ប្រជាពលរដ្ឋជាង ២០គ្រួសារ រស់នៅស្រុកលំផាត់ ខេត្តរតនគិរី ចោទប្រកាន់ក្រុមហ៊ុនសម្បទានសេដ្ឋកិច្ច ហ័ង អាញ លំផាត់ (Hoang Anh Lumphat) ថារំលោភដីចម្ការរបស់ពួកគាត់។ អ្នកភូមិទាំងនោះអះអាងថា ដីទាំនោះប្រជាពលរដ្ឋមានប័ណ្ណកម្មសិទ្ធិត្រឹមត្រូវដែលទទួលបានពីការវាស់វែងដោយក្រុមនិស្សិត និងមន្ត្រីជំនាញរបស់រដ្ឋាភិបាល ប៉ុន្តែខាងក្រុមហ៊ុននៅតែធ្វើរបងហ៊ុមព័ទ្ធដីសម្បទាន និងប៉ះទៅលើដីចំណីទន្លេថែមទៀត។
ប្រជាពលរដ្ឋបីនាក់តំណាងឲ្យអ្នកភូមិដីឡូត៍ ឃុំជ័យឧត្តម ជាង ២០គ្រួសារ បានមកដល់ការិយាល័យអង្គការអាដហុក (Adhoc) ខេត្តរតនគិរី ដើម្បីស្នើសុំឲ្យមន្ត្រីការពារសិទ្ធិមនុស្សមួយនេះធ្វើអន្តរាគមន៍ទៅលើករណីរំលោភដីធ្លីប្រជាពលរដ្ឋពីសំណាក់ក្រុមហ៊ុនសម្បទានសេដ្ឋកិច្ច និងចោទមន្ត្រីអាជ្ញាធរស្រុកថាមានភាពលំអៀងទៅខាងក្រុមហ៊ុនក្នុងពេលដោះស្រាយទំនាស់នេះ។
តំណាងប្រជាពលរដ្ឋ អ្នកស្រី គង់ គឹមសៀង នៅថ្ងៃទី២៧ ខែសីហា រៀបរាប់ថា ដីប្រជាពលរដ្ឋមានប័ណ្ណកម្មសិទ្ធិពីរគ្រួសារ និងដីប្រជាពលរដ្ឋជាង ១០គ្រួសារទៀត បានកាន់កាប់ច្រើនឆ្នាំមកហើយ ត្រូវក្រុមហ៊ុនឈូសឆាយរំលោភយកក្នុងនោះក៏បានឈូសឆាយទៅលើដំណាំចម្ការប្រជាពលរដ្ឋបានដាំដុះនៅពេលថ្មីៗនេះទៀតផង។
អ្នកស្រីបន្តថា ក្រុមហ៊ុនបានបោះបង្គោលរបងព្រំដីសម្បទានរំលោភយកដីចំណីទន្លេផ្ទុយពីគោលការណ៍ផ្ដល់ដីសម្បទានសេដ្ឋកិច្ច៖ «ប្លង់ហើយហ្នឹងវាឈូសហើយវាឈូសថ្ងៃ២៣ ហើយដាក់របងព័ទ្ធអស់ព័ទ្ធទាំងមុខផ្ទះ តែព័ទ្ធមុខផ្ទះខ្ញុំដកចេញទៅ។ ប្អូនខ្ញុំមានដែរ ឈូសដីស្រែហ្នឹងអស់ទៀត ប្អូនខ្ញុំមានខ្ទង់ប្រហែលមួយហិកតារជាង»។
ប្រធានភូមិដីឡូត៍ លោក គង់ ខៀវ មានប្រសាសន៍គាំទ្រការប្ដឹងតវ៉ារបស់ប្រជាពលរដ្ឋ ហើយទម្លាក់ការទទួលខុសត្រូវទៅលើអាជ្ញាធរស្រុកថា មិនយកចិត្តទុកដាក់ដោះស្រាយបញ្ហាជូនអ្នកភូមិបានត្រឹមត្រូវ។
លោកថាដីតំបន់នោះអ្នកភូមិចូលទៅកាន់កាប់ច្រើនឆ្នាំមុនពេលក្រសួងបរិស្ថាន បានផ្ដល់ដីសម្បទានតំបន់នោះទៅឲ្យក្រុមហ៊ុន៖ «គាត់ឈូសឆាយចូលលក្ខណៈរំលោភយកតែម្ដង។ ស្រុកហ្នឹងគាត់បង្កប់ទុក ខ្ញុំក៏មិនដឹងដែរ ព្រោះខ្ញុំធ្វើរបាយការណ៍វាហួសរបាយការណ៍ហើយ»។
