ប្រជាពលរដ្ឋ និងភ្ញៀវទេសចរជាតិមកពីតាមបណ្ដាខេត្តក្រុងមួយចំនួនបន្តរិះគន់អាជ្ញាធរខេត្តព្រះសីហនុ ពិសេសរដ្ឋាភិបាល ថាទំនងជាមិនមានលទ្ធភាពថែរក្សាថ្នល់ក្រាលកៅស៊ូជាស្នាព្រះហស្តអតីតព្រះមហាក្សត្រ សម្ដេចព្រះ នរោត្តម សីហនុ បន្សល់ទុកពីសម័យសង្គមរាស្ត្រនិយម មានទីតាំងនៅប្របមាត់សមុទ្រនៃឆ្នេរអូរឈើទាលឲ្យគង់វង្ស ដូចផ្លូវរទេះភ្លើង ឬផ្លូវដែកទេ។
បញ្ហានេះ មន្ត្រីសង្គមស៊ីវិលបង្ហាញទស្សនៈថា ស្នាព្រះហស្ត (ស្នាដៃ) កសាងដែលត្រូវថ្នាក់ដឹកនាំប្រទេសពីមួយជំនាន់ទៅមួយជំនាន់បន្សល់ទុក គួរត្រូវថ្នាក់ដឹកនាំបន្តវេនក្រោយៗជួយថែរក្សា ឬអភិរក្សកែលំអឲ្យបានគង់វង្ស ដោយមិនត្រូវបំផ្លាញចោលវត្ថុតាងនោះទេ។
ការរិះគន់របស់ប្រជាពលរដ្ឋ និងភ្ញៀវទេសចរជាតិដូច្នេះ កើតឡើងនៅគ្រាអាជ្ញាធរពាក់ព័ន្ធខេត្តព្រះសីហនុ បានដាក់គ្រឿងចក្រជាច្រើនគ្រឿងដើម្បីឈូសបំផ្លាញថ្នល់ក្រាលកៅស៊ូដែលជាស្នាព្រះហស្តអតីតព្រះមហាក្សត្រខ្មែរ សម្ដេចព្រះ នរោត្តម សីហនុ មានទីតាំងនៅតាមប្របឆ្នេរអូរឈើទាល ផ្លូវទល់មុខវិមានលំហែកាយរបស់លោកនាយករដ្ឋមន្ត្រី ហ៊ុន សែន ត្រូវគេជីកកកាយយកអាចម៍ដីបំផ្លាញចោលនៅព្រឹកថ្ងៃអង្គា ទី១០ ខែឧសភា។
ក្រុមប្រជាពលរដ្ឋបង្ហាញទស្សនៈថា ស្នាព្រះហស្ត និងសមិទ្ធផលផ្សេងៗរបស់អតីតព្រះមហាក្សត្រ និងថ្នាក់ដឹកនាំប្រទេសគ្រប់ជំនាន់ គួរត្រូវថ្នាក់ដឹកនាំបន្តវេនជួយថែរក្សា និងអភិរក្សឲ្យបានល្អប្រសើរ ជាជាងឃុបឃិតបំបាត់ភស្តុតាងក្នុងន័យអភិវឌ្ឍន៍ ឬដើម្បីលាភសក្ការៈអ្វីមួយ។
ទោះជាបែបណាក៏ដោយចុះ ផ្លូវក្រាលកៅស៊ូមានទីតាំងនៅតាមបណ្ដោយចុងឆ្នេរអូរឈើទាល ឬឆ្នេរអូរឈើទាលទី២ ត្រូវរដ្ឋបាលខេត្តព្រះសីហនុ កាលពីព្រឹកថ្ងៃអង្គា ទី១០ ខែឧសភា ដាក់គ្រឿងចក្រឈូសកម្ទេច និងដឹកយកអាចម៍ដីចេញពីផ្លូវកៅស៊ូ ដែលជាស្នាព្រះហស្តអតីតព្រះមហាក្សត្រ នរោត្តម សីហនុ ឲ្យបាត់ទ្រង់ទ្រាយដើមទាំងស្រុង។
