នៅរសៀលថ្ងៃទី១៣ ខែវិច្ឆិកា ក្រុមកម្លាំងអាជ្ញាធរខណ្ឌពោធិ៍សែនជ័យ ជាច្រើននាក់ បានចុះទៅលុបអក្សរជាភាសាអង់គ្លេសថា អេស.អូ.អេស (SOS) ដែលអ្នកសហគមន៍ថ្មគោលបានសរសេរនៅលើដំបូលផ្ទះប្រជាពលរដ្ឋនៅសហគមន៍ ដែលមានទីតាំងស្ថិតនៅជាប់របងអាកាសយានដ្ឋានអន្តរជាតិភ្នំពេញ។
អ្នកភូមិបានហៅសកម្មភាពអាជ្ញាធរ ថាជាការព្យាយាមបិទបាំងបញ្ហារបស់ពលរដ្ឋ មិនអោយដំណឹងបានឮទៅដល់លោកនាយករដ្ឋមន្ត្រី ហ៊ុន សែន។
នៅប៉ុន្មានម៉ោងមុនពេលដំណើរត្រឡប់មកវិញរបស់លោកនាយករដ្ឋមន្ត្រី ហ៊ុន សែន អាជ្ញាធរខណ្ឌពោធិ៍សែនជ័យ រួមទាំងកងកម្លាំងចម្រុះ បានយកឆ្នាំពណ៌ខៀវទៅបាញ់ពីលើអក្សរ អេស.អូ.អេស ដែលសរសេរដោយអ្នកភូមិ ធ្វើអោយប្រឡាក់ប្រតាកមើលមិនយល់។
ការលប់ពាក្យ អេស.អូ.អេស នេះ គឺបន្ទាប់ពីអ្នកភូមិនៅក្នុងសហគមន៍ថ្មគោល បានសរសេរពាក្យនោះនៅលើដំបូលផ្ទះ ក្នុងបំណងផ្ដល់ដំណឹងទៅអោយលោកនាយករដ្ឋមន្ត្រី ហ៊ុន សែន ដែលធ្វើដំណើរតាមយន្តហោះត្រឡប់មកពីប្រទេសមីយ៉ាន់ម៉ា (Myanmar) បន្ទាប់ពីលោកបានទៅចូលរួមកិច្ចប្រជុំកំពូលអាស៊ាន។
តំណាងសហគមន៍ព្រលានយន្តហោះអន្តរជាតិភ្នំពេញម្នាក់ អ្នកស្រី ច្រាយ នីម មានប្រសាសន៍ថា អាជ្ញាធរខណ្ឌពោធិ៍សែនជ័យ ហាក់មានបំណងលាក់បាំងព័ត៌មានពីតម្រូវការរបស់ពលរដ្ឋ មិនអោយលោកនាយករដ្ឋមន្ត្រីបានដឹង។ លើសពីនេះ អ្នកស្រីចាត់ទុកថា អាជ្ញាធរនៅតែប្រកាន់អាកប្បកិរិយាគេចវេសក្នុងការរកដំណោះស្រាយជូនពលរដ្ឋ៖ «ខ្ញុំសរសេរ អេស.អូ.អេស នេះ គាត់ជិះយន្តហោះម៉ោមើលឃើញនូវសាររបស់ខ្ញុំ។ សាររបស់ខ្ញុំ គឺមានន័យថា សាក់សេស អូហ្វ សូរីដារីធី (Success of Solidarity) មានន័យថា រួមគ្នាដើម្បីជួយគ្នា ហើយដើម្បីរួមគ្នាជោគជ័យ។ បើគាត់ឃើញសារហ្នឹង គាត់នឹងជួយដោះស្រាយបញ្ហាជូនពួកខ្ញុំ។ សហគមន៍ខ្ញុំ គឺទាមទារចង់បាន ទី១ ដីដែលកាត់ ៥ម៉ែត្រ គឺយើងគិត១ម៉ែត្រការ៉េ ២.៥០០ (ដុល្លារ) ដីដែលនៅសល់សុំប្លង់កម្មសិទ្ធិ ហើយអ្នកដែលប៉ះពាល់ធ្ងន់ធ្ងរបំផុតហ្នឹង គាត់លក់ជូនក្រុមហ៊ុន និងរាជរដ្ឋាភិបាល ១ម៉ែត្រការ៉េ ២.០០០ដុល្លារ។ ហើយចំណុចទី៣ គឺសុំអភិវឌ្ឍនៅនឹងកន្លែង»។
