ក្រសួងកសិកម្ម រុក្ខាប្រមាញ់ និងនេសាទ បានចេញលិខិតផ្ញើជូនមន្ទីរកសិកម្ម ឲ្យសហការជាមួយអាជ្ញាធរខេត្តឧត្តរមានជ័យ ចុះសម្របសម្រួលប្រគល់ដីសម្បទានសេដ្ឋកិច្ចរបស់ក្រុមហ៊ុនស្ករអំពៅ ចំនួន៣ មកឲ្យប្រជាពលរដ្ឋបានធ្វើស្រែចម្ការវិញ។
ការជំរុញឲ្យអាជ្ញាធរខេត្តឧត្តរមានជ័យ យកដីសម្បទានសេដ្ឋកិច្ចឲ្យទៅជាដីសង្គមកិច្ច ចែកជូនប្រជាពលរដ្ឋវិញនោះ គឺបន្ទាប់ពីក្រុមហ៊ុនចំនួន៣ មានអង្គរ ស៊ូហ្គើរ (Angkor Sugar) ទន្លេ ស៊ូហ្គើរ (Tunle Sugar) ខេន អែន ស៊ូហ្គើរ (Can and Sugar) បានប្រកាសក្ស័យធនរយៈពេលជិត ២ឆ្នាំមក។
ពលរដ្ឋដែលបាត់បង់លំនៅឋាន និងដីស្រែចម្ការដោយសារតែក្រុមហ៊ុនដីសម្បទានសេដ្ឋកិច្ចរំលោភយកនៅខេត្តឧត្តរមានជ័យ ចង់ឲ្យអាជ្ញាធរខេត្តនេះបែងចែកដីធ្លីដែលដកហូតពីក្រុមហ៊ុន មកឲ្យពួកគេវិញបានឆាប់រហ័ស ពោលគឺឲ្យទាន់ពេលធ្វើស្រែចម្ការនៅរដូវវស្សាឆ្នាំនេះ។
ការទាមទារឲ្យពន្លឿនការចែកដីសម្បទានសង្គមកិច្ចមកឲ្យពួកគេបានឆាប់រហ័សនេះ ពីព្រោះតែតាំងពី ៨ឆ្នាំមុនរហូតមកដល់ពេលនេះ អ្នករងគ្រោះបាត់បង់លំនៅឋាន និងស្រែចម្ការជាច្រើនគ្រួសារដោយសារក្រុមហ៊ុនដីសម្បទានសេដ្ឋកិច្ចរំលោភយក គឺពុំទាន់មានដីថ្មីធ្វើស្រែចម្ការចិញ្ចឹមជីវិតទេ។
ប្រធានមន្ទីរកសិកម្ម រុក្ខាប្រមាញ់ និងនេសាទខេត្តឧត្តរមានជ័យ គឺលោក សូត្រ សុខឃាង។ លោកមានប្រសាសន៍ថា រយៈពេលកន្លះខែមកនេះ រូបលោកបានទទួលលិខិតពីក្រសួងកសិកម្ម ដែលជំរុញឲ្យសហការជាមួយអាជ្ញាធរខេត្តឧត្តរមានជ័យ យកដីសម្បទានសេដ្ឋកិច្ចពីក្រុមហ៊ុនស្ករអំពៅចំនួន៣ មកធ្វើជាដីសម្បទានសង្គមកិច្ចចែកជូនប្រជាពលរដ្ឋដែលធ្លាប់ទទួលរងការប៉ះពាល់ដោយសារក្រុមហ៊ុនទាំងនោះវិញ។
មន្ត្រីដដែលបញ្ជាក់ថា កាលពីថ្ងៃទី១៥ ខែមិថុនា ក្រសួងកសិកម្ម រុក្ខាប្រមាញ់ និងនេសាទ សម្រេចឲ្យមន្ទីរកសិកម្មខេត្តឧត្តរមានជ័យ ចុះធ្វើការសម្របសម្រួលផ្ទាល់ជាមួយតំណាងពលរដ្ឋដែលប៉ះពាល់ដីធ្លីទាំងនោះ ហើយឲ្យដាក់ពាក្យស្នើសុំដីធ្លីតាមរយៈគណៈកម្មការសម្បទានដីសង្គមកិច្ចខេត្តឧត្តរមានជ័យ៖ « យើងបានជួបជាមួយតំណាងប្រជាពលរដ្ឋម្ដងហើយនៅសាលាខេត្តឧត្តរមានជ័យ ហើយក៏សុំឲ្យគាត់ធ្វើបញ្ជីអំពីចំនួនអ្នកប៉ះពាល់ដីធ្លីឲ្យពិតប្រាកដ។ ឥឡូវកំពុងរង់ចាំបញ្ជីរបស់ប្រជាពលរដ្ឋ ដើម្បីដាក់ទៅអភិបាលខេត្ត សុំគោលការណ៍បែងចែកដី »។
