​នៅ​ភូមិ​ត្រពាំងកន្ទឹម បាន​ចោទ​ប្រកាន់​ថា ក្រុមហ៊ុន​ចិន មួយ​ឈ្មោះ ឌែលខម កម្ពុជា ១ ថា កំពុង​រៀបចំ​ផែនការ​រំលោភ​យក​ដីស្រែ​ចម្ការ​របស់​ពួកគេ ក្នុង​រយៈពេល ២-៣​ថ្ងៃ​មក​នេះ ដើម្បី​ឈូស​ឆាយ​ពង្រីក​ផ្ទៃដី​សម្បទាន​រុករក​រ៉ែ​មាស។

ជនជាតិ​ដើម​ភាគ​តិច​ម្នាក់ ក្នុង​ចំណោម​ជា​ច្រើន​ទៀត ដែល​មាន​ដី​ចម្ការ​នៅ​ជិត​តំបន់​ភ្នំ​អន្លង់ ដែល​ជា​តំបន់​រុករក​រ៉ែ​មាស​នោះ គឺ​អ្នកស្រី យឹម ផាត។ អ្នកស្រី​មាន​ប្រសាសន៍​ទាំង​ចិត្ត​អន្ទះសា​នៅ​ព្រឹក​ថ្ងៃ​អង្គារ ទី​៣០ ខែ​ឧសភា ថា កាល​ពី​ម៉ោង​ជាង ៨​ព្រឹក​ថ្ងៃ​ដដែល គឺ​ក្រុមហ៊ុន​បាន​នាំ​ទាហាន​ប្រដាប់​អាវុធ​មក​ជាមួយ​ផង ប៉ុនប៉ង​ឈូស​ឆាយ​យក​ដី​ចម្ការ​របស់​គាត់​ជា​ថ្មី​ទៀត។

ស្ត្រី​ដដែល​បញ្ជាក់​ថា ក្រុមហ៊ុន​នេះ​ធ្លាប់​ឈូស​រំលោភ​យក​ដី​ចម្ការ​របស់​គាត់​ដែល​មាន​ដំណាំ​ពេញ​អស់​ជា​ច្រើន​ហិកតារ ហើយ​ដោយ​គាត់​ដាក់​ពាក្យ​បណ្ដឹង​ទៅ​អាជ្ញាធរ​តាំង​ពី​ថ្នាក់​ឃុំ ស្រុក​រវៀង រហូត​ដល់​ខេត្ត​ព្រះវិហារ ផង ក៏ប៉ុន្តែ​រយៈពេល​ជាង ៥​ខែ​មក​ហើយ មិន​ឃើញ​មាន​ដំណោះស្រាយ​ទេ៖ «ក្រុមហ៊ុន ឌែលខម កម្ពុជា ព្រឹក​មិញ​នេះ មក​ពី ២-​៣​ដង មក​បម្រុង​យក​គ្រឿងចក្រ​មក​ឈូស​ដី​ទៀត។ ខ្ញុំ​ថា បើ​គេ​យក​ក៏​យក​ចុះ​ចេញ សង​តែ​ថ្លៃ​ដំណាំ ប៉ុន្តែ​គេ​មិន​ឱ្យ​អ្វី​ទាំង​អស់»

ប្រជាពលរដ្ឋ​ខ្លះ រិះគន់​អាជ្ញាធរ​ឃុំ​រម្យទម​ថា មិន​ដែល​យក​ចិត្ត​ទុក​ដាក់​ជួយ​ដោះស្រាយ​បញ្ហា ដែល​ក្រុមហ៊ុន​រ៉ែ​មាស​រំលោភ​ដីធ្លី​របស់​អ្នក​ភូមិ​នោះ​ឡើយ។

មេ​ឃុំ​រម្យទម លោក ប្រាក់ ផន បាន​បដិសេធ​មិន​ធ្វើ​ការ​ពន្យល់​ជុំវិញ​រឿង​ដែល​អ្នក​ភូមិ​ចោទ​ប្រកាន់​នេះ​ទេ ដោយ​លោក​ឆ្លើយ​យ៉ាង​ខ្លី​ថា កំពុង​ជាប់​រវល់​ប្រជុំ។

