ប្រជាពលរដ្ឋខេត្តព្រះសីហនុ និងមន្ត្រីសង្គមស៊ីវិល បង្ហាញការព្រួយបារម្ភជាថ្មីទៀតនៅគ្រាពួកគេសង្កេតឃើញថា ផ្ទៃបឹងកង្កែប និងដីជុំវិញបរិវេណបឹងធម្មជាតិមួយនេះ ត្រូវបុគ្គលឯកជនឃុបឃិតជាមួយមន្ត្រីស្ថាប័នជំនាញខ្លះ ពុះច្រៀកជាឡូៗចែកគ្នា និងឈានដល់ចេញប្លង់កម្មសិទ្ធិស្ទើរទាំងស្រុងអស់ទៅហើយ។
ពួកគេសំណូមពរដល់លោកនាយករដ្ឋមន្ត្រី ហ៊ុន សែន ឲ្យជួយសង្គ្រោះបឹងកង្កែបមានទីតាំងនៅស្រុកព្រៃនប់ ដែលរងការរំលោភបំពាន មកដាក់ជាសម្បត្តិរដ្ឋគ្រប់គ្រងវិញ។
ប្រជាពលរដ្ឋមួយចំនួននៅឃុំរាម និងឃុំបិតត្រាំង ស្រុកព្រៃនប់ បង្ហាញកង្វល់ពីការបាត់បង់បឹងកង្កែប និងព្រៃកោងកាងរាប់រយហិកតារ ដែលដុះនៅជុំវិញបឹងធម្មជាតិមួយនេះ ហើយត្រូវមន្ត្រីមានអំណាច និងឈ្មួញឃុបឃិតជាមួយអតីតប្រធានមន្ទីរសុរិយោដីខេត្តព្រះសីហនុ និងអតីតអភិបាលខេត្តនេះ ធ្វើប្លង់កម្មសិទ្ធិរំលោភយកទាំងផ្ទៃបឹង និងដីចំណីមាត់បឹងទាំងមូល។
បុរសជាអ្នកនេសាទឈ្មោះ លោក កែវ សន សំណូមពរដល់លោករដ្ឋមន្ត្រីក្រសួងកសិកម្ម រដ្ឋមន្ត្រីក្រសួងបរិស្ថាន លោករដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ ពិសេសលោកនាយករដ្ឋមន្ត្រី ឲ្យជួយសង្គ្រោះបឹងកង្កែប មានទីតាំងនៅក្នុងឃុំរាម និងឃុំបិតត្រាំង ស្រុកព្រៃនប់ ឲ្យបានគង់វង្ស។ លោកឲ្យដឹងថា បច្ចុប្បន្ន បឹងកង្កែបត្រូវគេឃុបឃិតពុះច្រៀកជាឡូៗធ្វើកម្មសិទ្ធិ និងបានចាក់ដីបំផ្លាញដីព្រៃលិចទឹក ឬព្រៃកោងកាងជាជម្រកត្រីសមុទ្របន្តពូជយ៉ាងអនាធិបតេយ្យ និងគ្មានស្ថាប័នពាក់ព័ន្ធថ្នាក់ខេត្តចេញមុខទប់ស្កាត់ទេ៖ « ឥឡូវទីតាំងបឹងកង្កែបទាំងមូលត្រូវគេចាក់ដីចូលផ្ទៃបឹង បំផ្លាញព្រៃកោងកាងស្ទើរទាំងស្រុង និងគ្មានអាជ្ញាធរពីស្ថាប័នពាក់ព័ន្ធណាមួយចេញមុខទប់ស្កាត់ទេ ហើយប្រជាពលរដ្ឋមានរបរនេសាទសមុទ្រដើម្បីចិញ្ចឹមជីវិតជាលក្ខណៈគ្រួសារ ក៏ស្ទើរតែរកទីកន្លែងនេសាទពុំមាន ព្រោះផ្ទៃបឹងទាំងមូលបានក្លាយជាកម្មសិទ្ធិឯកជនអស់ទៅហើយ។ សូមសំណូមពរដល់ប្រមុខដឹកនាំ និងថ្នាក់ដឹកនាំស្ថាប័នពាក់ព័ន្ធ ជួយថែរក្សាបឹងកង្កែបឲ្យបានគង់វង្ស ដើម្បីទុកជូនកូនចៅជំនាន់ក្រោយបន្តរបរចិញ្ចឹមជីវិត »។