កាលពីថ្ងៃទី១៩ ខែឧសភា ក្រសួងកសិកម្ម រុក្ខាប្រមាញ់ និងនេសាទ បានចេញលិខិតជំរុញឲ្យមន្ទីរកសិកម្ម និងអាជ្ញាធរខេត្តឧត្តរមានជ័យ យកដីសម្បទានសេដ្ឋកិច្ចពីក្រុមហ៊ុនស្ករអំពៅចំនួន៣ គឺក្រុមហ៊ុន អង្គរ ស៊ូហ្គើរ (Angkor Sugar) ទន្លេ ស៊ូហ្គើរ (Tunle Sugar) និង ខេន អែន ស៊ូហ្គើរ (Can and Sugar) ទៅចែកជូនប្រជាពលរដ្ឋវិញ។ ការចេញលិខិតនេះ បន្ទាប់ពីក្រុមហ៊ុនទាំង៣ បានប្រកាសក្ស័យធន ហើយប្រជាពលរដ្ឋដែលរងការប៉ះពាល់ដោយសារក្រុមហ៊ុននេះ តែងដាក់ពាក្យស្នើសុំដីធ្វើកសិកម្មជាញឹកញាប់។
អភិបាលខេត្តឧត្តរមានជ័យ លោក ស ថាវី មានប្រសាសន៍ថា អាជ្ញាធរខេត្តកំពុងអនុវត្តតាមលិខិតរបស់ក្រសួងកសិកម្ម ដែលជំរុញឲ្យយកដីផ្នែកខ្លះពីក្រុមហ៊ុនទៅធ្វើជាដីសម្បទានសង្គមកិច្ចចែកជូនប្រជាពលរដ្ឋ។ លោកបញ្ជាក់ថា អាជ្ញាធរខេត្តបានបង្កើតគណៈកម្មការស្រាវជ្រាវរកប្រជាពលរដ្ឋទាំងឡាយណាដែលរស់នៅលើដីទាំងនោះមុនពេលដែលក្រុមហ៊ុនកាន់កាប់ ថាតើអ្នកប៉ះពាល់ទាំងនោះមានប៉ុន្មានគ្រួសារមិនទាន់ដោះស្រាយ និងប៉ុន្មានគ្រួសារបានដោះស្រាយរួចហើយ ជាដើម៖ « យើងបានបង្កើតក្រុមការងារគ្រប់គ្រងដីរដ្ឋថ្នាក់ខេត្តហើយ។ ពិនិត្យទី១ ឲ្យគ្រប់គ្រងទិន្នន័យប្រជាពលរដ្ឋដែលតវ៉ា។ ហើយទី២ យើងផ្ទៀងផ្ទាត់ចំនួនអ្នកប៉ះពាល់នេះជាមួយនឹងអាជ្ញាធរភូមិ ឃុំ ដើម្បីរៀបចំចែកដីសម្បទានសង្គមកិច្ច »។
អភិបាលខេត្តឧត្តរមានជ័យ ឲ្យដឹងថា ដីសម្បទានសេដ្ឋកិច្ចរបស់ក្រុមហ៊ុនស្ករអំពៅទាំង៣ នោះ គឺទំហំជាង ១.៨០០០ហិកតារ ហើយកាលពីជាង ៨ឆ្នាំមុនបានធ្វើឲ្យប៉ះពាល់លំនៅឋាន និងដីស្រែចម្ការរបស់ប្រជាពលរដ្ឋនៅក្រុងសំរោង និងនៅស្រុកចុងកាល់ ចំនួនប្រមាណ ១.២០០គ្រួសារ។
