អាជ្ញាធរក្រុងសិរីសោភ័ណសម្រេចដោះស្រាយបញ្ហាដីធ្លីជាង៤០គ្រួសារ
2015.05.23
តំណាងក្រុមហ៊ុនជីកយកអាចម៍ដីនៅតំបន់ភ្នំកងវ៉ា រួមនឹងតំណាងពលរដ្ឋនៅសង្កាត់កំពង់ស្វាយ ក្រុងសិរីសោភ័ណ ជាង៤០គ្រួសារសម្រេចយល់ព្រមបញ្ចប់វិវាទដីធ្លីជាមួយគ្នា នៅព្រឹកថ្ងៃទី២២ ឧសភា ក្រោមកិច្ចអន្តរាគមន៍ពីសំណាក់អាជ្ញាធរ ខេត្តបន្ទាយមានជ័យ។ ការសម្រេចនេះ បន្ទាប់ពីមានពលរដ្ឋប្រមាណ៧០នាក់ នាំគ្នាទៅតវ៉ានៅមុខសាលាខេត្តបន្ទាយមានជ័យ ដើម្បីក្រុមហ៊ុនជីកដីតំបន់ភ្នំ បញ្ឈប់សកម្មភាពជីកដីរបស់ខ្លួនតទៅទៀត។
ការសម្រេចដោះស្រាយពេលនេះ បន្ទាប់ពីអាជ្ញាធររកឃើញថា ក្រុមហ៊ុនជីកយកអាចម៍ដីមួយឈ្មោះ ញ៉ាំសាវួន បង្កផលប៉ះពាល់ដល់ប្រជាពលរដ្ឋជាង៤០គ្រួសារ ពោលគឺធ្វើឱ្យបាក់ស្រុតផ្លូវសាធារណៈរបស់ពួកគាត់ មិនអាចឱ្យពលរដ្ឋធ្វើដំណើរនោះបាន ប៉ះពាល់ដីស្រែចម្ការពលរដ្ឋ និងរកឃើញថាក្រុមហ៊ុននេះនៅតែមិនព្រមអនុវត្ត តាមសេចក្តីជូនដំណឹងរបស់សាលាខេត្តផង។
អភិបាលរងក្រុងសិរីសោភ័ណ ទទួលបន្ទុកដីធ្លី លោក វ៉ៃ កេងលី មានប្រសាសន៍ថា អាជ្ញាធរតម្រូវឱ្យខាងក្រុមហ៊ុនញ៉ាំសាវួន បញ្ឈប់សកម្មភាពជីយកដីរបស់ខ្លួនជាបន្ទាន់ និងត្រូវដឹកដីចាក់បំពេញកន្លែងដែលរងការខូចខាត និងជួសជុលផ្លូវជូនពលរដ្ឋឡើងវិញ។ លើសពីនេះទៀត អាជ្ញាធរមិនតម្រូវឱ្យក្រុមហ៊ុននេះ បន្តសកម្មភាពជីកដីយកទៅលក់បន្តទៀតទេ ព្រោះអាជ្ញាប័ណ្ណក្រុមហ៊ុនញ៉ាំសាវួន គឺផុតកំណត់ទៅហើយ។ ចំណែកពលរដ្ឋវិញ ក៏ព្រមទទួលយកដំណោះស្រាយរបស់អាជ្ញាធរពេលនេះដែរ៖ «ហើយខេត្តបានចេញលិខិតមិនឱ្យបន្តអាជ្ញាប័ណ្ណ រហូតដល់ក្រុមហ៊ុនទាំងអស់ដែលគេផុតដែលនោះគេគោរព ដោយឡែកក្រុមហ៊ុនដែលមានប្រតិកម្មពីពលរដ្ឋនេះនៅតែកកាយ»។
អភិបាលរងក្រុងដដែលបញ្ជាក់ថា ប្រសិនបើក្រុមហ៊ុននេះនៅតែហ៊ានធ្វើសកម្មភាពខុសពីកិច្ចសន្យានោះ អាជ្ញាធរនឹងដកគ្រឿងចក្រទុក ព្រមទាំងដាក់ពាក្យប្តឹងទៅតុលាការតែម្តង។
ការអះអាងដោះស្រាយបញ្ហារបស់អាជ្ញាធរជូនពលរដ្ឋពេលនេះ ក្រោយពេលពលរដ្ឋនៅឃុំពង្រ សង្កាត់កំពុងស្វាយ ក្រុងសេរីសោភ័ណ បានស្នើឱ្យអាជ្ញាធរជួយដោះស្រាយបញ្ហានេះ ប៉ុន្តែមិនមានដំណោះស្រាយ រហូតពលរដ្ឋរាប់សិបនាក់នាំគ្នាមកតវ៉ាដល់ខាងមុខសាលាខេត្តតែម្តង។
