គ្រូបង្រៀនបឋមសិក្សានៅស្រុកកំពង់ត្របែក ខេត្តព្រៃវែង ចោទប្រកាន់អាជ្ញាធរមូលដ្ឋានថា ឃុបឃិតគ្នាលក់ដីរបស់សាលាទៅឲ្យអ្នកភូមិដោយខុសច្បាប់។ ក្រុមគ្រូបង្រៀនបានតវ៉ាឲ្យអាជ្ញាធរ ប្រគល់ដីដែលលក់នោះមកឲ្យសាលាវិញ ប៉ុន្តែគ្មានដំណោះស្រាយ។ មេឃុំបញ្ជាក់ថា ទំនាស់ដីរបស់សាលានោះកើតឡើងដោយសារការមិនច្បាស់លាស់លើព្រំដីរបស់ប្រជាពលរដ្ឋក្បែរនោះ ហើយអាជ្ញាធរនឹងសើរើការងារនេះ។
ក្រុមគ្រូបង្រៀនអំពាវនាវសុំឲ្យអាជ្ញាធរពាក់ព័ន្ធនឹងបញ្ហានេះត្រួតពិនិត្យមន្ត្រីដែលលក់ដីនោះ ហើយដោះស្រាយប្រគល់ដីមកឲ្យសាលាវិញជាបន្ទាន់ ជៀសវាងកុំឲ្យបញ្ហានេះអូសបន្លាយពេលទៅមុខទៀត។ ផ្ទៃដីរបស់សាលាបឋមសិក្សាប្រាសាទដែលលក់នោះមានចំនួន ២ប្លង់ ទំហំប្រហាក់ប្រហែលគ្នា គឺបណ្ដោយប្រមាណ ១៦ម៉ែត្រ នឹងទទឹង ៤ម៉ែត្រ ស្ថិតនៅតំបន់ផ្សារកអណ្ដើក ឃុំ ប្រាសាទ ស្រុកកំពង់ត្របែក ខេត្តព្រៃវែង។ គ្រូបង្រៀនអះអាងថា ដីនេះអាជ្ញាធរបានលក់ទៅឲ្យអ្នកភូមិដែលមានលុយនៅតំបន់នោះធ្វើជាកម្មសិទ្ធិដោយស្របច្បាប់។
គ្រូបង្រៀនបឋមសិក្សាប្រាសាទ ម្នាក់ លោក អៀង អស្ចារ្យ មានប្រសាសន៍នៅថ្ងៃទី៩ មិថុនា ថា មេភូមិបានឃុបឃិតគ្នាជាមួយអាជ្ញាធរឃុំលក់ដីនោះទៅឲ្យប្រជាពលរដ្ឋដោយស្ងាត់ៗ។
លោកបន្តថា ក្រុមគ្រូបង្រៀនសាលាបឋមសិក្សាតវ៉ាឲ្យអាជ្ញាធរឃុំពន្យល់ពីមូលហេតុនៃការលក់ដីនោះ ព្រមទាំងឲ្យដោះស្រាយជាច្រើនលើកមកហើយ។ ប៉ុន្តែការតវ៉ានោះអាជ្ញាធរបានត្រឹមតែចរចាពន្យារពេលម្ដងថ្ងៃនេះថ្ងៃនោះពុំបានលទ្ធផលអ្វីជាដុំកំភួនទេ៖ «យើងគ្មានសមត្ថភាពអីទៅដោះស្រាយឲ្យលើសពីហ្នឹងទេ ហើយបើសិនគាត់មិនដោះស្រាយអាបញ្ហាហ្នឹងទេ គ្រូៗទាំងអស់គាត់សុំផ្អាកការបង្រៀនសិន ដើម្បីតវ៉ា ហើយឥឡូវឃើញថា ព្រឹកមិញហ្នឹងគាត់មកប្រជុំជាមួយគ្រូៗហ្នឹងណាស់! ហើយឥឡូវគាត់សុំលើកទៅថ្ងៃព្រហស្បតិ៍ ដើម្បីដោះស្រាយអាបញ្ហាដែលផ្ទះថ្មីដែលធ្វើចូលផង។ ថ្មីហ្នឹងក៏ដោយផ្ទះចាស់ដែលបានសង់កន្លងទៅហ្នឹងឲ្យអាជ្ញាធរដែនដីហ្នឹងដោះស្រាយអាបញ្ហាហ្នឹងឲ្យហើយទៅ អ៊ីចឹងគាត់ហ្នឹងក៏ដកឃ្លាទៅដែរ»។
