សហគមន៍ទន្លេម្រេច ក្នុងស្រុករវៀង ខេត្តព្រះវិហារ ចោទប្រកាន់ថា មន្ត្រីបរិស្ថានប្រចាំការនៅតំបន់ជិតនោះ បានប្រើប្រាស់អាវុធបាញ់គំរាមប្រជាពលរដ្ឋ និងរំលោភសិទ្ធិមនុស្សយ៉ាងធ្ងន់ធ្ងរ។ ការចោទប្រកាន់នេះ បន្ទាប់ពីកម្លាំងសមត្ថកិច្ចចម្រុះ មានប៉ូលិស និងកងរាជអាវុធហត្ថជាច្រើន បានបញ្ជូនទៅរារាំងអ្នកភូមិ មិនឱ្យសង់លំនៅឋានលើដីថ្មីចំនួន ៩ខ្នង ព្រមទាំងចាប់ខ្លួនបុរសម្នាក់យកទៅកាន់ទីរួមខេត្តផង។
ក្រុមអ្នកភូមិអូរពោធិ៍ ឃុំរមណី ស្រុករវៀង ជាង ១៣០នាក់ បានលើកគ្នាទៅតវ៉ានៅមុខមន្ទីរបរិស្ថាន ខេត្តព្រះវិហារ ពេញ១ថ្ងៃសុក្រ ទី៤ ខែកក្កដា។
ក្រុមអ្នកភូមិដែលជាសមាជិកសហគមន៍ព្រៃឈើឈ្មោះទន្លេម្រេចទាំងនោះ កំពុងទាមទារឱ្យមន្ទីរបរិស្ថាន ដោះលែងបុរសម្នាក់ដែលមន្ត្រីបានចាប់ខ្លួន នៅពេលដែលចុះទៅរារាំងមិនឱ្យសង់លំនៅឋានថ្មី នៅលើដីមួយកន្លែង ទល់មុខគ្នានឹងដីសម្បទានសេដ្ឋកិច្ចក្រុមហ៊ុនរបស់លោកឧកញ៉ា ទ្រី ភាព។
តំណាងសហគមន៍ការពារព្រៃឈើទន្លេម្រេចម្នាក់ ក្នុងចំណោមតំណាងមួយចំនួនទៀត គឺលោក ហួន គាណូ។ លោកមានប្រសាសន៍ថា ការចាប់ខ្លួនបុរសអ្នកភូមិឈ្មោះ ឃិន ថា អាយុ ៤១ឆ្នាំ គឺជារឿងអយុត្តិធម៌ ដែលប្រជាពលរដ្ឋមិនអាចទទួលយកបានទេ។ លោក ហួន គាណូ បញ្ជាក់ថា ក្រុមហ៊ុនដីសម្បទានរបស់លោកឧកញ៉ា ទ្រី ភាព ចេះតែរំកិលចូលទៅក្នុងដែនដីសហគមន៍បន្តិចម្ដងៗ ហើយនៅពេលសហគមន៍ព្រៃឈើដាក់ពាក្យប្ដឹងទៅ អាជ្ញាធរ និងតុលាការ គឺមិនដែលឃើញមានការដោះស្រាយទេ ក៏ប៉ុន្តែនៅពេលដែលប្រជាសហគមន៍ព្រួយបារម្ភខ្លាចបាត់បង់ដី ក៏ទៅសង់ផ្ទះការពារ បែរជាមន្ត្រីដឹកនាំសមត្ថកិច្ចចុះអនុវត្តការបណ្ដេញចេញ និងចាប់ខ្លួនអ្នកភូមិទៅវិញ។