តំណាងពលរដ្ឋនៅសង្កាត់កំពង់ស្វាយ លោក អេម សង្អៃ មានប្រសាសន៍ថា ពលរដ្ឋរីករាយនៅពេលអាជ្ញាធរ ចាត់វិធានការលើបញ្ហានេះ ព្រោះសកម្មភាពជីកដីភ្នំធ្វើអាជីវកម្ម កន្លងមកគឺបង្កផលប៉ះពាល់ជាច្រើនដល់ប្រជាពលរដ្ឋ៖ «ការសម្រេចហ្នឹងគឺពេញចិត្តប្រជាពលរដ្ឋ ។ គោលបំណងប្រជាពលរដ្ឋបាទ»។
យ៉ាងណាក៏ដោយ លិខិតកិច្ចសន្យារបស់ខាងក្រុមហ៊ុនញ៉ាំសាវួន បញ្ជាក់ចំពោះមុខអាជ្ញាធរខេត្ត និង ពលរដ្ឋថា ខ្លួនយល់ព្រមបញ្ឈប់ការជីកកាយយកអាចម៍ដី តំបន់ភ្នំកងវ៉ាចាប់ពីថ្ងៃទី២២ ឧសភា តទៅ។ បន្ថែមពីនេះ ក្រុមហ៊ុនធានាធ្វើផ្លូវដែលខូចខាតជូនពលរដ្ឋ ដោយគ្មានលក្ខខណ្ឌ និងព្រមរើរបាំងចេញ ពីផ្លូវឱ្យពលរដ្ឋចូលប្រើប្រាស់ផ្លូវសាធារណៈឡើងវិញ។
ទោះជាយ៉ាងណា បញ្ហានេះ មន្ត្រីអង្កេតនៃអង្គការការពារសិទ្ធិមនុស្សលីការដូ (LICADHO) ខេត្តបន្ទាយមានជ័យ ដែលបានតាមដានរឿងនេះ លោក ឡេង យ៉េន យល់ថា ប្រសិនបើពលរដ្ឋមិននាំគ្នាឡើងទៅតវ៉ាដល់សាលាខេត្តទេ ប្រហែលជាពួកគាត់មិនទាន់ទទួលបានការដោះស្រាយទេ ពីព្រោះបញ្ហានេះកើតឡើងជាយូរមកហើយ ប៉ុន្តែអាជ្ញាធរមិនមានវិធានការណាមួយលើក្រុមហ៊ុនឱ្យមានប្រសិទ្ធិភាពឡើយ បើទោះបីជាក្រុមហ៊ុនរំលោភលើសេចក្តីជូនដំណឹងរបស់ខេត្តក៏ដោយចុះ៖ « ខ្ញុំយល់ថារាល់វិវាទទាំងឡាយ ដើម្បីកុំឱ្យមានស្ថានភាពសង្គមវឹកវររបៀបមានពលរដ្ឋឡើងតវ៉ាអីហ្នឹង អាជ្ញាធរគប្បីមានឆន្ទៈដោះស្រាយវិវាទណាមួយដែលពួកគាត់ទទួលបណ្ដឹង តាមរយៈបណ្ដឹងផ្ទាល់ឬក៏បណ្ដឹងបរិហារជាដើម»។
លោកបន្ថែមថា អាជ្ញាធរគប្បីស្រាវជ្រាវរកក្រុមហ៊ុនកកាយដីដទៃទៀត ដែលបង្កផលប៉ះពាល់ដល់ពលរដ្ឋមកដោះស្រាយ មិនចាំបាច់ទាល់តែពលរដ្ឋនាំគ្នាតវ៉ា ទើបមានការដោះស្រាយនោះទេ។ បើទោះបីជាការអនុវត្តកិច្ចសន្យារបស់ក្រុមហ៊ុនញ៉ាំសាវួន អនុវត្តចាប់ពីថ្ងៃទី ២២ ឧសភា ក៏ដោយ ក៏ប្រជាពលរដ្ឋ នៅតែបន្តតាមដានលើការអនុវត្តកិច្ចសន្យារបស់ក្រុមហ៊ុន កកាយដីតំបន់ភ្នំនេះបន្តទៀត រហូតទាល់តែការអនុវត្តកិច្ចសន្យានោះប្រជាពលរដ្ឋពេញចិត្ត ទើបបញ្ហានេះអាចបញ្ចប់បាន៕