ប្រជានេសាទច្រើនទៀត ក៏បង្ហាញការព្រួយបារម្ភខ្លាចបាត់បង់បឹងធម្មជាតិ ឬបឹងកង្កែបនេះដែរ ព្រោះបច្ចុប្បន្ននេះ ផ្ទៃបឹងកង្កែប និងដីចំណីមាត់បឹងទាំងមូល ត្រូវគេចាក់ដីលុបដើមកោងកាងសម្រាប់ចម្ការដូង និងធ្វើចម្ការផ្សេងៗទៀតរាប់រយហិកតារ ហើយគ្មានអាជ្ញាធរទប់ស្កាត់ទេ។
ក្រុមអ្នកនេសាទ ឲ្យដឹងថា សព្វថ្ងៃនេះទាំងនៅលើដីគោក និងនៅលើផ្ទៃទឹកនៃបឹងកង្កែបទាំងមូល ត្រូវគេបោះបង្គោលកំណត់ព្រំដីនៅលើទីតាំងជាក់ស្តែងរៀងៗខ្លួន។
បុរសអ្នកនេសាទឈ្មោះ លោក ម៉ា អ៊ី និងអ្នកនេសាទឈ្មោះ អេង ប៊ុនឡូ រស់នៅឃុំរាម ស្រុកព្រៃនប់ ខេត្តព្រះសីហនុ ស្នើដល់ប្រមុខដឹកនាំ និងថ្នាក់ដឹកនាំក្រសួងពាក់ព័ន្ធ ជួយថែរក្សាបឹងធម្មជាតិបឹងកង្កែបឲ្យបានគង់វង្ស ព្រោះត្រូវឈ្មួញ និងមន្ត្រីមានអំណាចរំលោភយកធ្វើកម្មសិទ្ធិទាំងស្រុងអស់ហើយ ហើយមន្ត្រីសុរិយោដីខេត្តនេះ ក៏មានចេញប្លង់កម្មសិទ្ធិជូនឯកជនមួយចំនួនទៅលើដីបឹងកង្កែបនេះ៖ « បឹងកង្កែបនេះ គឺជាតំបន់ប្រកបរបរនេសាទសាធារណៈរបស់ប្រជាពលរដ្ឋពីរឃុំ គឺឃុំរាម និងឃុំបិតត្រាំង ក្នុងស្រុកព្រៃនប់ ធ្វើរបរនេសាទជាលក្ខណៈគ្រួសារជាយូរលង់ណាស់មកហើយ។ ហើយបច្ចុប្បន្ន ដីចំណីមាត់បឹងកង្កែបនេះមួយផ្នែកត្រូវបានបាត់បង់ដោយសារគម្រោងអភិវឌ្ឍន៍ព្រលានយន្តហោះកងកេង និងមួយផ្នែកទៀត ត្រូវមន្ត្រីមានឋានៈបុណ្យស័ក្តិធំៗរហូតដល់មានពាក់ផ្កាយ ឈូសឆាយដីចាក់រំលោភយកធ្វើកម្មសិទ្ធិទាំងដីចំណីមាត់បឹងកង្កែប និងផ្ទៃបឹងទាំងមូល ឬទាំងដីគោក និងដីទឹកទាំងស្រុងអស់ទៅហើយ ហើយគ្មានអាជ្ញាធរទប់ស្កាត់ទេ។ សំណូមពរដល់ថ្នាក់ដឹកនាំជួយថែរក្សាបឹងកង្កែបឲ្យគង់វង្ស »។