អាជ្ញាធរខេត្តនេះនិយាយខ្លីថា ការដាក់គ្រឿងចក្រឈូសកម្ទេចផ្លូវនេះ គឺដើម្បីដឹកយកអាចម៍ដីទៅស្ថាបនាផ្លូវថ្មីផ្សេងទៀតនៅប្របមាត់សមុទ្រនៃឆ្នេរអូរឈើទាលនេះដែរ ហើយផ្លូវកៅស៊ូបន្សល់ទុកពីសម័យសង្គមរាស្ត្រនិយមនេះ ត្រូវគ្រប់គ្រងដោយក្រុមហ៊ុនសុខា អូតែល ព្រោះផ្លូវនេះត្រូវអតីតប្រធានមន្ទីរសុរិយោដី និងអតីតអភិបាលខេត្តព្រះសីហនុ អាណត្តិមុនចេញប្លង់កម្មសិទ្ធិជូនក្រុមហ៊ុនសុខា ជាស្ថាពរបាត់ទៅហើយ។
ទាក់ទិនបញ្ហានេះ លោក កែម ឡី អ្នកវិភាគឯករាជ្យ និងជាអ្នកស្រាវជ្រាវការអភិវឌ្ឍសង្គមផ្ដល់អនុសាសន៍ថា គួរតែរដ្ឋាភិបាលជំនាន់នីមួយៗ ជួយថែរក្សាស្នាព្រះហស្តផ្សេងៗ ពីមួយជំនាន់ទៅមួយជំនាន់ដែលបានស្ថាបនាឡើងឲ្យបានគង់វង្ស ជាជាងបំផ្លាញសមិទ្ធផលទាំងនោះចោល។
លោក កែម ឡី បង្ហាញការយល់ឃើញថា ស្នាដៃ និងសមិទ្ធផលផ្សេងៗរបស់ថ្នាក់ដឹកនាំគ្រប់ជំនាន់ ដែលបានកសាងឡើងដើម្បីបម្រើដល់ប្រជាពលរដ្ឋ គួរត្រូវអ្នកដឹកនាំបន្តវេនជួយថែរក្សា ឬអភិរក្សឲ្យបានគង់វង្ស ដោយមិនត្រូវឃុបឃិតបំផ្លាញចោលភស្តុតាងក្នុងហេតុផលផ្សេងៗនោះទេ៖ «យើងមិនមែនទៅអភិវឌ្ឍប្រទេស ឬឆ្នេរដោយកម្ទេចសមិទ្ធផល ឬស្នាព្រះហស្តដែលមានស្រាប់នោះទេ ដោយការអភិវឌ្ឍនេះ យើងត្រូវអភិវឌ្ឍ ហើយអភិរក្សប្រកបដោយនិរន្តរភាព ដោយមិនឲ្យស្នាដៃ ឬស្នាព្រះហស្តរបស់ថ្នាក់ដឹកនាំគ្រប់ជំនាន់បន្សល់ទុកនោះរងនូវផល ប៉ះពាល់ច្រើនទេ ជាពិសេសយើងគួរកុំព្យាយាមលុបបំបាត់ស្នាដៃ ឬស្នាព្រះហស្តរបស់បុព្វបុរស ឬសមិទ្ធផលរបស់ថ្នាក់ដឹកនាំនៅតាមជំនាន់នីមួយៗចោលនោះទេ។ មរតករបស់បុព្វបុរសខ្មែរយើងខំសាង ឬស្ថាបនាឡើង ហើយដែលមានស្រាប់ យើងត្រូវថែរក្សា និងអភិរក្សឲ្យគង់វង្ស ហើយបើចង់អភិវឌ្ឍ គឺប្រទេសកម្ពុជា នៅមានទីតាំងធំទូលាយ ឬឆ្នេរជាច្រើនដែលត្រូវអភិវឌ្ឍ មិនមែនទៅកម្ទេចចោលស្នាព្រះហស្ត ឬសមិទ្ធផលមានស្រាប់ចោលនោះទេ»។
កាលពីដើមខែឧសភា នៅលើបណ្ដាញសង្គមហ្វេសប៊ុក (Facebook) របស់លោកនាយករដ្ឋមន្ត្រី ហ៊ុន សែន ក្នុងអំឡុងពេលនៃដំណើរទស្សនកិច្ចរបស់ប្រមុខដឹកនាំតាមរថភ្លើងពីភ្នំពេញ ឆ្ពោះមកកាន់ខេត្តព្រះសីហនុ ប្រមុខដឹកនាំបានរំលឹកពីសមិទ្ធផល ឬស្នាព្រះហស្តរបស់អតីតព្រះមហាក្សត្រ សម្ដេចព្រះ នរោត្តម សីហនុ គឺផ្លូវដែក មានខ្លឹមសារទាំងស្រុងថា "ផឹកទឹកត្រូវនឹកដល់ប្រភព ទទួលទានផ្លែឈើត្រូវនឹកដល់អ្នកដាំ"៖ «កូនចៅប្រជារាស្ត្រទូទាំងប្រទេសចងចាំ និងដឹងគុណចំពោះស្នាព្រះហស្តអតីតព្រះមហាវីរក្សត្រកម្ពុជា សម្ដេចឪ សម្ដេចតា សម្ដេចតាទួតនៃយើងដែលបានកសាងផ្លូវដែកក្នុងទសវត្សឆ្នាំ៦០ ដែលបានបន្សល់ទុកអោយកម្ពុជា ប្រើប្រាស់មកទល់សព្វថ្ងៃនេះ»។