លោកបន្ថែមថា អាជ្ញាធរភូមិបានធ្វើលិខិតបំពានលើដីរបស់សាលា កាលពីដើមឆ្នាំ២០១៤ ដោយមានការឯកភាពពីមេឃុំ លក់ទៅឲ្យប្រជាពលរដ្ឋក្បែរសាលាកាន់កាប់ដោយស្របច្បាប់។ លោកថា ភ្លាមៗនោះ គ្រូបង្រៀនបានមានប្រតិកម្មតវ៉ារឿងដីនេះជាបន្តបន្ទាប់។
ឆ្លើយតបនឹងបញ្ហានេះ មេឃុំប្រាសាទ លោក ភោគ បូរី មានប្រសាសន៍បញ្ជាក់ថា អាជ្ញាធរពុំមានចេតនាលក់ដីរបស់សាលាទៅប្រជាពលរដ្ឋក្បែរនោះដូចការចោទប្រកាន់នោះឡើយ។ លោកបន្តថា ករណីនេះកើតឡើងដោយសារការភ័ន្តច្រឡំរវាងប្រជាពលរដ្ឋនិងអាជ្ញាធរ ដែលមិនបានពិនិត្យច្បាស់លាស់លើផ្ទៃដីដែលប្រជាពលរដ្ឋធ្លាប់កាន់កាប់កន្លងមក។ លោកថាបញ្ហានេះអាជ្ញាធរនឹងតាមដានហើយដោះស្រាយការងារនេះឡើងវិញ។
លោក ភោគ បូរី៖ «គេអ្នកលក់មុនហ្នឹង គេដាក់បណ្ដោយជម្រៅ ១៩ម៉ែត្រ ព្រំប្រទល់ខាងលិចទល់នឹងដីចំណីផ្លូវលំ។ អ៊ីចឹងកាលហ្នុងលោកមេភូមិប្រហែលជាទុក ៦ម៉ែត្រអាចំណីផ្លូវហ្នឹងណាស់។ ដល់អាលិខិតក្រោយៗមកគាត់ហ្នឹង ប្រហែលជាវាស់ពីដីចំណីផ្លូវលំហ្នឹងមកវាឃើញ ១៦ម៉ែត្រអ្នកទិញក្រោយចេះតែទិញអ៊ីចឹងទៅ។ ព្រឹកមិញខ្ញុំទៅសម្របសម្រួល ខ្ញុំថាឥឡូវហ្នឹងដីអ្នកដែលដីក្នុងរង្វង់ ១៦ម៉ែត្រដែលលោកមេភូមិស៊ីញេហើយមានត្រាឃុំអីហ្នឹង ខាងត្បូងដែលគេទើបហ្នឹងទិញហ្នឹងគេថាឲ្យតែខាងជើងរុះសិនទៅ គាត់ហ្នឹងតាមទាំងអស់វាអ៊ីចឹងណាស់»។
ក្រុមគ្រូបង្រៀនបង្ហើបថា ពួកគាត់ហាក់គ្មានជំនឿទៅលើការរកដំណោះស្រាយរបស់អាជ្ញាធរឃុំនេះឡើយ។ ព្រោះការដោះស្រាយរបស់អាជ្ញាធរឃុំ កន្លងមកបានត្រឹមតែចរចាគ្នាដោយពុំមានកំណត់ទិសដៅច្បាស់លាស់ដែលបញ្ជាក់ថា ជាសញ្ញាវិជ្ជមានលើករណីរំលោភយកដីរបស់សាលានោះទេ។ បញ្ហានេះប្រសិនបើនៅតែបន្តអូសបន្លាយទៅមុខទៀត នោះដីរបស់សាលាអាចនឹងបាត់បង់ បន្តិចម្ដងៗនៅថ្ងៃខាងមុខជាពុំខាន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។