តំណាងសហគមន៍ព្រៃឈើដដែលបញ្ជាក់ថា រូបគាត់ និងប្រជាពលរដ្ឋចំនួន ១៥៨គ្រួសារ ទាមទារឱ្យមន្ទីរបរិស្ថានខេត្តព្រះវិហារ ត្រូវតែដោះលែងបុរសឈ្មោះ ឃិន ថា ឱ្យមានសេរីភាពវិញ៖ «ទាមទារទី១ ដោះលែងប្រជាពលរដ្ឋនៅក្នុងសហគមន៍ហ្នឹងវិញ។ ទី២ ឱ្យក្រុមហ៊ុន ទ្រី ភាព ឈប់រំលោភដីសហគមន៍ និងបោះបង្គោលឱ្យច្បាស់លាស់។ ទី៣ ឱ្យមន្ត្រីបរិស្ថានឈប់រំលោភការបាញ់បោះលើប្រជាពលរដ្ឋ ធ្វើឱ្យភិតភ័យ និងឈប់បណ្ដេញប្រជាពលរដ្ឋដែលរស់នៅលើដីសហគមន៍»។
ជាច្រើនខែមកហើយ សហគមន៍ការពារព្រៃឈើទន្លេម្រេច នៅភូមិអូរពោធិ៍ ស្រុករវៀង កើតមានជម្លោះដីធ្លីជាមួយក្រុមហ៊ុនដីសម្បទានសេដ្ឋកិច្ចរបស់លោកឧកញ៉ា ទ្រី ភាព។
កាលពីថ្ងៃទី២០ ខែមករា ឆ្នាំ២០១៤ តំណាងសហគមន៍ទន្លេម្រេច ធ្លាប់ដាក់ពាក្យប្ដឹងក្រុមហ៊ុន ទ្រី ភាព ទៅតុលាការ ពីបទឈូសបំផ្លាញព្រៃសហគមន៍ចំនួន ១៥ហិកតារ ក៏ប៉ុន្តែរហូតមកដល់នេះ ទាំងអាជ្ញាធរ និងតុលាការ មិនទាន់ដោះស្រាយបញ្ហានេះយ៉ាងណានៅឡើយ។
កាលពីរសៀលថ្ងៃសុក្រ ទី៤ ខែកក្កដា នៅពេលដែលប្រជាសហគមន៍កំពុងតវ៉ានៅក្នុងទីរួមខេត្តនោះ ទាំងអាជ្ញាធរខេត្តព្រះវិហារ ព្រមទាំងមន្ត្រីមន្ទីរបរិស្ថាន មិនធ្វើការអធិប្បាយយ៉ាងណាឡើយ។
នាយខុទ្ទកាល័យសាលាខេត្តព្រះវិហារ លោក ខូយ ឃុនហ៊ មិនបានទទួលទូរស័ព្ទអធិប្បាយជុំវិញរឿងនោះថាយ៉ាងណានៅឡើយ។
ចំណែកប្រធានមន្ទីរបរិស្ថានខេត្តព្រះវិហារ លោក ខូយ ឃុនចន្ទរ័ត្ន ក៏បានបដិសេធមិនពន្យល់រឿងនោះដែរ ដោយលោកមានប្រសាសន៍ហាក់បង្ហាញពីភាពមមាញឹកខ្លាំង ក្នុងការជួបដោះស្រាយជាមួយក្រុមអ្នកតវ៉ា៖ «ឈប់! ឥឡូវខ្ញុំជាប់រវល់ មិនទាន់មានពេលធ្វើការទេ។ ចាំប្រហែលជាអាច ១ម៉ោងក្រោយចាំទូរស័ព្ទមក»។
អាជ្ញាធរមូលដ្ឋានភូមិឃុំដែលប្រជាពលរដ្ឋរស់នៅ ហាក់ដូចបង្ហាញអំពីការគេចវេសយករួចខ្លួន ជុំវិញរឿងប្រជាសហគមន៍ទន្លេម្រេច មានជម្លោះដីធ្លីជាមួយក្រុមហ៊ុន ទ្រី ភាព នេះ។
មន្ត្រីក្រុមប្រឹក្សាឃុំរមណី លោក សូ សៀ បានមានប្រសាសន៍ថា លោកបានដឹងបញ្ហាចាប់ខ្លួនអ្នកភូមិនោះ ក៏ប៉ុន្តែលោកបន្ទោសថា បណ្ដាលមកពីអ្នកភូមិចេះតែនាំគ្នាចូលទៅសង់លំនៅឋានខុសច្បាប់លើដីដែលហាមឃាត់។ លោក សូ សៀ បញ្ជាក់ទៀតថា