ប្រជាពលរដ្ឋប្រមាណ ៥០គ្រួសារ នៅភូមិត្រពាំងក្រឡាញ់ ឃុំអូរសារាយ ស្រុកត្រាំកក់ ខេត្តតាកែវ នៅថ្ងៃទី១១ មករា អំពាវនាវឲ្យថ្នាក់ដឹកនាំរដ្ឋាភិបាលជួយអន្តរាគមន៍រឿងទំនាស់ដីស្រែចម្ការរបស់ពួកគាត់ទំហំប្រមាណ ៥០ហិកតារ ជាមួយមន្ត្រីយោធាម្នាក់ ដែលមកដណ្ដើមយក ហើយ អះអាងថា គាត់មានប័ណ្ណកម្មសិទ្ធិកាន់កាប់ដីទាំងនោះទៀត។
ប្រជាពលរដ្ឋ ១០នាក់ តំណាងឲ្យប្រជាពលរដ្ឋទាំង ៥០គ្រួសារ នឹងត្រូវឡើងទៅតុលាការនៅថ្ងៃទី១៥ មករា សប្ដាហ៍ក្រោយនេះ ដោយសារទំនាស់ដីតាមបណ្ដឹងរបស់ភាគីនៃមន្ត្រីយោធាខេត្តកំពង់ស្ពឺ ម្នាក់ ដែលប្រជាពលរដ្ឋឲ្យដឹងថា ឈ្មោះ ស្វាយ សារ៉ាត់។
ទាំងអាជ្ញាធរមូលដ្ឋាននិងប្រជាពលរដ្ឋឲ្យដឹងថា ដីកាកោះហៅនោះចេញដោយលោក ម៉ែន រត្ថា ចៅក្រមសាលាដំបូងខេត្តតាកែវ កាលពីថ្ងៃទី២៥ ធ្នូ ឆ្នាំ២០១៤។
តំណាងប្រជាពលរដ្ឋម្នាក់ក្នុងចំណោមតំណាងប្រជាពលរដ្ឋ ១០នាក់ បញ្ជាក់នៅថ្ងៃទី១១ មករា ថា ប្រជាពលរដ្ឋទាំង ៥០គ្រួសារនោះបានរានព្រៃធ្វើស្រែខ្លះធ្វើចម្ការតាំងពីតំបន់នោះនៅមានសង្គ្រាមជាមួយខ្មែរក្រហមក្នុងទសវត្សរ៍៨០ មក។
លោកបានរំលឹកថា ស្រាប់តែនៅឆ្នាំ២០១៤ បែរជាលេចមុខមន្ត្រីយោធាម្នាក់មកពីខេត្តកំពង់ស្ពឺ អះអាងថា ខ្លួនបានទិញដីនេះពីមនុស្ស ១០នាក់ផ្សេងទៀត តែអ្នកភូមិមិនដែលស្គាល់មុខ ធ្វើឲ្យប្រជាពលរដ្ឋ ៥០គ្រួសារដែលជាម្ចាស់ដីពិតប្រាកដមានកំហឹងយ៉ាងខ្លាំង៖ «ដីហ្នឹងខ្ញុំចាប់ផ្ដើមធ្វើតាំងពីឆ្នាំ១៩៨២-៨៣ មក អត់មានឃើញឈ្មោះទាំង ១០នាក់ហ្នឹងទៅឃាត់ឃាំងអីផង បាននាំគ្នាចេះតែខំធ្វើរហូត ស្រាប់ដល់ឆ្នាំ២០១៤ ស្រាប់តែមានឮសូរឈ្មោះលោក ស្វាយ សារ៉ាត់ ថាដីនេះជាដីរបស់គាត់ ហើយពូកខ្ញុំនេះខំកាប់ឆ្ការតាំងពីយូរមកហើយ គាត់មកថាដីរបស់គាត់អ៊ីចឹង ប្រជាពលរដ្ឋខឹងដែរ»។
វិទ្យុអាស៊ីសេរី មិនអាចទាក់ទងលោក ស្វាយ សារ៉ាត់ បាននៅថ្ងៃអាទិត្យ ទី១១ មករា ដើម្បីឆ្លើយតបនឹងការចោទប្រកាន់ខាងលើបានទេ។ ក៏ប៉ុន្តែជំទប់ឃុំអូរសារាយ លោក ឡាយ ណម អះអាងថា ការទិញដីរបស់មន្ត្រីយោធាម្នាក់ពីមនុស្ស ១០នាក់ផ្សេង ដែលថាជាម្ចាស់ដីទំហំ ៥០ហិកតារនេះ ហាក់មានអាថ៌កំបាំង ព្រោះថា អាជ្ញាធរមូលដ្ឋានមិនដែលឃើញ និងស្គាល់ឈ្មោះអ្នកទាំង ១០នាក់នេះទេ។
ក្រៅពីនេះ លោកថា ប្រជាពលរដ្ឋដែលកំពុងមានទំនាស់សព្វថ្ងៃជាមួយមន្ត្រីយោធាម្នាក់នោះក៏មិនមានឯកសារកាន់កាប់ដីតម្កល់ទុកនៅសាលាឃុំទៀត ព្រោះថា កន្លងមកពួកទាហានខ្មែរក្រហម បានចូលវាយនិងដុតសាលាឃុំឆេះដោយទាំងឯកសារទាំងនោះអស់។
លោកជំទប់បន្តថា ស្របពេលដែលមានការគាបសង្កត់ខាងផ្នែកតុលាការ ប្រជាពលរដ្ឋក៏ទទួលរងការគំរាមកំហែង ដោយប្រើអាវុធបាញ់បង្ក្រាប បើសិនជាប្រជាពលរដ្ឋហ៊ានក្រោកឡើងតវ៉ាប្រឆាំងការរឹបអូសយកដីនោះ៖ «ឥឡូវហ្នឹង វាមានច្រើនគ្នា វាចេះតែរឹបខ្លាំងឡើងៗ ប្រជាពលរដ្ឋយើងខ្លាចគេ ហើយឥឡូវខ្លាចគេ។ វាគំរាមថា វាមកលើកក្រោយថ្ងៃទី១៥ ខែ២ ហ្នឹងវានឹងយកត្រាក់ទ័រមកឈូសឆាយ ហើយយកអាវុធយុទ្ធភណ្ឌមកតាមទៀត អ៊ីចឹងរឿងនេះខ្ញុំដឹងឮពីប្រជាពលរដ្ឋដែលគាត់មកដល់ផ្ទះខ្ញុំគាត់ប្រាប់ខ្ញុំអ៊ីចឹង»។
លោកបន្ថែមថា នេះជាលើកទី៣ហើយដែលតំណាងប្រជាពលរដ្ឋទាំង ១០នាក់ ត្រូវបានកោះហៅឡើងតុលាការ។ កាលឡើងតុលាការកាលពីពីរលើកមុន តុលាការបានកាត់ក្ដីឲ្យប្រជាពលរដ្ឋចាញ់ តែប្រជាពលរដ្ឋប្រឆាំងជំទាស់មិនទទួលយកការកាត់ក្ដីនោះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។