អាជ្ញាធរឃុំស្រែគរ ស្រុកសេសាន ខេត្តស្ទឹងត្រែង ចោទប្រកាន់ក្រុមហ៊ុនសម្បទានសេដ្ឋកិច្ចវៀតណាម មួយថា បានប្រើប្រាស់ឧបករណ៍ឆក់សម្លាប់គោក្របីអ្នកភូមិដែលចូលទៅក្នុងបរិវេណដីក្រុមហ៊ុន។ ចំណែកតំណាងក្រុមហ៊ុនវិញ បដិសេធថា អ្នកដែលប្រើប្រាស់ឧបករណ៍ឆក់នោះ មិនមែនជាបុគ្គលិកកម្មករក្រុមហ៊ុនទេ។
ក្របីអ្នកភូមិពីរក្បាលត្រូវបានគេប្រើឧបករណ៍ឆក់សម្លាប់ ខណៈក្របីទាំងនោះចូលទៅក្នុងបរិវេណដីក្រុមហ៊ុនសម្បទានសេដ្ឋកិច្ចវៀតណាម ឈ្មោះ យិ តឹង អតីតក្រុមហ៊ុន ភូមា ឌី មានទីតាំងជាប់នឹងភូមិស្រែគរ។
ការចោទប្រកាន់នេះ ធ្វើឡើងបន្ទាប់ពីប្រជាពលរដ្ឋម្ចាស់ក្របីបានប្រទះឃើញក្របីមួយក្បាលកាលពីថ្ងៃច័ន្ទ ដេកប្រកាច់នៅក្បែរចំការសណ្ដែកក្នុងដីក្រុមហ៊ុនដែលមានរាយខ្សែលួសតូច កម្ពស់ ៥០សង់ទីម៉ែត្រពីដី ព័ទ្ធជុំវិញចំការប្រមាណមួយពាន់ម៉ែត្រភ្ជាប់ជាមួយចរន្តអគ្គិសនីប្រើដោយអាគុយសម្រាប់ឆក់សត្វគោក្របីដើរឆ្លងចូលទៅចំការសណ្ដែក។
មេឃុំស្រែគរ លោក សៀក មេគង្គ ចាត់ទុកថា សកម្មភាពរាយខ្សែលួសភ្ជាប់ជាមួយចរន្តអគ្គិសនីគឺជាចេតនាប៉ុនប៉ងសម្លាប់សត្វពាហនៈអ្នកភូមិ និងអាចបង្កឲ្យមានគ្រោះថ្នាក់ដល់អាយុជីវិតប្រជាពលរដ្ឋដែលឆ្លងកាត់តំបន់នោះដោយមិនដឹងខ្លួន។
លោកថា ក្របីអ្នកភូមិបាត់ជាបន្តបន្ទាប់ ហេតុនេះលោកទាមទារឲ្យម្ចាស់ក្រុមហ៊ុនទទួលខុសត្រូវលើករណីនេះ៖ «មុននឹងដាក់អន្ទាក់យើងគួរប្រកាសមកអាជ្ញាធរភូមិ ឃុំ មានតើ! ហើយឥឡូវកាប់ក្របីហ្នឹងថាមិនរស់ទេ ក្របីមួយទៀតប្រជាពលរដ្ឋរាយការណ៍ (ថា) កាប់ក្នុងក្រុមហ៊ុនតែម្ដង។ អស់ក្របី២ មួយត្រូវអន្ទាក់ឲ្យម្ចាស់វាទៅយកសែងដាក់គោយន្តមក ក្របីហ្នឹងមិនរស់ទេ»។
ឆ្លើយតបការចោទប្រកាន់នេះ តំណាងក្រុមហ៊ុន លោក ខាំ វ៉ាន់ បដិសេធមិនទទួលខុសត្រូវលើបញ្ហានេះទេ ដោយលើកហេតុផលថា អ្នកដាក់ខ្សែលួសភ្ជាប់ចរន្តអគ្គិសនីគឺជាប្រជាពលរដ្ឋចូលមកដាំសណ្ដែកលើដីក្រុមហ៊ុនគ្មានការអនុញ្ញាត។