ទាក់ទិនបញ្ហានេះ អភិបាលខេត្តព្រះសីហនុ លោក យន្ត មីន មិនធ្វើអត្ថាធិប្បាយច្រើនទេ ដោយបញ្ជាក់ខ្លីថា រដ្ឋបាលខេត្តនេះកំពុងពិនិត្យ និងយកចិត្តទុកដាក់សង្គ្រោះបឹងកង្កែប ដែលត្រូវរំលោភបំពាននាពេលកន្លងមក ដើម្បីឈានដល់ស្នើសុំគោលការណ៍ពីប្រមុខដឹកនាំ ឬថ្នាក់ដឹកនាំថ្នាក់ជាតិជួយអន្តរាគមន៍។ លោក យន្ត មីន សង្កត់ធ្ងន់ថា ករណីទន្ទ្រានកាន់កាប់ទាំងដីចំណីមាត់បឹង និងផ្ទៃបឹងកង្កែបទាំងមូលនេះ អាចនឹងមានពន្លឺល្អ ឬឈានដល់ថ្នាក់ដឹកនាំថ្នាក់ជាតិ និងប្រមុខដឹកនាំរដ្ឋាភិបាល ដាក់បឹងធម្មជាតិមួយនេះដើម្បីអភិរក្សក៏ថាបាននាថ្ងៃអនាគត៖ « រឿងករណីបឹងកង្កែបនេះ ខ្ញុំបានពិភាក្សាគ្នាជាមួយនាយខណ្ឌជលផលខេត្តរួចហើយ ហើយក៏បានដាក់បទបញ្ជាទៅលោកអភិបាលស្រុកព្រៃនប់ លោក ទិត វុទ្ធី ឲ្យចុះទៅពិនិត្យជាក់ស្តែងរួចហើយដែរ ក្នុងនោះក៏ឃើញមានការបោះបង្គោល និងការចូលកាន់កាប់ដីចំណីមាត់បឹងទាំងលើគោក និងក្នុងទឹក ដោយមានបោះកំណត់ព្រំម្ចាស់ដីរៀងៗខ្លួន។ បញ្ហានេះ សូមកុំឲ្យប្រជាពលរដ្ឋបារម្ភអី ព្រោះអាជ្ញាធរ ឬរដ្ឋបាលខេត្តព្រះសីហនុ កំពុងយកចិត្តទុកដាក់ថែរក្សា ឬឈានដល់អភិរក្សបឹងកង្កែបនេះនាថ្ងៃខាងមុខ »។
បញ្ហានេះដែរ តំណាងសហគមន៍ដីធ្លី សេ.អ៊ី.ប្រាំ (CI5) រស់នៅឃុំបិតត្រាំង ស្រុកព្រៃនប់ លោក ស៊ុន សុផាត បានឲ្យដឹងថា ទាំងដីចំណីមាត់បឹង និងផ្ទៃបឹងកង្កែបទាំងមូល ត្រូវគេរំលោភធ្វើកម្មសិទ្ធិទាំងស្រុងអស់ហើយ ហើយអតីតប្រធានមន្ទីរសុរិយោដីខេត្តព្រះសីហនុ ក៏បានចេញប្លង់កម្មសិទ្ធិជូនបុគ្គលឯកជនមួយចំនួនរួចហើយដែរ។ លោកស្ដាយស្រណោះបឹងកង្កែប ដែលត្រូវមន្ត្រីស្ថាប័នពាក់ព័ន្ធខេត្តព្រះសីហនុ ឃុបឃិតចេញប្លង់កម្មសិទ្ធិជូនបុគ្គលឯកជននាពេលកន្លងមក។
តំណាងប្រជាពលរដ្ឋ លោក ស៊ុន សុផាត អំពាវនាវដល់លោករដ្ឋមន្ត្រីក្រសួងពាក់ព័ន្ធ ពិសេសលោកនាយករដ្ឋមន្ត្រី ឲ្យជួយដកហូតបឹងកង្កែបមកដាក់ជាសម្បត្តិរដ្ឋគ្រប់គ្រងវិញ ព្រោះបឹងនេះមានដុះកោងកាងជាជម្រកត្រីសមុទ្របន្តពូជរាប់រយហិកតារនៅនៅជុំវិញបរិវេណបឹងធម្មជាតិមួយនេះ ហើយប្រជាពលរដ្ឋមួយចំនួនរស់នៅតំបន់នេះ បានប្រកបរបរធ្វើរបរនេសាទជាលក្ខណៈគ្រួសារ ដើម្បីចិញ្ចឹមជីវិតនៅលើបឹងកង្កែបនេះ៖ « សូមរាជរដ្ឋាភិបាលជួយរំលាយប័ណ្ណកម្មសិទ្ធិទាំងអស់ដែលមន្ត្រីសុរិយោដីខេត្តព្រះសីហនុ ចេញជូនបុគ្គលឯកជននៅលើដីចំណីមាត់បឹងកង្កែប។ ហើយត្រូវដកហូតបឹងនេះមកដាក់ជាសម្បត្តិរដ្ឋគ្រប់គ្រងវិញ ព្រោះទាំងផ្ទៃបឹង និងដីចំណីមាត់បឹងកង្កែបសព្វថ្ងៃនេះ ត្រូវមន្ត្រីមានលុយមានអំណាច ឃុបឃិតធ្វើប្លង់កម្មសិទ្ធិរំលោភយកទាំងស្រុង គឺទាំងនៅដីចំណីមាត់បឹងលើគោក និងផ្ទៃបឹងកង្កែបនៅក្នុងទឹកសមុទ្រដោយបុគ្គលមួយចំនួននោះ បានបោះបង្គោលថ្មកំណត់ព្រំដីក្នុងទឹករៀងៗខ្លួនថែមទៀត »។
លោក ស៊ុន សុផាត ឲ្យដឹងថា បច្ចុប្បន្ននេះ ទាំងដីចំណីមាត់បឹង និងផ្ទៃបឹងកង្កែបទាំងមូល ត្រូវគេបោះបង្គោលកំណត់ព្រំដែនទាំងនៅលើដីគោក និងនៅក្នុងទឹកសមុទ្រនៃបឹងកង្កែបទាំងស្រុង ហើយភាគច្រើន អ្នកដែលមានចំណែកដីនៅលើបឹងនេះ គឺជាមន្ត្រីនៅស្ថាប័នប្រដាប់អាវុធមានឋានៈពាក់ផ្កាយ ឈ្មួញមានទ្រព្យធន និងមានមន្ត្រីជំនាញខ្លះកំពុងបម្រើការងារនៅតាមមន្ទីរនានា ឬមន្ត្រីជំនាញមួយចំនួនកំពុងបម្រើការងារនៅរដ្ឋបាលសាលាខេត្តព្រះសីហនុ ជាដើម មានចំណែកដីនៅក្នុងបរិវេណបឹងកង្កែប។
មន្ត្រីសម្របសម្រួលនៃអង្គការលីកាដូ (LICADHO) ខេត្តព្រះសីហនុ លោក ប៊ួន ណារិទ្ធិ ដែលបានចុះពិនិត្យផ្ទាល់ដល់ទីតាំងដីជុំវិញបរិវេណបឹងកង្កែប ឲ្យដឹងថា សព្វថ្ងៃនេះ សកម្មភាពទន្ទ្រានកាន់កាប់ដៃព្រៃកោងកាងនៅជុំវិញបរិវេណបឹងកង្កែបរបស់មន្ត្រីមានអំណាច និងឈ្មួញ ឃើញមានដាំដំណាំចម្ការដូងនៅលើដីចំណីមាត់បឹងកង្កែប និងបោះបង្គោលថ្មក្នុងទឹក មានភស្តុតាងជាក់ស្តែង។ លោកសំណូមពរដល់លោកនាយករដ្ឋមន្ត្រី ហ៊ុន សែន ជួយបញ្ចេញកណ្ដាប់ដៃដែក ដើម្បីសង្គ្រោះបឹងកង្កែប និងព្រៃកោងកាងដែលដុះនៅជុំវិញបឹងកង្កែប ដែលជាបឹងធម្មជាតិសម្រាប់ជម្រកត្រីសមុទ្របន្តពូជឲ្យបានមកសភាពដើមវិញ។ ជាងនេះទៀត ក៏ត្រូវវែកមុខអ្នកឃុបឃិតចេញប្លង់កម្មសិទ្ធិនៅលើដីចំណីបឹងកង្កែប និងផ្ទៃបឹងកង្កែប យកមកផ្ដន្ទាទោស ឬដកឋានៈបុណ្យស័ក្តិដើម្បីជាការព្រមាន៖ « គួរតែរដ្ឋាភិបាលមោឃភាពប័ណ្ណកម្មសិទ្ធិដីទាំងឡាយនៅជុំវិញបឹងកង្កែប ឬដកហូតមកដាក់ជាសម្បត្តិរដ្ឋគ្រប់គ្រងវិញ។ បឹងនេះឃើញនៅមានដុះព្រៃកោងកាងជាច្រើន និងមានដីចំណីមាត់បឹងខ្លះ ត្រូវគេចាក់ដី ហើយដាំចម្ការដូងនៅលើដីចំណីមាត់បឹងកង្កែបជាក់ស្តែង។ សំណូមពរដល់នាយខណ្ឌជលផលខេត្តព្រះសីហនុ សូមចុះមកពិនិត្យផ្ទាល់ និងជួយអភិរក្សព្រៃកោងកាងដែលដុះនៅជុំវិញបរិវេណបឹងកង្កែបឲ្យគង់វង្ស »។