ត្រង់ចំណុចនេះ អ្នកស្រី ជៀប សុធារី មន្ត្រីសម្របសម្រួលសមាគមអាដហុក (ADHOC) ខេត្តព្រះសីហនុ គាំទ្រចំពោះផែនការ ឬការងារថែរក្សា និងអភិរក្សនូវស្នាព្រះហស្ត ឬសមិទ្ធផលនានា ដែលថ្នាក់ដឹកនាំរដ្ឋាភិបាលគ្រប់ជំនាន់បន្សល់ទុក។
អ្នកស្រី សុធារី ប្រកាសគាំទ្រការប្ដេជ្ញាចិត្តរបស់លោកនាយករដ្ឋមន្ត្រី ហ៊ុន សែន ក្នុងការថែរក្សាស្នាព្រះហស្តអតីតព្រះមហាក្សត្រ សម្ដេចព្រះ នរោត្តម សីហនុ បន្សល់ទុកពេលនេះ។ ជាងនេះ អ្នកស្រី សុធារី ក៏សំណូមពរដល់ប្រមុខដឹកនាំឲ្យជួយថែរក្សា និងអភិវឌ្ឍផ្លូវក្រាលកៅស៊ូជាស្នាព្រះហស្តអតីតព្រះមហាក្សត្រ ដែលរដ្ឋបាលខេត្តព្រះសីហនុ កំពុងប្រើគ្រឿងចក្រឈូសបំផ្លាញ មានទីតាំងភ្ជាប់តាមផ្លូវកៅស៊ូ ផ្លូវទល់មុខវិមានលំហែកាយប្រមុខដឹកនាំ នាឆ្នេរអូរឈើទាល ដូចជួយថែរក្សាអភិវឌ្ឍផ្លូវដែកដែរ៖ «រដ្ឋាភិបាលបានប្រគល់ដីនៅតំបន់ឆ្នេរអូរឈើទាលនេះ ទៅឲ្យក្រុមហ៊ុនសុខា ក្នុងការទទួលការអភិវឌ្ឍតំបន់ឆ្នេរ ហើយយើងឃើញក្រុមហ៊ុនសុខា ជាមួយស្ថាប័នគណៈកម្មការថែរក្សាឆ្នេរជាតិនេះ បានលើកគម្រោងស្ថាបនាផ្លូវថ្មី នៅប្របមាត់សមុទ្រ នាំឲ្យបាត់បង់ទំហំដីចំណីឆ្នេររួមតូច»។
ទាក់ទងបញ្ហានេះ យុវជន អាន ចាន់និមល ដែលធ្វើដំណើរពីភ្នំពេញ មកទស្សនាឆ្នេរអូរឈើទាល បង្ហាញការហួសចិត្តកាលបើឃើញសសរថ្មធំៗរាប់រយដើមត្រូវក្រុមហ៊ុនសុខា អូតែល យកមកបុកគ្រឹះនៅលើថ្នល់កៅស៊ូបន្សល់ទុកពីសម័យសង្គមរាស្ត្រនិយម និងហ៊ុមព័ទ្ធរបងថ្ម មិនអាចឲ្យយានជំនិះគ្រប់ប្រភេទបើកឆ្លងកាត់ចេញពីដើមផ្លូវម្ខាងចេញទៅចុងផ្លូវម្ខាងបាន។
