អ្នកភូមិ និងអាជ្ញាធរមូលដ្ឋាននៅសង្កាត់វាលស្បូវ ចោទក្រុមអ្នកធ្វើអាជីវកម្មបូមខ្សាច់ក្នុងទន្លេមេគង្គ និងទន្លេបាសាក់ ថាមានបំណងបំផ្លាញដីផ្ទះ និងដំណាំពួកគាត់ ដោយការបូមខ្សាច់បណ្ដាលឲ្យបាក់ច្រាំងទន្លេ។ ការចោទប្រកាន់នេះ នៅពេលដែលកាណូតជាច្រើនគ្រឿង ប្រើបំពង់ទុយោមុខកាត់ធំៗបូមរូងយកខ្សាច់ក្បែរច្រាំងទន្លេ។
ចៅសង្កាត់វាលស្បូវ និងអ្នកភូមិអះអាងថា រយៈពេលបីថ្ងៃជាប់ៗគ្នា កាណូតបូមខ្សាច់ជាច្រើនគ្រឿង ចាប់ផ្តើមបូមខ្សាច់តាមច្រាំងទន្លេក្បែរវត្តក្តីតាកុយ ហើយបានបំផ្លាញដីច្រាំងទន្លេមេគង្គអោយបាក់ចូលទឹកបណ្ដើរៗ។
ចៅសង្កាត់វាលស្បូវ អ្នកស្រី យឹម ស៊ីម៉ន ថ្លែងនៅថ្ងៃទី៦ ខែធ្នូ ថា គាត់បានស្នើសុំឲ្យអាជ្ញាធរខណ្ឌច្បារអំពៅ ចុះត្រួតពិនិត្យជាថ្មីអំពីសកម្មភាពកាណូតស៊ីឈ្នួលបូមខ្សាច់លក់ កំពុងតែបង្កវិនាសកម្មដល់ច្រាំងទន្លេមេគង្គក្បែរវត្តក្តីតាកុយ ដែលកាណូតទាំងនោះបានបូមយកខ្សាច់ ៣ថ្ងៃហើយ គឺបូមទាំងយប់ទាំងថ្ងៃ។ អ្នកស្រីថា កាណូតទាំងនោះបូមខ្សាច់នៅពេលយប់ និងបានធ្វើឲ្យច្រាំងទន្លេបាក់បន្តិចម្តងៗចូលទឹក។ អ្នកស្រីថា អ្នកភូមិបារម្ភខ្លាចផ្ទះបាក់ធ្លាក់ចូលទឹក ក៏នាំគ្នាក្រោកយាមផ្ទះ និងប្ដឹងមកអាជ្ញាធរឲ្យជួយអន្តរាគមន៍៖ «ស្មានម៉ែត្រមិនត្រូវទេទន្លេ គ្រាន់ថាវាបូមចូលដីវាលស្បូវ ភូមិក្តីតាកុយ គឺវាបូម ២-៣ថ្ងៃហើយ នៅក្តីតាកុយ ហ្នឹង។ ខ្ញុំរាយការណ៍ទៅខណ្ឌ ២-៣ថ្ងៃហើយ សុំឲ្យជួយធ្វើម៉េចកុំឲ្យវាបូមយប់ទៀត គាត់អត់ងងុយ ហើយណាមួយគាត់ខ្លាចបាក់ច្រាំងដែរហ្នឹង»។
ពលរដ្ឋនៅសង្កាត់វាលស្បូវ លោក សុខ សឿន ឲ្យដឹងថា កាណូតបូមខ្សាច់បង្កវិនាសកម្មដល់ច្រាំងទន្លេមេគង្គ ដោយគ្មានអ្នកជំនាញពីស្ថាប័ន ក្រសួង មន្ទីរពាក់ព័ន្ធ ជួយអើពើឡើយ។ អ្នកភូមិ និងអាជ្ញាធរមូលដ្ឋាន តវ៉ារារាំងដោយផ្ទាល់ ចំពោះកាណូតបូមខ្សាច់ក្បែរច្រាំងទន្លេនេះ ដែលបណ្ដាលឲ្យច្រាំងបាក់ចូលទន្លេ។ លោកស្នើសុំឲ្យក្រសួងរ៉ែ និងថាមពល និងសាលារាជធានីភ្នំពេញ ដែលអនុញ្ញាតឲ្យមានការបូមខ្សាច់ គឺសុំឲ្យបង្ហាញពីបទបញ្ជានៃសិទ្ធិបូមខ្សាច់ អាចឲ្យកាណូតបូមពីត្រឹមណាដល់ត្រឹមណា ហើយសុំឲ្យចុះពិនិត្យមើលសកម្មភាពបូមខ្សាច់ និងដាក់ពិន័យដល់ឈ្មួញបូមខ្សាច់ ដែលប្រព្រឹត្តល្មើសបទបញ្ជានោះផង៖ «វាឥឡូវនេះបូមនៅមុខវត្តក្តីតាកុយ គឺបូមកៀកវត្តដែរហ្នឹង ហើយបូមម៉ាស៊ីនអាអ៊ូរហ្នឹងច្រើនមែនទែន»។