ក្រុមហ៊ុន ហ័ង អាញ់ លំផាត់ បានវិនិយោគដំណាំកសិឧស្សាហកម្ម មានដំណាំកៅស៊ូ ដូងប្រេង លើដីសម្បទានរបស់ក្រុមហ៊ុនដូនពេញ អាហ្គ្រីកូ (Daun Penh Agrico) លើផ្ទៃដីប្រមាណ ៨ពាន់ហិកតារក្នុងតំបន់ដែនជម្រកសត្វព្រៃលំផាត់ តាំងពីឆ្នាំ២០១៣ រហូតបច្ចុប្បន្ន។
អ្នកបកប្រែនិងជាតំណាងក្រុមហ៊ុន លោក ឆាយ អៀង បដិសេធការចោទប្រកាន់ទាំងអស់របស់ពលរដ្ឋ។ លោកថា ក្រុមហ៊ុនបានអនុវត្តគោលការណ៍កាត់ដីមានផលប៉ះពាល់ប្រជាពលរដ្ឋចេញ និងបោះបង្គោលព្រំដីសម្បទានតាមការកំណត់របស់ក្រសួងជំនាញបរិស្ថាន៖ «គោលការណ៍របស់ក្រុមហ៊ុន ឲ្យតែថា ដីកម្មសិទ្ធិរបស់ប្រជាពលរដ្ឋ គឺអត់មានការប៉ះពាល់ទេ។ ដីដែលសល់ពីមាត់ទន្លេមកគឺយើងធ្វើតាមការកំណត់ព្រំទេ»។
ចំណែកអភិបាលស្រុកលំផាត់ លោក គង់ ស្រ៊ុន អះអាងដូចគ្នាថា ក្រុមហ៊ុនមិនបានរំលោភដីកម្មសិទ្ធិណាមួយរបស់ពលរដ្ឋនោះទេ ផ្ទុយទៅវិញ គឺប្រជាពលរដ្ឋប្រមាណ ២គ្រួសារនៅតំបន់នោះបានចូលទៅដាំដុះក្រោយពេលរដ្ឋបានប្រគល់ដីតំបន់នោះទៅឲ្យក្រុមហ៊ុនសម្បទាន។ លោកកត់សំគាល់ថា មន្ទីរបរិស្ថានគឺជាដើមបណ្ដឹងចោទប្រកាន់អ្នកភូមិនោះតាមផ្លូវតុលាការពីបទរំលោភកាន់កាប់ដីរដ្ឋខុសច្បាប់។
លោក គង់ ស្រ៊ុន៖ «ក្រុមហ៊ុនពុំមានការប៉ះពាល់ទេដោយមានអាជ្ញាធរយើងចុះទៅពិនិត្យដល់ទីតាំងទាំងអស់គ្នា។ គាត់ហ្នឹងបើសិនថា ដីក្រុមហ៊ុនហើយគាត់ទៅដាំលើហ្នឹង ដល់ក្រុមហ៊ុនទៅឈូសទៅគាត់ថា ក្រុមហ៊ុនទៅរំលោភលើដីគាត់»។
ទោះជាយ៉ាងនេះក្តី មន្ត្រីសម្របសម្រួលសមាគមអាដហុក ខេត្តរតនគិរី លោក ឆាយ ធី នៅថ្ងៃពុធ ទី២៧ ខែសីហា អំពាវនាវសុំឲ្យអាជ្ញាធរខេត្តស៊ើបអង្កេតការចោទប្រកាន់នេះដើម្បីផ្ដល់យុត្តិធម៌ជូនពលរដ្ឋ។
លោកថ្លែងថា ការផ្ដល់អាទិភាពជូនប្រជាពលរដ្ឋទាក់ទិនទំនាស់ដីធ្លី គឺជាយន្តការដែលប្រមុខរាជរដ្ឋាភិបាលណែនាំឲ្យមន្ត្រីមូលដ្ឋានអនុវត្តប្រសិនដីសម្បទានមានផលប៉ះពាល់សិទ្ធិរស់នៅរបស់ពលរដ្ឋអ្នកកាន់កាប់ដីនោះ៖ «ក្នុងពាក្យប្ដឹងដែលពលរដ្ឋប្ដឹងមកអាដហុក គឺយើងអន្តរាគមន៍ពាក្យប្ដឹងទៅអាជ្ញាធរខេត្ត ជាពិសេសអភិបាលខេត្ត ដើម្បីលោកចាត់វិធានការតាមផ្លូវច្បាប់»។
កាលពីខែមីនា ក្រុមហ៊ុន ហ័ង អាញ លំផាត់ បានកាត់ចេញដីជិត ២ពាន់ហិកតារពីដីសម្បទាន គ្រាដែលប្រជាពលរដ្ឋនៅភូមិចំនួនពីរ ក្នុងឃុំជ័យឧត្តម បានធ្វើការតវ៉ាទារដីនោះសម្រាប់ទុកជាដីត្រៀមបម្រុងរបស់អ្នកភូមិវិញ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។