យុវជន ចាន់និមល ស្ថិតក្នុងចំណោមយុវជនច្រើននាក់ទៀត ដែលចូលទៅកម្សាន្តតាមឆ្នេរសមុទ្រ ស្នើឲ្យរដ្ឋាភិបាលជួយថែរក្សា ឬសង្គ្រោះផ្លូវក្រាលកៅស៊ូជាស្នាព្រះហស្តសម្ដេចព្រះ នរោត្តម សីហនុ បានបន្សល់ទុកឲ្យបានគង់វង្ស។ ជាងនេះទៀត ក៏ត្រូវជួយសើរើមន្ត្រីនៅតាមស្ថាប័នពាក់ព័ន្ធអំពីការចេញប្លង់កម្មសិទ្ធិនៅលើដីថ្នល់កៅស៊ូដែលជាទ្រព្យសម្បត្តិសាធារណៈរបស់រដ្ឋ និងជាស្នាព្រះហស្តអតីតព្រះមហាក្សត្រ ឬទ្រព្យសម្បត្តិព្រះបរមរាជវាំងសាជាថ្មីឡើងវិញ ដើម្បីឈានដល់មានវិធានការតាមផ្លូវច្បាប់៖ «ខ្ញុំសង្កេតឃើញថា ផ្លូវក្រាលកៅស៊ូចាស់នេះ បែរជាត្រូវបានបុកគ្រឹះ ដោយក្រុមហ៊ុន សុខា ហើយគេបានស្ថាបនាផ្លូវថ្មីមួយទៀតនៅប្របមាត់សមុទ្រ នាំឲ្យបាត់បង់ដីចំណីឆ្នេរសមុទ្ររួមតូច ឬកៀកទៅនឹងឆ្នេរសមុទ្រនៃចុងឆ្នេរអូរឈើទាលនេះ»។
បញ្ហានេះដែរ អភិបាលខេត្តព្រះសីហនុ លោក យន្ត មីន ធ្លាប់ប្រាប់វិទ្យុអាស៊ីសេរី ខ្លីថា ផ្លូវកៅស៊ូដែលជាស្នាព្រះហស្តអតីតព្រះមហាក្សត្រនៅប្របមាត់សមុទ្រចុងឆ្នេរអូរឈើទាលនេះ ត្រូវបានអភិបាលខេត្ត និងប្រធានមន្ទីរសុរិយោដីខេត្តព្រះសីហនុ អាណត្តិមុន ចេញប្លង់កម្មសិទ្ធិជូនក្រុមហ៊ុនសុខា អូតែល រួចហើយ ហើយករណីនេះ រូបលោកគ្មានសិទ្ធិសម្រេចទេ ដោយទុកជូនប្រមុខដឹកនាំរាជរដ្ឋាភិបាលពិនិត្យសម្រេច។
តំណាងក្រុមហ៊ុនសុខា អូតែល និងជាប្រធានសភាពាណិជ្ជកម្មខេត្តព្រះសីហនុ លោកឧកញ៉ា ឡាវ កាំង បានឲ្យដឹងថា ផ្លូវក្រាលកៅស៊ូ ឬដីនៅក្នុងបរិវេណចុងឆ្នេរអូរឈើទាល ត្រូវប្រធានមន្ទីរសុរិយោដី និងអភិបាលខេត្តព្រះសីហនុ អាណត្តិមុន ផ្ដល់សិទ្ធិវិនិយោគជូនក្រុមហ៊ុនសុខា ស្របច្បាប់ ហើយក្រុមហ៊ុនសុខា ក៏បានបុកសសរគ្រឹះនៅលើផ្លូវនេះសម្រាប់គម្រោងអភិវឌ្ឍន៍របស់ក្រុមហ៊ុនរួចហើយដែរ។
ក្រុមយុវជន និងប្រជាពលរដ្ឋមកពីតាមបណ្ដាខេត្តមួយចំនួនដែលបានចូលទៅទស្សនាតំបន់ឆ្នេរអូរឈើទាល ខេត្តព្រះសីហនុ កំពុងរង់ចាំមើលចំណាត់ការរបស់លោកនាយករដ្ឋមន្ត្រី ហ៊ុន សែន ថាតើអាចជួយសង្គ្រោះផ្លូវក្រាលកៅស៊ូ ដែលជាស្នាព្រះហស្តរបស់អតីតព្រះមហាក្សត្រ សម្ដេចព្រះ នរោត្តម សីហនុ បន្សល់ទុកពីសម័យសង្គមរាស្ត្រនិយម មានទីតាំងនៅចុងឆ្នេរអូរឈើទាល ផ្លូវត្រង់ទល់មុខវិមានលំហែកាយរបស់ប្រមុខដឹកនាំ ឲ្យបានគង់វង្សដូចការអះអាង ឬទុកជូនប្រជាពលរដ្ឋប្រើប្រាស់ដូចដើមវិញ មានប្រសិទ្ធភាពដែរ ឬទេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។