ដីស្រែរបស់អ្នកភូមិដែលរស់នៅតាមជាយដែនកម្ពុជា-វៀតណាម ១៦គ្រួសារ នៅស្រុកព្រះស្ដេច ខេត្តព្រៃវែង មិនបានធ្វើប្លង់ដីដោយសារអាជ្ញាធរចាត់ជាតំបន់ស។ ពួកគាត់បញ្ជាក់ថា អ្នកស្រុកតែងបង្កបង្កើនផលនៅលើដីនោះតៗគ្នាតាំងពីដូនតាមកម្ល៉េះ ហើយប្រសិនបើពុំមានប័ណ្ណកម្មសិទ្ធិកាន់កាប់ស្របច្បាប់ទេ វាអាចនឹងកើតជម្លោះដណ្ដើមដីគ្នានៅថ្ងៃខាងមុខ។
អ្នកភូមិទាំងនោះអំពាវនាវសុំឲ្យអាជ្ញាធរពាក់ព័ន្ធចេញប័ណ្ណកម្មសិទ្ធិស្របច្បាប់ឲ្យពួកគាត់ ដើម្បីងាយស្រួលគ្រប់គ្រងដីនៅថ្ងៃខាងមុខ។
អ្នកភូមិម្នាក់ គឺលោក ប៊ូ ប៊ីន រស់នៅភូមិអំពិល នៃឃុំព្រះស្ដេច ស្រុកព្រះស្ដេច ខេត្តព្រៃវែង ឲ្យដឹងនៅថ្ងៃទី២៨ កក្កដា ថា ដីស្រែរបស់អ្នកភូមិអាជ្ញាធរមិនចេញប្លង់ឲ្យនោះប្រមាណ ៩ហិកតារ ដោយមានប្រជាពលរដ្ឋចំនួន ១៦គ្រួសារកាន់កាប់ ស្ថិតនៅភូមិអំពិល ឃុំព្រះស្ដេច និងមានចម្ងាយពីមាត់ទន្លេជាយដែនប្រទេសកម្ពុជា-វៀតណាម ប្រមាណ ៣០០ម៉ែត្រ។ លោកបន្តថា ដីរបស់លោកផ្ទាល់មានចំនួន ៣ហិកតារ នៅតំបន់នោះ ហើយបានដាំដុះអាស្រ័យផលនៅលើដីនោះតាំងពីឆ្នាំ១៩៧៩ ជាប់ៗគ្នាពុំដែលខានឡើយ។
លោកថា ប្រជាពលរដ្ឋទាំង ១៦គ្រួសារដែលអាស្រ័យផលនៅលើដីនោះ ព្រួយបារម្ភខ្លាចបាត់បង់ដី ពីព្រោះថា អាជ្ញាធរពុំចេញប័ណ្ណកម្មសិទ្ធិស្របច្បាប់ដល់អ្នកភូមិទេ ដោយលើកឡើងថា ដីទាំងនោះស្ថិតនៅក្នុងតំបន់ស៖ «ដីកេរអាករម៉ែឪខ្ញុំតាំងដូនតាមក ហើយឥឡូវម៉ែឪខ្ញុំគាត់ចែកឲ្យខ្ញុំនៅកន្លែងហ្នឹង ឥឡូវគេអត់ធ្វើប្លង់ឲ្យ ដឹងថាមូលហេតុយ៉ាងម៉េចដីហ្នឹងគេទុកយ៉ាងម៉េច ទៅឲ្យអ្នកណាអនាគតទៅមុខហ្នឹង? មុខរបរមានតែប៉ុណ្ណឹង អ៊ីចឹងបើដីហ្នឹង បើសិនគេដកអស់ហ្នឹង ខ្ញុំប្រជាពលរដ្ឋទុក្ខលំបាកមែនទែនតែម្ដង ព្រោះរស់តែធ្វើស្រែស្រូវហ្នឹងហើយ។ គេគ្រាន់ឲ្យយើងកាន់កាប់ធ្វើដូចមិនឲ្យស្អីសំអាងផងហ្នឹង»។
ឆ្លើយតបនឹងបញ្ហានេះអភិបាលស្រុកព្រះស្ដេច លោក ប៉ិច សុង មានប្រសាសន៍ថា ហេតុដែលអាជ្ញាធរមិនអាចចេញប័ណ្ណកាន់កាប់ដល់ប្រជាពលរដ្ឋភ្លាមនោះ ដោយសារដីរបស់ពួកគាត់ទាំង ១៦គ្រួសារនោះស្ថិតក្នុងតំបន់ឡូត៍នេសាទចាស់ ហើយពុំទាន់សម្រេចថា យ៉ាងណានៅឡើយទេ តែពួកគាត់អាចទៅបង្កបង្កើនផលនៅលើដីនោះបានដោយពុំមានការហាមឃាត់ពីសំណាក់អាជ្ញាធរឡើយ។
