ប្រជាពលរដ្ឋជាង ១០០គ្រួសារ នៅភូមិតាលាវ ឃុំតាលាវ ស្រុកអណ្ដូងមាស ខេត្តរតនគិរី គ្រោងលើកគ្នាទៅតវ៉ារុះរើបង្គោលព្រំដីសម្បទានរបស់ក្រុមហ៊ុនសម្បទានសេដ្ឋកិច្ច ហ័ង អាញ អូរយ៉ាដាវ (Hoang Anh Oyadav) ដើម្បីទាមទារដីជាង ១០ហិកតារ ជាទីទួលសុវត្ថិភាពរបស់អ្នកភូមិបន្ទាប់ពីក្រុមហ៊ុនបានឈូសឆាយយកជាដីសម្បទាននៅតំបន់នោះ។
អ្នកភូមិតាលាវ គ្រោងធ្វើការតវ៉ាដោយហិង្សានៅថ្ងៃព្រហស្បតិ៍ ទី១២ ខែមិថុនា ដើម្បីដណ្ដើមយកដីពីក្រុមហ៊ុនមកវិញសម្រាប់បង្កើតភូមិថ្មី ដោយសារភូមិចាស់ច្រាំងទន្លេបានបាក់ជាបន្តបន្ទាប់។
តំណាងអ្នកភូមិ លោក សុង ប៊ុនអាំ នៅថ្ងៃពុធ ទី១១ ខែមិថុនា រៀបរាប់ថា ដីទំហំជាង ១០ហិកតារដែលអ្នកភូមិទាមទារនេះ ជាដីត្រៀមបម្រុងរបស់អ្នកភូមិ ក៏ប៉ុន្តែក្រុមហ៊ុនបានឈូសឆាយយកតាំងពីឆ្នាំ២០១២ ទោះបីអ្នកភូមិបានតវ៉ាជាច្រើនលើក និងធ្វើលិខិតប្ដឹងសុំកិច្ចអន្តរាគមន៍ពីអាជ្ញាធរមូលដ្ឋានយ៉ាងណាក្តី។
លោកកត់សំគាល់ថា ដីតំបន់នោះមានសារសំខាន់សម្រាប់អ្នកភូមិតាំងទីលំនៅថ្មីដើម្បីជម្លៀសក្រុមគ្រួសារពីភូមិចាស់កំពុងរងគ្រោះដោយបាក់ច្រាំងទន្លេ៖ «ពួកខ្ញុំទៅដេញក្រុមហ៊ុនពីរបីដងហើយគេថា ដោះស្រាយឲ្យគ្មានអត់ដោះស្រាយឲ្យទេ ឥឡូវនេះគេដាំរបងថ្មីទៀតហើយ ពួកខ្ញុំចង់ទៅដកទៀតហ្នឹង។ ស្អែកពួកខ្ញុំធ្វើសកម្មភាព»។
ក្រុមហ៊ុន ហ័ង អាញ អូរយ៉ាដាវ ទទួលបានដីសម្បទានសេដ្ឋកិច្ច ៩ពាន់ហិកតារនៅស្រុកអណ្ដូងមាស កាលពីឆ្នាំ២០១១ ក៏ប៉ុន្តែដីនោះបង្កផលប៉ះពាល់ដីត្រៀមបម្រុងជាទីទួលសុវត្ថិភាពប្រជាពលរដ្ឋគ្រាមានទឹកជំនន់។
តំណាងក្រុមហ៊ុន លោក ថាច់ ភៀន មានប្រសាសន៍បញ្ជាក់ថា ដីដែលអ្នកភូមិទាមទារនោះ គឺជាដីដែលក្រុមហ៊ុនបានឈូសឆាយរួចហើយ បន្ទាប់ពីក្រសួងកសិកម្ម បានចេញអាជ្ញាប័ណ្ណសម្បទានប្រគល់ឲ្យក្រុមហ៊ុន។
លោកបន្តថា ក្រុមហ៊ុននិងអាជ្ញាធរបានពិភាក្សាគ្នាស្វែងរកដីនៅតំបន់ក្បែរនេះ ដើម្បីប្ដូរជូនប្រជាពលរដ្ឋតាំងទីលំនៅថ្មី៖ «អាជ្ញាធរមូលដ្ឋានស្រុកយើង ខេត្តយើង មានតំណាងខេត្តចុះទៅហ្នឹង គាត់មានរៀបចំដីមួយកន្លែងធ្វើភូមិ ធ្វើទីតាំង អាចកសាងសាលារៀន មន្ទីរពេទ្យឲ្យគាត់ណា»។