លោក ប៊ួន ណារិទ្ធិ ក៏ស្នើឲ្យរដ្ឋាភិបាល ត្រូវកោះហៅអ្នកជាប់ពាក់ព័ន្ធការឃុបឃិត ឬឈានដល់ការចេញប្លង់កម្មសិទ្ធិនៅលើដីចំណី និងផ្ទៃបឹងកង្កែបដែលមានដុះព្រៃកោងកាងនៅជុំវិញបរិវេណនោះ មានដូចជា ត្រូវកោះអញ្ជើញអតីតប្រធានមន្ទីរសុរិយោដីខេត្តព្រះសីហនុ ជាដើម មកឆ្លើយបំភ្លឺក្នុងការសម្រួលឯកសារ ឈានដល់ចេញប្លង់កម្មសិទ្ធិជូនបុគ្គលឯកជននៅលើដីសាធារណៈរបស់រដ្ឋ ដែលការពារដោយរដ្ឋធម្មនុញ្ញ។
ទាក់ទិនបញ្ហានេះ មន្ត្រីខណ្ឌជលផលកំពង់សោម និងអាជ្ញាធរឃុំរាម និងឃុំបិតត្រាំង ស្រុកព្រៃនប់ ខេត្តព្រះសីហនុ ទទួលស្គាល់ថា ព្រៃកោងកាងនាមូលដ្ឋាននេះពិតជាត្រូវរងការបំផ្លាញជាបន្តបន្ទាប់ ហើយឈ្មួញ និងមន្ត្រីរដ្ឋាភិបាលមានឋានៈខ្ពស់ៗ និងថ្នាក់ដឹកនាំនៅតាមស្ថាប័នខេត្តខ្លះ បានជាប់ពាក់ព័ន្ធសកម្មភាពកាន់កាប់ដីនៅជុំវិញបរិវេណបឹងកង្កែបពិតមែន ប៉ុន្តែករណីនេះ អាជ្ញាធរត្រឹមថ្នាក់ឃុំមិនមានលទ្ធភាពទប់ស្កាត់ទេ។
ត្រង់ចំណុចនេះ ប្រធានអង្គការស្រាវជ្រាវជាតិកម្ពុជា ឬហៅកាត់ថា ស៊ី.អ៊ិន.រ៉ូ (CNRO) សាខាខេត្តព្រះសីហនុ លោក សុខ សុខុម ក៏បានរិះគន់ភាពកម្សោយរបស់អាជ្ញាធរស្ថាប័នពាក់ព័ន្ធខេត្តនេះដែលមិនមានសមត្ថភាព ឬលទ្ធភាពទប់ស្កាត់បទល្មើសទន្ទ្រានកាន់កាប់ដីចំណីមាត់បឹងកង្កែប និងផ្ទៃបឹងទាំងមូល ព្រមទាំងព្រៃកោងកាងនាមូលដ្ឋាននេះឲ្យបានគង់វង្ស។ លោកថា ដីព្រៃកោងកាងនៅជុំវិញចំណីមាត់បឹងកង្កែប អាជ្ញាធរខេត្តព្រះសីហនុ គួរតែនាំគ្នាថែរក្សាដីព្រៃកោងកាងមានចំនួនរាប់រយហិកតារដែលដុះស្រាប់ឲ្យគង់វង្ស ប្រសើរជាងនាំគ្នាទៅអភិរក្ស ឬដាំកូនកោងកាងបួនដប់ម្ភៃដើមក្នុងមួយឆ្នាំៗ ដោយធ្វើឲ្យតែល្អមើលនោះទេ៖ « ចំណុចបឹងកង្កែបនេះស្ថិតក្នុងភូមិសាស្ត្រឃុំរាម និងឃុំបិតត្រាំង ស្រុកព្រៃនប់ ដែលជាតំបន់មួយសម្បូរទៅដោយព្រៃកោងកាង ជាជម្រកត្រីសមុទ្របន្តពូជ មានក្ដាម បង្គា ខ្យង និងត្រីសមុទ្រ ជាដើម ដើម្បីបម្រើដល់ប្រយោជន៍សង្គមជាតិ និងប្រយោជន៍រួមរបស់ប្រជាពលរដ្ឋ។ អាជ្ញាធរគ្រប់ជំនាញ និងគ្រប់លំដាប់ថ្នាក់មូលដ្ឋាន គឺមានភារកិច្ចការពារ ឬរាយការណ៍អំពីបទល្មើសផ្សេងៗដាក់ជូនរាជរដ្ឋាភិបាល ដើម្បីការពារទ្រព្យសម្បត្តិរបស់រដ្ឋឲ្យបានគង់វង្សទាំងអស់គ្នា។ ដូច្នេះ មិនគួរទុកឲ្យមានបុគ្គល ឈ្មួញ និងមន្ត្រីខ្លះធ្វើសកម្មភាពរំលោភកាន់កាប់ដីបរិវេណបឹងធម្មជាតិ បឹងកង្កែប ដោយគ្មានការទប់ស្កាត់នោះទេ »។
ផ្ដើមពីបញ្ហានេះ លោក សុខ សុខុម ប្រធានអង្គការ ស៊ី.អ៊ិន.រ៉ូ សំណូមពរដល់លោកនាយករដ្ឋមន្ត្រី ហ៊ុន សែន ជួយអន្តរាគមន៍ ឬចេញបទបញ្ជាទៅថ្នាក់ដឹកនាំនៅតាមក្រសួងពាក់ព័ន្ធ និងអាជ្ញាធរខេត្តព្រះសីហនុ ដើម្បីឈានដល់ថែរក្សាបឹងកង្កែប និងព្រៃកោងកាងនៅជុំវិញបឹងធម្មជាតិមួយនេះឲ្យបានគង់វង្ស និងអភិរក្សទុកសម្រាប់ត្រីសមុទ្របន្តពូជដូចដើមវិញ។
ប្រជាពលរដ្ឋរស់នៅខេត្តព្រះសីហនុ បានអំពាវនាវដល់លោកនាយករដ្ឋមន្ត្រី ហ៊ុន សែន ឲ្យជួយសង្គ្រោះបឹងកង្កែប និងជួយការពារព្រៃកោងកាងដែលដុះនៅជុំវិញបរិវេណបឹងកង្កែប ដែលត្រូវឈ្មួញមានទ្រព្យ និងមន្ត្រីកំពុងមានតួនាទីនៅក្នុងរដ្ឋបាលខេត្តព្រះសីហនុ ព្រមទាំងកងទ័ពខ្លះនៃស្ថាប័នកងទ័ពជើងទឹកមូលដ្ឋានសមុទ្ររាម រំលោភយកធ្វើកម្មសិទ្ធិ។
បឹងកង្កែបជាបឹងធម្មជាតិសម្បូរទៅដោយព្រៃកោងកាងរាប់រយហិកតារ មានទីតាំងនៅឃុំរាម និងឃុំបិតត្រាំង ស្រុកព្រៃនប់ ខេត្តព្រះសីហនុ ឬនៅជាប់ចម្ការដូង ចេង ហេង នាឆ្នេរសមុទ្ររាម។ ប្រជាពលរដ្ឋរស់នៅមូលដ្ឋាននេះ និងភ្ញៀវទេសចរដែលចូលទៅដល់ទីតាំងនោះ បង្ហាញការសោកស្ដាយដែលព្រៃកោងកាងដុះនៅជុំវិញបរិវេណបឹងកង្កែប និងផ្ទៃបឹងកង្កែបទាំងមូល ត្រូវគេទន្ទ្រានកាន់កាប់ ឬពុះច្រៀកជាឡូៗធ្វើកម្មសិទ្ធិ ដោយគ្មានអាជ្ញាធរពីស្ថាប័នណាមួយក្នុងខេត្តនេះចេញមុខទប់ស្កាត់ទេកន្លងមក៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។