ពលរដ្ឋរស់នៅតាមបណ្ដោយផ្លូវជាតិលេខ៦អា (6A) ស្ថិតក្នុងសង្កាត់ជ្រោយចង្វា បានដុតកង់ឡានប្រឆាំងការឈូសឆាយដីធ្វើផ្លូវមួយខ្សែនៅតាមបណ្ដោយផ្លូវនេះ ដោយចោទប្រកាន់ថា អាជ្ញាធរមិនទាន់ជូនដំណឹង ឬផ្ដល់ដំណោះស្រាយដល់ពួកគេនៅឡើយ។ ក្នុងការតវ៉ាថ្ងៃនេះ អាជ្ញាធរនៅមិនទាន់មានការឆ្លើយតបពីរឿងឈូសឆាយដីពលរដ្ឋនេះនៅឡើយទេ។
យ៉ាងហោចណាស់ត្រាក់ទ័រប្រមាណ ៥គ្រឿង និងឡានដឹកដីចំនួន ២គ្រឿង ចូលឈូសឆាយ និងចូលចាក់ដីលើរបង និងផលដំណាំរបស់ប្រជាពលរដ្ឋដែលរស់នៅតាមបណ្ដោយផ្លូវជាតិលេខ៦អា នៅក្នុងសង្កាត់ជ្រោយចង្វារ និងសង្កាត់ព្រែកលៀប ក្នុងភ្នំពេញ។ ដំណាលគ្នានោះដែរ ផ្សេងខ្មៅខ្មួលខ្មាញ់ក៏ចាប់ផ្ដើមហុយសន្ធោសន្ធៅ ព្រោះពលរដ្ឋដុតកង់ឡានប្រឆាំងការឈូសឆាយនេះ។
ប្រជាពលរដ្ឋរងផលប៉ះពាល់ លោក ម៉ៅ វណ្ណតិច ប្រាប់ថា ដីលោកមានជាង ៦.០០០ម៉ែត្រការ៉េ ត្រូវអាជ្ញាធរឈូសឆាយប្រមាណ ៤០ភាគរយនៃដីសរុប។ ពលរដ្ឋដដែលបន្តថា លោកចង់បានដំណោះស្រាយមួយដែលសមរម្យពីអាជ្ញាធរ៖ «ខ្ញុំសុំអំពាវនាវសម្ដេច ហ៊ុន សែន ដែលជាប្រមុខ និងអ្នកដែលអាចជួយប្រជាជនបាន សូមមេត្តាជួយប្រជាជនផង ដើម្បីបន្ថយផលប៉ះពាល់មិនមែនថា មិនឲ្យប៉ះពាល់ទេ ប៉ុន្តែសុំឲ្យប៉ះពាល់តិចបំផុត»។
ពលរដ្ឋថា អាជ្ញាធរបើកការឈូសឆាយជិតមួយសប្ដាហ៍ទៅហើយ ប៉ុន្តែនៅថ្ងៃទី២៦ ខែមករា ទើបអាជ្ញាធរផ្ដល់លិខិតជូនដំណឹងមកពលរដ្ឋដែលរងប៉ះពាល់ដើម្បីជជែករកដំណោះស្រាយជាមួយអាជ្ញាធរខណ្ឌជ្រោយចង្វារ។ ក្នុងសកម្មភាពឈូសឆាយនោះ ភាគច្រើនធ្វើឡើងពេលគ្មានពលរដ្ឋប្រមូលផ្តុំគ្នា ប៉ុន្តែប្រសិនបើមានពលរដ្ឋច្រើន មានសង្គមស៊ីវិល ឬអ្នកកាសែតនៅទីតាំងប៉ះពាល់អាជ្ញាធរមិនធ្វើសកម្មភាពទេ។
ទាក់ទងរឿងនេះដែរ នាយកលេខាធិការដ្ឋាននៃក្រុមការងារពិសេសសិទ្ធិលំនៅឋាន លោក សៀ ភារម្យ យល់ថា សកម្មភាពឈូសឆាយដែលធ្វើឡើងមិនបានជូនដំណឹងជាមុន ឬមិនទាន់ផ្ដល់ដំណោះស្រាយត្រឹមត្រូវ ជាអំពើល្មើសច្បាប់។ លោកស្នើឲ្យអាជ្ញាធរ ឬអ្នកពាក់ព័ន្ធផ្ដល់ដំណោះស្រាយដល់ពលរដ្ឋជាមុនសិន មុននឹងបើកការឈូសឆាយ៖ «ក្រុមហ៊ុន ឬរដ្ឋាភិបាលពេលដែលអភិវឌ្ឍ ទោះបីយកដីទាំងអស់នោះទៅបម្រើផលប្រយោជន៍សាធារណៈក៏ដោយ ត្រូវតែដោះស្រាយសំណងជូនពលរដ្ឋជាមុនទើបអាចធ្វើការឈូសឆាយនោះបាន»។
វិទ្យុអាស៊ីសេរី មិនអាចសុំការបំភ្លឺពីអភិបាលខណ្ឌជ្រោយចង្វារ លោក ឃ្លាំង ហួត បានទេ នៅថ្ងៃទី២៦ ខែមករា។ យ៉ាងណាក៏ដោយចុះ អាជ្ញាធរទើបផ្ដល់លិខិតជូនដំណឹងដល់ពលរដ្ឋនៅរសៀលថ្ងៃទី២៦ ខែមករា ដដែល ដោយបញ្ជាក់ថា ផ្លូវដែលធ្វើនៅប៉ែកខាងលិចនៃផ្លូវជាតិលេខ៦អា មានចម្ងាយ ១០០ម៉ែត្រពីអ័ក្សផ្លូវនេះ ដើម្បីបម្រើប្រយោជន៍សាធារណៈទូទៅ និងអាចបញ្ចៀសការកកស្ទះចរាចរណ៍បានមួយផ្នែកនៅពេលអនាគត។
ផ្លូវនេះ ពលរដ្ឋថា មានប្រវែងប្រមាណ ៦.០០០ម៉ែត្រ ដែលប៉ះពាល់ដល់ពលរដ្ឋប្រមាណ ៣០០គ្រួសារ រស់នៅតាមបណ្ដោយផ្លូវលេខ៦អា នៅក្នុងសង្កាត់ជ្រោយចង្វារ និងសង្កាត់ព្រែកលៀប។ នៅក្បែរកន្លែងឈូសឆាយចម្ងាយប្រមាណ ៧០ម៉ែត្រ ក៏មានផ្លូវមួយដែរដែលសាងសង់ដោយក្រុមហ៊ុន OCIC។
ប្រជាពលរដ្ឋស្នើឲ្យការសាងសង់ធ្វើឡើងចម្ងាយ ១៥០ម៉ែត្រ ពីអ័ក្សផ្លូវជាតិលេខ៦អាំ ព្រោះចម្ងាយផ្លូវនេះ មិនសូវប៉ះពាល់ដីផ្ទះរបស់ពលរដ្ឋ។ ពួកគេនៅតែអះអាងថា បន្តប្រឆាំងការឈូសឆាយនេះទៀត ប្រសិនអាជ្ញាធរខណ្ឌមិនផ្ដល់ដំណោះស្រាយសមរម្យ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។