ក្រុមអ្នកភូមទាំងបីសហគមន៍ រួមមានសហគមន៍បឹងកក់ បុរីកីឡា និងថ្មគោល នៅថ្ងៃទី១២ កក្កដា បានធ្វើបាតុកម្មនៅមុខតុលាការកំពូល ដោយទាមទារឲ្យតុលាការកំពូល ពន្លឿនដោះស្រាយសំណុំរឿង អ្នកស្រី យ៉ោម បុប្ផា ដែលពួកគាត់អះអាងថា ជាសកម្មជនដីធ្លីយ៉ាងសកម្មក្នុងការជួយតវ៉ាក្នុងបញ្ហាជម្លោះដីធ្លីនៅសហគមន៍បុរីកីឡា ជាមួយក្រុមហ៊ុន ផាន អ៊ីម៉ិច។
អ្នកស្រី យ៉ោម បុប្ផា ដែលមានអាយុ ២៩ឆ្នាំ និងជាសកម្មជនដីធ្លីផងនោះ កាលពីចុងខែធ្នូ ឆ្នាំ២០១២ ត្រូវបានតុលាការនៃសាលាដំបូងរាជធានីភ្នំពេញ បានផ្ដន្ទាទោសឲ្យជាប់ពន្ធនាគារ ៣ឆ្នាំ និងតម្រូវឲ្យបង់ប្រាក់ជំងឺចិត្តទៅជនរងគ្រោះចំនួន ៣០លានរៀល។ អ្នកស្រី យ៉ោម បុប្ផា ត្រូវចោទប្រកាន់ពីបទប្រើអំពើហិង្សាដោយចេតនា តាមរយៈការចូលរួមព្រួតគ្នាវាយលើបុរសអ្នករត់ម៉ូតូឌុបពីរនាក់ ឲ្យរងរបួសកាលពីដើមខែកញ្ញា ឆ្នាំ២០១២។
នៅមុខតុលាការកំពូលថ្ងៃទី១២ សីហា អ្នកស្រី ទេព វន្នី តំណាងអ្នកភូមិបឹងកក់ និងជាអ្នកដឹកនាំការធ្វើបាតុកម្មនេះ មានប្រសាសន៍ថា ការធ្វើបាតុកម្មនេះ គឺដើម្បីសុំឲ្យតុលាការកំពូលជួយពន្លឿនរឿងក្តីសកម្មជនដីធ្លី អ្នកស្រី យ៉ោម បុប្ផា ដែលក្រុមអ្នកស្រីបានដាក់លិខិតស្នើសុំតាំងពីខែមិថុនា ឲ្យបានឆាប់រហ័ស។
អ្នកតំណាងចំនួន ៥នាក់ ត្រូវបានអនុញ្ញាតឲ្យចូលជួបជាមួយមន្ត្រីតុលាការ។
អ្នកស្រី ទេព វន្នី ដែលបានចូលទៅជួបជាមួយមន្ត្រីតុលាការ បន្តថា មន្ត្រីតុលាការបានឲ្យក្រុមគ្រួសារ អ្នកស្រី យ៉ោម បុប្ផា ធ្វើសំណុំបែបបទនូវអ្វីដែលពួកគេចង់បាន ហើយបញ្ជូនទៅកាន់តុលាការ ងាយស្រួលខាងតុលាការធ្វើការលើរឿងនេះ។
អ្នកគ្រប់គ្រងបច្ចេកទេសការិយាល័យស៊ើបអង្កេតនៃអង្គការសិទ្ធិមនុស្សលីកាដូ (Licadho) ដែលបានចុះទៅដល់កន្លែងបាតុកម្ម ថ្លែងថា អ្វីដែលក្រុមអ្នកធ្វើបាតុកម្មចង់បាន គឺចង់ឲ្យមានការលែង អ្នកស្រី យ៉ោម បុប្ផា ឲ្យមានសេរីភាព ព្រោះពួកគេអះអាងថា អ្នកស្រី យ៉ោម បុប្ផា មិនបានប្រព្រឹត្តដូចការចោទប្រកាន់នោះទេ។
ទាក់ទងនឹងការចង់បានឲ្យក្រុមអ្នកភូមិទាំងបីសហគមន៍ ក្រឡាបញ្ជីសភាព្រហ្មទណ្ឌនៃតុលាការកំពូល គឺលោក ឈាង វុត្ថា បរិយាយថា ខាងតុលាការបានជួយសម្រួលឲ្យភាគីខាងគ្រួសារ អ្នកស្រី យ៉ោម បុប្ផា ដោយទុករយៈពេល ២០ថ្ងៃ ឲ្យពួកគាត់ក្នុងការធ្វើសារណាការពារផលប្រយោជន៍របស់ពួកគេ។
បាតុកម្មនេះ ចាប់ផ្ដើមនូវម៉ោង ៨កន្លះព្រឹក បានបញ្ចប់ទៅវិញនៅ ម៉ោង ១១ថ្ងៃត្រង់ ដោយមិនមានការបិទ និងការប៉ះទង្គិចជាមួយមន្ត្រីនគរបាលទេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។