លោកបន្តថា ឆ្នាំនេះក្រុមហ៊ុនផ្អាកការដាំដុះ ពីព្រោះដីសម្បទានមួយផ្នែកនៅតំបន់នោះឋិតក្នុងតំបន់អាងស្តុកទឹកនៃគម្រោងសាងសង់ទំនប់វារីអគ្គិសនីសេសានក្រោមពីរ ដែលអាចត្រូវទឹកលិច។ ករណីនេះ ដីនៅទំនេរទើបប្រជាពលរដ្ឋចូលមកដាំដុះដោយក្រុមហ៊ុនមិនបានដឹង៖ «គេមកក៏គេមិនសុំខ្ញុំដែរ ខ្ញុំអត់ដឹងទេ។ ខ្សែភ្លើងអ្នកណាធ្វើចាប់អ្នកហ្នឹងដាក់គុកទៅ ក្រុមហ៊ុនម៉េចដឹង ព្រោះក្រុមហ៊ុនមិនមែនហៅមកធ្វើ គាត់មកធ្វើខ្លួនគាត់ ដាក់ខ្លួនគាត់ អានេះគាត់ទទួលខុសត្រូវចំពោះខ្លួនគាត់ទៅ»។
ទាក់ទិនករណីនេះដែរ នាយនគរបាលប៉ុស្តិ៍ឃុំស្រែគរ លោក ហ៊ត សត ឲ្យដឹងដែរថា សមត្ថកិច្ចប៉ូលិសបានរកឃើញខ្សែលួសដាក់រាយតាមដីចំការសណ្ដែកនោះ ប៉ុន្តែឧបករណ៍ភ្ជាប់ចរន្តអគ្គិសនីត្រូវគេដោះចេញបាត់។ លោកអះអាងថា ប៉ូលិសកំពុងស្រាវជ្រាវរកជនពាក់ព័ន្ធប្រើឧបករណ៍ខុសច្បាប់នេះ ប៉ុន្តែមិនទាន់បានលទ្ធផលយ៉ាងណានៅឡើយ។
លោក ហ៊ត សត៖ «ខ្ញុំកំពុងឲ្យកូនចៅខ្ញុំចុះស្រាវជ្រាវស៊ើបរកអ្នកដែលដាក់ហ្នឹងណា ក៏ប៉ុន្តែភស្តុតាងបានសារខ្សែបានមួយចំនួនហើយ ប៉ុន្តែអត់ស្គាល់ម្ចាស់។ ក្នុងដីក្រុមហ៊ុន បានតែខ្សែភ្លើងទេ ក្បាលនិងអាគុយអត់បានទេ វាដឹងខ្លួន វាលួចដោះយកទៅបាត់»។
យ៉ាងនេះក្តី មន្ត្រីឃ្លាំមើលសិទ្ធិមនុស្សសមាគមអាដហុក ខេត្តស្ទឹងត្រែង លោក ហូ សំអុស ថ្លែងថា ទីតាំងប្រព្រឹត្តបទល្មើសគឺនៅលើដីក្រុមហ៊ុន ហេតុនេះម្ចាស់ក្រុមហ៊ុនមានចំណែកទទួលខុសត្រូវបញ្ហានេះ៖ «បើសិនធ្វើជារបងអាចធ្វើបានសម្រាប់ការពារផលដំណាំក្នុងដីរបស់អ្នកឯងអ៊ីចឹងណា ប៉ុន្តែបើសិនដាក់ជាខ្សែភ្លើងឆក់គឺវាខុស។ ឥឡូវវាប៉ះពាល់សត្វ ចុះបើវាប៉ះពាល់មនុស្សតើត្រូវទទួលខុសត្រូវយ៉ាងណាដែរ?»។
អ្នកភូមិស្រែគរអះអាងដែរថា ចាប់ពីក្រុមហ៊ុនបោះទីតាំងឈូសឆាយព្រៃដាំកៅស៊ូនៅតំបន់នេះពីឆ្នាំ២០១២ មក គោក្របីអ្នកភូមិប្រមាណ ៣០ក្បាល បានបាត់មិនដឹងមូលហេតុ។ អ្នកភូមសង្ស័យថា គោក្របីពួកគាត់ចូលទៅស៊ីស្មៅក្នុងដីសម្បទាន ហើយកម្មករក្រុមហ៊ុនដាក់អន្ទាក់ ឬឆក់សម្លាប់យកសាច់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។