មន្ត្រីឃ្លាំមើលបញ្ហាព្រៃឈើសមាគមអាដហុក (Adhoc) និងសហគមន៍ជនជាតិដើមភាគតិច ខេត្តរតនគិរី អំពាវនាវសុំឲ្យអាជ្ញាធរខេត្តស៊ើបអង្កេតករណីឈូសឆាយរានព្រៃ យកដីភ្នំជាតំបន់ព្រៃការពារ។
ប្រជាពលរដ្ឋនៅឃុំឡាមិញ ស្រុកបរកែវ ខេត្តរតនគិរី បានតវ៉ាថា មានមនុស្សជួលត្រាក់ទ័រឈូសកូនភ្នំមួយ ឋិតនៅទល់មុខភ្នំដាង ជាប់នឹងខាងត្បូងផ្លូវជាតិលេខ៧៨អា (78A) លើផ្ទៃដីប្រមាណ ៥ហិកតារ ដើម្បីយកដីជាកម្មសិទ្ធិឯកជន។
មន្ត្រីឃ្លាំមើលបញ្ហាព្រៃឈើសមាគមការពារសិទ្ធិមនុស្សអាដហុក ខេត្តរតនគិរី លោក ឆាយ ធី នៅថ្ងៃច័ន្ទ ទី៣ ខែមីនា មានប្រសាសន៍បញ្ជាក់ថា គ្រឿងចក្រប្រភេទឈូសដីត្រូវបានគេប្រើប្រាស់ឈូសរំលំព្រៃឈើអស់ប្រមាណ ១ហិកតារ នៅជម្រាលភ្នំ ប្រសិនអាជ្ញាធរមិនមានវិធានការទប់ស្កាត់ទាន់ពេលវេលាទេ ព្រៃនៅតំបន់ភ្នំនោះនឹងត្រូវគេឈូសឆាយអស់គ្មានសល់។
លោកបន្តថា ការអង្កេតជំហានដំបូងរបស់លោក គឺការឈូសឆាយយកដីភ្នំនេះមានទាក់ទិននឹងការចោទប្រកាន់ថា មន្ត្រីស្រុកបរកែវ ជាអ្នកបែងចែកដីនេះទៅឲ្យមន្ត្រីសាលាស្រុក ហើយបន្ទាប់មក ដីនោះត្រូវបានគេលក់ដូរ៖ «នេះជាការរំលោភទន្ទ្រានឈូសឆាយហ៊ុមព័ទ្ធ និងកាន់កាប់យកដីរដ្ឋដោយខុសច្បាប់។ ប្រវត្តិដីនេះ ប្រជាពលរដ្ឋ និងមន្ត្រី គាត់ថាអាជ្ញាធរស្រុកខ្លួនឯងផ្ទាល់ បានយកផ្លាកទៅវាយនៅទីនោះដាក់ថាជាដីរដ្ឋ។ ឥឡូវនេះ បែរជាមានការឈូសឆាយបំផ្លាញដីរដ្ឋ ដែលទុកពីមុនមកហើយជាដីភ្នំទៀត»។
ប្រជាពលរដ្ឋរស់នៅភូមិកាម៉ាំង ឃុំឡាមិញ លោក នួ សុណ្ណ មានប្រសាសន៍បញ្ជាក់ថា អ្នកភូមិបានផ្តល់ព័ត៌មាននេះជូនអាជ្ញាធរភូមិរួចហើយ ប៉ុន្តែមន្ត្រីមូលដ្ឋានមិនបានចាត់វិធានការលើបញ្ហានេះឡើយ។ លោកបន្តថា សហគមន៍ចាត់ទុកថាជាករណីរំលោភបំពានឈូសឆាយតំបន់មានព្រៃឈើទ្រព្យសម្បត្តិរដ្ឋ៖ «សហគមន៍ហ្នឹងពិបាកចិត្តដែរ ដល់មេភូមិធ្វើមិនដឹងអ៊ីចឹង។ខ្ញុំចង់ឲ្យគាត់តវ៉ាដែរ តែគាត់ចេះតែខ្លាចគេអាងទឹកលុយអាងបុណ្យស័ក្តិ មានមុខមានមាត់ក្នុងស្រុកហ្នឹង ចេះតែឈូសឆាយមិនដឹងដីសហគមន៍ដីភ្នំ ចេះតែយកផ្ដេសផ្ដាស»។