ចំណែក​មន្ត្រី​ក្រុមប្រឹក្សា​ឃុំ​រម្យទម ម្នាក់ ដែល​សុំ​មិន​បញ្ចេញ​ឈ្មោះ បាន​ប្រាប់​ថា ប្រជាពលរដ្ឋ​ដែល​រង​គ្រោះ​ដោយសារ​ក្រុមហ៊ុន​រំលោភ​យក​ដី​ចម្ការ គឺ​ធ្លាប់​ស្នើ​សុំ​ទៅ​អាជ្ញាធរ​ឃុំ​រម្យទម ឱ្យ​ជួយ​ទារ​សំណង​ពី​ការ​ប៉ះពាល់​ផល​ដំណាំ​ក្នុង ១​ហិកតារ ១.០០០​ដុល្លារ ប៉ុន្តែ​ឃុំ​មិន​ដែល​យក​ចិត្ត​ទុក​ដាក់​ដោះស្រាយ​ទេ។ មន្ត្រី​ដដែល​បញ្ជាក់​ថា ប្រជាពលរដ្ឋ​ជា​ច្រើន​គ្រួសារ បាន​រង​ការ​ប៉ះពាល់​ដោយសារ​ក្រុមហ៊ុន​រំលោភ​យក​ដី​ទៅ​ធ្វើ​ជា​តំបន់​រុករក​រ៉ែ​មាស​នោះ។

អ្នក​សម្របសម្រួល​សមាគម​ការពារ​សិទ្ធិមនុស្ស​អាដហុក (ADHOC) ខេត្ត​ព្រះវិហារ លោក ឡោ ចាន់ ព្រួយ​បារម្ភ​ចំពោះ​បញ្ហា​ដែល​ក្រុមហ៊ុន​រ៉ែ​មាស​នោះ​រំលោភ​យក​ដី​ប្រជាពលរដ្ឋ​កាន់​តែ​ច្រើន​ឡើងៗ។ លោក ឡោ ចាន់ ស្នើ​សុំ​ឱ្យ​រដ្ឋាភិបាល​ពិនិត្យ​មើល​ឡើង​វិញ តើ​ក្រុមហ៊ុន​យក​កម្លាំង​ទាហាន​ពី​ណា​ទៅ​កាង​នៅ​ក្នុង​តំបន់​រុករក​រ៉ែ​មាស​នោះ៖ «គឺ​ថា​យក​កម្លាំង​ទាហាន មាន​ស្ពាយ​កាំភ្លើង​យក​មក​កាង គឺ​ទាហាន​មាន​តួនាទី​ការពារ​សន្តិសុខ ការពារ​ប្រទេស​ជាតិ មិន​មែន​ក្រុមហ៊ុន​យក​មក​គំរាម​ប្រជាពលរដ្ឋ​ឡើយ»

គេហទំព័រ អូផិន ឌីវែលឡបមែន (Open Development) ឱ្យ​ដឹង​ថា ក្រុមហ៊ុន ឌែលខម កម្ពុជា ១ បាន​ទទួល​អាជ្ញាប័ណ្ណ​ពី​រដ្ឋាភិបាល​តាម​ប្រកាស​លេខ ១៤១ ឆ្នាំ​១៩៩៨ ដោយ​អនុញ្ញាត​ឱ្យ​រុករក​រ៉ែ​ដែក និង​រ៉ែ​ជា​ច្រើន​ប្រភេទ​ទៀត នៅ​តំបន់​ភ្នំ​ដែក នៃ​ស្រុក​រវៀង ខេត្ត​ព្រះវិហារ លើ​ផ្ទៃដី​ទំហំ ២១៦​គីឡូម៉ែត្រ​ក្រឡា និង​នៅ​តំបន់​ក្រវា ខេត្ត​កំពង់ធំ លើ​ផ្ទៃដី​ទំហំ ១៩៨​គីឡូម៉ែត្រ​ក្រឡា៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
  • បោះពុម្ព
  • ចែករំលែក
  • អ៊ីម៉ែល
គេហទំព័រ​ទាំងមូល