លោកថាអាជ្ញាធរកំពុងញាប់ដៃញាប់ជើង រៀបចំធ្វើប័ណ្ណកម្មសិទ្ធិស្របច្បាប់ជួនពួកគាត់ទាំងនោះក្នុងពេលឆាប់ៗ៖ «យើងខ្ញុំកំពុងតែសំណើទៅនេះដើម្បីសុំប្រគល់ប្លង់ជូនគាត់។ ខ្ញុំក្នុងនាមតំណាងអាជ្ញាធរដែនដីខ្ញុំប្រឹងប្រែងណាស់ ដើម្បីប្រជាពលរដ្ឋខ្ញុំ ខ្ញុំចង់បានឲ្យគាត់ណាស់ ដើម្បីឲ្យគាត់មានសិទ្ធិចាត់ចែងហ្នឹងទៀត។ ឥឡូវគាត់មានសិទ្ធិអាស្រ័យផង ប៉ុន្តែនៅខ្វះសិទ្ធិចាត់ចែង។ ខ្ញុំម្សិលមិញក៏ខ្ញុំនៅហ្នឹងដែរ ខ្ញុំកំពុងតែប្រឹងប្រែងតស៊ូដើម្បីឲ្យគាត់មានសិទ្ធិចាត់ចែងហើយ ព្រោះពិភាក្សាជាមួយជំនាញដែលគេកំពុងចុះវាស់លក្ខណៈប្រព័ន្ធនៅឃុំហ្នឹង»។
ទាក់ទងបញ្ហានេះមន្ត្រីសម្របសម្រួលអង្គការសិទ្ធិមនុស្សអាដហុក (Adhoc) ប្រចាំខេត្តព្រៃវែង អ្នកស្រី អៀង គិមលី មានប្រសាសន៍ថា ប្រសិនបើអ្នកភូមិបង្កបង្កើនផលលើដីនោះតាំងពីឆ្នាំ១៩៧៩ មែន បញ្ជាក់ថា ដីរបស់ពួកគាត់ដែលកាន់កាប់នោះជាកម្មសិទ្ធិស្របច្បាប់។
អ្នកស្រីបន្តថា បញ្ហានេះអាជ្ញាធរត្រូវដោះស្រាយចេញប័ណ្ណកម្មសិទ្ធិដល់ពួកគាត់ ហើយចាត់ទុកការលើកឡើងរបស់អាជ្ញាធរដែលថា ជាតំបន់ឡូត៍នេសាទនោះ គឺដើម្បីដោះបន្ទុកពីទទួលខុសត្រូវមួយគ្រាប៉ុណ្ណោះ៖ «ព្រោះដែលហាមឃាត់នៅដំណាក់កាលណាមួយនៅពេលដែលគាត់កំពុងកាន់កាប់ណោះ ហើយនៅពេលបិទប្រកាស ៣០ថ្ងៃហ្នឹង ឧទាហរណ៍ដីហ្នឹងមានទំនាស់ដីតំបន់ស អ៊ីចឹងគេបិទប្រកាស ៣០ថ្ងៃហ្នឹង គួរតែតវ៉ានៅពេលហ្នឹង ជជែកគ្នានៅពេលហ្នឹង ដើម្បីឲ្យដោះស្រាយនៅពេលហ្នឹង ដើម្បីឲ្យប្លង់ហ្នឹងចេញមក ព្រោះបានទៅអ្នកណាឬយ៉ាងម៉េច? តែអានេះគេចែកទៅគ្រប់គ្នាហើយ ស្រាប់តែគាត់អត់បាន គាត់និយាយអ៊ីចឹង អាហ្នឹងការអះអាងរបស់អះអាងឲ្យរួចៗពីមាត់ហ្នឹង»។
តែយ៉ាងណាអ្នកភូមិឲ្យដឹងថា ដីដែលពួកគាត់បង្កបង្កើនផលនោះពុំមែនស្ថិតក្នុងតំបន់ឡូត៍នេសាទឡើយ។ សព្វថ្ងៃដីស្រែរបស់ភូមិនៅតំបន់នោះអាជ្ញាធរចែកប័ណ្ណកម្មសិទ្ធិអស់ទៅហើយ ចំណែកឯអ្នកភូមិទាំង ១៦គ្រួសារនោះពុំមានប្លង់ដីនៅឡើយទេ ហើយពួកគាត់ព្រួយបារម្ភខ្លាចកើតជម្លោះដណ្ដើមដីនៅថ្ងៃអនាគត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។