មេភូមិក្តីតាកុយ លោក ប៊ូ ណន ថ្លែងថា ជិតមួយសប្ដាហ៍ហើយដែលកាណូតបូមខ្សាច់ លួចចូលបូមក្នុងទឹកដីភូមិនេះ។ លោកថា ការបូមភាគច្រើននៅពេលយប់ កាណូតបើកមកកៀកច្រាំងទន្លេបូមខ្សាច់ ប៉ុន្តែពេលថ្ងៃ គឺកាណូតវាបើកចេញឆ្ងាយពីច្រាំងទន្លេបន្តិច។ លោកថា នៅថ្ងៃនេះវាបូមទៀតនៅកៀកច្រាំងក្បែរវត្តក្តីតាកុយ ទើបអ្នកភូមិតវ៉ា ទោះបីដីមិនទាន់បាក់ខ្លាំងក៏ដោយ៖ «តែវាអស់ខ្សាច់ទៅ វាមិនដល់បាតទន្លេ តែកាលណាដល់បាតទន្លេទៅ វាអាចជំរាលៗទៅវាអាចទៅជាបាក់ផ្ទះ ហើយវាអាចបាក់តែម្តងក៏មានដែរ គឺវាអត់ទៀង»។
លោកស្រី សៅ សំណាង រស់នៅភូមិវាលស្បូវខាងកើត ឲ្យដឹងថា កាលពីសប្ដាហ៍មុន អ្នកភូមិតវ៉ាដុតកង់ឡាន និងប្ដឹងទៅអាជ្ញាធរខណ្ឌច្បារអំពៅ ហើយមានអភិបាលរងខណ្ឌចុះមកអន្តរាគមន៍ទាន់ពេល បានធ្វើឲ្យកាណូតបូមខ្សាច់លើកទុយោបើកកាណូតរត់ចេញទៅឆ្ងាយពីច្រាំងទន្លេ។ លោកស្រីថា ប្រសិនបើអ្នកភូមិក្តីតាកុយ មិនតវ៉ាប្រឆាំងខ្លាំងក្លាដូចពួកគាត់ទេ ច្រាំងទន្លេ និងដីវត្តក្តីតាកុយ នឹងធ្លាក់ចូលទឹក ព្រោះអាជ្ញាធរមិនបានដឹងរឿង នាំឲ្យការចុះអន្តរាគមន៍មិនបានទាន់ពេល។
អ្នកនាំពាក្យសាលារាជធានីភ្នំពេញ លោក ឡុង ឌីម៉ង់ ថ្លែងថា អាជ្ញាធររាជធានីភ្នំពេញ មិនអនុញ្ញាតឲ្យមានការបូមខ្សាច់នៅក្នុងទឹកដីរាជធានីភ្នំពេញទេ។ លោកនឹងរាយការណ៍ទៅអាជ្ញាធរមានសមត្ថកិច្ចបន្តទៀត ដើម្បីត្រួតពិនិត្យបញ្ហានេះ៖ «គឺយើងមានការណែនាំច្បាស់ណាស់ ហើយខ្សាច់ដែលអាចយកមកនេះ គឺថាជាខ្សាច់អាចការបូមនៅក្រៅរាជធានីភ្នំពេញ អាចដឹកតាមសាឡង់មក ហើយបូមយកទៅដាក់នៅការងារអភិវឌ្ឍន៍ដទៃ»។
ពលរដ្ឋរស់នៅតាមដងទន្លេមេគង្គ និងទន្លេបាសាក់ ក្នុងខេត្តកណ្តាល និងរាជធានីភ្នំពេញ អះអាងថា កាណូតធុនធំៗមកពីប្រទេសវៀតណាម ប្រមាណ ១០គ្រឿង បើកបូមខ្សាច់ក្បែរច្រាំងទន្លេចាប់ពីកោះពេជ្រ ទៅដល់កៀនស្វាយ និងទៅដល់ជ្រោយចង្វារ នៅក្នុងទន្លេមេគង្គ និងទន្លេបាសាក់ ជាប្រចាំ។ នៅកណ្ដាលទន្លេមេគង្គមានកាណូត ៤គ្រឿងផ្សេងទៀតឈប់មួយកន្លែងបូមយកខ្សាច់ពីបាតទន្លេមេគង្គរាល់ថ្ងៃដែរ។
អាជ្ញាធរភូមិ និងប្រជាពលរដ្ឋសង្កាត់វាលស្បូវ អះអាងថានឹងធ្វើការតវ៉ានៅថ្ងៃបន្ទាប់ បើសិនជាមិនបណ្ដេញកាណូតបូមខ្សាច់ ចេញពីតំបន់ក្បែរច្រាំងទន្លេមេគង្គ ក្នុងរាជធានីភ្នំពេញទេនោះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។