ឆ្លើយតបសេចក្តីចោទប្រកាន់នេះ អភិបាលស្រុកបរកែវ លោក ហេង ប៊ុនថាន់ បដិសេធថាអាជ្ញាធរស្រុកមិនមានជាប់ពាក់ព័ន្ធបញ្ហាបែងចែកដី ឬឈូសឆាយភ្នំនោះទេ។ លោកបញ្ជាក់ថា ប្រជាពលរដ្ឋម្នាក់ឈ្មោះ សាំង មានដីចម្ការនៅតំបន់នោះ បានជួលគ្រឿងចក្រឈូសឆាយព្រៃភ្នំនោះ ដើម្បីពង្រីកដីធ្វើកសិកម្ម៖ «អត់ដឹងដែរមិនដឹងមន្ត្រីណា។ដីតាសាំង តើគាត់ឈូសនោះគាត់លប់រណ្ដៅត្បូងទេ គាត់នឹងដាំដំឡូងតអ៊ីចឹងណា!»។
យ៉ាងនេះក៏ដោយ នាយរងខណ្ឌរដ្ឋបាលព្រៃឈើ ខេត្តរតនគិរី លោក ផាន់ ភីន ចាត់ទុកការឈូសឆាយដីតំបន់ព្រៃការពាររបស់រដ្ឋ គឺជាករណីខុសច្បាប់៖ «បើសិនជាវាមានព្រៃ គឺខុសហើយ ប៉ុន្តែបងអាចទូរស័ព្ទទៅឯកឧត្តមអភិបាលខេត្ត សួរនាំពីរឿងហ្នឹងច្បាស់ជាង។ ហើយបើកាលណាចាំបាច់ គាត់នឹងបញ្ជាកម្លាំងហើយ»។
ចំណែកអភិបាលខេត្តរតនគិរី លោក ប៉ាវ ហមផាន មានប្រសាសន៍បញ្ជាក់ថា លោកបានសាកសួរមន្ត្រីមូលដ្ឋាននោះហើយថា សេចក្តីរាយការណ៍ចោទនោះមិនពិតទេ ពីព្រោះដីនោះប្រជាពលរដ្ឋឈ្មោះ សាំង បានកាន់កាប់យូរហើយ។ លោកនឹងបន្តស្រាវជ្រាវករណីនេះបន្ថែម។
ប្រជាពលរដ្ឋសហគមន៍ភូមិកាម៉ាំង ឲ្យដឹងថា ភ្នំដែលគេកំពុងឈូសឆាយព្រៃយកដីឋិតក្នុងតំបន់ភ្នំដាង មានភ្នំចំនួនពីរ និងមានអូរធម្មជាតិ គឺអូរក្រាច និងអូរឡាមិញ នៅចន្លោះភ្នំទាំងពីរនេះ។តំបន់នោះមានរ៉ែត្បូងមានតម្លៃ ប៉ុន្តែត្រូវគេជីកកកាយ និងធ្វើអាជីវកម្មដោយម៉ាស៊ីនពាក់កណ្ដាលស្វ័យប្រវត្តិ រុករកត្បូងអនាធិបតេយ្យកាលពីប៉ុន្មានឆ្នាំកន្លងទៅនេះ។ តំបន់ភ្នំដាង មានដាក់បម្រាមហាមកាប់រានព្រៃ។ ភ្នំនេះក៏ជាតំបន់ព្រៃឈើនៅសេសសល់ពីការកាប់រានយកដី ដែលសហគមន៍ជនជាតិដើមភាគតិចអភិរក្សផងដែរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។