ទំនាស់ដីនៅស្រុកគូលែន ខេត្តព្រះវិហារ បានកើនកម្ដៅជាបន្តបន្ទាប់ ដោយអ្នកស្រុកចាប់ផ្ដើមលើកគ្នាទៅរារាំងសកម្មភាពក្រុមហ៊ុនដីសម្បទានសេដ្ឋកិច្ច ដែលប្រើគ្រឿងចក្រឈូសឆាយដីស្រែនិងចំការ។ អ្នកស្រុកបានសម្រេចចិត្តនាំគ្នាបោះជំរំដើម្បីឃ្លាំមើលសកម្មភាពក្រុមហ៊ុន។
ប្រជាពលរដ្ឋប្រមាណជាង ១០០នាក់ នៅភូមិស្រយង់ ឃុំស្រយង់ កំពុងប្រមូលផ្ដុំគ្នា ២ថ្ងៃមកហើយចាប់ពីថ្ងៃអាទិត្យ ដើម្បីតវ៉ាប្រឆាំងក្រុមហ៊ុនដីសម្បទានសេដ្ឋកិច្ចមួយ ឈ្មោះ សេលា ដាម៉ិច មិនឱ្យបន្តឈូសឆាយដីព្រៃ និងរំលោភចូលដីស្រែចំការរបស់ពួកគេទេ។
ក្រុមអ្នកភូមិជាច្រើនបានប្រមូលផ្ដុំគ្នាចាកចេញពីផ្ទះ ហើយទៅបោះជំរំ នៅតំបន់ភូមិផុងចាស់ ដែលជាប់ព្រំប្រទល់គ្នា និងឃុំខ្វាវ ស្រុកជីក្រែង ខេត្តសៀមរាប ដើម្បីរារាំងនិងបណ្ដេញគ្រឿងចក្ររបស់ក្រុមហ៊ុនចំនួន ៣គ្រឿង ឱ្យចាកចេញទៅវិញ។
ក្រុមអ្នកភូមិ ស្រី ប្រុស ជាច្រើនអះអាងកាលពីព្រឹកថ្ងៃច័ន្ទ ទី៤ ខែសីហា ថា ក្រុមហ៊ុន សេលា ដាម៉ិច កំពុងរំលោភបំពានលើដីស្រែរបស់ពួកគេ ដែលមានប័ណ្ណកម្មសិទ្ធិត្រឹមត្រូវរួចហើយ ព្រមទាំងរំលោភទៅលើដីព្រៃរបស់សហគមន៍ផង៖ «នេះកំពុងបាតុកម្មនៅ សេលា ដាម៉ិច មានអាប៊ុល ៣គ្រឿង។ ក្បាលស្រែបន្តិចបន្តួច... ដីស្រែ មានស្រូវអី គឺបរជាន់ពេញតែនេះឯង។ អត់មានដកថយទេ នេះកំពុងតែសម្រុកយកកម្លាំងមកប្រហែលជាដេញឱ្យឈប់ឈូសឆាយ ឱ្យវាទៅវិញ។ ខ្ញុំតវ៉ាខ្ញុំចង់សួរថា ដីនេះដីប្រជាពលរដ្ឋចេញប្លង់អស់ហើយ ម៉េចក៏មកឈូសឆាយ? ភ័យខ្លាចរឿងអស់ដីស្រែ ដីសហគមន៍»។
ក្រុមអ្នកភូមិបន្ទោស អាជ្ញាធរភូមិ ឃុំនិងស្រុកគូលែន ថា កំពុងព្រងើយកន្តើយចំពោះបញ្ហាដែលក្រុមហ៊ុនឈូសរំលោភដីស្រែ និងចំការរបស់ប្រជាពលរដ្ឋ ពីព្រោះគេបានប្រាប់ទៅអាជ្ញាធរ ២-៣ថ្ងៃទៅហើយ ក៏ប៉ុន្តែរហូតមកដល់ពេលនេះមិនទាន់ឃើញអាជ្ញាធរណាទៅពិនិត្យនិងដោះស្រាយនៅឡើយ។
ទោះយ៉ាងណា អាជ្ញាធរឃុំស្រយង់ បានឆ្លើយតបថា គេពុំបានព្រងើយកន្តើយដូចប្រជាពលរដ្ឋចោទប្រកាន់នោះទេ។
មេឃុំស្រយង់ លោក ប៉ែន ឡាម មានប្រសាសន៍ថា លោកបានដឹងជុំវិញរឿងក្រុមហ៊ុនដែលយកគ្រឿងចក្រទៅឈូសបំផ្លាញ ដីស្រែរបស់ប្រជាពលរដ្ឋនោះ។ លោកមេឃុំទទួលស្គាល់ថា ដីតំបន់នោះគឺបានធ្វើប័ណ្ណកម្មសិទ្ធិត្រឹមត្រូវជូនប្រជាពលរដ្ឋរួចហើយ ហេតុអ្វីក៏ក្រុមហ៊ុនហ៊ានយកគ្រឿងចក្រទៅឈូសរំលោភទៀត?
លោក ប៉ែន ឡាម៖ «ខ្ញុំនៅឯខេត្តឯណេះ តែឱ្យក្រុមការងារចុះទៅមើលហើយ។ យ៉ាងម៉េចបានជាក្រុមហ៊ុនទៅឈូសឆាយដីដែលបងប្អូនកំពុងធ្វើស្រែចម្ការអ៊ីចឹង?»។
ជាច្រើនឆ្នាំមកហើយ រដ្ឋាភិបាលបានប្រគល់ដីសម្បទានសេដ្ឋកិច្ចទំហំ ៩ពាន់ហិកតារទៅឱ្យក្រុមហ៊ុន សេលា ដាម៉ិច ក្នុងភូមិសាស្ត្រស្រុកគូលែន ខេត្តព្រះវិហារ ដើម្បីដាំដំណាំកសិឧស្សាហកម្ម។
អ្នកសម្របសម្រួលសមាគមអាដហុក (ADHOC) ខេត្តព្រះវិហារ លោក ឡោ ចាន់ មានប្រសាសន៍ថា លោកទើបតែបានទទួលបណ្ដឹងពីតំណាងអ្នកភូមិជុំវិញរឿងនោះ ហើយឯកសារបង្ហាញថា ដីនៅតំបន់ដែលក្រុមហ៊ុន សេលា ដាម៉ិច ឈូសឆាយ គឺប្រជាពលរដ្ឋមានប្លង់រឹង បន្ទាប់ពីក្រុមនិស្សិតស្ម័គ្រចិត្តបានចុះវាស់វែងរួចរាល់មក។
លោក ឡោ ចាន់ សំដែងក្ដីព្រួយបារម្ភចំពោះការគំរាមកំហែង និងអំពើហិង្សាដែលកើតមានជាញឹកញាប់ ដោយសារជម្លោះដីធ្លីនៅស្រុកគូលែន។
កាលពីថ្ងៃទី២៧ ខែកក្កដា កន្លងទៅ យុវជនម្នាក់ ឈ្មោះ ទ្រី ចំរើន អាយុ ១៨ឆ្នាំ នៅភូមិស្នាផ្អែក ឃុំស្រយង់ ត្រូវទាហានប្រដាប់អាវុធនៃកងពលតូចលេខ៤១ បាញ់ស្លាប់ នៅពេលដែលមានជម្លោះដីចំការទំហំ ២ហិកតារ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។