ដូចគ្នានេះដែរអភិបាលស្រុកអណ្ដូងមាស លោក នង ដារិទ្ធ កត់សំគាល់ដែរថា អាជ្ញាធរស្រុកនិងខេត្តបានយកចិត្តទុកដាក់លើបញ្ហារស់នៅរបស់ប្រជាពលរដ្ឋ ក៏ប៉ុន្តែប្រជាពលរដ្ឋគួរអត់ធ្មត់ទុកពេលវេលាឲ្យមន្ត្រីអាជ្ញាធរដោះស្រាយបញ្ហានេះជូនប្រជាពលរដ្ឋ។ លោកបន្ថែមថា ដីដែលប្រជាពលរដ្ឋស្នើសុំមួយផ្នែកប៉ះពាល់ដីឈូសឆាយរបស់ក្រុមហ៊ុន និងមួយផ្នែកទៀតប៉ះពាល់ដីប្រជាពលរដ្ឋមួយចំនួនគ្រប់គ្រងជាលក្ខណៈឯកជន ហេតុនេះអាជ្ញាធរកំពុងស្វែងរកលទ្ធភាពដោះស្រាយបញ្ហានេះជូនប្រជាពលរដ្ឋ។
លោក នង ដារិទ្ធ៖ «ឯកឧត្តមអភិបាលខេត្តថ្មី ឯកឧត្ដម ថង សាវុន លោកយកចិត្តទុកដាក់ណាស់ គាត់សួររហូត ហើយគាត់ជំរុញឲ្យដំណើរការហ្នឹងឲ្យឆាប់ តាមសំណូមពរគាត់ហើយ ប៉ុន្តែអ្វីដែលគាត់ចង់បានលឿនបំផុតនោះ យើងមិនទាន់ធ្វើទៅបានទេ»។
ទាក់ទិនករណីនេះដែរ មន្ត្រីសម្របសម្រួលសមាគមការពារសិទ្ធិមនុស្សអាដហុក ខេត្តរតនគិរី លោក ឆាយ ធី អំពាវនាវឲ្យប្រជាពលរដ្ឋធ្វើការតវ៉ាដោយអហិង្សា ចៀសវាងមានកំហុសតាមផ្លូវច្បាប់ ក៏ប៉ុន្តែលោកសំណូមពរឲ្យក្រុមហ៊ុននិងមន្ត្រីអាជ្ញាធរមូលដ្ឋានដោះស្រាយបញ្ហាជូនប្រជាពលរដ្ឋតាមប្រកាសរបស់អន្តរក្រសួងស្ដីពីការពង្រឹងការអនុវត្តបទបញ្ញត្តិ និងបច្ចេកទេសនានាទាក់ទិនការគ្រប់គ្រងដីសម្បទានសេដ្ឋកិច្ចនៅប្រទេសកម្ពុជា។
លោក ឆាយ ធី៖ «បើសិនជាមិនមានការគោរពទេ គឺជាការរំលោភសេចក្ដីប្រកាសរបស់ក្រសួងហើយ។ គួរតែអាជ្ញាធរយកចំណុចវិជ្ជមានណាដែលមានស្រាប់មកអនុវត្ត។ ពលរដ្ឋគាត់មានសិទ្ធិតវ៉ា ប្រើប្រាស់វិធានការផ្លូវច្បាប់ដោយអហិង្សា»។
កាលពីដើមខែឧសភា រដ្ឋមន្ត្រីក្រសួងកសិកម្មនិងរដ្ឋមន្ត្រីក្រសួងបរិស្ថាន បានចេញប្រកាសរួមគ្នាស្ដីពីការពង្រឹងការគ្រប់គ្រងដីសម្បទានសេដ្ឋកិច្ច គឺតម្រូវឲ្យក្រុមហ៊ុនវិនិយោគនានាអនុវត្តគោលនយោបាយរូបមន្តស្បែកខ្លា ដែលធានាមិនធ្វើឲ្យប៉ះពាល់ដីធ្លីប្រើប្រាស់អាស្រ័យផលរបស់ប្រជាពលរដ្ឋ ដីព្រៃសហគមន៍ និងដីអភិរក្សដែលត្រូវរក្សាទុក៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។