លោកមិនមានអន្តរាគមន៍ណាមួយទៅអាជ្ញាធរស្រុករវៀង និងខេត្តព្រះវិហារ ឱ្យជួយដោះលែងអ្នកភូមិនោះទេ ពីព្រោះតែអ្នកភូមិទាំងនោះធ្វើអ្វីៗមិនបានចាត់ទុកអាជ្ញាធរនៅក្នុងកែវភ្នែក និងនៅក្នុងចិត្តទេ៖ «ហ៊ឺ! ប្រជាពលរដ្ឋគេមិនដែលមកជួបខ្ញុំទេ។ គេរំលងហើយភូមិឃុំ គេអត់ស្គាល់ទេ គេឈប់ជឿហើយ។ ប្រជាពលរដ្ឋគេទៅឡើងទៅតវ៉ាអ៊ីចឹង»។
ទោះយ៉ាងណា សកម្មជនការពារសិទ្ធិមនុស្សក្រៅរដ្ឋាភិបាល កំពុងព្រួយបារម្ភចំពោះបញ្ហាជម្លោះដីធ្លីរវាងក្រុមហ៊ុនដីសម្បទានសេដ្ឋកិច្ចរបស់លោកឧកញ៉ា ទ្រី ភាព ជាមួយប្រជាពលរដ្ឋនេះ។
អ្នកសម្របសម្រួលសមាគមការពារសិទ្ធិមនុស្សអាដហុក (adhoc) ខេត្ត ព្រះវិហារ លោក ឡោ ច័ន្ទ មានប្រសាសន៍ថា ជម្លោះដីធ្លីរវាងសហគមន៍ប្រជាពលរដ្ឋជាមួយក្រុមហ៊ុននេះ កំពុងធ្វើឱ្យប្រជាពលរដ្ឋប្រឈមមុខនឹងការគាបសង្កត់ផ្លូវច្បាប់ ចំណែកឯសកម្មភាពចាប់ខ្លួនអ្នកភូមិម្នាក់ កាលពីថ្ងៃទី៣ ខែកក្កដា ដែលធ្វើឱ្យអ្នកភូមិលើកគ្នាតវ៉ានេះ ក៏មានការរំលោភសិទ្ធិមនុស្សយ៉ាងធ្ងន់ធ្ងរ៖ «អាជ្ញាធរគាត់ចុះទៅរហូតមានការផ្ទុះអាវុធទៀត។ អានេះខាងសង្គមស៊ីវិល យល់ឃើញថា ជាការរំលោភសិទ្ធិមនុស្សយ៉ាងធ្ងន់ធ្ងរ។ នេះជាកំហុសអាជ្ញាធរ ដែលពីមុនមកមិនបានដោះស្រាយ ឬក៏មិនបានបោះព្រំប្រទល់រវាងដីក្រុមហ៊ុន ជាមួយដីសហគមន៍បានច្បាស់ ហើយក្រុមហ៊ុនគាត់ចេះតែឈូសឆាយទៅៗ បណ្ដាលឱ្យប៉ះពាល់ព្រៃសហគមន៍គាត់អស់ ១៥ហិកតារហើយ។ គាត់ធ្វើផ្ទះថ្មី ដើម្បីកុំឱ្យក្រុមហ៊ុនឈូសឆាយយកដីទៀតហ្នឹង»។
កាលពីរសៀលថ្ងៃទី៤ ខែកក្កដា នៅខេត្តព្រះវិហារ ក្រៅតែពីប្រជាសហគមន៍ទន្លេម្រេច ចំនួនជាង ១៣០នាក់ លើកគ្នាទៅតវ៉ានៅមុខមន្ទីរបរិស្ថាន ឱ្យដោះលែងអ្នកភូមិម្នាក់ គឺមានប្រជាពលរដ្ឋ២ក្រុមទៀត មកពីសហគមន៍ដីធ្លីស្រុកគូលែន និងឃុំប្រមេរ ស្រុកត្បែងមានជ័យ ក៏បានលើកគ្នាទៅទីរួមខេត្ត បំណងតវ៉ាបញ្ហាទំនាស់ដីធ្លីជាមួយក្រុមហ៊ុនដែរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។