អភិបាលខណ្ឌពោធិ៍សែនជ័យ លោក ហែម ដារិទ្ធ មានប្រសាសន៍ថា ជុំវិញព្រលានយន្តហោះជាទីតាំងសុវត្ថិភាព ដែលមិនគួរពលរដ្ឋទៅសរសេរពាក្យ អេស.អូ.អេស បែបនេះឡើយ។ លោកបន្តថា ពលរដ្ឋគួរតែទៅរកអាជ្ញាធរមូលដ្ឋាន ប្រសិនបើពួកគាត់មានសំណើបែបណាមួយ។ ចំពោះបញ្ហាទាមទាររកដំណោះស្រាយបញ្ហាដីធ្លីរបស់ពលរដ្ឋ អាជ្ញាធរ និងភាគីពាក់ព័ន្ធ កំពុងបន្តស្វែងរកដំណោះស្រាយ៖ «តំបន់ជុំវិញព្រលាន គឺយើងការពារគ្រប់បែបយ៉ាង ព្រោះថា ថ្នាក់ដឹកនាំយើង ភ្ញៀវជាតិអន្តរជាតិយើងចេញចូលគ្រប់បែបយ៉ាង។ បើបងប្អូនប្រជាពលរដ្ឋមិនពេញចិត្ត ចង់បានសំណូមពររឿងអី អោយគាត់សរសេរលិខិតមកសាលាខណ្ឌ ឬទៅសាលាក្រុង ឬក៏ទៅក្រសួងទៅ មានថ្នាក់ដឹកនាំកំពុងតែជួយដោះ។ ការងារជុំវិញព្រលាននេះ សំណង់អនាធិបតេយ្យជុំវិញហ្នឹង យើងបានធ្វើស្ថិតិទៅទីស្ដីការគណៈរដ្ឋមន្ត្រីហើយ ព្រោះយើងបានមានគម្រោងដោះស្រាយយ៉ាងម៉េចហ្នឹង គឺសុំគោលការណ៍ថ្នាក់លើ បានន័យថា យើងកំពុងតែដោះ ព្រោះថាជិតបានគោលការណ៍ថាត្រូវសងយ៉ាងម៉េចៗចឹងណាស់»។
យ៉ាងនេះក្តី តំណាងសហគមន៍ព្រលានយន្តហោះអន្តរជាតិភ្នំពេញបញ្ជាក់ថា ពួកគេធ្លាប់ដាក់ពាក្យទៅតាមស្ថាប័នពាក់ព័ន្ធអោយដោះស្រាយ ប៉ុន្តែនៅពុំមានលទ្ធផល ទើបពួកគេរិះរកមធ្យោបាយយ៉ាងណាអោយដំណឹងនេះបានទៅដល់លោកនាយករដ្ឋមន្ត្រី ហ៊ុន សែន ដែលពួកគាត់សង្ឃឹមថាអាចផ្តល់ដំណោះស្រាយបាន។
ក្រៅពីសរសេរអក្សរ អេស.អូ.អេស អ្នកភូមិបានបិទរូបលោកនាយករដ្ឋមន្ត្រី ហ៊ុន សែន និងភរិយា នៅលើដំបូលផ្ទះនោះដែរ។
កាលពីឆ្នាំ២០១២ នៅពេលដែល លោក បារ៉ាក់ អូបាម៉ា (Barack Obama) ប្រធានាធិបតីសហរដ្ឋអាមេរិក មកកម្ពុជា ចូលរួមកិច្ចប្រជុំកំពូលអាស៊ាន អ្នកភូមិបានសរសេរអក្សរ អេស.អូ.អេស នេះម្តងរួចមកហើយ ព្រោះចង់ឲ្យប្រទេសមហាអំណាចក្រឡេកមើលការរំលោភសិទ្ធិមនុស្ស សិទ្ធិដីធ្លី ដែលរដ្ឋាភិបាលកម្ពុជា បណ្ដេញពលរដ្ឋពីលំនៅឋានគ្មានសំណង និងស្នើឲ្យផ្ដល់ជំនួយសង្គ្រោះពួកគេជាបន្ទាន់។ បន្ទាប់ពីសរសេរអក្សរ អេស.អូ.អេស កាលនោះ អ្នកទាំងនោះក៏ត្រូវបានអាជ្ញាធរឃាត់ខ្លួន និងឲ្យលុបសញ្ញានោះចេញវិញ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។