អ្នកសម្របសម្រួលសមាគមការពារសិទ្ធិមនុស្សអាដហុក (ADHOC) ខេត្តឧត្តរមានជ័យ លោក ស្រី ណារ៉េន ចង់ឃើញអាជ្ញាធរដោះស្រាយ និងចែកដីធ្លីជូនប្រជាពលរដ្ឋវិញឲ្យបានឆាប់រហ័ស។ លោកគាំទ្រចំពោះអាជ្ញាធរដែលកំពុងរៀបចំគោលនយោបាយបែងចែកដីធ្លីជូនប្រជាពលរដ្ឋវិញតាមរយៈដីសម្បទានសង្គមកិច្ចនេះ៖ « ជាការល្អមួយដែលរដ្ឋាភិបាលបានប្រគល់ដីសម្បទានសង្គមកិច្ចមកឲ្យប្រជាពលរដ្ឋវិញនេះ ដើម្បីឲ្យពលរដ្ឋមានដីប្រើប្រាស់ដោយសុវត្ថិភាព »។
ទោះជាយ៉ាងណា តំណាងប្រជាពលរដ្ឋដែលប៉ះពាល់ដីធ្លីខ្លះ មិនចង់ទទួលយកដីពីអាជ្ញាធររបស់រដ្ឋមកវិញតាមរយៈដីសម្បទានសង្គមកិច្ចទេ។
តំណាងប្រជាពលរដ្ឋនៅភូមិអូរបាត់មាន់ សង្កាត់កូនក្រៀល ក្រុងសំរោង លោកស្រី ហួយ ម៉ៃ មានប្រសាសន៍ថា អាជ្ញាធរបានជូនដំណឹងមករូបគាត់ ព្រមទាំងឲ្យដើរចែកសេចក្តីជូនដំណឹងចំពោះរឿងចែកដីធ្លីនេះទៅដល់អ្នកភូមិជាច្រើនទៀត។ ទោះយ៉ាងណា លោកស្រី ហួយ ម៉ៃ បញ្ជាក់ថា អ្នកភូមិរបស់គាត់ចំនួន ២១៤គ្រួសារដែលបាត់បង់ដីលំនៅឋាន និងដីស្រែចម្ការជាង ១.០០០ហិកតារដោយសារក្រុមហ៊ុនស្ករអំពៅរំលោភយកនោះ គឺមិនចង់បានដីដែលអាជ្ញាធរចែកជាសម្បទានសង្គមកិច្ចទេ ពីព្រោះគាត់យល់ថា ការចែកតាមរយៈដីសម្បទានសង្គមកិច្ច គឺមានន័យថាពួកគាត់ជាអ្នកដែលពុំធ្លាប់មានដីធ្លី។ ពួកគាត់មិនមែនគ្មានដីធ្លីទេ គឺមានលំនៅឋាន និងដីស្រែចម្ការត្រឹមត្រូវ ប៉ុន្តែត្រូវក្រុមហ៊ុនរំលោភយកកាលពី ៨ឆ្នាំមុន ហើយពួកគាត់ចង់ឲ្យអាជ្ញាធរប្រគល់ដីដែលបាត់បង់នោះមកពួកគាត់វិញ៖ « ខ្ញុំចង់ឲ្យអាជ្ញាធរដោះស្រាយ ធ្វើម៉េចឲ្យបានសមស្របនឹងប្រជាពលរដ្ឋ។ ខ្ញុំចង់ឲ្យអ្នកដែលបាត់បង់ដី ហើយអាជ្ញាធរដោះស្រាយពីមុនមិនគ្រប់ចំនួន គឺឲ្យបន្ថែមជូនដូចអ្នកដែលទទួលបានថ្មីៗដែរ »។
អ្នកភូមិអូរបាត់មាន់ ចង់ជំរុញឲ្យមន្ទីរកសិកម្ម និងអាជ្ញាធរខេត្តឧត្តរមានជ័យ ពន្លឿនការប្រគល់ដីមកឲ្យពួកគេឲ្យបានទាន់រដូវវស្សាឆ្នាំនេះ ដើម្បីឲ្យពួកគេអាចធ្វើស្រែចម្ការចិញ្ចឹមជីវិតបានប្រសើរឡើងវិញ ពីព្រោះតែពួកគេគ្មានដីធ្វើស្រែចម្ការរយៈពេល ៨ឆ្នាំហើយ ដោយអ្នកខ្លះបានចេញទៅធ្វើពលករនៅប្រទេសថៃ និងខ្លះទៀតដើរស៊ីឈ្នួលគេនៅតាមបណ្ដាខេត្តឆ្ងាយៗទាំងលំបាក៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។